الي الاخ Sam ram

[zaki2000]

حضرتك انا كان معايا سيينا 2001 وبعتها
وبفكر اجيب السيينا 2008 زيرو

اية ريي حضرتك ؟

وافكر اجيب اسبرانز A113 الهتشباك

اية ريكي اجيب اية وانا بثق في كلام حضرتك جداً عشان موضوع و امين
وشكرا

[sam ram]

أهلا بيك يا استاذ زكي معانا في مصر موتورز ...
الفرق في الشكل بين السينا من موديل 2000 لحد دلوقتي مش كبير .. وتعتبر فيس ليفت
لكن الفرق الأكبر في المواتير
الموديل اللي كان مع حضرتك كانت مواتيره 1400 او 1600 و تجميع محلي
اما الموديل الجديد فهو 1500 سي سي صيني والموتور ده مش موجود الا في السيينا و الباليو !!
للاسف السيينا ال 1500 محققتش الانتشار و النجاح اللي يخليها تستمر ...
بالعكس الموديلات القديمه 2000 - 2004 حققت انتشار وعليها طلب اكتر من الموديل الجديد اللي مفيش له حاليا اي مبيعات تذكر و اشك ان في منه موديلات جديده .. يعني غالبا الموجود حاليا 2009 او 2008 كمان

عموما المقارنه بين السيينا و السبيرانزا A 113 صعبه اوي لأنهم فئتين مختلفتين تماما
السيننا معروفه ان شنطتها كبيره جدا في حين ان ال A113 هاتشباك و تعتبر من غير شنطه مقارنه بالسيينا
يعني حضرتك ممكن تقارن السيينا بال A516 خصوصا انهم نفس السعر تقريبا .. واعتقد ان السبيرانزا تكسب بانتشارها و مواصفاتها عن السيينا
لو حضرتك مقتنع بفيات و بتفكر في هاتشباك في رينج الستينات ممكن البونتو كلاسيك .. على الاقل معروفه و منتشره نسبيا و قطع غيارها متوفره
لكن لو عايز عربيه سيدان زيرو من نفس فئه السيينا في رينج سعرها فمقدرش انصحك بيها ... و متهيألي اللوجان او الفيرنا حيكونو افضل
او تزود شويه و تجيب افيو

في جميع الاحوال ... بلاش سيينا زيرو


واسف جدا على التأخير في الرد
وشاكر جدا لحضرتك على ثقتك فيا ... ويا رب اكون عند حسن الظن او قدرت افيدك بمعلوماتي البسيطه

[zaki2000]

شكرا علي رد حضرتك الموضوعي
وان شاء الله افهم من كلام حضرتك اجيب العربية المنتشرة - وا نا عجباني الاسبرانز A113 عجباني ومنتشرة
اية ريكي انا توكلت علي الله و اجيبها
وشكرا لحضرتك

[sam ram]

للأسف مقدرش افيد حضرتك اوي في ال A113 لأني مجربتهاش
لكن انا شخصيا لو بفكر في هاتشباك صغير في رينج الخمسينات حفكر في الاي 10 او البيكانتو الاول
ممكن لو تحدد متطلباتك من العربيه و طبيعه الاستخدام و رينج السعر نقدر نفيدك و نرشح لك العربيه المناسبه
خصوصا انك بتفكر تركب عربيه اصغر بكتير من اللي كانت معاك ... فلازم تكون متأكد تماما انها كافيه لاحتياجك منها