|
#1
04-02-2011, 12:05 AM
|
||||
|
||||
خطاب متظاهر في التحرير! (اهم من خطاب الرئيس)
يا عم بالا مظاهرات بلا قرف.عايزين ناكل عيش.أقعد فى البيت
يا جدعان كفايه مظاهرات ماهو عين نايب وغير شوية وزرا.حلو مش وحش يا شباب العيش والخضار غلى وعايزين ناكل ونروح نشوف مصالحنا ... فى ناس هو ده مبدئها فى الحياه.ادينى جبنه وعيش وسيب الحكومه تعيش صحابى اللى عايشين بره بيقولوا ان الغرب بيقول علينا شعب سلبى وبتاع بطنه تسمعوا عن غاندى؟ عمر المختار؟جيفارا؟ ايوه هوه اللى صورته على الحيطه تعرف يعنى ايه طموح؟ دفع الظلم؟ الساكت عن الحق شيطان؟ شعب متحضر بيتظاهر سلمى؟ طب بلاش...هقولكم حاجه حلوه أوى انا دخلى فى الشهر اكتر من 3 الاف جنيه عندى عربيه وشقه وبسافر اتفسح بره مصر عمرى ما كنت من الطبقه المطحونه بس خرجت يوم جمعة الغضب وبعدها عشان أقول عايز حق اخواتى المطحونين عايز حق الغلابه فى العشوائيات والقرى والنجوع عايز حق الشاب الغلبان اللى بيتخرج من كليته مش عارف يشتغل.مش قادر يتجوز وهيموت مش عارف ينزل يخرج مع صحابه عشان معهوش تمن المشاريب! عايز حق البنت الطيبه اللى خرجت من بيتها تشتغل عشان ابوها خلاص مش قادر يديها مصروف أنا عمرى ما كنت اخوان ولا يمين ولا يسار عمرى ما اعتقلت سياسيا ولا دينيا ولا تم اغتيال اى فرد من عائلتى بس خرجت عشان عشان أقول لأ لظلم وطغيان الداخليه لأ لغشم وجبروت أمن الدوله.لأ لقانون الطوارئ خرجت أقول عايز حق المعتقل السياسى اللى مشافش بيته من 20 سنه بدون تهمه عايز حق اللى اتعذبوا واتقتلوا واتقهروا فى ظلمات أمن الدوله عايز حق دم المصرى البسيط اللى خرج يقول لأ ومعهوش حتى قصافه فدهسته عربية أمن مركزى أنا بأه معايا فلوس وبشرب ميه معدنيه وعندى كمان فلتر مستورد فى البيت وبشترى أغلى فاكهه وأحسن خضار وبجيب العيش أبو جنيه الديب فريزر مليان لحمه ومعنديش أى تلاته مشكله لو كيلو اللحمه بقى ب100 جنيه بس خرجت عشان عايز الناس متشربش الميه اللى كلها بكتريا وفطريات وصرف صحى خرجت عشان الناس اللى بنعالجهم أن وزمايلى الأطباء من السرطانات كتروا أوى خرجت عشان القمح فاسد والمبيدات مسرطنه والأكل كله أمراض خرجت عشان الناس اللى عندهم تليف كبدى فيروسى وفشل كلوى أكتر من اللى عندهم برد أنا بأه عندى حمام كيلوباترا يعجبك أوى وعندى شاشه دى فى دى 37 بوصه وبلاى ستيشن و2 موبايل وكافة شىء بس خرجت عشان عايز حق الغلابه فى المراكز اللى معندهمش صرف صحى ولسه بيحفروا ترنش عايز حق الست المسنه اللى عندها فوق ال80 سنه ومعندهاش كهربا ولا ميه خرجت عشان الست دى متشتريش جركن الميه -الجربانه- ب20 جنيه ايييييييييييه! محدش فيكوا بيتفرج على برنامج واحد من الناس وغيره وغيره 
|
|
#2
04-02-2011, 12:06 AM
|
||||
|
||||
|
رد: خطاب متظاهر في التحرير! (اهم من خطاب الرئيس)
خرجت عشان مش عايز ضابط الشرطه يكلمنى ببلطجه مع انى معملتش حاجه!
