|
#371
14-08-2010, 06:57 PM
|
||||
|
||||
رد: أدب الرحلات
ومازلنا فى محطة مصر
فى يوم داخل المحطة الساعة 1 الضهر لقيت واحد على باب المحطة صعيدى بلدياتى وجنبه كرتونة كبيرة وقال لى / لو سمحت يااستاذ نعم خلى بالك من الكرتونة دى لان صاحبها سابها امانة معايا وقال هغيب ربع ساعة اجيب اكل واجى وبقى له ساعة ونص مجاش والقطار بتاعى معاده قرب وعايز ارو ح اركب سيبها وامشى اسيبها ازا ى بجولك (بقول لك) دى أمانة دى مصيبة مش أمانة ازاى انت عارف فيها ايه دى لا تعرف صاحبها لأ خلاص سيبها وامشى مجدرش(مقدرش) يااستاذ اروح من ربنا فين صاحبها بافتراض حسن النية مهمل ومعندوش دم ازاى يسيب واحد مسافر كل المدة دى جنب حاجته يحرسهاله وثانيا هو ميعرفكش وسابها لك وبالتالى لازم يتحمل عاقبة اهمال وبروده بص لى وقال / يعنى هيا الدنيا بجت(بقت) اكديه(كده) غور وانا اللى فاكرك لما شفتك راجل محترم ياع متغلطش وحقك عليا انا اسف انا هروح للشرطة متروحش للشرطة اعمل معروف ليه هيمسكوك انت وهيا ولو فتشوها وطلع جواها مصيبه هتشربها انت ليه اومال هو احنا فين طب حقك عليا عليك طبعا غور امشى لكن رغم عصبيته صعب عليا فوقفت مستنيه ومراقبه من بعيد راح للشرطة وجه ومعاه امين شرطة وبيسلمه الكرتونة وهيمشى مسك فيه فى ايه قال / يانروح المكتب نفتشها لو فيها مصيبة / مخدرات/ اثار /اى بلوى تبقى بتاعتك مفيهاش هتسيبها وتمشى فقال صاحبنا / والحل التانى تقف جنبها لحد ميجيلك صاحبها ايه الوجعة (الوقعة) السودة دى المهم صاحبنا فضل جنبها وشوية وقرر يعمل اللى انا قلت عليها من ساعة فاتت هيسيبها ويمشى وجه يمشى نط امين الشرطة رايح فين مسافر و الكرتونة دى مش بتاعتى تقول الكلام ده جوه فى النقطة فوقف جنبها تانى وهو بيندب حظه الاسود وانقاذا للموقف روحت رايح ناحيته وكلمته بصوت عالى بحيث امين الشرطة اللى مراقبه يسمعنى ايه ده هو صاحب دى لسه مجاش ؟ مجاش ومعرفتش اسلمها للشرطة ليه ياعم جالولى (قالو لى) تستنى صاحبها وانت هتجيبه منين صاحبها انا ايش ورانى (ايش عرفنى) روحت للمأمور وشرحت له الواقعة بصراحة طلع راجل متفهم ومحترم وقال نادى امين الشرطة جه ايه الموضوع ده و اقف جنبها من بدرى وبيقول فى واحد سايبهاله ومجاش ووجه كلامه ليا علاقتك بيه ايه معرفوش انا داخل المحطة لقيته بيقول لى خلى بالك من دى وانا واقف من ييجى ساعتين جنبها وسأل امين الشرطة فقال /فعلا ميعرفوش انا شفته معدى جنبه بالصدفة طب هات الكرتونة والراجل وهنا بدأ الفصل الثانى وانا عمال ادعى واقول تممها على خير يارب وجه الراجل فقال له صاحبك بيقول ان دى مش بتاعتك وتلقائيا رد عليه / صاحبى مين انا معرفش الجدع ده لا ياشيخ والله م اعرفه يابيه ماشى سيب الكرتونة وامشى ومشينا لكن انا فاهم اننا هنتراقب احنا ال2 لحد م نركب واللى هيراقبنا لو ركبنا سوا هيتابعنا لحد ميجيله بلاغ ان الكرتونة مفيهاش حاجة انا متشكر جوى (اوى /قوى) يااستاذ الله يخليك ومتعملهاش تانى انت رايح فين وكنت خايف من السؤال ده فرديت/ انت طريقك ازاى انا مسافر سوهاج وانا مسافر طنطا سلام عليكم وسبته ومشيت 
