جايب فرنا علىالزيرو و خايف أكون طلعت من الضمان

[mahmoudelazab]

سلام عليكم أستفسار مهم قوى أنا أنهاردة جبت عربية فرنا أوتوماتيك على الزيرو من معرض صغير جنب بيتنا فى الهرم
و بعد ما مضيت وصل الأستلام أخذتها على البنزينة علشان أفولها
لاحظت أن عداد السرعة مابيتحركش و كذلك عداد الكيلو مترات بتاعها واقف على 16 كم
رجعت للمعرض أقول لهم على كده راح مادد أيده و مركب حاجة ما شفتهاش و قالى جرب كده أشتغلوا و بعدين لما روحت بفتح كتالوج العربية لقيت كاتبين أن اللعب فى عداد الكيلوا مترات يخرج العربية من الضمان أيه الحل دلوقتى أرجعها للمعرض و أعمل خناقة ولا أنا فاهم غلط أرجو الرد إذا سمحتم

[Ahmed Anwer]

الف مبروووك مقدما

و ربنا يباركلك فيها و يملاهالك بركه

معارض كتير بتعمل الحركة دي للاسف

الغرض منها ان الزبون ينبسط و ميقولشي دي العربية عامله كام كيلو

سواء المسافه من التوكيل او الميناء للمعرض او لو بعد الشر يكون بيستخدمها

حكاية خروج السيارة من الضمان باللعب في العداد

اعتقد القصد بيها ان ميجيش واحد يعدي الضمان و يلعب في العداد عشان يفضل في الضمان

او ميروحشي الصيانات و يقول انا لسه ما وصلتش للكيلوات بتاعت الصيانة

فاعتقد في حالتك انك خارج النطاق ده

لو عايز تطمن اكتر روح التوكيل ( غبور و مش مركز صيانه معتمد ) بحجة انك بتشتكي من اي حاجة في العربية

و بكده تسجل نفسك في سجلاتهم و نظام الكمبيوتر و مش هتدفع اي فلوس

و يبان لو فيه اي مشكلة في ضمان عربيتك

هيرفضوا يشتغلوا فيها

و لو في اي مشكله قلنا و احنا ان شاء الله نقدر نساعدك في التوكيل

[AHMEDCAR]

المشاركة الأصلية كتبت بواسطة Ahmed Anwer الف مبروووك مقدما و ربنا يباركلك فيها و يملاهالك بركه معارض كتير بتعمل الحركة دي للاسف الغرض منها ان الزبون ينبسط و ميقولشي دي العربية عامله كام كيلو سواء المسافه من التوكيل او الميناء للمعرض او لو بعد الشر يكون بيستخدمها حكاية خروج السيارة من الضمان باللعب في العداد اعتقد القصد بيها ان ميجيش واحد يعدي الضمان و يلعب في العداد عشان يفضل في الضمان او ميروحشي الصيانات و يقول انا لسه ما وصلتش للكيلوات بتاعت الصيانة فاعتقد في حالتك انك خارج النطاق ده لو عايز تطمن اكتر روح التوكيل ( غبور و مش مركز صيانه معتمد ) بحجة انك بتشتكي من اي حاجة في العربية و بكده تسجل نفسك في سجلاتهم و نظام الكمبيوتر و مش هتدفع اي فلوس و يبان لو فيه اي مشكلة في ضمان عربيتك هيرفضوا يشتغلوا فيها و لو في اي مشكله قلنا و احنا ان شاء الله نقدر نساعدك في التوكيل

لا كلام بعد كلام احمد بك اور تسلم ايدك يا كبير

[sh_masry]

ما تقلقش خالص من الموضوع ده ..... عموما معظم المعارض بتعمل كده و انا اسيلمت عربيتى فيها نفس الموضوع و الحكايه كلها فيشه بيركبها و خلاص .... و مالهاش اى علاقه بالضمان , المهم اللى احمد باشا كتب عنه , انك ماتلعبش فى عداد العربيه علشان تطول فتره الضمان لو كنت عملت ال 60 الف كيلو /متر بتوع الضمان .

[lost2008]

انا لما استلمت العربيه كانت عامله 64 كيلو, و لما سالت فى المعرض قالولى ديه المسافه من المصنع فى 6 اكتوبر لحد المعرض فى مصر الجديده