العودة   مصر موتورز مجتمع السيارات > السيارات اليابانية > نيسان NISSAN > صنى SUNNY

صنى SUNNY نيسان صنى


إضافة رد
 
أدوات الموضوع
  #1  
قديم 25-06-2012, 07:05 PM
الصورة الرمزية YahiaAshraf
YahiaAshraf YahiaAshraf غير متواجد حالياً
التخصص العملى: طالب بالأكادمية العربية للعلوم و التكنولوجيا و النقل البحرى بالاسكندرية
هواياتي: السيارات - الكمبيوتر
 
تاريخ التسجيل: Mar 2011
الموقع: Alexandria
المشاركات: 11,343
YahiaAshraf has a reputation beyond reputeYahiaAshraf has a reputation beyond reputeYahiaAshraf has a reputation beyond reputeYahiaAshraf has a reputation beyond reputeYahiaAshraf has a reputation beyond reputeYahiaAshraf has a reputation beyond reputeYahiaAshraf has a reputation beyond reputeYahiaAshraf has a reputation beyond reputeYahiaAshraf has a reputation beyond reputeYahiaAshraf has a reputation beyond reputeYahiaAshraf has a reputation beyond repute
مميز لكل اللى عاوز يشترى النيسان صنى الجديده (اختبار نيسان الصني الجديدةباحدى معارض نيسان بمصر )

انطباعى العام


مقدمة :-

* طبعا كان لي تجربة قيادة من قبل عند زيارتى لمصنع نيسان وذكرتها فى تقرير لى سابق بالقسم .. ولكن لم استفيض بشكل كامل ومفصل عن السيارة فى التيست دريف نظرا لشدة الحر فى ذلك اليوم .. وايضا لتجربة للسيارة لمسافة ليست طويلة ..

* وكان تقريرى القديم عن ابراز امكانيات السيارة بدون اى عيوب .. وكان الغرض منه ابراز امكانيات السيارة كاى سيارة جديدة يتم طرحها فى الاسواق .. وتطرقت فى الحديث على سبيل الميثال عن وجود باور كهرباء .. وبوجيهات بلاتنيوم .. وايضا على العفشة التى تحسنت عن الموديل القديم .. واسرار كثيرة ذكرتها فى التقرير المطروح فى القسم .. وايضا ذكرت مميزات من الناحية النظرية .. مثل وظيفة البوجيهات البلاتنيوم .. ووظيفة العفشة التروشن بيم والباور الكهرباء .. لمن لا يعرف وظائف تلك الامكانيات .. الى حين ان يتم تجربة السيارة اكثر من مرة وبشكل عملى ..
وفى النهاية لكل شخص منا فى الحياة له اراء خاصة وطباع واذواق وامكانيات وظروف تشكل فى النهاية منظوره العام فى الحكم على الاختيار او الاعجاب بشئ

تجربتى للسيارة للمرة الثانية لمسافة اطول لتقييم مقسم الى الاتى :-

1) الموتور
2) الثبات
3) التكيف
4) الفرامل
5) التقفيل العام
6) العفشة
7) الوسع
8) تنجيد الفرش

1- الموتور :

* من اول تدوير المحرك وصوت التشغيل هادئ .. وصوت الماتور مش خشن ناعم مثل ماتور التيدا .. وايضا صوته اثناء السير هادئ جدا .. وعند الضغط عليه وعمل كيك داون .. صوته قوى ومش مرتفع للدرجة المزعجة ابدا .. وحتى وصوته تحت سرعة 120 مش مسموع وهادئ .. وفوق ال120 مسموع ولكن مش بازعاج

* من وضع الثبات العربية استجابتها قريبة من ال1600 سى سى ولكن مش بقوة طلعت ال1600 .. وطبعا مفروض اى حد بيقارن لايضع فى باله سيارة 1600 سى سى اتوماتيك او مانيول .. لان حتكون المقارنة ظالمة بالفعل
واحساسى عند القيادة .. واستمتاعى مع اصدقائى ومراقبة سواقتهم فى اكثر من مرة .. وجدنا طلعت العربية جيدة وطلعتها مش بطيئة ولا سريعة حتى الى الوصول لسرعة 70 ..

* تجميع العربية من 0 الى 100 من وضع الثبات بنقل الغيارات مانيول على الفتيس الاتوماتيك كانت بتوصل فى حدود من 12 الى 12.5 ثانية فى التيدا عندى بتوصلى الى 10 ثوانى

* حاجة انتبهت اليها وهى تسارع العربية وانت ماشى بيها على سرعة 70 .. ولما تسقط من الd الى الغيار رقم 2 مع قفل الاوفر دريف .. تجميع العربية كان هائل عند التسقيط .. لدرجة على الطريق فى اتجاه الذهاب وكنا ماشيين عكس اتجاه الهواء فرقنا بمسافة 4 عربيات عن الصنى الشكل القديم وكنت انا وبيشوى فى العربية .. وفى طريق العودة ومع اتجاه الهواء الصنى الشكل القديم كانت بجانبنا وكانت بتطلع منا بحاجة بسيطة .. الى ان فرقت بسيارتين عنا فى النهاية