مش عايز أحس انى خايف وأنا داخل قسم الشرطه وأنا مش عارف أنا خايف ليه! خرجت عشان مش عايز أدفع رشوه فى المرور والشهر العقارى والجمارك والضرايب والبلديه ... خرجت عشان مش عايز الغاز بتاعنا يروح لاسرائيل بأرخص من التمن اللى بندفعه احنا خرجت عشان مش عايز نحاصر أهلنا المساكين فى غزه واسرائيل بتضربهم بكل انواع القنابل خرجت عشان عايز فلوسى اللى خدها أحمد عز وملياراتى اللى راحت مع نواب القروض خرجت وخرج معايا شيوخ ازهر وسلفيين واخوان وعمرو خالد ويساريين وممثلين وأدباء ومسيحين كلنا على كلمه واحد: يسقط مبارك الطاغيه نسيتم العباره والكام الف اللى ماتوا وحسنى وحكومته سابوا الكلب يهرب نسيتم خالد سعيد ومحمد السيد بلال وكل اللى موتهم نظام مبارك لمجرد الاشتباه نسيتم الدكتور المصرى اللى اتجلد فى السعوديه وكرامتنا اللى اتهانت جوه وبره نسيتم العساكر والشباب اللى اتضرب برصاص اسرائيل على الحدود واعمل نفسك ميت اصدقه ليه وهو كل خماسيه بيقول الخماسيه الجايه كل حاجه هتحصل احترمه ليه وهو خلانى مهان فى بلدى وفى بره بلدى وفى كل بلد احترمه ليه ومدير مكتبه السابق قال مبارك لم يكن يهتم بتقرير الشعب اليوميه عارفين القذافى اللى بعضنا بيتريق عليه!؟ بقاله فى الحكم أكتر من مبارك بس على الأقل هو مدلع شعبه.مفيش جمارك.العربيات رخيصه.مستوى الدخل مرتفع بياكل بعقل وسايب حته كبيره للشعب.لكن مبارك حكومته سفاحيييين. كل خره ومتفتحش بأك يا كلب!!! قناة السويس والسياحه والاثار والزراعه والصناعه والثروه السمكيه والغاز والبترول فين كل ده يا حراميه..سرقتونى..وكمان خوفتونى بالداخليه! محدش يقولى المظاهرات مدسوسه وأمريكا والمعارضه والاخوان وكفايه هيحرقوا البلد أنا محدش حركنى غير احساسى بالظلم والمهانه والسرقه والنهب والقهر ولا فى أى حزب معارضه ولا قوى سياسيه ولا قوى خارجيه تقدر تحرك 4مليون انسان فى نفس الوقت وتانى يوم الضهر يطلع بلطجية الداخليه ورجال الأعمال المستفيدين من النظام بخيول وأسلحه بيضاء وقنابل غاز وغيره يهجمون على العائلات والستات والبنات والأطفال العزل اللى هيقول غير كده هحط صباعى فى عينيه.انا وصحابى كنا هناك وشوفنا بنفسنا دانا وصحابى قلنا نروح بعد خطاب الريس ونحكم صوت العقل.مجرد وصولنا رمسيس طلعوا علينا الف بلطجى بيهتفوا لمبارك بأسلحه ونجينا منهم بأعجوبه عارفين.لولا لطف ربنا كنتم سمعتوا عن 6 شباب ماتوا فى عربيه فى رمسيس وهم مروحين اوعى تقولى المتظاهرين السلميين روحوا ليلة الخطاب واللى موجودين الان اخوان ومعارضه على اساس انهم كلموا بلطجية الحكومه على الموبايل وقالولهم نتقابل فى الميدان بكره الضهر ظبطوا المواعيد بعد ماحنا مشينا ونزلوا فارس لفارس فى الميدان واللى يكسب يطلع على قصر العروبه وحلال عليه! .