المواجهة ▲AbOnOrA☼ ◄VS► ▲Hazem Shahin☼

[azzat 55]

موضوع أجتماعى رائع وأسئلة متميزة وأجابات وافية من الشخصية المتميزة أستاذ حازم شاهين

[AbOnOrA]

والله يا جماعة حازم من الناس اللى لما تعرفهم تتاكد انك عمرك ما تقدر تعوضهم سواء كصديق وناصح امين بمعنى الكلمة او كإدارى وصاحب فكر وعزم واسلوب اكثر من راقى
وبالرغم من يقينى ده بان القيمة ديه مش ممكن تتعوض الا انى مقدر تماماً ومحترم رغبتة فى الخروج من الإدارة ويمكن بحسدة عليها
لان اللى بيشارك فى الإدارة اكيد بيتحرم من متعة الاطلاع والمناقشة بكامل حريتة فى المنتدى ومن غير قيود او مسئوليات وما اكثر القيود والمسئوليات

وفى نفس الوقت متأكد اننا لازم نرجعله فى كل حاجة كعضو مؤسس ونستفيد من خبراتة دائماً ورؤيتة

انا بصراحة مش عايز اقفل الموضوع استمتاعاً بيه لكن مقدرش اتقل على حازم اكتر من كدة فهختم بمجموعة اسئله صغيرة هتكون المجموعة الاخيرة ان شاء الله


السؤال الاول
حازم الانسان يقول ايه لحازم الفنان

لاء بجد اشرح للناس الفرق بين دورك زى مانت شايفه كعضو مؤسس خارج الادارة وبين دورك ومسئولياتك الفترة اللى فاتت


السؤال التانى
اكتب مكونات الوصفة السحرية للعضو فى عمل اجتماعى زى المنتدى ويكون فعال ومبدع بجد . ايه هى الصفات فى رائيك هل التواجد ولا عدد الموضوعات ولا ايه ؟


السؤال الثالث
اكتب اللى انت عايزة عن الكلمات والجمل الاتية

ثورة 25 يناير
مذبحة بورسعيد
تطبيق الشريعة
مستقبل مصر
الاخوان المسلمين
كامب ديفيد
العلاقات مع ايران

السؤال الاخير بس قولى فى ودنى
تحب مين كمان نستضيفه على كنبة الاعتراف ممكن ترشح اكتر من واحد

[miam0502788391]

السلام عليكم
الحقيقة الاستاذ حازم شاهين شخصية من شخصيات المنتدى اللى تمنيت انى التقى بها يوما ما
بيعجبنى فيه الحكمة فى المواقف خصوصا لو موضوع سخن فى المنتدى والسجال اشتد بين الأعضاء تلاقي رده يطفى اى نار
حتى فى أرائه السياسية يقول رأيه بموضوعية بدون ان يجرح فى اى فصيل من اللى الفصائل الموجودة على الساحة
على فكرة يا استاذ حازم انا اشتغلت فى بور سعيد من حوالى 7 سنين فى مستشفى آل سليمان اللى أمام مسجد مريم لمدة سنة تقريبا , وبنزل بورسعيد تقريبا كل سنة شارع التجارى والحميدى لشراء الملابس , وبور سعيد بلد جميلة فعلا مناخها يبعث على هدوء الأعصاب

[حازم شاهين]

المشاركة الأصلية كتبت بواسطة AbOnOrA السؤال الاول حازم الانسان يقول ايه لحازم الفنان أقوله وحشتنى قوى إنت فين من زمان لاء بجد اشرح للناس الفرق بين دورك زى مانت شايفه كعضو مؤسس خارج الادارة وبين دورك ومسئولياتك الفترة اللى فاتت أسف على التأخير كنت فاكر إن الحوار إنتهى على كده الفرق بين دور العضو المؤسس و دور عضو الإدارة زى الفرق بين عضو مجلس الأمناء و العضو التنفيذى فى أى مؤسسة لو اللى فات صعب شوية هضرب مثل من الواقع الحديث مدينة زويل (تشبيه مع الفارق طبعا) ليها مجلس أمناء هم عبارة عن مجموعة من العلماء و السياسيين و الأشخاص أصحاب الرؤى و الفكر مهمتهم إنهم يحطو الإستراتيجية و الخطط العريضة لأعمال الجامعة دى لكن رئيس الجامعة و المجلس التنفيذى مهمتهم إنهم يديرو شئون الجامعة يوم بيوم بالتفاصيل المهمة و غير المهمة و نفس الأدوار بالنسبة للمنتدى المؤسسين هم أمناء المنتدى مهمتهم رسم السياسة العريضة للمنتدى و التوجهات الإستراتيجبة له دون الدخول فى التفاصيل الدقيقة أما المشرفين أو أعضاء الإدارة فمهمتهم التفاصيل الدقيقة و الممارسات اليومية أعتقد إننا الحمد لله قدرنا خلال فترة عملى فى الإدارة إننا نوثق المفاهيم دى فى قانون الإشراف إللى ليا الشرف إنى أكون شاركت فى ظهوره للنور مع باقى المشرفين إللى هيسعده الحظ و يكون مسئول إدارى فى المنتدى هيتعرف على القانون ده إللى أنا أزعم بكل تواضع إنه من الإنفرادات اللى ينفرد بيها منتدانا على باقى المنتديات المشابهة و خطوة مهمة من خطوات تطور المنتدى و هيكلة إدارته. و أحب أقول للكل إن الإنضمام للمؤسسين مش حكر على أوائل الأعضاء إللى قام عليهم المنتدى فى بدايته بس لكن ممكن أى عضو حتى لو انضم النهاردة أو بكرة أو بعد سنة إنه يبقى عضو مؤسس برضه لو كان ليه إسهامات ملموسة و رؤية متفقة مع المبادئ و الأفكار إللى قام عليها المنتدى فى بدايته معلش الكلام تقيل و جد شوية بس هى دى الروح إللى كنا بنتعامل بيها مع المنتدى، يعنى الموضوع مش هزار و ضحك و تصوير بس ، لكننا ياما سهرنا فى المكتب لغاية الفجر بندرس و نتناقش علشان نصل للأفضل للمنتدى و ياما روحنا و نور الصبح طالع ، و فى عز الإنفلات الأمنى و حظر التجول كمان ، و أبو نورا و سيف يقعدوا يرنولى و أرنلهم طول منا ماشى فى السكة لغاية ما يطمنوا إنى دخلت بورسعيد.... أرجوا إن الروح دى و التجربة دى تتنقل للأعضاء الجدد فى الإدارة علشان ما يستهينوش بالمسئولية إللى .