|
|
#372
14-08-2010, 06:59 PM
|
||||
|
||||
رد: أدب الرحلات
|
|
#373
15-08-2010, 05:40 AM
|
||||
|
||||
|
رد: أدب الرحلات
ولازلنا مع الاذاعة
واللى كتير من الركاب ميعرفوش ان فى موظف فى كل محطة يعلن عن رقم القطار القادم ودخوله على رصيف كام ويقول اسماء محطاته اللى بيقف عليها كمان واعتقد ان المعفى من اسماء المحطات هو مذيع القاهرة لكمية القطارات الرهيبة عنده ولكن اللى فوجئت بيهم بيعلنو عن القطارات فى كل الجمهورية حوالى 7 او 8 محطات واماالباقى القطار يدخل ويقف ويمشى ولاحد يقول عليه حاجة كأنه سر حربى ميصحش حد يعرفه ونوادر المذيعين كالأتى 1- بنها صباحا انسة جميلة صوتها حريمى لكن مسكينة تحس انها هيغمى عليها كل م تعلن عن قطار صوتها كده مسرسع وحاد مينفعش اذاعة خااااااالص وانت فهمت مين جاى فهمت مفهمتش يبقى المهم انك عرفت ان فى قطار جاى مساء عمك حسين (تقريبا ده اسمه ) والله كنت ببقى متكيف وانا بسمعه تحس مذيع هيذيع بيان عسكرى (اللى حضرو حرب اكتوبر وسمعو محمود سلطان وهو بيذيع البيانات او سمعوه فى برنامج عالم الحيوان اللى كان بييجى بعد صلاة الجمعه زمان ) حاجة كده محترمة وصوت واضح ويذيع اسماء المحطات واحدة واحدة وبتأ نى ويعيد الكلام من تانى ومبيزهقش وبيأدى عمله كما ينبغى وهو اللى عرفنى يعنى ايه تأخير كلى اللى شرحتهالكو دى لانه مرة اعلن عن قطار انه متاخر تاخير كلى وانا مفوتهاش وروحت المكتب سالته عن معناها و رد و شرح بدون اى ملل او زهق وتبقى فاهم كل حاجة عن القطار القادم وكم لهذا الرجل صاحب الضمير الحى من خدمات عليا انا وكثير من الركاب وبكفى اننا نبقى واقفين منتظرين قطار معين ونفاجأ بيه مسك الميكروفون واعلن انه متأخر ساعتين مثلا وان اول قطار متجه للقاهرة يصلنا بعد ساعتين وطبعا بعدها نبدأ كلنا نتصرف واذكر مرة كنا فى رمضان وباقى على الفطار ساعة ونص واعلن ان القطارالقادم من اسكندرية والنازل للقاهرة يصل بعد 3 ساعات وان اول قطار يصل بنها متجها للقاهرة بعد ساعة ونص وجاى من الزقازيق وطبعا انقذنا من الفطار فى الشارع و كلنا جرينا على الميكروباس بسبب الكلمتين دول وكان بيتكلم لغة عربية سليمة وكنت بستغرب على كده 2-- طنطا صباحا انسة مجتهدة صوتها أرحم شوية من بتاعة بنها بتحاول تقوم بواجبها على اكمل وجه لكن وكالعادة نظرا لان السكة الحديد معندهاش حد يختار طبقات الاصوات فهيا طبيعة صوتها مايص شوية (دى طبيعة مش هيا اللى مايصة ) واذكر مرة واحنا واقفين على المحطة واحد قال مالها دى عايزة ايه دى فواحد رد عليه / عايزة عريس هههههههه(فينك يااحمد يابدر بس تلاقيها اتجوزت دلوقت وطفشت جوزها كمان ) مساءا / فى طنطا شخص لذيذ بيقول ربع معلومات القطار وانت تخمن الباقى بس امتى ؟؟؟؟؟؟ بعد م يكون مشى او دخل المحطة وقرب يمشى ههههههههههه مع ان موضوع الاذاعة معمول علشان الراكب يستعد قبلها مش بعدها 3ـ اسكندرية القطارات داخلة خارجة داخلة خارجة ( على رأى عادل امام فى شاهد مشافش حاجة) والاذاعة هس هس وممكن يعلن عن قطار او 2 اذا افتكر سيدى جابر بيعلن عن القطارات النازلة القاهرة فقط اما القادمة من القاهرة فكانه سر حربى لايجوز الاعلان عنه الجيزة شخصين الذ من بعض بيذيعو عن القطارات المتجهة الى قبلى فقط اما النازلة للقاهرة فانت وشطارتك ياحلو اومال المحمول عملوه ليه ؟؟؟؟؟؟؟؟؟؟ اسيوط (بلدنا / وسلام كبير اوى لجمهورية اسيوط الديموقراطية) نهارا فى واحد لذيذ بيعلن عن القطارات بلهجة صعيدى صرف مع وجود وش فى ماكينة الميكروفون فلاتفهم اى شىء بالمرة مساء هس هس القطارات داخلة خارجة محدش بيقول عنها حاجة لانهم مبيحبوش يجيبو سيرة حد عندنا فى اسيوط ومحطة اسيوط محطة كبيرة تقريبا بحجم بنها او سيدى جابر ولما عرفو الوش جاى من انهى هورن (مكبر الصوت) وشالوه وخلو واحد بس فى اخر المحطة ومحدش بيسمعه خالص واللى واققف جنبه مش فاهم حاجة برضه هههههههههههه واما بقية المحطات انسى وخد البنسة بس تجيب تمنها ياتسيب البنسة مكانها التعديل الأخير تم بواسطة خالدخليفة ; 15-08-2010 الساعة 05:55 AM
|
|
#374
15-08-2010, 06:10 AM
|
||||
|
||||
|
رد: أدب الرحلات
ناظر دمنهور
ده من اعجب الشخصيات اللى شفتها فى حياتى مبـيـحبش مكتبه ابداااااااااااااا لايمكن تلاقيه قاعد عليه وكنت دايما الحق القطارات الاخيرة بالليل وادخل محطة طنطا واسال الناظر وهو راجل متعاون للحق يعنى ويتصل بدمنهور ولا حد بيرد ويتصل باللاسلكى ولا حد هنا ويضطر يتصل بدنشال او دسونس او ام دينار ( قرى بين دمنهور وايتاى البارودى ويسألهم قطار 30 عدى من عندكم (دى لها قصه هنقولها ) يردو لسه م جاش ويتصل بدمنهور ولا مجيب ويتصل اخيرا ببرج دمنهور فيقول له ان 30 واقف على محطة دمنهور وبعد معاناه نعرف ان 30 فاضل 45 دقيقة ويشرف طنطا وبينى وبينكو انا مفوتهاش وقررت البحث عن ناظر دمنهور ولا مرة نتصل بيه نلاقيه ؟؟؟؟!!!!! شىء عجيب وغريب وبقيت كل م اركب قطار وانا رايح اسكندرية او نازل دمنهور ابص على ناظر دمنهور وادور عليه ومن تكرار المشاهدات منظر واحد لايتغير الباشا (بتاع بالليل) صيفا ساحب كرسى وقاعد فى الهواء الطلق والطراوة على رصيف المحطة شتاء ساحب كرسى برضه وقاعد جوه مكتب الشرطة لكن مكتبه نووووووووو واى ولما فهمت الفولة دخلت فى يوم على ناظر طنطا شوف لنا 934 او 30 واتصل بدمنهور جرس ومبيردش واتصل باللاسلكى (اللى هو عهدة ياراجل يامؤمن ) ولابيرد السيد ناظر دمنهور السيد ناظر دمنهور يادمنهور يادمنهور ومن الزهق رمى اللاسلكى على المكتب متزعلش نفسك ياعمنا اعمل ايه الراجل ده دايما قارفنى مافى مرة طلبته ولقيته اتصل بمكتب شرطة دمنهور