* وبصراحة عجبنى جدا تسارع العربية وتجميعها على السرعات العالية زى وصولها الى 180 مرتاح ووصل بيها بسام عند قيادتها الى 185 وكان على الغيار الثالت ولسه كان فيه رابع .. ولما قفلنا الاوفر دريف لقينا لما العربية نقلت على الغيار الرابع وجدنا الاربى ام على 4500 .. يعنى لسه تقدر تعدى ال185 مرتاحة وتوصل الى 200

* وبعدين فى حاجة كلنا ركزنا معاها فى النقلات وهى ان مفيش نتشة بين الغيارات والعربية بتنقل زى ما بنحس فى التيدا والصنى القديمة ! فمش عارف هل عشان العربية لسه جديدة ولا ايه ! ولا فعلا تم معالجتها

* تسارع العربية مع التكيف محستش باى حمل على الماتور .. وده اللى بيميز مواتير الhr عن تجربة فى سياراتى التيدا .. الميزة ان على السرعات العالية اداء التكيف بيكون ثابت وقوى .. لانه مش بيعمل حمل على الماتور .. على عكس الصنى الشكل القديم اللى بتاخد من الماتور وبيكون فى اجهاد عليه بس طبعا كان المقابل قوة تكيف الصنى الشكل القديم على السرعات المنخفضة .. بس بردوا فى الجديدة انا شايفه بصراحة جيد جدا

2- الثبات :

* ثبات العربية على الطريق الطوالى والسرعات العالية بصراحة جيد جدا .. كنت خايف لتخذلنى .. لكن فعلا زى ما توقعت .. ثابتة فى المناورات وثابتة على الطوالى ..
وده راجع الى الجزء الثانى الخلفى للعربية
انه تصميمه جاى بميل شوية من ناحية السقف الى الزجاج الخلفى بيخلى الهواء يضغط عليه ..

* وكمان بسبب الخطين اللى على سقف العربية اللى بيمر بينهم الهواء
وبيكونوا عامل ضاغط وبيخلى الثبات افضل على سرعات .. وكمان بيقلل مقاومة الهواء وبردوا بيساعد فى استهلاك بنزين افضل .. وبصراحة دى الميزة فى العربية ان تصميمها كله الصاج والفوانيس بيقلل مقاومة الهواء

* وكمان الثبات فى المناورات راجع الى وجود عمودين اتزان استبليزر .. وده بيعطى ثبات فى المنحنيات وفى المناورات

* ومش حتكلم على الثبات اكتر من كدا تانى عشان متنرفز .. وكل ده بسبب المفترى ى ى احمد زونج .. حسيبه هو يقولكم عملت فيه ايه .. لما احمد اخد غرزة على سرعة 180 المجنون ! المفترى .. وتوبة اركب معاه تانى

3- التكيف :

* اداء التكيف بصراحة جيد جدا .. وتبريده يمكن مش حتحتاج تشغل مروحة التكيف الخلفى

* اداء التكيف مش ماثر فى سحب العربيات على السرعات والتسارع .. ولكن فى بداية الانطلاق من وضع الثبات فى تاثير خفيف

* المروحة الخفية هى عبارة عن تقليب للهواء اللى فى المقصورة الامامية من السيارة وبتاخده وبتسحبه للخلف يعنى لما الدنيا قدام تبرد .. يبتدى اللى قاعد ورا يحس ويجيله هواء ساقع

4- الفرامل :

* استجابة الفرامل قوية جدا .. حسيت بقوة استجابتها على السرعات العالية ..
وبالاخص على سرعة 160 .. وبسواقتى للتيدا وكمان للصنى .. حسيت انها اقوى شوية .. ازاى معرفش
وفى اعضاء معايا حسوا بالكلام ده .. مش انا لوحدى

* الفرامل فيها abs,ebd,ba

5- التقفيل العام :

التقفيل العام للعربية حيرنى .. سواء من جوة او من بره فضلت ابص فيها كتير من بره العربية ومن جوة العربية .. عنيه مالمحتش اى مشكلة على عكس الصنى الموديل القديم .. ويارب يفضل على هذا المستوى

6- العفشة :

* الذى انتبهت له من اول مرة عند تجربتى للسيارة فى مصنع نيسان هو نعومية العفشة .. وذلك ما تاكدت منه عند تجربة القيادة للمرة الثانية مع الاعضاء
منذ انطلاقنا من معرض اوتو ايجيبت فى شارع مدرسة المنهل واتجاهنا الى طريق التجمع الخامس طريق (الان ايه) والطريق كان ماليان مطبات .. والعفشة بصراحة كانت فى منتهى النعومية سواء للراكب الامامى او الراكب الخلفى

* وبسؤالى لاحد مهندسى المكيانيكا فى توكيل نيسان .. وضحلى ان مشوار المساعد اطول من التيدا كمان .. والعفشة اتحسنت كتير عن الصنى الشكل القديم

