البطارية وسننها ----- تانى مرة

[tham1010]

أعزائى اصدقاء المنتدى..

طبعا مشكلة البطارية مش اتحلت لانى بعد ما شحنتها وشغلت العربية تانى يوم وجدتها بارضوا نايمة ومش بتقوم العربية ولكن السنتر لوك شغال وكذلك الزجاج الكهربى. المهم جبت كابل وقدرت اشغلها من عربية تانية. ومشيت بيها حوالى 10 دقائق ورجعت ركنت العربية وسكيت المحرك ورجعت قومتها تانى لقيت العربية تمام والبطارية قومت العربية.

تانى يوم الصبح يعنى بعد اقل من 24 ساعة لقيت البطارية نايمة تانى. رجعت وصلت الكابل وقومتها والمرة دة قعدت الف فى البلد لمدة حوالى نص ساعة على سرعات من 30 كيلوا فى الساعة إلى 60 كيلوا فى الساعة لمدة النص ساعة. ركنت العربية والصبح لقتها برضوا مش بتقوم العربية رغم ان السنتر والانوار والزجاج الكهرباء شغال... حسيت ان الامر ان البطارية السبب وخاصة ان بقلها 2 سنة ونص.

لفيت فى السوق عندنا على انواع واسعار البطارية الجافة وجدت التالى..

اقل سعر للبطارية55 أمبيرهو 400 جنية للتركى والكورى اغلى حوالى 420 وماركة كوب الكورى 430 وليس هناك غير هذا فى هذه البلد المغلقة... وعندما سألت على مركات مثل AC deleco أو كلوريد لم اجد اى منهما وتعلل التاجر ان AC delco غالية على البلد هنا والكولوريد مش بتعطى ضمان وخدمة بعد البيع جيدة.. اللى مخلينى عاوز كلورويد Colorid هو ان البطارية دى عند والدى منذ اكثر من 2 سنة وهى سائلة وشغالة كويس بدون اى مشاكل. الاسعار السابقة بدون ما يأخد البطارية القديمة. هيخفض 50 جنية من السعر لو اخد البطارية القديمة...

فى واحد من اللى سألت عندهم قال لى " يا استاذ، مش تتعب نفسك وتقعد تلف أختار اى حاجة كل اللى فى السوق هنا هتلاقية زى بعضة ومفيش اختلاف من حيث جودة الصناعة سواء كورى او تركى. البطاريات دى حظ يعنى ممكن تجيب مركة وتلاقى انها مش تقعد اكثر من السنة ونص وممكن تجيب حاجة تركى 400 جنية وتقعد معاك اكثر من سنتين" .

أريد ان اعرف الان

1- هل كل البطاريات زى بعض فعلا من حيث الصناعة والتكنولوجيا والفروق فى السعر هى فروق ترجع للعرض والطلب على بعض الاسماء...

2- البائع قال لى لما قلت له انى هشترى سائلة قال لى هو العربية نوعها ايه قلت له ماتركس 2001 قالى لى احسن تجبها بطارية جافة. فهل السيارات الحديثة يلزمها بطاريات جافة فقط.

3- كان فى بطاريات 55 امبير وبطاريات 70 امبير والفرق فى السعر بين الاثنين حوالى 40 جنية. اريد ان اعرف المناسبة لسياراتى؟ هل هناك ضرر من شراء واحدة 55 امبير؟ واحد كان معاه عربية جديدة وكان بيشترى 55امبير لما سأته ليه مش تشترى 70 امبير قال لى مفيش فرق والعربيات الحديثة دلوقتى بتنزل ب بطارية 45امبير... البطارية الكورى القديمة اللى فى السيارى ى Ac delco 62 امبير. ممكن اعرف الفرق بين البطاريات 55 امبير و 70 امبير من حيث الاداء؟ وايهما يجب ان اختار...

شكرا على المشاركة بالرأى فى هذا الموضوع

[a_pharaon]

امن تجاربي مع البطاريات فأن نوع البطارية بيفرق في أعطالها بعد كده
أفضل الأنواع فارتا الألماني الجافة ودي أنا جربتها أستمرت 3.5 سنه
حالياً معايا AC delco وهى كويسه وبركنها بالشهر " بعد فصل الكهرباء " ووبتدور بسهولة بقالها 2 سنه
في أنواع تاني غريبه في السوق زاى بريميوم مكملتشي معايا سنه و شهرين وعملت نفس اللى حصل معاك

الفرق بين الأمبير أنا معرفشى على أساس ايه ولكن أنا معايا عربيتين أونو ونوبيرا 2 والأتنين 55 أمبير وشغلين كويس
الخلاصه : أنتقي نوع بطارية كويس هترتاح بعد كده وأرجع لمانيوال عربيتك علشان تعرف مواصفات البطارية المناسبة

[AbOnOrA]

يا باشا احنا قولنالك من الاول ان المشكلة فى البطارية

بص اولاً مفيش حاجة اسمها كله زى بعض طبعاً فيه فروق فى الجودة والعمر الافتراضى بين كل ماركة والتانية وده ميمنعش ان فيه معاملات تانية زى عيوب الصناعة وفترة التخزين والا مكانش بقى فيه ضمان مع كل نوع لكن عادة الانواع الكويسة لو انتاج حديث نادراً ما بيكون فيها عيوب تصنيع

البطاريات الجافة افضل من كل النواحى طبعاً مش بتحتاج صيانة دورية زى السائلة وكمان مش بتطلع بخر (حارق) زى السائله وده بياثر على حوض العربيه والاسلاك انا مثلاً مرة البطارية السائلة البخر بتاعها أكل الكابل الرئيسى بتاع الكهرباء خالص فاحسن طبعاً تجيب الجافة والفرق يستاهل

اخيراً موضوع الامبير ده احسن تكون اعلى من 45 او 55 علشان لو هتركب اكسسوارات اضائة او اى حاجة بتستهلك كهرباء اكتر تستحملها ومن حيث الاسعار انا كنت جايب ال Acdelco من اسابيع وكانت اسعارها مع استبدال القديمة 375 لل 55 و 465 لل 70 امبير

[tham1010]

سألت اليوم عند فرع شركة منصور فى طريق مصر اسكندرية الزارعى قرب دفرة بطنطا.....

قالى لى البطارية AC delcoe - 55 امبير.. ثمنها 495 جنية والقديمة بيخدوها 25 جنية وقال لى ان البطارية القديمة اختيارى يعنى ممكن تبعها بمعرفتك برة 50 جنية تقف على البطارية 445 جنية 55 امبير... وقال لى ان البطارية لن يتخطى عمرها الستة شهور لان الاقدم من هذا يرد للمصنع....... اشعر انها غالية....

[محمد فيصل]

ليست غالية بسبب انه نوع محترم
ممكن تبيع القديمة بمعرفتك والفرق يساوى
يسر الله لك امرك