أدب الرحلات

المشاركة الأصلية كتبت بواسطة خالدخليفة طب فين البطيخة ياعم كروزير ماشى نكمل دى بقى مباراة قانونية فى الجووون القطار العادى اللى من غير شبابيك ده اول م طلع كان اسمه المميز لانه كان بالحجز تروح الشباك تدفع ربع جنيه زيادة على تمن التذكرة وتاخد رقم كرسى ورقم عربية زى المكيف بالظبط (طبعا مع الوقت وعدم تطبيق الكلام ده لم يبقى الا الاسم فقط وهو المميز وحتى فى ناس مش عارفه هو مميز فى ايه ولا ليه ) المهم راكبين ذات مرة (حلوة ذات مرة دى ؟؟) وركب شخص منوفى لذيذ كده وفاهم وقاطع تذكرة برقم كرسى وراح للكرسى لقى واحد قاعد عليه بيقول له بادب / الكرسى بتاعى بعد أذنك فشوح له بايده وقال له غور من هنا والراجل المنوفى مكدبش خبر وطلع على شرطة القطار وعلشان بختهم الأسود كنت انا واقف جنبهم والراجل بيقول فى واحد قاعد مكانى فبص له ببلاهة كده وقال له /عاوزنى اعمل لك ايه هو علشان دفعت لك ربع جنيه هتقرفنا ؟ والراجل م ردش وهنا انبريت له (حلوة انبريت له دى ؟؟؟) وقلت له / اومال مهمة سعادتك فى القطر ده ايه ؟؟ انك تاخد جوز جنيهات من كل بياع وبس فرد بقلة ادب / لا مهمتى اقعد الركاب واجيبلهم الرضعة روحت مزعق فيه وقلت له / مهمتك حفظ الأمن والنظام داخل القطار يارجل الامن وفى واحد واكل حق واحد هتقوم تجيب له حقه والا اقول له يعمل ايه فقال بعند / مش قايم واعلى مافى خيلك اركبه قلت له ماشى ورحت باصص للراكب وادام الشرطة والناس والكل سامع وقلت / انت نازل فين فقال ايتاى البارود قلت حلو تنزل ايتاى البارود وتعمل محضر عند القضائى بس انت قتيل التذكرة اوعى حد ياخدها منك لانها عقد الرحلة بينك وبين السكة الحديد طبعا هيرفض علشان ميأذيش زميله فتطلع على المستشفى الميرى بايتاى البارود وتضرب ايدك ف جيبك وتدفع 20 جنيه وتجيب تقرير طبى انك رجلك بتوجعك ومتقدرش تقف عليها اكتر من 10 دقايق متواصلة وانك وصلت المستشفى فى حالة صعبة بسبب انك وقفت على رجلك مدة تزيد على الساعة وبعدها تطلع على قسم الشرطة التابع له محطة ايتاى البارود ومعاك التقرير الطبى وتعمل محضر تتهم فيه كل افراد شرطة القطار رقم كذا والذى قمت بركوبه من محطة قويسنا متوجها الى ايتاى البارود بالتقاعس عن عملهم مما تسبب فى ايذائك بدنيا ونفسيا طبعا هيبعتوله استدعاء هيطنشه والمحضر هيروح النيابة فى النيابة تطالب بتعويض 5000 جنيه والقاضى هيخليهم 500 كويسين؟؟ قال / حلوين قلت له /صاحبنا اللى قاعد بيسمعنا ده هيحصل معاه حاجة من 2 يااما النيابه هتبعت له استدعا وهنا ميقدرش ميروحش او مش هيروح وده هيبقى دليل ضده فى المحكمة وساعتها هينطس حكم بالسجن اقله شهر وتتحط فى ملفه وهيتحاسب اداريا وثانيا هيضيع يومين سفر رايح جاى من رصيد اجازاته طبعا لان مفيش نيابة الجمعه مرة فى النيابة ومرة فى المحكمة واذااتحكم عليه هيستانف وهكذا هتصرفه فلوس للمحامى اللى رايح يدافع عنه وهتاكل من رصيد اجازاته السنوية بدل م يريح فى البيت وبضرب عينى لقيت القطار اللى كله كان هيصة ترمى فيه الابرة ترن وكلهم ملمومين حوالينا وانا بشرح للراجل بيسمعونى راح فرد من افراد الشرطة قام وقال ده انت ابليس وبص للراجل وقال له تعالى ورينى الكرسى بتاعك قلت ابليس اللى بياخد مرتب نظير عمل مبيعملوش المهم وانا نازل لقيت صاحب الكرسى بيشاورلى من الشباك وعمال يدعيلى و كل افراد الشرطة باصين لى ونفسهم يخنقونى ومرة ركب معانا مرتضى منصور ايام انتخابات نادى الزمالك اللى فاز فيها كمال درويش وطول الطريق لحد م نزل طنطا بلد حبيبه شوبير وهو عمال يحكى بطولاته وهيصة فى القطار وكانت سفرية م يعلم بيها الا ربنا من الطرائف بقى كانو بيصورو فيلم داخل محطة القاهرة المهم انا رايح اركب ولقيت كردون وكاميرات وممثلين المهم فيهم واحدة بصت لها وبشبه عليها وهيا بصت لى وابتسمت وقالت لى اهلا بيك وقلت مين دى ياعبد الرحيم مين دى ياعبد الرحيم مين دى ياعبد الرحيم وهدانى المخ الصعيدى انها ممكن تكون كانت زميلتى فى الجامعه وقلت ياواد عيب دى قالت لك اهلا بيك يعنى تعرفنىفروحت اسلم عليها سلمت عليا بقول لها انتى مين بصت لى بغيظ وقالت فى حاجة ؟ فقلت ولازال المخ الصعيدى شغااااااااااااال انتى غالبا مديحة بتاعة شبرا فقالت لى اتفضل روح شوف طريقك فقلت ولازال المخ الصعيدى شغااااااااااااال تبقى ايمان بتاعة مصر الجديدة فقالت ياعم ابعد عننا بقى وصرخت فين الامن ولقيت شوية تيران لابسين بنى آدمين جايين جرى صرخت فيهم انتو فين ياحيوانات وهما نازلين اعتذارات اسفين ياهانم ولقيتهم اتلمو حواليا فحسيت نفسى عبارة عن فار واقف بين 4 عمارات هيقعو عليه فى اى لحظة فقلت وانا عندى بقايا شجاعة وبتهور أحسد عليه / فى حاجة قالولى انت مش عارف دى مين فقلت بثقة عجيبة دى غالبا كانت زميلتى فى كلية الحقوق جامعة عين شمس وبالأمارة خريجة سنة1987 وهنا انفجرت غوروه من هنا فواحد فيهم حط ايده على كتفى وحسيت ان جبل المقطم واقف على كتفى وقال دى الممثلة فلانة الفلانيه (الكارثة انى ناسى اسمها دلوقت لانى مش متابع جيد للمسلسلات والافلام غالبا منى زكى او حنان ترك مش فاكر لان الكلام ده سنة 2000 ومكانوش مشاهير ااوى كده) فقلت له اهلا وسهلا معلش انا اسف كنت فاكرها زميلتى اصلها شبه ايمان ... وقبل م اكمل فقال امشى بقى متخليهاش تقول لنا اضربوه وانت مش هتستحمل ومشيت وانا عامل شجاع لكن من جوايا كنت بموت وايده اللى حطها على كتفى وجعتلى كتفى لمدة اسبوع