* وبصراحة لما جربت وسوقت كذا مرة .. فعلا حسيت ان العفشة حتى انعم من التيدا بحاجة بسيطة .. والعفشة كمان اصبحت اخف من عفشة الصنى الشكل القديم

7- اتساع السيارة :

* السيارة عبارة عن كابينة واسعة فعلا .. قدام لما تقعد متحسش انك قريب للارض مثل الصنى الشكل القديم .. والكنبة الخلفية تشيل 3 افراد مرتاحين فى جلوسهم عن الصنى الشكل القديم .. وحتى راحة ارجلهم مرتاحة ومش بتلامس الكراسى الامامية مهما رجعت الكرسى الامامى للخلف اللى جالس فى الخلف مرتاح جدا

* الشنطة عميقة جدا .. واستغرت ان الوسع الداخلى للكابينة ماخدش من الشنطة والشنطة عميقة ومرتفعة وتشيل كتير

* الدخول والخروج افضل .. الباب الخلفى بيتفح اوسع عن الباب فى الصنى القديمة او يمكن متيهالى عشان العربية وسعت من الخلف .. بس اعتقد ان الباب فتح وسع فعلا ..
والباب الامامى وانت نازل منه متحسش انك على الارض زى الشكل القديم وبتخرج منه مرتاح جدا

* منطقة الكراسى الامامية اوسع بحاجة بسيطة عن الصنى القديمة لان الطابلوه الامامى بعيد عن الكراسى الامامية شوية

8- تنجيد الفرش :

الكراسى قعدتها اصبحت مريحة جدا .. ومتعبتش منها بصراحة وقعدت فى العربية حوالى ساعيتن على كرسى السائق مرة والكرسى اللى جنب السائ قمرة وعلى الكنبة كمان

العيوب :

* لايوجد اوكر مسند لليد فى السقف ( اللى احيانا بيتعلق عليها جاكت البدلة ) غير فى الامام عند الراكب الامامى اللى بجانب السواق .. واعتقد الاوكر سعرها رخيص جدا .. وكانت مفيدة للراكب الخلفى .. ومفيدة اكثر للناس الكبار سنا .. عشان السرعة فبيمسكه فيها

* درج التخزين فى الطابلوه الامامى مش واسع وكبير زى مافى الصنى القديمة والتيدا .ز بس يمكن عشان هما قسمين الدرج الى جزء اعلى الطابلوه فيه تخزين بدون غطاء للدرج

* الكاوتش صوته اللى يركز معاه يسمع صوته .. واكيد تغيره لنوع افضل مثل بريدج ستون حيكون احسن لان الكاوتش لما يكون ماركة محترمة بيفرق كتير فى صالح حاجات كتير منها العفشة وثبات العربية ولو اتغير حيحسن من العربية بشكل افضل

* اذا كانت نيسان مستقبلا مش حتنتج الا فئة واحدة من الشكل الحالى يبقا ارجوا وضع لونين على خامات البلاستيك مثل الشكل القديم عشان يكسر اى حاجز للناس بخصوص ان البلاستيك الداخلى فقير .. لانه البلاستيك فى نظرى جيد ولكن كثرته فى العربية بيعطى هذه الايحاء

* ايضا الاوكر الداخلى اتمنى نزولها مستقبلا بنواكل

* ولكن فى حين لو تم انتاج فئة زيادة عن اللى موجودة فى السوق حاليا اعتقد ممكن يتداركوا هذه النقاط

* الحاجة الاخيرة هو عند النقل بين الغيارات فى الاتوماتيك بطريقة مانيول .. يعنى انا اللى بتحكم فيها من 1 الى 2 الى d واقفل الاوفر دريف بلاحظ بين كل نقلة ونقلة تاخير حوالى ثانتين .. وبكون حارق وموصل الغيار الى 6500 اربى ام .. بس ده بسبب اكيد ان الماتور 1500 سى سى .. لان مش بيحصل عندى فى التيدا .. ولكن عند وضع الفتيس على الd وبسيبها بتنقل لوحدها مش بحس باى شئ ولا حتى بنتشة فى النقل زى ما ذكرت فى بداية كلامى

فى النهاية

العربية فى رائى الخاص صفقة اكثر من رابحة .. لاى شخص محتاج سيارة 1500 سى سى اسرية وقوية بالنسبة الى فئاتها وواسعة ..

ومش معنى كلامى ده ان السيارة مش بتنافس السيارات ال1600 سى سى .. او لا ترقى الى منافستهم .. فعلا ماتور محترم واستجابته جيد جدا اعطيه 8 الى 10 بالنسبة الى الماتور
تقييمي الرئيسي لبعض النقاط اللي اخترتها شخصيا بالعربية بعد التجربة :

1- تصميم الرفرف الخلفي خارج عن الكشاف الخلفي :


و دي من النقاط اللي اثارت اهتمامي فالتصميم بالطريقة دي هتوفر لينا ثمن الفانوس الخلفي في حالة الاحتكاك و كلنا نعلم ان ده بيحصل كتير كل يوم فالتصميم حاز علي اعجابي ان يكون الرفرف خارج عن الفانوس مش زي العربيات اللي بتلاقي ان الفانوس بيكون في حذا الرفرف كما هو بالصور في العربيات "الكورولا - السيراتو - النيسان الشكل القديم .. و هكذا "





2- المرايات الجانبيه :

لاحظت ان المرايات الجانبية صغيرة في الحجم لكن الرؤية واضحة و لكن كنت شايف انها لو كانت اكبر شوية كانت هتبقي افضل كتير .

