مشكلة كبيرة فى تاكيهات دايون اكسبريس

[Ahmed H. Suror]

السلام عليكم ورحمة الله

الاعضاء الكرام

هذه اول مشاركة لى ومش عارف فى القسم الصحيح ولا لا بس عموما اتمنى مساعدتكم وانا متابع مصر موتورز من زمان وبصراحه منتدى محترم واتمنى لكم التوفيق

عندى مشكلة كبيرة فى موتوسيكل دايون اكسبريس ومش لاقى لها حل

انا اشتريت المكنة من 3 شهور ولينتها بشكل صحيح وجه وقت ضبط التاكيهات بعد اول 1200 كم وفعلا ضبطت التاكيهات وصوت المكنة اتظبط وبدات تسحب بشكل اسرع وافضل ولكن كانت المفاجأة...

بعد حوالى 3 ايام التاكيهات بوشت (حملت) لوحدها ورجع الصوت بتاعها تانى وقل السحب بتاعها رحت للميكانيكى الاول اللى ظبطتها عنده وقالى انه ظبطهم بالمقاس على الضبط الصيفى وانه مش هينفع يقفل عليهم اكتر من كده عشان متسخنش، المهم فضلت ماشى بيها كده حوالى شهر وبعدين وديتها لميكانيكى تانى -راجل ممتاز بصراحه- وظبطهم تانى وقالى انهم كان مبوشين او محملين وظبطهم وفعلا المكنه رجعت تسحب والصوت اتظبط...

ولكن جات الحزينة تفرح ....

مفيش يومين والتاكيهات بوشت تانى والواحد مل بصراحه فرحت لميانيكى تالت ظبطهم وقبل ماوصل البيت التاكيهات حملت

روحت رجعتله قالى والله مكنتك دى اغرب مكنه عدت عليا، ازاى يحصل فيها كده ومفيش تايكهات بتبوش لوحدها بعد الضبط،

قلتله طيب ممكن المشكلة تكون فين؟
قالى ممكن تكون الصبابات بايظه رغم ان المكنة جديدة زيرو ويكون ده عيب مصنع عشان كده التاكيهات بتحمل على طول

انا بصراحه زهقت وتعبت ومش لاقى حل ومش عارف فعلا اغير الصبابات اللى لسه مكملتش شهرين شغل ولا اعمل ايه
ارجوكم افيدونى

عذرا للاطالة وشكرا لكم