هتجنن أجيب لوجان ولا فيرنا :(((((((

[Dr.Mustafa]

المشاركة الأصلية كتبت بواسطة sherifabden بسم الله الرحمن الرحيم ربنا يكون في عونك حلو اوي ممتاز فعلا دا سعراها الاصلي موديل 2013 لسا منزلش واللي يقولك نزل يبقا نصاب ياراجل اتقي الله !! اللوجان تكييفها اسكيمو والله لا لا لا الكلام دا كان زمان دلوقتي منتشرة في القاهرة بالهبل ومش بعيد تلاقيها عندك لا مؤخاذة ياباشا الميكانيكي دا جاهل لان الميكانيكي لازم يتطور دا نص العربيات في مصر فيها كمبيوتر ومين قال انها مشفرة والكلام الفاضي دا اللوجان بسيطة جدا في الصيانة العربيات المعقدة صح في الصيانة هيا الرينو فلوانس والميجان انما اللوجان بسيطة جدا ومن الاخر انا مبحبش شغل الميكانيكية خااالص انا توكيلاتي لان كل الميكانيكية اللي اتعاملت معاهم كانوا نصابين هههه والتوكيل هوا ادرى واحد بالعربية ولو نصب التوكيل عليك تقدر تاخد حقك منه بمليون طريقة انما لو ميكانيكي نصب عليك والله مش هتطول منه مليم احمر خلاص يبقا مش مهم تجيب الفيرنا في المنصورة في فرع في شارع جيهان منطقة الجامعة ودا معرض وفي مركز خدمة معتمد اسمه العدوي على طريق المنصورة طنطا يعني مفيش حاجة بعيدة عنك ياحبيبي قطع الغيار بقت في كل حتة ومش غالية ابدا وانا زغاي اكتر منك هههه ماشي مش مشكلة لكن انتا في المنصورة وطبعا مليانة مطبات (انا غبي طب ماكل محفظات مصر مليانة مطبات) فهل هتجيب الفيرنا الواطية لا طبعا هل هتجيب عربية مفيهاش اي وسائل امان تحمي اي حد في العربية مكان عربية واخدة 3 نجوم في اختبارات التصادم وفيها ايرباج لسيادتك نصيحة مني هات اللوجااااان وبس وتقبل تحياتي

ردك مقنع جدا جدا جدا و انا مقتنع بكل حرف حضرتك قلتو

و حضرتك ضفتلي ان اللوجان تكييفها جميل اوي و ان توكيلها مش غتت

يارب استرها معايا و ابقى لوجاناوي قريب بعد ما ابيع نفيسة ( التيريوس )

ألف شكر على طولة بالك و صبرك عليا و ردك المحترم اوي

[Dr.Mustafa]

المشاركة الأصلية كتبت بواسطة akerima عجبني اوي بجد الرد دا - احب بس اضيف ان ماتور اللوجان مش بالتعقيد اللي الناس متصوراه بالعكس هو مش معقد بالمرة ويكاد يكون ابسط من ماتور الفيرنا اللي اي قطة بعفريتة يصلحة - بس للاسف الميكانيكي بتاع حضرتك ماشافش اصلا ماتور اللوجان عشان يحكم علية وبيفتي باللي سمعة وخلاص

هوا بالفعل الميكانيكي اللي قالي كده في مدينتي ( شربين ) و طبعا مشافش اللوجان خالص

بس بيحكم بسمعة الفرنسي و انو تكنولوجيا ( و دي من وجهة نظري ميزة مش عيب )

لأن مش مطلوب إني ابقى بشتري عربية موديل 2012 بتقنية موديل 1999

عشان خاطر الميكانيكي يبقى فاهم فيها .. ده غير ان مدام ليها توكيل و مش هيقولي

اطلع برا زي ما توكيل دايهاتسو عمل معايا يبقى اكيد هختار التوكيل على الاقل الناس

اللي فيه دارسة و فاهمة اكتر من اي ميكانيكي

[Dr.Mustafa]

المشاركة الأصلية كتبت بواسطة sosoabdu يا باشا انصحك باللوجان بلا تردد ... محسوبك زقازيقي راكب لوجان 2012 مانيوال من حوالي سنة بعد ست سنوات كفاح مع المغفور لها الدايو- الله لا يرجع ايامها - فعلا الاوروبي ركوبة أعلي .... لم احتك بمطب في الشرقية و الله بدون مبالغة ......العفشة مبهرة - نعومة السنيييييييين - شنطة بحر 510 لتر .. مقصورة قيادة و صالون واااااااااسع في منتهي الشياكة لا يقارن بالمرة بجحر البلاستيك الدايو و الفيرنا الضييييق الرديء... الموتور معقول جدا و هو بالمناسبة موتور الميجان 99 و تكنولوجيته عااااادية جدا و تاريخه بلا مشاكل تقريبا .....فرامل قوية و ايرباااااااااج- شفت السيفتي ؟؟؟ - لو عايز تاكسي جيب فيرنا او لانوس ..... انما شياكة و احترام و برستيج - كصاحب ملاكي يعني- تبقي اللوجان انسب .... و علي فكرة قطع الغيار متوفرة جوة التوكيل و برة التوكيل ... مالية التوفيقية و شارع دمشق بالاضافة للمستعمل اللي رادم الحرفيين و هي قطع غيار معمرة جدا و مش غالية للدرجة بشهادة كل المختصين ..... ربنا ينجيك م الفيرنا اللي بتحك في الخطوط اللي مرسومة ع الارض و صاحبة ميكس الهلاك المتمثل في الموتور الرهيييييب مع الفرامل الضايعة و انعدام كل وسائل الامان ... و تنه عاااااااامر

أهو دي الردود انا بقى اهلي من الزقازيق و بحتاج اروح من المنصورة للزقازيق

كل اسبوعين تقريبا و الطريق بسم الله ما شاء الله عبارة عن مطبات و بينها شوية اسفلت

فشهادة حضرتك للوجان اكيد في محلها و تعلي قيمتها في نظري ألف شكر يا جميل

[d,mhmd brbry]

ربنا يهديك للى فيه الخير يا دكتور يارب وتجيب حاجة ماتندمش عليها

[michaelmic]

عاوز رايى من الاخر هات فيرنا و ياريت لو تجبها اوتو تبقى زى الفل