3- الخامات الداخلية :

الخامات الداخلية شايف من وجهة نظري انها خامات جيدة جدا و عملية في نفس الوقت بحيث ان اي حد ممكن يغسل العربية من الداخل في اي مغلسة او سبا فبحب العملية جدا ً و ده المنهج اللي نيسان بتتبعه

4- شنطة العربية :

الشنطة عبارة عن بحر غوييييييييييييييييييييط جدا ً و فعلا زي ما اعلان نيسان في التليفزيون عامله الشنطة كبيرة جدا

5- عزل الطابلوه :

يوجد ورا الطابلوه عزل رائع بين المقصورة الداخلية و موتور العربية و ده فعلا له تأثير رائع في عزل صوت الموتور عن العربية من الداخل و ده كان اهتمامي الاول اول ما شوفت العربية اني اتأكد من العزل وراء طابلوه العربية

6- الاكصدام الامامي غير مرتبط بالفوانيس الامامية :

طبعا دي برده من الحاجات اللي عجبتني ان الفوانيس الامامية غير مرتبطة بالاكصدام الامامي بتاتا ً يعني مثلا علي سبيل المثال و ليس الحصر في الميتسوبيشي البوما موديل 2005 كان اول ما يحصل تريح من العربية الامامية للاكصدام كان بيؤثر علي الفوانيس و كان بيخرجها عن الاكصدام و قامت ميتسوبيشي بتعديل الاكصدام في الموديلات التالية لكن نيسان صني الجديدة عملت الفوانيس غير مرتبطة بالاكصدام يعني في حالة حدوث اي ترييح من الامام مش هيحصل اي تأثير علي الفوانيس الامامية






7- الجلوس داخل العربية :

العربية يا جماعة و بدون مبالغة بقت واسعة من الداخل بطريقة جنونية لدرجة اني رجعت كرسي السائق للاخر و طبعا عارفين ان احمد زونج رجليه ماشاء الله طويلة و بالفعل وجدت ان مشكلة الجلوس خلف السائق اتحلت بكل المقاييس



8- كراسي العربية :

انا اعطيت لكراسي العربية نسبة عالية في التصويت لأنها بالفعل اصبحت مريحة جدا جدا و مش ناشفة زي ما كانت في العربية القديمة و مش محتاجه اي تعديلات بتاتا ً و بالذااااااااااااااااااااا ت في المطبات راحة و ما بعدها راحة

9- ابواب العربية :

اصبح غلق و فتح ابواب العربية سلسة جدا جدا و بتغلق من اول مرة و كمان زاوية فتح الباب الخلفي اصبحت افضل من مثيلتها القديمة

10- عفشة العربية :

عفشة العربية جربتها كتير في ظروف مثل مطبات و عيون قطة و كذا ظرف لاقيت انها اصبحت ناعمة و النشوفية اصبحت شبه معدومة و انها افضل بكثير من الشكل القديم

11- سرعة العربية و التسارع مع الصني الشكل القديم :

العربية جبت بيها حتي 160 كيلو / الساعة لكن خوفت اني ازود عن كده يمكن رهبتي من ان العربية جديدة لكن العربية جابت السرعة بكل سهولة و اصدقائي في التجربة جابوا بيها 180 كيلو / الساعة و اكثر رغم ان العربية عامله 40 كيلو فقط علي العداد و علي فكرة لما عملت تجربة الشد مع احمد زونج كان النجاح لتقدم الصني الجديدة في بداية الامر رغم انها 1500 سي سي لكن ابتدأت الصني القديمة في التقدم لكن في وقت ليس بقريب يعني كانت بتتقدم ببطء و علي فكرة حمل العربية بيتأثر جامد و ده كان معايا عدد 2 راكب غيري و كانت الصني القديم راكب واحد فقط مع السائق

12- شاسيه الحماية :

شوفت شاسيه حماية رائع لحماية الردياتير و السربانتينة من اي خبطة امامية و بمساحة محترمة من امام العربية و ده لتقليل الاضرار الناتجة عن الحوادث الجسيمة لقدر الله و دي بتظهر وراء الفليين الابيض كما هو بالصورة





13- الدليات :

للاسف مفيش دليات علي الاكصدامات للعربية و ده ممكن في بعض الاوقات تتكتل الاتربة علي الاكصدامات .

14- الشماسات الامامية :

لاحظت ان الشماسة الشمال اللي ناحية السائق هي اللي فيها المرايا و اللي جنب السائق مافيهاش مرايا و ديه حاجه استغربت ليها جدا .

