ليه كسرنا ورا فيات قله ؟؟

[Ahmed Anwer]

سؤال دايما بسأله لنفسي ،،

ليه كسرنا ورا فيات قله ؟؟

ازاي شركة كانت ملء السمع و البصر

و تقريبا مفيش غيرها في مصر لمدة ثلاثين سنة ،،

و فجأة تكون بمثل هذا الدور الثانوي ،،

هل خلاص فيات ارتبطت في ذهننا بعربية عطلانه في عز الظهر علي كوبري اكتوبر

و ازازة المياة لازم تكون موجودة معاك عالطول

و البارومة اللي بتسرح و الشاسيه اللي بيفتح و يقفل لوحده

ليه يا جماعة مبنشفشي ،، موديلات فيات الحديثة في شوارعنا ؟؟

رغم جمال تصميماتها و حداثتها و اسعارها المنافسة مقارنة حتي بالسيارات الاسيوية

هل عيب التوكيل ؟؟

اللي انحدر من شركة النصر للسيارات لشركة النيل الهندسية لأوماترا حاليا ،،

و الشركة الأم مش سائله في سوق اساسي ليها ،،

هل رياح النفط الخليجي اثرت علينا ،، و نسينا ذوقنا الأوربي اساسا ؟؟

هل فيات اتظلمت بسمعة بعض موديلاتها القديمة ،،

هل هوا اليورو ؟؟

هل فعلا فيات اعتماديتها ضايعه ،،

Fix it again tony

ليه نسينا الطعم الايطالي للسيارات ،،

بانتظار ارائكم ،،

[M!NA]

المشاركة الأصلية كتبت بواسطة Ahmed Anwer هل خلاص فيات ارتبطت في ذهننا بعربية عطلانه في عز الظهر علي كوبري اكتوبر و ازازة المياة لازم تكون موجودة معاك عالطول و البارومة اللي بتسرح و الشاسيه اللي بيفتح و يقفل لوحده

ديه الخلاصة...
و الموضوع أنك مش سهل أبدا تطلع فكرة دخلت و عششت و توارثتها الأجيال كمان...

يعني أبويا مثلا من كتر ما شاف من ال127... عارف لو قلتله ألفا روميو... هيقوللك الله الغني.... (لمجرد ذكر اسم ايطاليا في الموضوع)

[CryptonX]

نسيته لكذا سبب .. منها اسباب احنا السبب فيها و منها من فيات نفسهم

فيات لسة قايمة من " انتكاسة " كانت ممكن تخليها تفلس و من فشل معاهدة تعاون مع جنرال موتورز الي هي اصلا فاشلة

بالنسبة لل80يات دي مش حترجع تاني ..

سيارات فيات حتى الايطالية الي كانت بتيجي مصر من 128 127 131 132 كانت مبيعاتها ممتازة استمرت ممتازة مع الريجاتا و التمبرا الي ان اخطأ وكيل فيات باسبتدل هذه الموديلات بموديلات مثل البونتو و السيينا و نسي تماما الموديلات المرغوبة في بلد معظم شعبها بيكره الهاتشباك و المواتير الصغيرة ( مثل الماريا و البرافا السيدان و الكروما )

و عندما ولع اليورو .. لم يكن امامنا سوى البونتو و هي سيارة شبابية ممتازة و لكن " قلة " في عين معظم الشعب المصري من مثلا محبين ال 131 و ال132

السيينا سيارة عملية و ناجحة عالميا و في مصر في اول مانزلت مثلا و لكنها فضلت كما هي لفترة تزيد عن ال 6-7 سنوات بدون اي اضافات - في نفس الوقت الي تم طرح في سيارات اسيوية مثل الانوس و الاكسنت و اختفت الميزة الاساسية لسيارات فيات مع دخول سيارات في نفس الحجم - ارخص - اسهل في الصيانة و متوفرة اكتر ... ثم جاء اختفاء التوكيل صاحب المبيعات الممتازة بالسيينا و البترا في مصر ( السعودي ) اختفاء غريب و لكنه ايضا كان في وقت توعك فيات ...
اوماترا موجودة في مصر من زمان و هي وكيل افيكو و هي السيارات فيات التجارية .. و ليس لهم اي خبرة في تسويق او بيع عامة سيارات الركاب و بالتالي " بيجربوا حظهم ".

سياسات فيات في ايطاليا الي افسدت فيات في مصر .

في اول الامر مكانش في عربية لاوروبا و عربية لمصر .. كانت كل سيارات فيات الايطالية ( الاسطول كله تقريبا ) يطرح في جميع البلاد و باسعار ممتازة ..

في اواخر التسعيينيات تم معاملة مصر كدولة نامية .. و بالتالي اكتفت فيات بطرح موديلات السيينا و بعض موديلات البونتو في نفس الوقت الي بدات فيه صناعة السيارات الاسيوية تحتل محلة كبيرة في مصر خصوصا مع سفر و هجرة الملايين من المصريين الى بلاد الخليج التي تكون خالية تماما من اي سيارة فيات ...

ثم جائت نكسة فيات ... و اختفت تماما من السوق المصري ... لتعود عودة " هزيلة " مع توكيل بيحاول لسة ... باسعار اليورو الجديدة و مواتير موفرة تحاول تنافس مرة اخرى ..