اشمعنى هو قاعد عندهم دلوقت او قاعد على كرسى على رصيف المحطة استغرب ومعجبوش الكلام (لانه حتى على الاقل لو الكلام ده صحيح لازم اللاسلكى يكون معاه افرض حد من رئاسة الهيئة طلبه) لكنه كان ضاربها طبنجة وفعلا طلبه فى مكتب الشرطة فقال مش عندى بس هشوفهولك ياباشا على مكتبه فقال م انا طلبته ف مكتبه والتانى توهه / تلاقيك طلبت نمرة غلط بس وانا غمزت له فراح معديها وطلبه فى مكتبه فرد عليه كنت فين ياعم هنا من بدرى ومتحركتش من مكتبى هروح فين يعنى وحسيت ناظر طنطا هينط جوه سلك التليفون يناوله بوكسين فى وشه قلبك ابيض ياعم اسأله على 30 30 جالك ؟؟؟ مشى من ربع ساعة و934 لسه خارج من سيدى جابر تسلم ياسيدى اى خدمة سلام عليكم وعليكم السلام ورمى السماعة وبص لى وقال انت حليت لى لغز محيرنى من سنين وكنت بشك فى الخط اللى بيننا وبين دمنهور طلع العيب مش فى الخط وانا ضحكت طلع العيب فى الناظر ههههههههههههههههههههههههه ه
|
|
#375
15-08-2010, 06:45 AM
|
||||
|
||||
|
رد: أدب الرحلات
نظام متابعة القطارات
كنا شرحنا جزء من هذا النظام فى حلقة سابقة واليوم سنشرحه بالكامل اى قطار فى الدنيا وخصوصا ام الدنيا مصر السائق اى سائق ليس له حرية التصرف بل ماشى بمبدأ اقره عادل ادهم فى أحد افلامه ادبح يازكى قدرة يدبح ذكى قدرة يعنى الاشارة نورت اصفر يبقى لازم يستعد انه يمشى من المحطة وبمجرد م تقلب اخضر يتحرك على طووول الا لو جاله امر بالتحرك باللاسلكى من البرج طيب القطار بيبقى ماشى ماشى ماشى ماشى ولا بيده طبعا لا فى المسافة من اسكندرية حتى بنى سويف وبطول 332 كيلو متر وفى المسافة من اسيوط لسوهاج بطول 92 كيلو متر يكون الموقف كالتالى كل برج مراقبة مسئول عن منطقة معينة ومجرد م يدخل القطار هذه المنطقة بيظهر امامه على الشاشة وهو بيكون عارف ان القطار داخل على منطقته عن طريق التليفونات واللاسلكى وبيكون على اهبة الاستعداد لمتابعته والتصرف فى حالة حدوث اى خلل او عدم سيطرة على القطار لاقدر الله او توقف مفاجىء بلاسبب او اى شىء والمفرووووووووض ان عينه على القطار لحظة بلحظة حتى يدخل المنطقة اللى بعدها وقبل خروجه من منطقته بيتصل بالبرج اللى بعده ويفهمه ان قطار رقم كذا داخل عليه ولذلك زادت سرعة القطارات فى المناطق التى بها هذا النظام وطبعا كل منطقة مقسمة الى عدة مناطق صغيرة وكل منطقة مسئول عنها شخص يراقب الطالع والنازل (المتجه الى القاهرة اسمه النازل حتى اسوان والمتجه الى اسكندرية اسمه الطالع من اسوان ) ومابين المناطق هناك اكشاك صغيرة وهى المسئولة قديما وحاليا فى بعض المناطق عن الاشارات الخشبية(مجازا ولكنها حديد) اللتى تقف بزاوية قائمة وبمجرد نزولها الى تحت معناها فتح السكة للقطارواسمها (السيمافور) فى المناطق التى بها النظام السابق وهو اسمه نظام التحكم المركزى قيمة هذه الاكشاك فقط فى متابعة القطار وتسجيل مروره من امامها بالساعة