فيلم هندى اخر حاجه والله وبالله وتالله اللى بينضربوا وبيموتوا وبيتقطعوا فى الميدان هم المتظاهرين السلميين بتوعنا والله وبالله وتالله فيهم ستات وبنات وأطفال ومش عارفين يروحوا ده حتى مصطفى الفقى وكلكم عارفين انه كان مستشار مبارك زمان قال اللى عمل الفتنه والبلبله والضرب ده هو وزير الداخليه الجديد وده فكره وبطايقهم اتمسكت وكارنيهات مباحث أمن الدوله والمباحث الجنائيه وكل الناس شافتهم ده غير ان بعضهم بالفعل اعترف انه داخليه او مرتزقه وواخد 100 جنيه طبعا حبيب العادلى ونواب الشعب اللى هيتزحلقوا مش ممكن يمشوا بهدوء بس السؤال مين اللى جابهم وحكمهم فينا!؟ أنا لم ولن أدعو الى القتال أو محاربة أى مسلم مهما كان السبب.ولن أشارك فى نزاع على الحكم أنا اسف جدا لما وصلت اليه الأمور ولما يحدث فى الميدان الان ولكنى لست أحمق .ولم ولن أنسى أن السبب فى كل هذه الفتنه هو مبارك ونظامه ليست المظاهرات السلميه هى السبب.ولكن غرور مبارك ونظامه هم السبب بطش وظلم وقهر وطغيان وجبروت 30 عاما هو السبب وبعد انقشاع الفتنه.سأخرج مره أخرى فى مظاهره سلميه أطالب بتنحى الدكتاتور الظالم متقليش البنت بتاعة المحور واسرائيل وأنا خنت بابا حسنى وندمانه والله هشتم شتايم وسخه! احنا مش فى سينما الأطفال هنا ومتقليش الجزيره وقطر بيكرهونا وبياخدوا فلوس من اسرائيل عشان يشوهوا صورتنا اسرائيل أكثر دوله فى العالم خسرانه من سقوط مبارك وتدعو كل يوم الى مساندته مظبطهم طبعا اخر حاجه.غاز وحديد وتطبيع ومحاصرة فلسطين وتهنئه بعيد تأسيس دولتهم طب ماشى الجزيره كخه.والعربيه برده كخه!؟والبى بى سى كخه!؟ والفرنسيه كخه!؟ لما أنا المرفه نسبيا أخرج عشان حضرتك يا أستاذ وحضرتك يا أستاذه وأسيب مرتبتى الماستر بيد أم 1400 جنيه وأنام على الأرض عشان خاطركم وتيجى تقولى فى الاخر بلاش خراب فى البلد كفايه كده عايزين نشوف مصالحنا وأكل عيشنا عارف هقوللك اييييييه؟؟؟؟؟ هقولك يكفيك كام كيلو استفندى وتتفرج على القناه الأولى وتقعد ساكت؟
|
|
#3
04-02-2011, 12:20 AM
|
||||
|
||||
|
رد: خطاب متظاهر في التحرير! (اهم من خطاب الرئيس)
ارجوك فكر بعقلك وليس عواطفك
لازم نحكم صوت العقل، اتقوا الله وكفايه كده، مالراجل هيمشي بعد ٨ شهور متبقوش عنيدين ... كلام بيتردد علي السنه مصريين كتير، منهم حتي ناس نزلت المظاهرات و منهم اللي علي الاقل كان متعاطف معاهم
|
|
#4
04-02-2011, 12:21 AM
|
||||
|
||||
|
رد: خطاب متظاهر في التحرير! (اهم من خطاب الرئيس)
لا تتخيلوا الم مثل هذه الانتقادات علي نفسيه المتظاهريين، الم اشد من سياط البلطجيه و نيران مولوتوفهم. صوت عقل اي مجتمع مثقفينه، ومثقفين مصر الشرفاء بيقولوا لا تراجع. واللي بيتكلموا بالدين و عن حرمانيه اثاره الفتنه، اقولهم دعاه مصر كلهم كانوا... في المظاهرات و القرضاوي قال لازم تنزلوا ... و بعدين اللي بيعمل الفتنه عشان يقعد علي كرسيه هو اللي تلومه.. اللي بيوقذ الفتنه بجد هو اللي تلومه، ده مش بس بيوقذ الفتنه، ده بيخترعها و يفبركها عشان انت تقول كده