15- وحدات التخزين :

كان اللي بيميز الصني القديمة هو كثرة اماكن التخزين في العربية لكن الصني الجديدة تأثرت و قلت اماكن التخزين في العربية

16- المروحة الخلفية :

المروحة الخلفية يا جماعة هي عبارة عن تقليب الهواء داخل العربية و غير متصلة بالتكييف بتاتا ً و بصراحة كان نفسي تبقي المروحة متصلة بالتكييف لكن عموما ً يمكن تشغيلها بعد ما العربية تاخد درجة الحرارة المطلوبة من التكييف و علي فكرة المروحة قوية جدا و لها سرعات



17- وحدات الاضاءة داخل العربية :

الاضاءة داخل العربية محترمة جدا و في وحدة بين السائق و الكرسي الجانبي و الوحدة التانية في الخلف و دي عجبتني لأن زيادة في قوة الاضاءة و كمان الاضاءة الامامية في اوقات معينة بتكفي في اوقات سريعة بدل ما تمد يدك للخلف

18- الصاج :

انا شايف ان الصاج متين و قوي لكن مش بمتانة الصني القديمة و احنا عارفين ان اغلب السيارات الجديدة اصبح الصاج ليس بمقدار متانة الصاج في الموديلات القديمة لنفس السيارات

19- الفرامل :

الفرامل قمت بتجربتها في كذا ظرف و بالفعل الفرامل قوية جدا جدا و تلحقك علي السرعات العالية

20- التكييف :

كعادة العربيات الياباني تلاجه و غير مؤثر علي الموتور بتاتا ً عند التشغيل

21- الموتور :

عجبني جدا الشكل داخل الكابود و الوسع و سهولة انك تعمل اي حاجه في العربية و كمان عجبني ترحيل الموتور الي الخلف و ده خلي في وسع محترم جدا بين الموتور و العربية من الامام



الانطباع العام


تم عمل اختبار قياده لمده ساعه لنيسان صني 2012 ال 1500 سي سي اوتوماتيك 99 حصان 134 عزم وسعر العربيه 99900 وسوف يتم تقييم السيارة من حيث النقاط التاليه

من حيث النقاط التاليه :

1) الشكل الخارجي
2) الصالون الداخلي والشنطه الخلفيه
3) الخامات والكماليات وعوامل الامان
4) اداء التكييف
5) القياده العاديه للسيارة
6) القياده الرياضيه للسيارة
7) التقييم العام للعربيه ككل
8) ما ينقص هذه السيارة

1- الشكل الخارجي :

العربيه شكلها مقبول بالنسبه لي وانسيابي ومصصم بشكل يعمل على تقليل مقاومه الهواء للسيارة مما يساعد على تحسين اداءها وتوفير البنزين

2- الصالون الداخلي والشنطه الخلفيه :

العربيه ما شاء الله واسعه جدا جدا والصالون مريح من قدام ومن ورا لدرجه ان انا رجعت كرسي السائق على الاخر وما كنتش طايل دواسه البنزين قوي ونزلت جربت القعده ورا وكان في مسافه لاتقل عن 20 سم بين ركبتي والكرسي الامامي وانا طولي 175 سم ببساطه لسهوله المقارنه العربيه اوسع من التيدا السيدان بحنه كويسين قوي
كمان شنطه العربيه ما شاء الله واااااااااااااااسعه جدا وممكن تشيل فيها اللي انت عاوزة وبرضو اكبر من شنطه التيدا

3- الخامات والكماليات وعوامل الامان:

بصراحه الخامات ليست عاليه قوي ولا فقيرة قوي بس هي المشكله فيها ان العربيه كبيرة من جوة وفرش الابواب كبه بلاستيك بس هو باين انه فقير شويه عشان الباب كبير فتحس ان العربيه من جوة بلاستيك لكن في الوقع هو بلاستيك زي اي فرش باب عادي في عربيات كتير ومش رديئ خالص لكن نقدر نقول انه معقول وكمان سبب الاحساس بالفقر ده هو استخدام لون واحد بس في فرش الابواب لكن لو كان في لونين غامق وفاتح مع بعض كان الموضوع بقى احسن كتير
بالنسبه للكماليات فهي عاديه تكييف وباور وسي دي عريض زي بتاع التيدا اسطوانه واحده مش 6 وزجاج كهرباء والدريكسيون قابل للتعديل ومروحه خلفيه لتوزيع هواء التكييف بشكل احسن في العربيه وكمبيوتر رحلات كامل بيدي استهلاك البنزين اللحظي والمتوسط وعدادات لحساب المسافه المقطوعه
بالنسبه لعوامل الامان فانا شايف انها حلوة قوي بالنسبه لعربيه بالسعر ده .. العربيه فيها ايه بي اس وايه بي دي وبريك اسسيست واتنين اير باج

4- اداء التكييف :

انا شايف ان التكييف جميل جدا وكانت تجربه العربيه الساعه 2 الظهر وكنا عاملين التكييف على 2 وكان عامل تبريدكويس في العربيه وكمان وجود المروحه الخلفيه مساعد جامد على توزيع الهواء داخل العربيه بشكل جيد جدا

5- القياده العاديه للسيارة:

