مشكلة محيرة جدا فى الماتريكس

[dr_eslam_66]

طيب ربنا يسهلك الحال وتتلافى العيب إنشاء الله.
ومبروك على العربية ولاونها جت متأخر.

[محمد صالح - المحامى]

مبروك على العربية وان شاء الله ربنا يبارك لك فيها
-----------------
حضرتك لازم تعرف ان اى عربية هتجيبها مستعملة لازم العربية تختبرك فى قدرة التحمل والاستحمال فى البداية حتى تتاكد انه مش هتفرط فيها لو تعبت منك فى المستقبل .
يعنى الى بيحصل مع حضرتك دة حصل مع 90 % من الشعب المصرى
اما بالنسبة للعيب المذكور
انصح حضرتك بعمل صيانة مبدأية فى التوكيل علشان تتطمن على حالة العربية العامة
وفى مركز خارجية بتعمل الصيانة دى بس التوكيل اضمن
وبالمرة تغير الحاجات الى بتحتاج تغير كل فترة ذى السيور والفلاتر
-----------------------------------
وربنا يبارك لك فيها
ومش اى عربية تتعبك فى بدايتها تروح بايعها
هيجى ايام بعد كدا هتعرف قيمتها وانت هتستغرب من المواقف الجدعه الى هتعملها معاك
سبحان الله انا بحس ان العربيات ليها روح ذى البشر

[MAWRO72]

فشلت يارجاله فشل زريع
الميكانيكى غير السيور التقسيمه والباوروالتكييف والدينمو وغير بلوف التاكيهات وغير الزيت زيت الموتور وزيت الفتيس ووفلتر هواء وفلتر زيت فتيس وفلتر بنزين وجوز مساعدين قدام طبعا المساعدين ملهاش دعوه بالمشكله بس بالمرة المهم ندور العربية تدور من اول مره كمان السحب بقى جميل والعفشه جميله والدنيا حلوه قالى ايه رايك قلت له تمام بس فى حاجه مهمه احنا نروح بالعربية مشوار ولما تسخن نبطل وندور ونشوف قالى تمام وفعلا مشينا حوالى نص ساعه وبعدين ندور العربية وكأننا معملناش اى حاجه برده بتغيب فى الدواره فكرنا ان السبب ممكن يكون فى المبينه لما تسخن بصراحه الميكانيكى جاب مبينه من محل قطع الغيار اللى جنبه واتفق مع صاحب المحل انها لو العيب مش منها هيرجعها وقد كان ركبنا المبينه وبرده بتغيب فى الدواره يعنى مش المبينه قلت له مافيش غير طلمبة البنزين قالى بس دى مش بترجع قلت له مش مشكله قالى طيب هجيب الصينى الرخيصة علشان ما نخسرش كتير قلت له ماشى وفعلا ركبنا الطلمبه ومافيش فايده بصراحة الميكانيكى كان هيخبط دماغه فى الحيط قالى انا عملت كل حاجه ممكن تتعمل ومش لاقى اى حل قلت له ممكن تكون حاجه فى الكارته قالى لو فى حاجه فى الكارته العربية مش هتدور اصلا مش هتستنى لما تسخن اصلا المهم قالى مش فاضل فى العربية غير حاجه واحده ممكن المارش قلت له بس مش بيعتل ولا حاجه قالى مافيش اى حل تانى ممكن المارش يكون بيهرب كهرباء طبعا انا حسيت انه بيهيس لان الساعه كانت عدت واحده بعد نص الليل المهم اتفقت معاه اروح له ان شاء الله بكره على الساعه تلاته الضهر علشان نشوف كهربائى يبص على المارش
المهم خدت العربية ومروح فى نص السكه لقيت العربية مش بتسحب وبتقطع تقطيعه خفيفه المهم قعدت اسايس فيها لغاية ما وصلت وقلت جايز ده تأثير الطلمبه الصينى مش عارف المهم حسيت انى زهقان وتعبان جدا ودماغى وقفت مش عارف اعمل ايه؟؟؟؟ أنا عندى استعداد اروح التوكيل بس المشكله فى التوكيل لانى مجرب توكيل هيونداى كتير جدا ان المهندس هيستلم العربية ويقولك تمام العيب ده هنعالجه وبعدين العربية هتدخل الصاله ولما يبتدوا شغل فيها هتكون بردت ومش هيظهر العيب ده وطبعا انا مش هكون واقف علشان اقول لهم طيب لو سمحتوا سيبوها دايره نص ساعه علشان العيب يظهر ولما هستلم العربية هتكون بارده وهتدور على طول فى اى اقتراحات ياشباب جزاكم الله كل الخير ياريت لو حد يعرف مركز متخصص او حد فى التوكيل يهتم بالمشكله ويعالجه بجدية وعموما شاكر جدا لاهتمامكم وجزاكم الله كل الخير واسف على الإطاله

[M.TONSY]

طبعا لازم متحسش بالفرق علشان ركبت طلمبة بنزين صينى
حضرتك ركب الطلمبة الاصلى بتاعتها من اى موزع معتمد لقطع غيار هيونداى الاصلى وبجملت المصاريف
لانى متأكد 100% من العيب اللى عندك ده عيب طلمبة بنزين والطلمبة الصينى اللى ركبتها دى بايظة اكتر من بتاعتها
اسمع كلامى وغيرها بواحدة اصلى ان شاء الله تروح التوكيل علشان تشترى دماغك من المتاهة دى

[gtx295]

المشاركة الأصلية كتبت بواسطة M.TONSY طبعا لازم متحسش بالفرق علشان ركبت طلمبة بنزين صينى حضرتك ركب الطلمبة الاصلى بتاعتها من اى موزع معتمد لقطع غيار هيونداى الاصلى وبجملت المصاريف لانى متأكد 100% من العيب اللى عندك ده عيب طلمبة بنزين والطلمبة الصينى اللى ركبتها دى بايظة اكتر من بتاعتها اسمع كلامى وغيرها بواحدة اصلى ان شاء الله تروح التوكيل علشان تشترى دماغك من المتاهة دى

أنا برده عندي نفس العيب ان العربية ساعات أما أركنها وتكون سخنة مابتدرش فبدور مع دوسة سنة بنزين وبتدور ^^ . ولذلك أعتقد ان العيب فعلا زي ما حضرتك بتقول في الطرمبة تكون بتتأثر بالحرارة مثلا . أنا عربيتي أوبل فكترا 1600 1998 .