المشاركة الأصلية كتبت بواسطة AbOnOrA السؤال التانى اكتب مكونات الوصفة السحرية للعضو فى عمل اجتماعى زى المنتدى ويكون فعال ومبدع بجد . ايه هى الصفات فى رائيك هل التواجد ولا عدد الموضوعات ولا ايه ؟ "فَأَمَّا الزَّبَدُ فَيَذْهَبُ جُفَاء وَأَمَّا مَا يَنفَعُ النَّاسَ فَيَمْكُثُ فِي الأَرْضِ كَذَلِكَ يَضْرِبُ اللَّهُ الأَمْثَالَ" (الرعد 17) فعلا التواجد المستمر و المشاركات الكتير و عدد الموضوعات ممكن تساعد فى نجاح عضو و اشتهاره فى المنتدى لكن هبفضل نجاح مؤقت و زائل لو ما كانش مع ده مجهود و إسهامات حقيقية مفيدة للناس و هضرب مثل حد فاكر موضوع أدب الرحلات بتاع المرحوم خالد خليفة؟ طيب حد فاكر المشاركات الظريفة حوالين الموضوع ؟ إللى فضل موضوع خالد خليفة الناس إهتمت تجمعه و تنزله فى ملف متكامل لكن محدش إهتم أو حتى فاكر التعليقات الظريفة من بعض الأعضاء أثناء كتابة خالد خليفة للموضوع علشان يعاكسوه و يناكفوا فيه أنا مش بقول إن المشاركات دى كانت وحشة لا سمح الله هى كانت ظريفة فى وقتها لكن اللى فضل فى الأخر مجهود خالد خليفة و خلاصة تجاربه فى الحياة ، لإن كان وراها فكر و رؤية ومجهود و كان نفسه الناس تستفيد من تجاربه دى و لو حتى على سبيل التسلية. مات خالد خليفة و فضل موضوعه فى المنتدى ينفع الناس.

المشاركة الأصلية كتبت بواسطة AbOnOrA السؤال الثالث اكتب اللى انت عايزة عن الكلمات والجمل الاتية ثورة 25 يناير الحمد لله إنى عشت و شوفت اليوم ده ، و الحمد لله إنى لما هموت مش هسيب لولادى حالة زى إللى كنا فيها قبل الثورة مهما كنا تعابنين دلوقتى و مهما كنا متضايقين من اللى إحنا مختلفين معاهم سياسيا و مهما إنخفضت الطموحات و الآمال لكن كل ده ما يجيش حاجة جنب السواد إللى كان ممكن نشوفه لو ما قامتش الثورة مذبحة بورسعيد أحداث بشعة لطخت بورسعيد و اهلها لفترة طويلة سواء كانت مدبرة أو عشوائية لكن النتيجة المؤسفة مش هتتغير تطبيق الشريعة أرجوا ألا تكون فقط محاولة لاستنساخ النموذج السعودى اللى ممكن يكون مناسب للمجتمع السعودى لكن الإسلام أرحب بكتير من كده و مصمم ليناسب كل المجتمعات باختلافاتها الثقافية و الإجتماعية و لولا كده ما كانش أنتشر من الفلبين للسنغال لأذربياجان رغم التنوع الثقافى و الإجتماعى الكبير جدا للبقعة إللى إنتشر فيها الإسلام (فى عهد الخلافة) مستقبل مصر إن شاء الله أحسن لإن مفيش أو×× من إللى كنا فيه الاخوان المسلمين قوة سياسية و تنظيمية يجب مأسستها و شرعنتها و الأهم موازنتها إلا ستتحول لغول يلتهم الوطن كامب ديفيد بدون مزايدات هى شر لابد منه فى المستقبل المنظور على الأقل العلاقات مع ايران أرجوا ألا تكون مجرد ورقة ضغط فى يد القوة الخليجية عموما و السعودية خصوصا السؤال الاخير بس قولى فى ودنى تحب مين كمان نستضيفه على كنبة الاعتراف ممكن ترشح اكتر من واحد

و الله المنتدى مليان بالشخصيات الجميلة و الثقيلة و اللى الواحد يحب يتعرف عليها أكتر لكن أنا هسيب حرية الإختيار للأعضاء يختارووا هم مين يحبوا يزنقوه المزنق ده

[mhamdy75]

أستاذ حازم شاهين



أبونورا