مفيش حريه من غير تمن و مفيش انتصار ببلاش. اوعوا يخوفوكوا من حرب اهليه، دول بلطجيه و لصوص و مأجوريين... احنا مش زي لبنان كل حلف عاوز شخص، احنا كلنا عاوزيين ديمقراطيه كلنا ... الاعلام المصري متواطيء متبقاش سهل التأثير عليك ... اللي بيحصل دلو...قتي حرب نفسيه مدروسه غرضها خلق حاله من البلبله، تفتكروا هما فتحوا النت ليه دلوقتي بالذات .. ايوه عشان نتخانق ... لما كنا متفقين قفلوها ... مبدئياً لازم ناخد بالنا ان زي مالشعب المصري اتعلم خطوات الثوره من التوانسه، برضه اتعلم النظام المصري من درس تونس. و أهم و اسوأ درس اتعلمه النظام انه لو انهزم هيتمسح من الحياه، ممتلكاته ، ارصدته ، شرفه و حتي هيبقي مطارد في كل مكان في العالم. الانتربول اصدر مذكره بالقبض علي الرئيس التونسي .عشان كده هما بيحاربوا بإستماته مع ان الحرب خلصانه. يا جماعه مفيش امل واحد في المليون ان المتظاهريين يرجعوا بيوتهم من غير الحريه. الحريه مش ان مبارك ميرشحش نفسه تاني او انه يمشي بعد ٨ شهور ... الحريه ان الانتخابات تبقي حره و الله العظيم ما في مثقف ولا محلل سياسي محايد شايف ان ده هيحصل بالتعديلات الهشه اللي عملوها . . . . و الله العظيم لو ادونا حريه حقيقيه "برلمان جديد، اشراف قضائي، الغاء قانون الطواريء، حكومه وحده وطنيه" لأنزل امشي الناس من الميدان وا قولهم استحملوا مبارك التسع شهور اللي جايه. اللي عاوز الدنيا تستقر يقول للنظام يدي الناس الحريه، و يبقي منطقي... و عقلاني .. انهه اسهل ؟ .. تقنع واحد علي باطل ولا تقنع ملايين علي حق؟ ملايين داقت طعم الحريه و عرفت ان لو تمنها الموت هندفعه و علي وشوشنا ابتسامه و هنبقي شهدا للأخوه المتدينين ... فين قصص الثبات و العزم والناس اللي ضحت بنفسها ... فين قصه عبدالله بن الزبير و الحسين؟ فين فضل الشهاده ؟ يا اخي انت عارف وانت عمال تقول اتقوا الله واهدوا انت بتعمل ايه؟ انت زي واحد بيقول لعمر مكرم في ثوره القاهره الاولي ارجعوا لو هيبقي فيه خساير!!! لا يا راجل هما الناس اللي رايحيين و نيتهم ربنا و اجبي الديني اني ارجعهم و اشككهم في نفسهم ... فكر انت قبل ما ربنا يحاسبك و اضعف الايمان ادعيلهم .. مش عاوزيين غير دعوه ... كلنا طالع عينينا من الموقف و زهقنا .. نرجع دلوقتي و يمسكنا القتله تاني ... نرجع دلوقتي و يستخدموا التمن شهور الحايين في اصطياد كل واحد قال لأ ... نرجع دلوقتي عشان الحراميه يلحقوا يلموا فلوسهم و يهربوا التحليل النفسي للمصريين دلوقي بيقول اننا كلنا نفسنا نقنع نفسنا بأي حل سهل، يوقف