الله عليك يا كبير الرحيميه طول عمرك أســــــــــــــــــتــــ ــــــــــــأذ

ههههههههههههههههههههههههه ههههههههههههههههههههههههه ههههههههه

انا كان نفسي تروح تاخد الممثله ديه بالحضن وتقولها ازيك يا ايمان مش عرفاني انا خالد بتاع 3/1 في المدرسه ههههههههههههههههههههههههه ه

[خالدخليفة]

مرة كنت بشوف ارض فى منخفض القطارة ودى منطقة صحراء جرداء خلف مدينة العلمين ومشيت مسافة حوالى 150 كيلو فى مدق (طريق غير مرصوف ) المهم مشيت بسرعة اقصاها 20 كيلو وبعدين قلت لالالالالالالا مبدهاش روحت فاتح السرعة وصلت 120 وكانت النتيجة ان المقص بتاع النيسان انكسر وقلت اااااااااه ه ه ه ياتموت فى الصحرا يابو خالد يااما ربنا يبعت لك نجدة من عنده المهم لقيت عربية نص نقل محملة علب بلح من اللى بناكله فى رمضان ونزل منها واحد شكله غلط وقال فى ايه قلت له المقص مكسور فقال ..... تعالى اركب معايا وودانى مدينة الحمام وجاب لى ميكانيكى واخدنى ورجعنا فكينا المقص ولحمناه فى اسكندرية ورجعت تانى للميكانيكى اخدناه ورجعنا ركب المقص وقال عايز حاجة تاني قلت له متشكر يابلدينا تسلم الايادى وادى الميكانيكى حاجة ف ايده وقال له خلى بالك من الراجل د ه ومشى وقبل ميمشى سالته هو ده بلح سيوة فبص لى من فوق لتحت وسابنى ومشى وقال انا كفاية عليا كده لانى اتاخرت ومفهمتش معنى الكلمة
المهم الميكانيكى بعد م خلص تركيب المقص ركب معايا ووصلته ورشته فقال الراجل ده قريبك ؟ قلت له انا قابلته هنا فى الصحرا فقال متعرفوش فقلت لا فقال ولا تعرف بيشتغل ايه فقلت لا لكن غالبا تاجر عجوة العربية مليانة عجوه فضحك وقال بسخرية عجوة ؟؟ ههأأأأو ده تاجر مخدرات واللى كان على العربية ده مخدرات وغالبا حشيش لان دى علب الحشيش وهو ادانى حتة حشيش بس حاجة نضيفة فضحكت وقلت الحشيش حاجة نضيفة؟ فقال اقصد انه ماركة كويسه لسه طازة ملعبوش فيه يقصد محصلش خلط بحاجات تانية زى القش والبن وحاجات كده قعد يشرحها ييجى ربع ساعة لدرجة انى شكيت انه يكون ميكانيكى
وبمناسبة المخدرات
ركبت قطار رقم 2 و ده قطار عادى بيقوم من اسكندرية 3 صباحا وغالبية ركابه موظفين او طلبة فى القاهرة ومفروض معاده يوصل مصر الساعة 6 ونص الصبح ولكن فى ايام منصور وزير النقل بقيت اشوف عجايب الاقى السواق بيكلم القاهرة يسالهم آجى امتى فيردو تعالى 8 او تعالى 7 ونص رغم ان معاده 6 ونص المهم فى يوم كنت جاى من مطروح وكان شتا مفيش مواصلات مباشرة للقاهرة فركبت لاسكندرية ومن هناك لقيت القطار ده ولاحظت ملحوظة غريبة
القطار كله زحمة جدداااااااا لدرجة ان الناس هتقطع بعض وواقفين فوق بعض والعربية الاخيرة فاضية ومحدش جه ناحيتها استغربت جدا فروحت راكب العربية الاخيرة ولقيت شوية بنى أدمين شكلهم غلط قلت اااااااه ه ه ه دول شكلهم مجموعة جنايات متنقلة