اولا انا طبيعه سواقتي ان رجلي مش تقيله على البنزين ومش بقرض على العربيه في العادي وبمنتهى الصراحه العربيه في السواقه العاديه داخل البلد ممتعه جدا ومش بتحس انك سايق عربيه 1500 خالص وبصراحه ما حستش بفرق بينها وبين التيدا في السواقه الهاديه اللي من 0 ل 100 داخل البلد وده شئ ممتاز جدا

6- القياده الرياضيه:

انا صحيح سواقتي العامه هاديه بس لما بشد بالعربيه باجيب اخرها بمعني الكلمه يعني بسقط وبقفل الاوفر درايف وبجيب سته ونص على الار بي ام وانا بالتيدا كنت بجيب على التاني 110 والتالت 180 والرابع كنت بوصل بيه ل 200 والطريق بيكون خلص والكلام ده على محور الان ايه وتم تجربه الصني في نفس الطريق وبنفس طريقه القياده والنتجيه كانت ان العربيه جابت 110 على التاني و 180 على التالت والطريق كان خلص بس ممكن لو كان الطريق اطول شويه كنا ممكن نشوف الرابع اخباره ايه
رايي ان العربيه بالنسبه ل 1500 مش وحشه بالنسبه للتسارع بس طبعا اخدت وقت اطول من التيدا شويه بس اهي جابت 180 على التالت مع الوضه في الاعتبار ان نيسان مش عامله العربيه دي بالذات للكلام ده
وملاحظتي برضو ان الفتيس مع الحرق بياخر شويه في النقله

7- التقييم العام للعربيه ككل:

انا قولتها قبل كده وهافضل اقولها لاني فعلا مقتنع بوجهه النظر ي الا وهي ان لما تشوف العربيه وتحكم عليها لازم نبقى عارف ان العربيه دي مش عباره عن نقله خطيرة من عربيه لعربيه الا اذا كنت راكب عربيه اصلا قديمه جدا فا دي ها تكون نقله طبعا
لكن العربيه دي هدف نزولها اصلا هو عربيه بتشم بنزين وواسعه جدا وشكلها حلو وعوامل امان كويسه جدا بسعر اقتصادي جدا
لو بصيت للعربيه دي من المنظور ده فعلا ها تتبسط منها جدا
ورايي الشخصي في العربيه دي من المنظور ده انها عربيه ممتازة جدا وفعلا احب احيي نيسان على تحقيق معادله السعر مقابل القيمه

8- ما ينقص هذه السيارة:

انا مش ها اقول ان العربيه ناقصها كماليات كذا وكذا لان اي حاجه ها تتحط في العربيه اكيد ها ترفع سعرها بس على الاقل كان ممكن بس يستخدموا لونين في التابلوه وفرش الابواب للتغلب على انطباع فقر الخامات وخصوصا زي ما قولت ان المساحات اللي متغطيه بالبلاستيك جوة العربيه كبيرة فوجود اللونين كان يا غطي شويه على الاحساس ده

في النهايه

ده تقييم شخصي بني على تجربه شخصيه عمليه للسيارة لمده ساعه تقريبا
ارجو اني اكون قدرت اوصل لحضراتكم معلومه تفيدكم في تقييم العربيه عند اتخاذ قرار الشراء
وطبعا لازم تروحو تشوفو العربيه بنفسكم عشان تقدروا تحكموا عليها



الانطباع العام


1) الشكل الخارجي
2) السيارة من الداخل
3) التقفيل

4) الموتور
5) الفتيس
6) التكييف
7) العفشة

8) الثبات
9) الفرامل


1- الشكل الخارجي :

السيارة من الامام شكلها جميل .. لكن من الخلف شكلها مش عجبنى < أذواق > .. الخطوط الانسيابية للسيارة نجحت في اختراقالهوا بطريقة ممتازة ..

أبواب السيارة بتقفل باحكام من غير أي جهد أو رزع ..

2- السيارة من الداخل :

* من الداخل تكاد لاتسمع صوت الهواء الخارجي .. البلاستك المقوى المستخدم في السيارة من الداخل وخصوصا في الأبواب ليسبالممتاز ولكنه جيد .. الطبلوه بيفكرني بـطبلوه new accent 2010 ..

* السيارة واسعة جدا من الداخل .. اصبح الطلوع والنزول من السيارة سهل .. مساحة الأرجل من الامام و الخلف اصبحت ممتازةو احسن من التيدا في النقطة ديه .. لكن يعيب الكنبةإنها ليست عريضة مثلا التيدا لكن تاخد 3 ورا مرتاحين قوي ما شاء الله .. المسندالأمامي اصبح اطول من القديمة ..

* شنطة السيارة واسعة جدا .. أوسع من القديمة بس في الطول مش العرض ..

* الكراسي اصبحت بجودة عالية .. مريحة جدا ما شاء الله .. احسن من القديمة مليون مرة ..

3- التقفيل :


* التقفيل بصراحة عالجوا فيها كل شيء ولم اجد أي مشكلة واحدة .. غير بس البلاستيك المستخدم كثيرا ولكنهم تقفل كويس ..