الموضوع حالاً و بنستخدم في اقناع نفسنا بالوهم ده كلام زي ان ده صوت العقل، مع ان الواقع ان ده صوت العاطفه الخائفه، واللي مش بتفكر ولا بتحلل صح و بعدين عاوزين استقرار، والله العظيم ما هيبقي فيه استقرار غير مع دوله نحترمها و يبقالها هيبه و ده مستحييييييييييييييييل يحصل في ظل دوله الحزب الوطني ... انا بتكلم علي الواقع مش العاطفه ... الناس واقعياً لو ما خدوش مطالبهم هيبقوا مش طايققين الوضع و هيتلككوا مع كل قرار مش عاجبهم ينزلوا الشارع و هتفضل الدوله فوضي الي مالا نهايه هو الناس بتتظاهر ليه ضد النظام؟؟؟ عشان مش عارفيين يعترضوا في صندوق الانتخابات .. اديني فرصه اعترض في الصندوق و عمرك ما هتشوف وشي تاني اللي عارفني كويس يعرف اني بفكر قبل ما اتكلم، اللي عارفني كويس يعرف اني مستحيل انصح بحاجه مش متأكد انها صح، اللي عارفني كويس يعرف اني براعي ربنا في تصرفاتي ... و هقول الكلمه دي وانا واثق ميه في الميه انها قمه العلانيه : كل واحد بيهدي قبل المطالب ما تحقق "برلمان جديد، اشراف قضائي، الغاء قانون الطواريء، حكومه وحده وطنيه" بيضيع البلد و بيفسد في الارض و بيضيع مجهود الشهداء و بيساعد الحراميه والقتله يهربوا و بيساعد ان ناس اكتر تموت ... المطالب هتحقق هتحقق، فساعدونا الموضوع يخلص اسرع. انزل يوم الجمعه و كل يوم تقدر عليه و فهم الناس اللي ضحكوا عليهم بخطاب عاطفي انهم بيخدعوهم ... و لو مش قادر تاخد قرار ارجوك اسكت و ادعي ربنا يوفق البلد للي فيه الخير و لو قررت تبقي محايد، اضعف الايمان متقولش كلمه محبطه ربنا هيسألك عليها ... انا بقول الكلام ده وانا ببكي عشان واحده بعتتلي بتقولي انا المسؤل عن اصابه اخوها المتظاهر و بقولها و انا بتألم علي ألمه معتقدش هو هيلومني و ان شاء الله هيجي يوم في الدنيا ويوم في الآخره يشكرني و يشكر كل اللي نوروا طريقه ... و بدعي اني مش اصاب، لأ اموت ... يارب اموت شهيد عشان بلدي و مصلحتها و حريتها ... عشان نقدر نبدأ علي نضافه ... عشان لما الدنيا ترجع يحس كل مصري انه قهر المستحييل وانه يقدر يعمل اي حاجه، و لو ده بس مكسبنا من كل اللي بيحصل و الله العظيم الموت تمن رخيص ليه
|
|
#5
04-02-2011, 12:22 AM
|
||||
|
||||
|
رد: خطاب متظاهر في التحرير! (اهم من خطاب الرئيس)
انا مش هنزل تاني بعد يوم الجمعة
بس لو مسقطش انا مش هزعل لاني عملت اللي عليا وبلغت صوتي بطريقة سلمية هيبقى ذنب الناس اللي ما نزلتش ولو شفت حد بيضرب ولا بيشتكي من الفقر هقوله احسن ......ولا ما اشتغلش عشان الوسطة ولابيشتكي من الاكل المسرطن او الامراض و..سوء التعليم .ولا كتر المخدرات في البلد هقوله تستاهل ولو شوفت فقير بيشحت مش عارف هعمل ايه بس هقوله انت سبتنا نتظاهر وانت عشان 50 جنيه ضربتنا هي دي الخيانة
|
 |
|
|
