اسئله المبتدئين ..عفوا ممنوع الفتى :)))

[Ahmed AlGamal]

الف الف شكر يا باشا على الشرح الوافي الكافي و على الرد والاهتمام بس معلش هتقل عليك و هاتناقش معاك في حاجتين كمان

المشاركة الأصلية كتبت بواسطة 3bd0 بص يا باشا انا عارف ان انتا بتحب تفهم السبب الميكانيكي ورا اي حاجة بتعملها، فانا هاحاول اشرحلك على قد علمي دلوقتي سؤالك عبارة عن جزئين، استخدام الدبرياج وانتا بتهدي سرعتك، واستخدام الدبرياج وانتا بتزود سرعتك. أولا: استخدام الدبرياج وانتا بتهدي: انتا عارف طبعا ان وظيفة الدبرياج انو يفصل العجل عن الماتور، فاالماتور يبقى حر، فتقدر تديلو الترس (الغيار) الانسب ليه لو افترضنا انك ماشي على سرعة 100، وهتنزل لسرعة 90. الترس المناسب للماتور في الحالتين هوا الرابع مثلا. في الحالة دي انتا مش محتاج الدبرياج في حاجة، ممكن ببساطة شديدة تدوس فرامل لحد ما توصل 90 وترجع تدوس البنزين تاني ( انا عادة بهدي الحاجات القليلة ده باني اسيب بنزين من غير فرامل) لكن لو انتا عارف انك هتفرمل لحد 60 او 50 مثلا، يبقى انتا عارف ان الماتور لما يوصل السرعة دي هايحتاج الغيار التالت، فلازم تدوس الدبرياج تمام بالنسبة لموضوع انك هاتبقى بتدي امرين مختلفين للعربية، فانا اختلف معاك انتا مجرد لما بتشيل رجلك من على البنزين، كده مابقاش في بنزين (الا كمية صغيرة جدا لا تكفي انها تحرك العربية) بيدخل الماتور. انت متاكد من الحكاية ده اصل انا عربيتي بتمشي لما بسيب الدبرياج بس و بتمشي كويس كمان يعني ممكن اخلص مشوار كامل من غير ما ادوس بنزين و لا ده عيب في العربية هي لانوس 99 على فكرة دلوقتي الحركة بقت معكوسة، بسبب ان عجل العربية بيلف، فا الترس اللي في الجير بوكس بيلف، وبيلف معاه ترس الماتور، وبالتالي الماتور بيبقى شغال (البساتم بتطلع وبتنزل) من غير اي مجهود من الماتور نفسو. في نفس الوقت، ده لا يؤذي الماتور في اي شئ. انت قصدك يعني الاية اتقلبت بدل ما المتور هو اللي بيتحكم في سرعة العجل . العجل هو اللي بيتحكم في سرعة ترس المتور .. ما هو ده اللي بحكي فيه .. بس انا متفق معاك طالما لمسه بسيطة كده بالراحة تنزلني من 100 ل 90 مافيهاش ضرر انما تخيل دوسة مرة واحدة لحد نص الفرامل اظن انها مش كويسة ابدا و لا عادي ما فيهاش ضرر و لا اجيب للنص او اكتر عادي بس اهم حاجة بالراحة و بالتدريج . انت ايه رايك؟ هل عادي ادوس لحد الاخر بس المهم ما تبطلش وطبعا بسبب ان العجل مش حر ومحتاج انو يشغل الماتور معاه، فبتحس ان العربية متكتفة لكن لما بدوس الدبرياج، بتفصل التروس، وبالتالي مافيش حاجة تدفع الماتور انو يشتغل فتلاقي صوته هدي وعدد لفاته بقى قليل جدا، وفي نفس الوقت العجل بقى حر من الماتور، فتلاقي العربية متهداش بسرعة، ولوعلى منزل هتلاقي سرعتك بتزيد. تمام يا ريس اقنعتني انت نبهتني لميزة تانية و هي ان بكده بتبقى انعم لسرعة المشي و اكثر سلاسة و اريح نفسي من اني افصل التروس عن بعضها و سرعتهم تختلف عن بعض واحد اسرع من التاني و اضطر اعشقهم تاني بالراحة و واحدة واحدة على الدبرياج و رجلي الشمال تورم و هي اصلا ضعيفة ما بستخدمهاش في حاجة خالص فلو شفنا الموضوع ده من وجهة نظر الفرامل، فاحسنلها بمليون مرة ان العجل يبقى متكتف بالماتور احسن ما يكون حر كده وبيجري براحته، اللي هايبقى وحش بالنسبالها ان الماتور يبدأ يشغل نفسو (اديتو بنزين) ويبدأ يحاول يزود سرعة العجلة بنفسو. عشان كده انتا بتستخدم رجلك اليمين للبنزين او الفرامل، ما ينفعش الاتنين. مش فاهم قصدك ايه ثانيا: استخدام الدبرياج وانتا بتزود: انتا لما بدوس الدبرياج لحد الاخر بتفصل الماتور عن التروس تماما وبالتالي دوست بنزين ولا لأ مش هاتفرق مع حد الا الماتور اللي عدد لفاته هايزيد على الفاضي اللي بيخلي الدبرياج يتاكل، هوا ان الناس بتخلي رجليها على الدبرياج طول الوقت حتى بعد ما يخلصو تغير النقلات، لا هوا مداس للاخر ولا هوا متساب للاخر. متشكر على المعلومة الجديدة والتنبيه الهام ده انا كنت فاهم العكس و ان لما بكون دايس بنزين و دبرياج للاخر ده مصيبة و ان بنزين و دبرياج نص نص ده مصيبة برضو بس اقل من الاولانية وانتا بتشيل رجلك من على الدبرياج شوية شوية، انتا بتوصل الماتور (اللي كان حر) بالعجل اللي هوا ماشي بطئ اوي بالنسبة للترس(الغيار) الجديد اللي انتا اديته، وبالتالي ده بيبطئ الماتور عشان هما بقو متصلين ببعض. ممكن الماتور يبطئ لحد ما يوقف خالص (العربية تبطل) فحتة البنزين الصغيرة اللي انتا بتديها دي بتمنع حاجة زي كده تحصل العربيات الحديثة ماتورها بيعرف يتعامل مع سرعة العجل البطيئة دي من غير ما يبطل، فما بتحتاجش تدوس بنزين الا بعد ما تخلص الدبرياج خالص أرجو اني اكون وضحت ولو جزء بسيط من اسئلتك