* بودي السيارة ليس ممتاز ولكنه جيد وده اللي مسبب وزن السيارة الخفيف اللي هي 1000 كيلو و ضعيف في حتت معينة زيالكبوت مثلا ومش معنى كده انه بيلق مع السرعات .. اطلاقا .. وطبعا خفية الوزن ده بيفرق فى استهلاك البنزين

* مرايات السيارة صغيرة ولكن روءيتها جيدة

4- الموتور :

* بصراحة شكله جميل جدا .. والتقفيل حواليه ممتاز ومخدوم جدا .. ولماتيجي تفتح الكبوت هتلاقي بعرض السيارة من الامام عمودمن الصلب عشان يحمي السيارة من التصادم العنيف ..

* الموتور 1500 cc .. 99 حصان .. سيركاتينة جنزير .. بوجيهات بلاتنينوم بتغيركل 100 ألف وأكتر ..وبوركهربة لم يسحبمن قوة الموتورشيء .. والعربية drive كهربة مش بـ wire .. يعني موتور ما شاء الله عملي جدا وموفر في البنزين .. وصيانته مش مكلفة نهائي ..

* الموتورليس ضعيف زي ما الناس فاكرة .. لكنه مش هيعجب الشباب اللي بيحب يجري من الطالعة الاولى وكده .. لكن بعد كدهبتلاقي وحش تحت الكبوت .. أنا بنفسي جايب 180 على التالت بكل سهولة والعربية لسةعاملة 40 كيلو وكنا 3 في السيارةوالسيارة في التاليين يعني حاجة فوق الممتاز .. بصراحة عجبني جدا .. وكنت واثق الموتور ده محترم .. وفعلا ماكسفنيش

5- الفتيس :


الفتيس الاوتوماتيك استجبته رائعة وليس به أي نتشة زي القديمة ..

6- التكييف :


التكييف الامامي والخلفي دفعهم للهوا قوي وبيخلي العربية تلاجة بدون أي تأثيرعلى قوة الموتور ..


7- العفشة :

العفشة اصبحت انعم بكتييرمن الاول .. بقت مثل عفشة التيدا لم احس بشيء من الخارج ولاخبط ولارزع ولاأي حاجة ما شاء الله..

8- الثبات :

* الثبات ليس بقوة الصني القديمة ولكن ثباتها يقارن بـالتيداواحسن شويتين كمان .. وكمان السيارة دي 2 stapilizer قدام وورا .. يعيبها فقط الكاوتش الماكسيس السيء .. ولو كانوا نزلوا فيها بريدج ستون كان هيظبطها جدا..

* أنااخدت بيها غرزة قطم على 180 وأحمد tv ضربني ساعتها ههههههههههههه .. بسم الله ماشاء الله عجتني جدا ..

9- الفرامل :


الفرامل قوية جدا ما شاء الله والعربية بتلم نفسها على أي سرعة وبـسلاسة جدا ..

أتمنى إني ماكُنش نسيت حاجة !!!

عايز اقول في الآخِر إن السيارة سعرها فيها و اكتر كمان و بجد اللي هيشتريها و خصوصا لو عائلة هتتبسط منها جدا


الانطباع العام

1) الخامات الداخلية للعربية
2) التقفيل الداخلي للعربية

3) وسع العربية من الداخل
4) شنطة العربية
5) الارتفاع الداخلي للعربية
6) ثبات و تسارع العربية بالتكييف و بدون
7) الباور ستيرنج


1- الخامات الداخلية للعربية :


الفبر الداخلي جيد وليس كمان يقال عنه إنه سيء وفي رأيي الشخصي عملي أكثر من الصني القديمة لأن الباب عندي اتنقر وطلع في سفينج تحت الطبقة الخارجية وشكلة ما بقاش ظريف عكس الجديدة..

2- التقفيل الداخلي للعربية :


التقفيل جيدة جدا وأفضل من الصني القديمة.. التابلوه جيد جدا وتقفيلة ممتاز..

3- وسع العربية من الداخل :

الدخول والخروج سهل جدا ودي مشكلة بتقابلني في الصني القديمة وهي إن رجلي بتخبط في الدركسيون، خصوصا وأنا خارج من العربية..

4- شنطة العربية :

الشنطة ما شاء الله واسعة جدا وأوسع من القديمة بحوالي 30 لتر ..

5- الارتفاع الداخلي للعربية :

ارتفاع السيارة مناسب وإن كان أقل بنسبة بسيطة عن القديمة...

