أفيدونى فى مشكلتى .......

[mido2k2]

السلام عليكم أحبائى فى هذا المنتدى الجميل

عندى مشكله فى عربيتى ومش عارف أحلها منذ أكثر من سنه تقريبا .. وآسف لو هطول عليكم لأن موضوعى طويل مع بتوع ابو رواش . منهم لله

أنا معايا a113 من شهر 6/2011 ومن يوم ما إشتريت العربيه وأنا بحس بدبه ناحية المساعد الأمامى يمين . وكان التكييف مش شغال للأسف مقدرتش أجربه فى المعرض لأن العربيه كانت مفيش فيها بنزين يدوب يودينى لأقرب بنزينه وكان عندى الفتيس مش مظبوط فى الأول والتانى والمارشدير المهم فى صيانه الألف قلتلهم على المشاكل دى صلحوا التكييف وقاللوا إن العربيه تمام مافيش فيها حاجه .. ويوم ورا يوم زادت الدبه روحتلهم تانى فى أبو رواش وقلتلهم أنا شاكك فى المساعد . كشفوا على العربية وقالولى إن فعلا المساعد بايظ . وحجزت مساعد وكان الإستلام بعد شهرين تقريبا . ركبت المساعد بدون ظبط زوايا . وأكدلى المهندس فى الإستقبال إن مش مهم ظبط زوايا ومشيت وأنا مش واسق فى كلامه وبعد مرور كام يوم حسيت بالدبه رجعت تانى وإن العربية بتحدف يمين إتصلت بيهم قالولى تعالى ونشوف . كشفوا على العربية قالولى إن المساعد الجديد بايظ وهنغيره . طبعا صوتى على عليهم هناك لأنهم كانوا عايزين يبيتوا العربية لتانى يوم لأن المساعد هيتوفر تانى يوم المهم قابلت مدير المركز وجابلى على حد كلامه مساعد من المصنع وركبوا المساعد وأخذت العربية فى نفس اليوم وتم عمل ظبط زوايا وفوجئت بنفس الحدفه اليمين . رجعت تانى لهم ظبطوا زوايا لتاتى مرة ومشيت بردة بنفس المشكله حدفة يمين وفى صيانه الـ 5000 إشتكيت من الحدفة والفتيس قالولى إن الفتيس تمام وقالولى إن العربية محتاجة ترصيص وظبط زوايا تانى . ودفعونى فى الترصيص 120 جنية ومشيت وإكتشفت نفس المشكله الحدفة اليمين . إشتكيت فى صيانه 10000 و 20000 قالولى العربية مضبوطة مافيش فيها حاجة وأطلع أجربها ألقيها بتحدف يمين . إتصلت بمهندس الإستقبال قاللى إحجز ظبط زوايا فى فرع العباسية أحسن من أبو رواش . طبعا زهقت منهم رحت لواحد بتاع ظبط زوايا وترصييص وحكيت له قصة العربية بدأ الراجل يرصص الأول وظهرت المشكله إللى كان التوكيل مخبيها عليها ظهر 2 فردة كوتش مش مظبوطين فيهم زى بوز كدة يعنى الدايرة مش مظبوطة طبعا غيرت واحدة بالإستبن كان جديد عندى والتانية ركبتها تانى وما زالت الحدفة موجودة .

مش عارف أعمل إيه مع التوكيل هل ليا حق تغير الكوتش فى الضمان ولا لأ . وحلال ولا حرام التوهه إللى توهونى فيها طول السنه دى ولا لأ . ومش عارف هل لو غيرت الكوتش الحدفة هتروح ؟ ولا هيظهر ليا عيب تانى هوا السبب الرئيسى للحدفة دى . أفيدونى أفادكم الله

وآسف لو طولت عليكم

[mhamdy75]

اولا الله يكون فى عونك

ثانيا على حد علمى لو بلونة فى الكاوتش متعملش حدفة

والدليل غير الفردة اليمين شمال والعكس لو الحدفة بقت يمين

يبقى الكاوتش السبب

ثالثا من اسباب ظهور البلونة الكاوتش اللى ارتفاعه قليل (55 -50 -45 - 40 )المطبات الجامدة فممكن خلال السنة تكون اخذت مطبات

[shoshovet]

• اولا ربنا يكون معاك
• ثانيا من الواضح ان الجماعة دول معندهمش خلفية عن موضوع الزوايا والترصيص
• انا معايا اسبرنزا 113 تقريبا شاريها في نفس الوقت بتاعك 4-2011
• كان عندي مشكلة الحدفة بس شمال بس انا بعمل صيانتي في توكيل اسبرنزا بالاسماعيلية المهم انا حكيت لهم وقلو لي اني اعمل ضبط زوايا برة لان هما ما عندهمش الحكاية دي
• المهم انا سالت والناس دلتن علي واحد كويس
• رحت ليه وضبط واللحمد لله الدنيا بقت تمام وبعد 6 شهور تقريبا بدات تحدف تاني فرحت أضبط زوايا وارصص بس المرادي المشكلة زي ما هي فعديت علية تاني قام مبدل العجلتين الاماميتين مكان بعض الحدفة بقت يمين فقالي الحل اني اجيب فردتين اماميتين جداد وكدة العفشة سليمة.
• المهم ان السبب في بوظان الكاوتش كان عدم الاهتمام بضغط الهوا في الكاوتش والمشي علية وهو مش مضبوط (اقل من الطبيعي) وبيني وبينك انا كنت شاكك وحسيت ان السبب ان الكاوتش نوعيته رديئة بس لاقيت واحد جاي وانا واقف لسه شاري بيكانتو الشكل الجديد وجاي يضبط زوايا بعد ما غير الفردتين اللي قدام لان عنده نفس المشكلة (عدم الاهتمام بضط ااطار)
  
• فالمهم الحل كالاتي:
• 1- اتاكد ان السبب من الاطارات بدل الاثنين مكان بعض
• 2- لو العفشة تمام يبقي الحل انك تشتري فردتن او الاربعة علي حسب الحالة
• 3- تستعوض ربنا في الفلوس وتحافظ علي ضغط الهوا بقدر الامكان
• 4- ضمان الكاوتش زي ما انا فاكر 3 شهور (اكيد عدوا من زمان) ما لم يتم فكة من قبل العميل (والله اعلم) وكده كده في الغالب انت السبب في انه يبوظ
  
• وما تنساش تقولنا انت عملت ايه