هو الواحد مش هيعرف يسوق في البلد دي ولا إيه

[crime]

بص يا باشا طبعا انت مش غلط ف كل اللى انت بتعمله انت عيبك انك بترتبك بص يا باشا الطريق دلوقتى بقى عامل زى ساحه المعركه يعنى من الاخر امشى بمبدا ياانا اعدى الاول يا الطريق كلوا يقف مع الاخذ بالاسباب طبعا يعنى الكلام ده ميتعملشى مع سواقين النقل علشان هما ف اغلبيه الوقت بيبقوا نايميين والعربيه ماشيه لوحدها تقدر تطبق الكلام ده على سواقين الميكروباص مع الحرص طبعا واولا واخيرا مرياتك مع سواقين الاجره هوا بيرمى وش العربيه بس لو حس ان هوا هايتخبط بيقف احسن من الالف مع الملاكى اعمل اللى انت عايزه وحذارى من الستات ابعد عنهم تماما او اركن خالص و5 دقايق وامشى علشان تبقى بعدت عن مرمى النيران والخطر زال تماما وبعد ما ترخم على خلق الله كلهم ارفع ايدك من الازاز اشاره اعتذار هتلاقى وكان شيي لم يكن

ومع الاسف هوا ده اللى متبع دلوقتى

[mr vigo]

والله الحال من بعضه ياصاحبي
انا كمان عندي نفس المشكله
لكن حبايبنا هنا نصحوني بكلام ريح قلبي قوي
اهم حاجه فعلا انك تهدى خااااااااالص
وتركز في اللي قدامك

[eng.mahmoud]

أنا الحمد لله ابتديت بعربية كابريس كلاسيك .. اللي بيفكر يحكها بيبقى هوه الجاني على عربيته .. أنا مرة واحد غبي دخل فيا من الجنب بياخد يوتيرن وهوه بيكلم الموزة ولاقيته داخل فيا الباشا من الجنب بعربية فيرنا .. الرفرف بتاعه اتشرخ .. لا واللي يضحك بقا اني وقفتله على جنب انه يجي يقولي انا اسف ولا معلش لا مشى وسابني .. انا اتخنقت من الموقف مع ان عربيتي الحمد لله متاثرتش .. بس لو كان معايا عربية كوري كان زمان الباب بتاعي على حجري .. ربنا يسامح كل مستهتر بحاجة الناس .. وفعلا السواقة مملة بس سيبك من المثالية اجري وخد غرز وعيش حياتك لو مشيت مثالي يا ميكروباص يخنقك يا عيل هايف هيلبسك يا تاكسي غبي هيدخلك في حاجة غصبن عنك .. امشي كان الشارع بتاعك انت وجمد قلبك واللي يزعل يتحرق بجاز .. للاسف دي السواقة في بلدك:coptic_Thutm osis1S:

[ehab_nnnn]

بينى وبينك يا ريس أحوال الشوارع فى مصر تغيظ
انا ساكن فى شبرا الخيمه وما ادراك ما شبرا الخيمه
ميكروباصات واخدنها عافيه وسواقين ملاكى بيستهبلوا وركنه صف تالت ووقوف من غير انتظار
وطبعا طبعا البلوه الكبيره ... التكاتك
يعنى من كتر الغلط بقى الغلط عادى والصح هو اللى غريب
انا بسوق بقالى سنتين وساعات بيحصل معايا كده واعصابى تتشد بس لما بتعصب بديها بلطجه وعرز واللى يحصلنى يكسرنى وهو ده اللى بينفع مع الناس دى
بس يستحسن انك تسوق عربيتك فى شوارع نضيفه ورايقه الاول عشان تتعود على ابعاد عربيتك وتقدر مسافاتك صح
وبعد كده انزل فى الزحمه واحده واحده
وانشاء الله تتمكن من السواقه فى خلال اسبوع
وربنا يستر طريقك وطريقنا انشاء الله

[Hisham.Elgazzar]

انا بقالى 15 سنة بسوق ولسه بتعلم ، السواقة ملهاش كبير
والغلطان دايما هو اللى بيتضرر حتى لو راكب دبابة
لازم تكون سواقتك بطريقة دفاعية وإحترس من خطأ الغير
لأن 70% من السواقين اللى على الطريق بياخدوا ترامادول ومش حاسين بأى حاجة
لو مخنوق دلوقتى من السواقة جوا البلد وده حالنا كلنا ماتنزلش فى ساعات الذروة إلا لو مضطر
وحاول تاخد طريق امان كده بالليل مع نفسك تكون مظبط العربية وتنزل طريق مفتوح بالليل وتمشى فيه
مرة او مرتين فى الأسبوع تفتح الموتور وتزود ساعات سواقتك زى الطيارين بالظبط
كل ماساعات سواقتك تزيد كل ماخبرتك تزيد
أبسط مثال : المعلمين بتوع النقل العام شوف ماشاء الله محافظين على عربياتهم من برة إزاى كأنها جديدة ( طبعا أقصد الموديلات الحديثة منها عشان محدش يتريق )
وربنا يوفقك بإذن الله