جزء بسيط :O يا باشا انا متوقعتش ان حد هيبقى عنده طولت بال و ترحيب كده ده انت شرحت كل حاجة و بزيادة كمان .. انا ما توقعتشحد يرد عليا اصلا .. بشكرك الف مرة تاني وانا شايف انك تعمل موضوع لوحده تحط فيه الشرح الرائع ده

:GR OWIN~12:

[أحمد عثمان محمد]

يا جدعان أنا الحكاية دى وجعالى دماغى أوى
مرة أشوف ناس بتهدى بالفرامل بدون دبرياج(فى حالة السرعة العالية أو أستعداد لمطب أو نزول كوبرى) ليه ؟ عشان تيل الفرامل و الطنابير ميتآكلوش و مرة أشوف ناس فى نفس الظروف السابقة ذكرها بتهدى بالفرامل و الدبرياج(يعنى يدوس دبرياج للآخر و يهدى بالفرامل) ليه عشان سلامة المحرك و الدبرياج و تروس الفيتيس و الكردان و الكرونة و مرة أشوف ناس مرة كده و مرة كدة و فى نفس الدواعى و الظروف السابقة
أنا احترت خالص و مش فاهم حاجة خالص أهدى بالإنجين بريك مع الفرامل بدون دبرياج ولا أهدى بالفرامل و الدبرياج ولا كل حاجة و ليها ظروف و دواعى أستخدام معين
أنا حاسس أنى ما بعرفش أسوق
: cry2W9:

[3bd0]

المشاركة الأصلية كتبت بواسطة Ahmed AlGamal الف الف شكر يا باشا على الشرح الوافي الكافي و على الرد والاهتمام بس معلش هتقل عليك و هاتناقش معاك في حاجتين كمان جزء بسيط :O يا باشا انا متوقعتش ان حد هيبقى عنده طولت بال و ترحيب كده ده انت شرحت كل حاجة و بزيادة كمان .. انا ما توقعتشحد يرد عليا اصلا .. بشكرك الف مرة تاني وانا شايف انك تعمل موضوع لوحده تحط فيه الشرح الرائع ده :GR OWIN~12:

لا شكر على واجب

1- ممكن فعلا تهدي من غير فرامل، بس انا قصدي ان الفرامل بردو مش هاضرك في حاجة زي كده.
مش عارف اذا كان ده في كل العربيات ولا لأ، بس انا كنت بنزل لحد 40 بالرابع بالفرامل بس من غير دبرياج، وبرجع ازود بنزين تاني وهيا الرابع وكان كلو تمام.

