مرسى مطروح (صور وخرائط تفصيلية) - تحديث 2009

[نبيل عبدالرحمن]

مطروح محافظة رائعة وأنا زرتها عدة مرات كمصيف ، لكن فى شهر يناير الماضى توجهت وأسرتى الى مكان آخر فى مطروح وهو واحة سيوه الرائعة وتمتعنا بالمناظر الطبيعية الجميلة وعيون المياه الرائعة وذهبنا فر رحلة سفارى بسيارات 4X4 وصعدنا التلال الرملية الناعمة قرب الحدود الليبية وتمتعنا بالإقامة فى منتجع برادايس الرائع

[coolteem]

ان بحب البلد دى قوى وكل صيف لازم نروح نقعد شويه ..... شويه صور جامدين جدا ... شكرا

[خالدخليفة]

المشاركة الأصلية كتبت بواسطة bmkbmk الف شكر يا ابو نورا على الموضوع الاكثر من رائع انا كنت لسة فى مطروح الاسبوع اللى فات قبل ما ارجع الكويت بيومين هى بصراحة مشوار محترم 420 كيلو من طنطا يعنى 510 كيلو من القاهرة يعنى 310 كيلو من الاسكندرية و اللى رايح لو مسافر بالنهار يخلى باله من الرادار السرعة 100 على طريق الساحل الشمالى و الطريق حلو و فاضى و يشجع على الجرى و اول ما تدخل مطروح فيه حتة 3 كيلو السرعة فيها 60 و مراقبة بالرادار و فيه بوكس واقف فى اخرها يعمل مخالفات... يعنى اللى رايح يخلى باله من تلاكيك السرعة دى ,,, انا لولا واحد صاحبى قالى عليها قبل ما اروح كنت خدت المخالفة التماااام اما بالنسبة للبلد فا زى ما تفضل الاساتذة الكرام هى لسة فيها كتير من الطبيعة البكر و المناظر الحلوة و اشكال البحر الجميلة و بصراحة هو ده اللى فى مطروح دا غير الاسواق لهواة الاسواق اللى فيها بضايع كتير و رخيصة و كمان البلد مابتنامش لحد الصبح و اشط البحر مليان كافيهات و مطاعم كتيير جدا ..بس المشكلة ان مطروح اليومين دول فيها زحمة جامدة جدا جدا لقرب دخول شهر رمضان أعاده الله عليكم و علينا بالخير و اليمن و البركات ... فا كل الناس عاوزين يلحقولهم يومين قبل رمضان بالنسبة للشقق بتبقى انسب و اوفر للأسر الكبيرة اما لو الاسرة صغيرة يعنى فردين تلاتة يبقى الفندق احسن بكتير اللى نفسه اشوفه فعلا هى البلد دى فى الشتا بتكون عاملة ازاى

اقوللك انا البلد دى بتبقى ازاى فى الشتا عبارة عن سيول طول الشتا وغالبا مبيشتغلوش معظم الوقت علشان كده الاسعار غالية جدا هناك لانهم بيشتغلو 3 شهور الصيف بس و فى ناس بتبقى من محافظات تانية تأجر محلات فترة الصيف فقط لكن لو اجرت شقة بحالها ايجار جديد فى الشتا تاخدها 3 او 5 سنين ممكن ب100 او 200 جنيه فى الشهر وانا اعرف واحد صديقى هناك المحل بتاعه سقفه وقع من قوة المطر

[essamanof]

المشاركة الأصلية كتبت بواسطة خالدخليفة اقوللك انا البلد دى بتبقى ازاى فى الشتا عبارة عن سيول طول الشتا وغالبا مبيشتغلوش معظم الوقت علشان كده الاسعار غالية جدا هناك لانهم بيشتغلو 3 شهور الصيف بس و فى ناس بتبقى من محافظات تانية تأجر محلات فترة الصيف فقط لكن لو اجرت شقة بحالها ايجار جديد فى الشتا تاخدها 3 او 5 سنين ممكن ب100 او 200 جنيه فى الشهر وانا اعرف واحد صديقى هناك المحل بتاعه سقفه وقع من قوة المطر