6- ثبات و تسارع العربية بالتكييف و بدون :

السيارة تسارعها جيد جدا وخصوصا على السرعات العالية ومع التكييف وثباتها جيد وكانت كويسة جدا معايا لحد 160 ولمت نفسها في حركة مفاجأة بدون مشاكل، قدرتها على المناورة جيدة جدا، التكييف رااااااائع وغير مؤثر على الأداء لكن شكل ازرار التكييف غير مقبولة بالنسبة لي

7- الباور ستيرنج :

الباور ممتاااااااز وناعم وبيفصل على سرعات وبيتقل ودي أنا حسيتها

عيوب السيارة :

ماركة الكاوتش (ماكسيس صيني)

صفقة رابحة :

وفي النهاية السيارة تعتبر صفقة أكثر من رابحة وأنا كنت واحد من الناس اللي غير متفائل بيها وبشكلها بس لما شوفتها على الطبيعة وجربتها على طريق مفتوح بصراحة غيرت رأيي تماما وأتوقع لها النجاح .. تحياتي


يارب الموضوع ينال اعجابكم

الموضوع مجمع من ردود
تحياتى



رد مع اقتباس
  #2  
قديم 25-06-2012, 08:06 PM
الصورة الرمزية Depsi141
Depsi141 Depsi141 غير متواجد حالياً
من انا؟: عبد الرحمن عبد الله
التخصص العملى: تمديدات كهربائية
هواياتي: السفر في السيارة والمغامرة
 
تاريخ التسجيل: Jun 2012
الموقع: في الارض الجميلة
المشاركات: 37
Depsi141 will become famous soon enoughDepsi141 will become famous soon enough
افتراضي رد: لكل اللى عاوز يشترى النيسان صنى الجديده (اختبار نيسان الصني الجديدةباحدى معارض نيسان بمصر )

ماشاء الله تقرير ولة اروع ممكن تقولنا ماركة او نوع المسجل في صني
رد مع اقتباس
  #3  
قديم 25-06-2012, 08:58 PM
heba_hasan heba_hasan غير متواجد حالياً
 
تاريخ التسجيل: Dec 2010
المشاركات: 85
heba_hasan will become famous soon enoughheba_hasan will become famous soon enough
افتراضي رد: لكل اللى عاوز يشترى النيسان صنى الجديده (اختبار نيسان الصني الجديدةباحدى معارض نيسان بمصر )

ميرسي علي الشرح دا
انا كنت محتاره بينها وبين اكسنت RB بس بعد كلامك هختار الصني ( ولا إيه رأي حضرتك ) ؟
ممكن تفيدني عشان انا خلاص هقرر بعد كلامك
رد مع اقتباس
  #4  
قديم 25-06-2012, 09:05 PM
الصورة الرمزية AKRAM_BMW
AKRAM_BMW AKRAM_BMW غير متواجد حالياً
من انا؟: نشيط
التخصص العملى: محاسب
هواياتي: الهكر - السيارات
 
تاريخ التسجيل: May 2010
الموقع: الاسكندرية
المشاركات: 379
AKRAM_BMW has a brilliant futureAKRAM_BMW has a brilliant futureAKRAM_BMW has a brilliant futureAKRAM_BMW has a brilliant futureAKRAM_BMW has a brilliant futureAKRAM_BMW has a brilliant futureAKRAM_BMW has a brilliant futureAKRAM_BMW has a brilliant futureAKRAM_BMW has a brilliant futureAKRAM_BMW has a brilliant futureAKRAM_BMW has a brilliant future
افتراضي رد: لكل اللى عاوز يشترى النيسان صنى الجديده (اختبار نيسان الصني الجديدةباحدى معارض نيسان بمصر )

مشكور

فعلا شرح ممتاز

:GR OWIN~12:
__________________

مع تحياتى



رد مع اقتباس
  #5  
قديم 25-06-2012, 09:07 PM
الصورة الرمزية AKRAM_BMW
AKRAM_BMW AKRAM_BMW غير متواجد حالياً
من انا؟: نشيط
التخصص العملى: محاسب
هواياتي: الهكر - السيارات
 
تاريخ التسجيل: May 2010
الموقع: الاسكندرية
المشاركات: 379
AKRAM_BMW has a brilliant futureAKRAM_BMW has a brilliant futureAKRAM_BMW has a brilliant futureAKRAM_BMW has a brilliant futureAKRAM_BMW has a brilliant futureAKRAM_BMW has a brilliant futureAKRAM_BMW has a brilliant futureAKRAM_BMW has a brilliant futureAKRAM_BMW has a brilliant futureAKRAM_BMW has a brilliant futureAKRAM_BMW has a brilliant future
افتراضي رد: لكل اللى عاوز يشترى النيسان صنى الجديده (اختبار نيسان الصني الجديدةباحدى معارض نيسان بمصر )

أحب أضيف الفديو ده
للموضوع

__________________

مع تحياتى



رد مع اقتباس
إضافة رد

أدوات الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code متاحة
كود [IMG] متاحة
كود HTML متاحة

الانتقال السريع

 MasrMotors غير مسؤول عن أي اتفاق تجاري أو تعاوني بين الأعضاء
التعليقات المنشورة لا تعبر عن رأي MasrMotors ولا نتحمل أي مسؤولية قانونية حيال ذلك ويتحمل كاتبها مسؤولية النشر


الساعة الآن 01:11 PM.


Powered by vBulletin® Copyright ©2000 - 2024, Jelsoft Enterprises Ltd.
www.MasrMotors.com ™ Copyright ©2008 - 2024
Egyptian Automotive Community
جميع الحقوق محفوظة - مصرموتورز 2008 - 2017