هل يمكن تحويل فيات 132 لسيارة حديثة؟

[khaledmh]

السلام عليكم ورحمة الله وبركاتة

انا عضو جديد فى المنتدى ودى اول مشاركة ليا فى المنتدى وكنت وعايز اشكر كل اعضاء المنتدى الغالي فقط لتواجدهم فى منتدى مصر موتورز
انا عندى استفسار مش عارف هو دة القسم الخاص بية ولا لا
بس عموما استفسارى هو هل يمكن تحويل فيات 132 لسيارة حديثة
بمعنى انا بعشق حاجة اسمها 132 بس حاسس فى نفسيتى ان الناس بتقول عليها قديمة وغيرة وغيرة
فهل لو انا اشتريتها ايا كانت حالتها وصرفت عليها مبلغ وليكن 20 الف هل هتبقى ذى اللانوس والفيرنا مثلا او مثلا ذى الى فى الصور دى







منتظر ارائكم

[mohamed ellithy]

زيها زى ال128

[حسام البورسعيدى]

ممكن بس هتصرف جامد اوى .. وبصراحه حرام فى الـ 132 لانها مهما عملت فيها هتفضل عربية قديمة ..

طبعا انا عارف انك زهقان من الكلام ده .. و حاسس انك غاوى العربية فعلا ..


طيب انا عندى فكره ..

ايه رأيك فى مرسيدس 200 موديل اوائل تمانينات ..

دى ممكن تجيبها وتظبطها واحده واحده .. طبعا فخامة واعتمادية اكتر من الـ 132 .. بس تعتبر نفس الاستايل (العضمة الناشفه بتاعت زمان ههههههه) ..

بس فعلا المرسيدس هى العربية اللى يمكن فعلا تحويلها لسياره حديثة ..

انا معلوماتى فيها مش اوى بس اقدر اقولك ازاى بشكل عام ..

اللى اعرفه ولاحظته معاه العربية دى صعب اى تقنعه انها بقت قديمة وانه يغيرها ويركب حديث (كورى ولا يابانى) .. بتبقى فى عينه النوع ده من العربيات هى اللى تستحق لقب عربية ..

ممكن يسقط فيها موتور تسعينات انجيكشن وبكده ميكانيكيا بقت عربية حديثه ..

ده غير ان فيها كماليات كتير .. وفخامة وثبات ووسع وراحه ..


يعنى باختصار بدل ما تجيب 132 بـ 20 الف مثلا (علشان تبقى اساسياتها سليمه وتتحمل التعديل) وتصرف عليها 20 زى ما قلت .. هات مرسيدس 200اعتقد تعمل من 30 الى 40 حسب الحالة والموديل و الكماليات) .. واصرف عليها الباقى .. وحاجة فى حاجة ظبط فيها لغاية ما تبقى عروسة ...

[أيمن الروبي]

السلام عليكم
بص حضرتك 132 ممكن يتعمل فيها اللي انت عايزه ويليق عليها كل حاجة وهي عربية مش عجوزة وبرده الملاسيدس 200 في منها موديلات سبعينات بس ال 132 حاجتها مقدور عليها اكتر من المرسيدس كمان ال 132 مش زي 128 كما تفضل احد الاعضاء وقال لأن انا ركبت دي ودي فرق شاسع طبعا كمان ال 132 مش هقولك سقط موتور انت تخلي ميكانيكي صح وعند ضمير يعملك الموتور بما يرضي الله هتحس انك مش راكب اي عربية
1-انا عربيتي منغير مبالغة بجيب بيها 170 مع ان موتوري عاوز حبة شغل وعندي جنطين بيرفو يعني ممكن اجيب اكتر من كده
2-في موقف حصل معايا كنت مسافر بورسعيد الطريق بعد مدخل الشروق وبعد البوابات وانت رايح بورسعيد زبالة كله مطبات هوا ومضعضع كان في سيات ابيزا ونوبيرا بيشدو معايا كنت بفرق معاهم علي السرعات العالية لأن الثبات عندهم ميتقارنش بالثبات عندي اول مايعدو 140 يخافو ويهدوا تاني من مطبات الهوا والضعضعة انما انا كنت 160 و 170 وبعدي ومش خايف ومعايا ناس ومطمن علي نفسي فيها (مفيش حاجة كبيرة علي ربنا)مش حرفنة بس ده ستر من ربنا
3-كمان الموتور بتاعها 2 كامة حاجة مش سهلة ومصمم ليوازي تقل العربية
4-العفشة مكلفة شوية لو جبت حاجتها الاصلي وجديدة بس بتعيش معاك وتحس انك راكب عربية جديدة
ومريحة في ركوبتها بس كل العربيات الجديدة دلوقتي عفشتها مكلفة برده
5-عربية دفع خلفي يعني اوعي
6-الصالون بتاعها لو نضيف بيكون شيك جدا وخصوصا تابلوه ال 2000 او كداب 2000 هما واحد وحاجة زي الجديد بالظبط واوسع كتير من عربيات كتير دلوقتي
7-البودي من الخارج لو رشيتو ميتالك بيكون شيك عليها جدا وخصوصا العربية كبيرة
8-بتكون ماشي بيها مطمن في الزحمة مش اي ترييحة او خدتش هيبهدلها ويشوها
9-في ناس كتير بتفتكر اني بكره الجديد او بقول كده قصر ديل يعني ولكن العربية دي كانت ومازالت طفرة
10-العربية دي لازم عشان تنزل منها تركب حاجة زيها مرسيدس بي ام بيجو
11-انا بركب عربية اخويا دايو عربيات صحابي الكوري بكون قلقان علي نفسي بيها ومش مرتاح
12-متخليش حد يحبطك ويقولك اصلها موديل قديم واللي هتصرفو مش هتلاقيه هو ممكن اللي انت عاوز تعملو هيخلي العربية توصل معاك ل 30000ج او اكتر بس هتتمتع بيهم وهتكون مبسوط منها اوي ومبتخزلش ابدا مش هتقرفك وعملك حاجة في عربية انت بتحبها ومرتحلها نفسيا
انا عارف اني رغيت كتير بس انا برده بحب العربية دي زيك ومش هنزل منها الا عشان اركب مرسيدس او بي ام ان شاء الله وده رأي وفي ناس ممكن تختلف معايا انما كوري وياباني لأ

[jamil]

اشتري وحدة متظبطة جاهز احسن