استفسر عن دهان سيارتك !!!!!!!

[أيمن الروبي]

المشاركة الأصلية كتبت بواسطة sameh 1 الوضع بالتفصيل كالتالى السيارة اوبل فكترا 2001 سوداء مرشوشة من الخارج بالكامل ومن الداخل قيل لى انها فبريكة و بالفعل لا يوجد ملحوظة سوى ان هناك بعض اجزاء صغيرة متفرقة مقشرة فى الصالون والحوض و الشنطة ويمكن تقشير اجزاء اخرى بالاظافر لكن لا معجون تحتها ولا ترى سوى الصاج بلون رصاصى فاتح ناعم املس لامع قليلا بدون اى سمك على عكس الفيلر الذى يكو ن له سمك واضح اى تخانة ويكون ملمسه مط مطفى ارجو الافادة فانا مقبل على شراء السيارة ولسيادتكم جزيل الشكر

طالما البويه بتقشر ومفيش تحتها معجون او فلر متقلقش القصه كلها ان العربيه دي مرشوش دواخلها نضافه مش اكتر علشان اللون جوه ميفرقش من بره وبتقشر علشان البويه اللي جوه متصنفرتش قبل ما تترش بويه جديده بس طالما بتفكر تشتريها يبقي تجيب اله حاده وتخربش حتت صغيره في الدواخل لا تتعد 0.5 سم في كل حته من عند القوايم الاربعه والشنطه والحوض علشان تتاكد انها مرشتش من جوه نتيجة حادثه لا قدر الله

[أيمن الروبي]

المشاركة الأصلية كتبت بواسطة tham1010 استاذ ايمن الروبى شكرا على معلوماتك انا عندى عربية ماتركس 2001 كورى وارد الخارج. المهم العربية عليها بوية الفبريكة دواخل وخارجى. اللى مضايقنى ان فبه تجريحات فى البوية تتراوح بين تجريحات بسيطة ترى من قرب ولا تصل للصاج وتجريحات عميقة ودى مش كثيرة مجرد ثلاث او اربع خرابيش والخرابيش العميقة دى فيها صدأ. العربية لما بتنظف من بعيد مش بتشوف مشاكل ولكن من قريب تشوف كل العيوب دى.فى حته كمان فى الإكصدام الامامى من تحت فانوس الشبورة ممكن تشوفها بوضوح كنت بفكر اعمل الخرابش المصدية دى واصنفرها عند بوهيجى واخلية يرش العربية كلها نظافة.. اة رائك فى هذا هل ادهن العربية كلها ام فقط الاجزاء اللى فيها خرابيش ام اتركها على حلها حتى لا تقل ثمنها؟؟ ارجو الافادة. عاوز اعرف هل ممكن رش جزء وترك الباقى وخاصة ان معظم الخرابيش فى جنب واحد اللى هو ناحية الشارع وبالتحديد فى الرفرف الامامى والابواب لما العربية بتكون متربة تجد ان الخرابيش دى بتكون واضحة جدا التاجر لما بها لى كان عامل بولش فمكنش باين حاجة خالص ولكن بعد شهر البولش راح والعيوب ظهرت

حضرتك انا شرحت ازاي نتعامل في المشكله اللي حضرتك فيها لو قابلت اي حد في احد مشاركاتي في هذا الموضوع واعيده لحضرتك تاني بإختصار
دلوقتي العربيه فبريكا من بره طيب وفيها بعض الخرابيش مشوه المنظر ومش عاوز ترشها علشان تفضل فابريكا علشان ميقلش تمنها نعمل ايه
المشكله هنا تعتمد علي الصنايعي اذا كان محترف ولا تعبان لو محترف بيمعجن الخربوش علي قده بالظبط ويبطنه فلر علي قده بالظبط ويرش البويه علي قد بالظبط والورنيش يرشه علي القطعه كاملا مثال بسيط عندك خربوش 3سم واصل للصاج في احد الرفارف نعمل ايه نمعجن الخربوش بس ونبطه علي قده ونرش بويه علي قده ونرش ورنيش علي الرفرف كله وبالتالي العربيه فابريكا زي ماهيه
الصنايعي التعبان تلاقيه يمعجن الرفرف كله ويبطنه كله ويرش عليه بويه كله وورنيش كله وبالتالي اي خربوش يحصل بعد كده هتلاقي تحتيه فلر ومعجون واللي هيشتري هيفتكر انها كان مخبطه وعامله حادثه لا قدر الله
وانا ممكن اعملهالك لو حبيت

[أيمن الروبي]

المشاركة الأصلية كتبت بواسطة موديز ريو 2013 استاذ ايمن اشكرك جزيلا على ردك السيارة لسه جديدة استلمتها من وكالة الجبر فى السعودية منذ شهر ونص وما لاحظتهاش الا لما بدأت اغسل السيارة واشيك عليها يعنى تعتبر عيوب صناعة بس مااعتقدش ان حاجة زى دى تتعالج يعنى حتى لو عملت شكوى صح ؟ هل ممكن ملمع السيارة يأثر عليها او يسبب كده حيث اننى مسحتها بملمع سيارة بعد ما غسلتها بالميه الفريم الاسود هاحاول انزلك الصورة

مفيش حاجه تأثر علي البويه طبعا بعد فتره من رشها غير حاجه واحده انك ترمي عليها مياه وهي واقفه في الشمس والصاج سخن بيحرق البويه معالجتها ان العيوب دي تتمعجن علي ادها بالظبط وتترش تاني بس الافضل تسيبها كده

[أيمن الروبي]

المشاركة الأصلية كتبت بواسطة walalila أستاذ / أيمن أنا متابع جيد لموضوعك و لكل مواضيع المنتدى و الصراحه ساعدتنى ف العربيه اللى جبتها أنا جبت من 3 شهور دايو 2005 ذهبى و دخلتها الفرن و و كأنها جديده , طبعا مع طرق مصر لو سايق أو حتى راكن عربيتك بتتخربش , المهم العربيه أتحكت من عربيه بوكس و أنا جاى الشغل من الجنب بس مش خبطه الدهان بس اللى طلع , مش عارف أعمل أيه و هل ليها علاج مش مكلف لأنى لسه صارف ع العربيه كتير عشان أظبطها يا ريت تساعدنى أنا مش عارف أعمل أيه ؟

لون حضرتك للأسف ميتالك فالقطعه اللي اتخربشت بتضطر ترشها كلها علي الاقل ورنيش والحته اللي محكوكه هتاخد معجون وفلر وبويه علي قدها

[tham1010]

اشكر يا استاذ ايمن....

سؤال اخير هو الورنيش فائدته ايه؟ يعنى هل هو للتلميع؟؟؟ هل ممكن الواحد يضرب العربية كلها وش ورنيش بدل البوليش علشان النظافة ويغطى على الخرابيش الخفيفة؟؟؟؟