2- العربية اللي تعرف تعمل زي عربيتك تبقى مية مية وزي الفل، بس ميكونش حد لاعب في السلانسيه
قصدي يعني ان ميكونش حد لاعب في العربية ومخليها وهيا واقفة تاخد بنزين اكتر من الطبيعي
انا بقيس حاجة زي كده بان عدد لفات الماتور والعربية مبتتحركش وانتا مش لامس البنزين يبقى اقل من 1000/دقيقة

3- انك تهدي بسرعة او تهدي بالتدريج معتقدش انها هاتفرق بحاجة، الموضوع كلو بيعتمد انتا بعد ما تهدي هاتبقى سرعتك كام؟ وايه الترس اللي انتا عاوزو على السرعة دي؟ سواءا بقى وصلت للسرعة دي في 5 ثواني ولا دقيقة مش هاتفرق
انا زي ما قولت لحضرتك الرابع عندي كان ممكن يجيب من ال 40، فكتير مثلا اكون ماشي بسرعة (120 مثلا) وتحصل مفاجأة قدامي اروح دايس فرامل بقوة شديدة والعربية تسحف كمان شوية وبعدين العائق اللي قدامي يتشال او يروح لحاله فاشيل رجلي من على الفرامل والاقي سرعتي لسة 50 مثلا، ارجع ادوس بنزين تاني من غير ما ادي الغيار التالت حتى
انتا تعرف ان العربية مش عاجبها الغيار اللي انتا فيه وعاوزة غيار اقل لما تلاقيها بترجرج كده وهاتبطل اهو، ده معناه انك لازم تدوس دبرياج وتدي غيار اقل. وطبعا مع الخبرة والسواقة كتير، هاتعرف حدود كل غيار في عربيتك قد ايه ومش هاتخلي عربيتك توصل للحالة دي.

4- انا عارف ان كل الناس بتقول لازم تشيل رجلك من على الدبرياج وحدة وحدة، وانا فعلا لما بدأت اسوق كنت بعمل كده، بس مع الوقت هتلاقي ان موضوع تغير النقلات ده مش هايخد منك ثانيتين بالكتير
ولو جمدت قلبك شوية هتلاقي نفسك علمت نفسك بنفسك ازاي تشيل رجلك من على الدبرياج مرة واحدة وتفرك بالعربية وانتا طالع من اشارة مثلا

5- قصدي يعني ان طول ما انتا مش دايس البنزين، تبقى متأكد ان مافيش حاجة بتشتغل ضد الفرامل. عمر الماتور ما يحاول يعاكس الفرامل الا اذا كنت قاعد تديله في بنزين
ولذلك دايما بنستخدم رجلينا الشمال للدبرياج بس، واليمين للبنزين أو الفرامل. عشان مهما حصل ما تعرفش تدوس الاتنين مع بعض

6- الدبرياج للاخر مع شوية بنزين مش مصيبة اصلا، الدبرياج نص نص هوا اللي بخلي الاسطوانة تتاكل على المدى البعيد


يا باشا انا معملتش الا واجبي كفرد من افراد مصر موتورز،
وبالنسبة لموضوع جديد، فانا شايف ان لما المعلومات كلها تكون في مكان واحد هاتبقى افضل واسرع للوصول


عندي بس نقطتين عاوز اقولهم في الاخر
انك تهدي العربية بسرعة او بالتدريج بتفرق في عمر الفرامل جدا
لو انتا شايف الاشارة حمرا مثلا من بعيد، وبدأت تهدي من قبليها بكيلو، احسن بكتييييييييير من انك تيجي في اخر 10 متر وتهدي مرة واحدة
في الحالة التانية تيل الفرامل بيتاكل اسرع
النقطة التانية: انا بالنسبالي انا كشخص (دي طريقتي الشخصية مش عاوزها تأثر عليك) اغلب المرات اللي بستخدم فيها الفرامل بستخدم معاها الدبرياج، سواءا هاهدي قليل ولا كتير، بسرعة ولا براحة. ده بيرجع اني مبحبش صوت الماتور اللي على الفاضي ده، وكمان بحب ادي لنفسي حرية اكبر لأن ببقى غالبا مش عارف انا هاهدي لغاية فين، وحتى لو هديت حاجة بسيطة بحب اسقط غيار عشان يديني قوة دفع اكبر.