والدقيقة فى دفتر مخصص لذلك لان هذه المناطق كل اشاراتها كهربائية فى المسافة مابين بنها وبورسعيد بطول 155 كيلو متر ومابين طنطا ودمياط بطول 118 كيلو متر ومابين بنى سويف واسيوط بطول 251 كيلو متر ومابين سوهاج واسوان بطول 412 كيلو متر ومابين محرم بك ومطروح بطول 298 كيلو متر لا احد يعلم شىء عن القطار هنا مكمن الخطورة القطار ماشى ازاى اكشاك الاشارات (السيمافورات) يتصلو ببعض قطار رقم كذا عدى من جنبك لا يتصل باللى قبله نفس السؤال اه مشى من 10 دقايق وهكذا ومابين الكشكين القطار ماشى ماشى ماشى ماشى ولابيده معرفش ان كنت هروح ولا امتى اليوم هيعدى على رأى عبدالحليم حافظ ورغم كده الحوادث الضخمة والكوارث الكبيرة فى مناطق التحكم المركزى اللى هما مفروض شايفين القطار ومتابعينه وفاهمينه ماشى ازاى وبيعمل ايه وشايفين كل كبيرة وصغيرة مش عجيبة دى ؟؟؟؟؟؟؟؟ حادثة قطارى الصعيد 1998 فى البدرشين (احترق القطار بالكامل وخبو الفاعل الاصلى ونسبوها الى انبوبة بوتاجاز ( منطقة تحكم مركزى ) 2006 حادث قطار قليوب (منطقة تحكم مركزى ) 2010 حادث قطار العياط (منطقة تحكم مركزى ) شىء عجيب والله اخيرا معلومة تانية صغيرة الاارقام القطارات دى عبارة عن ارقام الرحلات يعنى لما اقول قطار رقم 157 يبقى ده رقم الرحلة لكن الجرار نفسه مكتوب عليه رقم وكل عربة من عربات القطار عليها رقم مسلسل وكل عربة من دول او الجرار ليها داتا محفوظة فى دفاتر وعلى سيديهات ومعروف قصة حياتها تمام من اول بنائها فى ورش ابو غاطس (علىبعد300 متر من محطة القاهرة ) وحتى كتابة تقارير عن تلفياتها خلو بالكو من الكلمتين اللى جايين دول ولايجوز بأى حال من الاحوال خروج اى قطار من مخزنه او الحوش الى الرصيف لبدء الرحلة قبل ان يوقع مهندسى السكة الحديد على كل مسمار فيه على سركى موجود عندهم وهذا السركى يتسلمه السائق ومن حقه رفض القيام بالقطار ان اتضح له ان هناك عيبا فنيا او خللا بالقطار ويرفض تسلم السركى كما وان هناك قرار لوزير النقل المحترم (ابراهيم الدميرى) بعدم مسير اى قطار مظلم وان حدث انقطاع للتيار اثناء الرحلة يتوقف فى اول محطة له ويتم علاج العطل ويمتنع الكمسارى عن صرف التذاكر اثناء فترة انقطاع الكهرباء بالقطار فان عجز فنيو المحطة المتوسطة (اللى فى النص )عن علاج العطل لايقوم الكمسارية بصرف اى تذاكر حتى وصوله لاول محطة رئيسية ولايقوم القطار منها مستأنفا رحلته الا بعد اصلاح العطل والكلام ده انا شفته بعينى طالعين من المنـصـورة وبنقول ياهادى الكهرباء قطعت فى طلخا حاول يصلحوها اشتغلت شوية وقطعت تانى ووصلنا سمنود والمحلة والكهربا قاطعة والكمسارى قاعد جنبى ولما سالته قال ممنوع صرف التذاكر طالما النور قاطع لحد موصلنا طنطا ولم يقم منها الا لما اتصلح تماما واتطمنو عليه واستأنف مسيره للقاهرة التعديل الأخير تم بواسطة خالدخليفة ; 15-08-2010 الساعة 07:17 AM
|
 |
|
|
