مبدئيا ربنا يوفقك يا باشا .. واحب ابشرك انك احسنت الاختيار .. اللوجان فعلا هى افضل عربية فى السوق بالسعر ده ..
اللوجان جر امامى طبعا .. وعلى فكره معظم - ان لم يكن كل - العربيات السيدان الحديثة جر امامى .. الجر الخلفى تلاقيه فى البى ام والمرسيدس مثلا .. او فى العربيات القديمة (زى اللادا والفيات 131 و 132 ) .. وكمان تلاقيه فى جميع العربيات النقل ...
اللوجان بتنزل بجنط مقاس 15 فممكن انت تركب 16 او 17 مرتاح بس انا افضل 16 .. وعموما اللوجان عفشتها مريحة جدا وناعمة فمش هتتأثر بالجنط زى عربيات تانية (الفيرنا مثلا) ...
على كبالن طبعا لانها جر امامى .. الكوبلن ده عباره عن عمود واصل ما بين الفتيس و العجلة الامامية .. وطبعا بيكون فى واحد يمين وواحد شمال ...
اما الكارونة بتكون موجوده ظاهره فى الجر الخلفى ..
وعلى فكره نظريا اى عربية لازم يكون فيها كارونة .. لان الكارونه دى وظيفتها توزيع حركه الموتور على العجلات الدافعة بنسب متغيره ..
بمعنى انك لما تكسر الدريكسيون شمال مثلا .. العجل اليمين ساعتها هيلف اكتر من الشمال فلازم يكون فى توزيع مناسب للحركة اللى جاية من الموتور ..
الكارونة فى الجر الامامى بتكون مدمجة داخل الفتيس .. اما فى الجر الخلفى بتكون موجوده فى المحور الخلفى (الدفرانس) اللى ماسك العجلتين الخلفيتين ...
وده فيديو بيشرح فكره عمل الكارونة ..
اما الكارتيره دى فحاجة تانية خالص ملهاش علاقة بالجر .. الكارتيره هى قطعه الصاج او الفيبر اللى بتبطن الرفارف من جوه علشان تصد المياه او الطين اللى جاى من الكاوتش ...
وكمان الكارتيره دى بتتقال على الحوض اللى بيتجمع فيه الزيت اسفل الموتور ...
مش متأكد اوى بس اعتقد انها مصفحه من عند الموتور فقط .. ولكن العربية عالية عن الارض جدا وصعب اوى انها تحك فى مطب ....
يا رب اكون قدرت اجاوب اجابات دسمة من العيار التقيل زى ما طلبت يا باشا ..
وتحت امرك فى اى وقت ....
رد: الى خبراء اللوجان ؟