[3bd0]

المشاركة الأصلية كتبت بواسطة أحمد عثمان محمد يا جدعان أنا الحكاية دى وجعالى دماغى أوى مرة أشوف ناس بتهدى بالفرامل بدون دبرياج(فى حالة السرعة العالية أو أستعداد لمطب أو نزول كوبرى) ليه ؟ عشان تيل الفرامل و الطنابير ميتآكلوش و مرة أشوف ناس فى نفس الظروف السابقة ذكرها بتهدى بالفرامل و الدبرياج(يعنى يدوس دبرياج للآخر و يهدى بالفرامل) ليه عشان سلامة المحرك و الدبرياج و تروس الفيتيس و الكردان و الكرونة و مرة أشوف ناس مرة كده و مرة كدة و فى نفس الدواعى و الظروف السابقة أنا احترت خالص و مش فاهم حاجة خالص أهدى بالإنجين بريك مع الفرامل بدون دبرياج ولا أهدى بالفرامل و الدبرياج ولا كل حاجة و ليها ظروف و دواعى أستخدام معين أنا حاسس أنى ما بعرفش أسوق : cry2W9:

انا شايف ان كل الناس دي صح
انا بعمل الطريقتين، بس الاغلب فرامل ودبرياج مع بعض، ولما رجلي الشمال بتقى وجعاني بنفض شوية للدبرياج لما اجي ادوس فرامل
شوف انتا بتستريح مع انهي طريقة اكتر واعملها، مش موضوع كبير
بس اهم حاجة مش كل مرة تفرمل تنزل للغيار الاقل وتسيب الدبرياج عشان الماتور هوا اللي يوقف العربية، دي مش وظيفة الماتور ولا وظيفة التروس، الحركة دي بتقصر عمر العربية جامد

[Ahmed AlGamal]

المشاركة الأصلية كتبت بواسطة أحمد عثمان محمد يا جدعان أنا الحكاية دى وجعالى دماغى أوى مرة أشوف ناس بتهدى بالفرامل بدون دبرياج(فى حالة السرعة العالية أو أستعداد لمطب أو نزول كوبرى) ليه ؟ عشان تيل الفرامل و الطنابير ميتآكلوش و مرة أشوف ناس فى نفس الظروف السابقة ذكرها بتهدى بالفرامل و الدبرياج(يعنى يدوس دبرياج للآخر و يهدى بالفرامل) ليه عشان سلامة المحرك و الدبرياج و تروس الفيتيس و الكردان و الكرونة و مرة أشوف ناس مرة كده و مرة كدة و فى نفس الدواعى و الظروف السابقة أنا احترت خالص و مش فاهم حاجة خالص أهدى بالإنجين بريك مع الفرامل بدون دبرياج ولا أهدى بالفرامل و الدبرياج ولا كل حاجة و ليها ظروف و دواعى أستخدام معين أنا حاسس أنى ما بعرفش أسوق : cry2W9:

امال انا اللي لسه بتعلم اعمل ايه

بص يا باشا انا الحاجة الوحيدة اللي اتعلمتها ان السواقة مالهاش قواعد و مش 1+1 = 2

انت حاول تفهم على قد ما تقدر طريقة عمل العربية و اسمع الاراء و الباقي يرجعلك انت و تقديرك و احساسك بالعربية .. اللي يريحك و يرحيها هي الاول اعمله و في النهاية العربية طول ما هي ماشية بنستهلك من عمرها مش معقولة هفرشلها سجاد تمشي عليه و امسحها بكلينكس .. اهم حاجة ما نفتريش عليها و نتنتب المحرمات زي انك تنسى و تسيب رجلك على الدبرياج و هي ماشية