اخى خالد انا احد مواطنى مرسى مطروح وموضوع السيول طول الشتا دى انت جبتها منين الشتاء عندنا امطار عادية زى الاسكندرية وحكاية ان احنا مبنشتغلش معظم الوقت دى معلومة خطا وصديقك اللى سقف دكانه وقع من قوة المطر اكيد ده كشك وحكاية الشقة ام 100 جنيه حكاية مضحكة خالص ارجو مراجعة معلوماتك او زيارة مطروح الان فى الشتاء وسوف ترى مطروح غير ما حكيت عنها

[MIDO-SPICY]

اسمحولى احكيلكم شويه عن مطروح فى عام 1986
انا من 86 ولغايه دلوقتى وانا فى مطروح كل سنه لدرجه ان من حب ابويا فيها اشترى شقه هناك فى قريه اسمها اندلسيه .. واللى من احلى القرى هناك واللى جابلكم منها لانسر استايل صوره الالعاب المائيه هناك
عايز اقولكم ان مطروح زمان ماكنش فيها اى وسيلة مواصلات غير الكارته وهى عباره عن عربية بيجرها حمار وانت والعيلة تركبوا فيها من ورا .. طبعا بتشم احلى ريحه وانت ماشى بس بجد الرحله دى كانت متعه لوحدها
وكان ياخدك يلف بيك البلد كلها ب 2 ج .. وبعد كده بقى الحنطور اللى زى اللى على النيل دلوقتى لغايه ما صلوا للعربيات الاجره من حوالى 8 سنين
وعايز اقولكم ان للاسف الطبيعه البكر دى مقارنة بالوقت اللى بقولكم عليه فهى مش بكر ولا حاجه
زمان انا ماكنتش بشوف شكل السما من كتر النجوم اللى كانت فيها
وكانت فاضيه خالص لدرجه انى كنت فاكر ابويا واحنا نازلين البحر يقولى نقى اقرب شمسيتين وحط شمسيتنا وسطيهم علشان برضه نحس اننا حوالينا بنى ادميين .. دلوقتى انت ممكن تلاقى الشواطى العامه صفين وسعات 3
الشركات دلوقتى كلها بقت بتطلع مصايف فيها وطريق وادى النترون الجديد اللى بيوفر 100 ك ماخلاش
زمان كنا لازم نسافر للعامريه ( قبل اسكندريه ب 30 ك ) ومنها على برج العرب وبعد كده مراقيا ومارينا وسيدى عبد الرحمن والحمام وبعد كده مطروح .. كان مشوار محترم يعنى
عايز اقولكم كمان ان اللى راح عجيبة ماكنش فيها سلم تنزل منه للبحر زى دلوقتى.. زمان ماكنش حتى فيه سور ..
كان منك للجبل وانت وحظك
بس بجد احلى فاكهه وبالذات التين والبطيخ تاكلهم من هناك .. وياسلام بقى على مطعم الجمهوريه اللى فى السوق لما تشترى منه بجنيه طعمية محشيه وبجنيه عيش من الفرن اللى ادامه وانت قاعد على البحر مستفرد بازازه سفن الساعه 6 الصبح
حتى سوق ليبيا كان زمان حاجته حلوه ورخيصه انما دلوقتى زيها زى القاهره ويمكن اغلى كمان
وياسلام على لب مقلة علم الروم .. مع انى بصراحه بستفز من اللى بيشتروا منه
انا مش قادر اتخيل نفسى انى ممكن اقف بدون مبالغه 3 ساعات علشان اشترى شويه لب عقبال ما اوصل القاهره يكونوا خلصوا
وعلى فكرة موضوع ال 3 ساعات دا 24 ساعه
بجد مطروح من احلى مدن القاهره اللى زرتها واللى من كتر حبى فيها بعتبر نفسى من اهلها واعتقد انها خلال 5 سنين مش اكتر .. هتنافس شرم والغردقه
كفايه انك ممكن وانت فى الميه على بعد 5 او 6 متر بتشوف الرمل من نقاء الميه
وانت واقف على البحر من بره بتشوف الميه 3 الوان
اسف على الاطاله ولكن بجد هى تستحق