واللى زود شكوكى اكتر ان الكمسارى مفروض ييجى بعد سيدى جابر ده جه قبل القطار ميطلع من اسكندرية وبص لى وقال انت قاعد هنا ليه وامسك شنطتك فى ايدك (وكانت شنطة جلد طبيعة فاخرة) نت فاكر نفسك فين ثم دول مش بنى آدمين اصلا والتانيين ردو عليه تشكر ياااااااعســــــــل فقلت آآآه ه
ده ايه فيلم الأكشن اللى وقعنا فيه ده
شوية والعيال دول جابو كوباية ( كانت اول مرة اشوف الحكاية دى) وجابو مسمار ولفو عليه حاجة وولعو المسمار وطفو النار وخلوه يطلع دخان زى البخور كده وغطو الكوباية بورق الومنيوم وخرموه فوتو منه المسمار جوه الكوبايه وخلو راس المسمار تقفل مكان الخرم واستنو لما اتملت دخان وبعد كده خرمو الغطا الالومنيو م وقعدو يشدو الدخان المهم واحد فيهم لاحظ انى عمال اتفرج باهتمام فقال فى حاجة قلت له بتفرج قال بتتفرج على ايه هو سيرك شغال قلت له اول مرة اشوف الحكاية دى فقال انت متعرفش الحشيش فقلت لا فبص لى باستغراب قال ولا دى وطلع حاجة زى قرطاس اللب بس على صغير فقلت ايه ده فقال انت متعرفش البانجو فقلت اسمع عنه بس فاستغرب جدا وبص لى على انى من كوكب تانى المهم الحشيش ده له تأثير غريب جداااا
انا فوجئت بيهم بعد م شدو الدخان بقو يضحكو ضحك هيستيرى وفجأة انقلبو على بعض وسحبو على بعض المطاوى وانا العرق الصعيدى اشتغل وقمت احوش بينهم وصلو ع النبى ياجماعة المهم واحد منهم قال سيبك منهم ده تأثير الحشيش وهيرجعو تانى وفعلا مفيش دقيقتين واتصالحو وبقو يضحكو ضحك هيستيرى تانى المهم الزعيم بتاعهم لما شافنى بحوش رغم المطاوى فاستجدعنى وعزم عليا بسيجارة فقلت مبدخنش قال دى محشية جااامد جاااامد اى واحد من الكلاب دول يتمناها فقلت له مليش فيها فقال طب خليكى فى الخفيف وطلع سيجارة البانجو قلت ولا دى فبص كده وقال ايه ده ياباشا لاسجاير ولابانجو ولاحشيش اومال بتتكيف ازاى فقلت له هو لازم كيف يعنى قال ياباشا فى حكمة بتقول
راس بلا كيف عايزة ضرب السيف فقلت لاياشيخ و دى مين قالها فقال واحد مسطول هاهاهاهاها وقعد يضحك فانا ضحكت على تعليقه فقال اومال بتشرب ايه اوعى تقوللى بشرب اللبن الصبح فقلت فعلا انا فطارى عبارة عن كوباية لبن او طبق بليلة فبصلى بسخرية وقال بليلة ؟؟ ههأأو أو أو و بص لزمايله وقال وسلام كبير ااوووووىىى للبليلة ولقيتهم غنو وقالو ياحبيبى تعالى بالعجل اه ياروحى تعالى بالعجل هيييييييييييييييه
قلت بس بااظت بصيت لقيت الزعيم بص لى بعد سلام البليلة مع انى مش عارف علاقة الغنوة دى بالبليلة وقال /انت رجل جدع وعلشان خاطرك مش هنقلب العربية دى يالا يارجالة قلبو القطر ماعدا العربية دى علشان دمنهور قربت
وفعلا نزلو كلهم دمنهور بعد م نشلو حاجات كتير من الركاب وواضح انهم معروفين فى القطار ده لان بعد دمنهور العربية دى اتزحمت جداااااااااااااااا
وكانت رحلة م يعلم بيها الا ربنا