العقدة الازلية بتاعت الهاتشباك دي حتبقى مشكلة لشركة اميز و انجح سيارات عندها هي الهاتشباك ...

[sam ram]

فيات من العربيات الممتاااااااااااازه
بس للأسف احنا كانت في فتره فيها فيات عربيه العامه - بيجو 504 اعيان الارياف و تاكسي - مرسيدس الطبقه الميسوره
ابتدى الياباني يدخل مصر و كان تقريبا المازاد 626 تمنها تمن ال 128 أو ال 127 نصر .....يمكن ارخص كمان الناس الاول تقول لأ ياباني ايه دا ورق ..... ال 128 البقال بيفهم فيها ..... الياباني رخيص بس قطع غياره ناااااار
شويه شويه الناس لقت الياباني زي الفل و الفيات هي هي 128 - 127
طبعا كان فيه عربيه كارثه اسمها ارجنتا كان تمنها تمن المرسيدس 230 وكل اللي اشتراها لبس اسود!!! لأن مرسيدس كسحتها
شويه ونزل الكوري و فيات قفشت على شركه النصر و وقفوا عند الريجاتا .... حولوا على تركيا و جابو الدوجان
طبعا لما ابتدت كل انواع العربيات تدخل مصر خصوصا الكوري - كانت فيات في مصر خلاص ملهاش حد .... لحد التسعينات مع شركه النيل ودخلت الاونو وبعدها التيبو و البرافو .... بس كانت اغلا طبعا من الكوري .... الناس لما تقول فيات يعني عربيه رخيصه يبقى ازاي يشتريها اغلى وكان الياباني عدى خلاص ..... يشتري كوري احسن و ارخص.... واهو زي الياباني اللي مرضاش يشتريه قبل كده و ماشي زي الفل
نزلت البونتو و كانت مقطعه اوروبا .... بس طبعا كان قدامها البولو و الكورسا و الفيليشيا والاكسيل و الابيزا و اكيد حاجات تتنيه مش فاكرها .... و بعدين نزلو السيينا وفي نفس الوقت نزلت السيفيا 1600 بنفس تمن السيينا ال1400 ..... من غير مارغي كتير .....
الناس في فتره ما كانش قدامها غير الفيات .... و لما تنوغت العربيات .... خلاص
تخيل واحد كل يوم يفطر فول ..... و في يوم لقى فيه جبنه و اومليت و كشري و سميط .... اكيد حياكل حاجات تانيه لانه شبع فول
هي اوماترا بتحاول دلوقتي .... بس لازم يزودوا مراكز الخدمه ويعملوا دعايه قويه ( البرافو هايله بس ازاي تقنع الناس يشتروا عربيه بتمن الكورولا و الشارك و المازدا 3 و الاسترا و ......... )

الكلام ده طبعا وجهه نظر شخصيه و رأي شخصي .... وممكن اكون نسيت معلومه او خانتني الذاكره في نقطه معينه.... الله اعلم
ياريت لو اي حد من الزملا الافاضل قرا حاجه مش مظبوطه يصححها لي .... او له رأي تاني مخالف لرأيي
رأي صواب يحتمل الخطاء و رأيك خطاء يحتمل الصواب

[sam ram]

المشاركة الأصلية كتبت بواسطة CryptonX سيارات فيات حتى الايطالية الي كانت بتيجي مصر من 128 127 131 132 كانت مبيعاتها ممتازة استمرت ممتازة مع الريجاتا و التمبرا الي ان اخطأ وكيل فيات باسبتدل هذه الموديلات بموديلات مثل البونتو و السيينا و نسي تماما الموديلات المرغوبة في بلد معظم شعبها بيكره الهاتشباك و المواتير الصغيرة ( مثل الماريا و البرافا السيدان و الكروما )

واضح اني كنت باكتب المشاركه في نفس الوقت اللي حضرتك شاركت فيه فمشوفتهاش الا بعد ما كتبت

انا موافقك على كل الكلام خصوصا نقطه انتكاسه فيات و مشاركه جنرال موتورز.. اعتقد انها فعلا كان ليها اثر كبير
بس في نقطه مش فاهمها اوي :-
الماريا و البرافا و الكروما عربيات سيدان ..... وكانو موجودين في مصر فيما عدا الكروما كانت قليله اوي... انا عن نفسي مشوفتش الا واحده بس.
السيينا كمان سيدان بس فئه اقل طبعا وبالتالي كان سعرها منافس
40000 جنيه كانت ارخص من الفيليشيا و البولو و الكورسا اللي كان متوسط سعرهم 42000 - 45000 - بس كان بينافسها الاكسنت و السيفيا
والبونتو كانت بتنافس عربيات كتير هاتشباك وكانت بينهم و بين الجولف يعني دخلت منطقه خاصه بيها
متهيألي هو كان مضطر يركز على موديل السيينا و البونتو مع زياده اليورو و بالتالي كان صعب ينافس بالماريا و البرافو .... اللي كانو فعلا موجودين بس مبيعاتهم قليله جدا .... زي التيبو من قبلهم
يعني هو كان مضطر مش بمزاجه
استئذنك توضح الجزئيه دي وياريت اعرف تعليقك على مشاركتي الاولى