[خالدخليفة]

المشاركة الأصلية كتبت بواسطة corsair الله عليك يا كبير الرحيميه طول عمرك أســــــــــــــــــتــــ ــــــــــــأذ ههههههههههههههههههههههههه ههههههههههههههههههههههههه ههههههههه انا كان نفسي تروح تاخد الممثله ديه بالحضن وتقولها ازيك يا ايمان مش عرفاني انا خالد بتاع 3/1 في المدرسه ههههههههههههههههههههههههه ه

اخدها بالحضن علشان ال4 عمارات اللى خدونى بعيد عنها يروقونى
ودول مؤدبين اوى كله ضرب ضرب مفيش شتيمة

[Injection]

ههههههههه "أنت متعرفش الحشيش", اللى يعيش ياما يشوف.
أحسن حاجة فى سفرياتك يا أستاذ خالد أنها بتديك خبرات وحكاوى جديدة.
بس متهيألى بعد الصنى خلاص مغامراتك مع الحشاشين فى القطرة (جمع قطر) خلصت, ولا أيه؟

[خالدخليفة]

المشاركة الأصلية كتبت بواسطة Injection ههههههههه "أنت متعرفش الحشيش", اللى يعيش ياما يشوف. أحسن حاجة فى سفرياتك يا أستاذ خالد أنها بتديك خبرات وحكاوى جديدة. بس متهيألى بعد الصنى خلاص مغامراتك مع الحشاشين فى القطرة (جمع قطر) خلصت, ولا أيه؟

لاااااااااااا السكة الحديد دى عشرة والعشرة متهونش
وفعلا انا عمرى م شفت الحشيش غير فى موقف القطار ده ولاعمرى شفت تاجر مخدرات ولا علب الحشيش الا فى موقف الصحرا
وانا فعلا شفت حاجات كتيرة وصدق المثل اللى قال اللى يعيش ياما يشوف واللى يلف يشوف اكتر
وعلى فكرة المواقف انتو هنا بتقروها وتضحكو لكن انا لما كنت عايش المواقف كل موقف كان بيبقى نافوخى شغال وبفكر ايه التصرف الامثل
لكن فعلا الموقف الوحيد اللى اتصرفت فيه بعقل جدا لانى باخد كل حاجة على كرامتى ولايمكن اخاف من حد هو موقف البودى جاردات بتوع الممثلة لانى متهيألى لو هبلت فى الكلام معاهم كانو طحنونى طحنة سودة
واصعب موقف كان فعلا موقف القنبلة و ده من اسوأ المواقف فى حياتى اللى كل م افتكرها بعد كده اموت على روحى من الضحك