النصب العلني لبيت التأمين المصري السعودي

[crime]

لا حول ولا قوه الا بالله ولا تزعل نفسك انا هافتح شركه تامين علشان شركات التامين ف مصر اكذوبه كبييره

تقبل تحياتى

[mainz]

ممكن تقولنا حضرتك كنت بتدفع كام تامين للعربيه كل شهر او كل سنه فى شركه التامين .
عموما شركات التامين كلها فى اى بلد شواء اوروبى او فى مصر كلها هدفها الاول والاخير نصب فى نصب وانا عشت التجربه ديه مع شركه اليانز للتامين وفعلا كلهم نصابين وبيظهروا على حقيقتهم وقت الدفع . والمشكله الاكبر ان المرور بيساعدهم فى كل بلد بخصوص التامين الاجبارى ومع وقوع اى حادثه يضاعف اشتراك التامين فى الحال لمده تزيد على اربع سنوات حسب حجم الحادثه .
وقدر الله وما شاء فعل . وربنا يعوضك خير

[eman2205]

حسبى الله و نعم الوكيل
ممكن حضرتك ترفع الصور للاطلاع

[تامين سيارات]

المشاركة الأصلية كتبت بواسطة elkordy2000 فعلا شركة نصابة بكل ما تحوية الكلمة من معاني لما أدفع 50% من تكاليف الاصلاح للسيارة فهذا هو النصب بعينة , الموضوع بأختصار شديد اني قمت بتأمين لدي شركة بيت النصب قصدي بيت التأمين المصري السعودي من سنتين ولم اقوم بعمل اي اصلاحات خلال تلك الفترة الحمد لله , لكن طبعا الشوارع المصرية لا تخلوا من ترك بصماتها علي السيارة من حين لأخر شوية خرابيش علي تجاريح وبعض الاحتكاكات البسيطة مع شرخ في أحد الفوانيس ( علي فكرة العربية لانوس 2 2009 ) , طبعا ذهبت لشركة التامين لعمل مقايسة اصلاح وخصوصا اني مقبل علي تجديد وفحص فقلت اعملها واخلص بدل غلاسة المرور اثناء الفحص وفعلا ذهبت الي الشركة وكتبت في اخطار الحادث تلفيات اثناء السير والوقوف حسب ما قالي البية الموظف , وقال لي حضرتك ابعت السيارة الي مركز الاصلاح وعندنا بعض الورش في منطقة الحرفيين , قولت كويس اهي جنب مني وسهلة المهم سلمتها للمركز والشركة ارسلت المهندس المبجل للفحص والمعاينة وطبعا انا مش موجود اثناء المعاينة وواضح انهم بيتعمدوا كدة لانهم عارفين العميل هيعترض علي التقييم وطريقتة , البية عمل المقايسة علي أن كل حتة في العربية حادثة شكل يعني الجنب اليمين حادثة لوحدها والشمال حادث اخر وخرابيش الاكصدام حادث ثالث وشرخ الفانوس حادث منفصل لوحدة رابع , وطبعا كل دة علشان يلبسك مبلغ التحمل اللي هو 250 جنية عن كل حادث , لأ واية المفأجأة الكبري أن بيحاسبك بالحتة يعني هيرش العربية للأجزاء التالفة فقط مش كل العربية أو نصف سفلي مثلا , يعني من الاخر تمشي بعربية مشكلة حتة فاتحة وحته غامقة وحته فيها معجون ولو مش عاجبك كمل باقي الاصلاح والرش من جيبك طبعا اضطريت ادفع للورشة 500 جنية زيادة عن تقرير البية بتاع المعاينة علشان اكمل باقي الاصلاحات والرش طبعا تقرير البية كان تكلفتة 2000جنية في حين ان المفروض سدادة 2500 جنية وطبعا اضطريت ادفع الفرق يعني هامشي بالعربية ملطشة بوية , المفاجأة الثانية بقة لما جيت استلم الشيك وجدت قيمتة كام 1200 جنية اول عن أخر والباقي ضربوا علية تحت بند حادث أول وثاني وثالث من الاخر أذا كان عاجبك يعني دفعت 1300 جنية من جيبي والاسم العربية متأمن عليها فعلا شركات التأمين في مصر أكذوبة كبيرة ...., شركات التامين بتظهر علي حقيقتها ساعة المصايب انا بقول اسم الشركة علشان الناس تاخد بالها ( بيت التامين المصري السعودي ) شركة نصصصصصصصصصصصصصصصصصابة واللي مش مصدق ممكن ارفع لة صورة الشيك ومعاينة الاصلاح والاستقطاعات اللهم بلغت اللهم اشهد

السلام عليكم و رحمه الله و بركاته
الف سلامه عليك من اى شر ده المهم الحديد و الفلوس يتعوضو و الله سبحانه يفدى اشياء باشياء

شوف يا استاذى انا هاتكلم معاك بكل حياديه لا فى صفك ولا فى صف الشركة و حضلاتك تعرف انى فى قناه السويس مش فى بيت التامين

ارجو قرائه كلامى للاخر اخى الفاضل
اولا ::: و ده لاى حد بيصلح عربيته ما تصلحش عربيتك من نفسك اسال على مستشار التامين الى باسمه ملف العربيه لانه هايفيدك اقصى استفاده و هايطلعك من مطبات كثيره

ثانيا ::: التامين زى ما بنعرفه كلنا لا يغطى الاستخدام السىء او الخربيش و الحاجات دى لان الوثيقه تغطى
1- السرقه كلى و جزئى
2- الحادث كلى و جزئى ( و هذا ما نقصده )
3- الحريق كلى و جزئى

حيث يا اخى الخربيش غير ناجمه عن تصادم لا تغطى و هذا قانونى فهى لا تغطى

موضوع حساب 3 حوادث و هو قانونى انه المفروض انك تروح تعمل عربيتك اول باول بمعنى ما يبقاش خبطه فى اليمين امامى و بعدين خبطه فى الشمال خلفى

و احب اوضح للاعضاء الكرام شىء مهم جداا (مش معنى ان الوثيقه بدون تحمل يعنى مش هاتتحمل فلوس دة مفهوم غلط ) لانه يوجد استهلاك قطع غيار هو ان لو سيارتك موديل 2012 يبقى هاتتحمل 10% من ثمن قطع الغيار و لو فى التوكيل يبقى فى 10% تحمل على كامل الفاتوره

طيب كان الموضوع الى حضرتك فيه هايحصل فى اى شركه لو انا رحت من نفسى و ما حدش نصحنى ايوة كان بنسبه 70% هايحصل

طيب ما يحصلش امتى قبل ما اصلح اشوف مستشار التامين الى باسمه العربيه و اكلمه و اقوله انا عميل عندك و حصل لى حادث و هوة هايقولى اعمل ايه و هايفيدنى و يوفر عليا فلوس ووجع دماغ

طيب المعاين الى كان بيعاين العربيه او البيه كما ذكرت حضرتك فعلا عندك حق فى كلامك لان نصفهم غير مؤهلين لكن المعاين محق فى موضوع الثلاث حوادث هذا لا جدال

و اخيرا و اسف للاطاله انا كان قصدى من شرح الموضوع بالتفصيل على شان تكون التجربه مفيده و اعرف حقى فين و اعمل ايه

و لو الوثيقه تبقى فيها صلاحيه و حبيت تعمل اى حاجه فى السياره كلمنى حضرتك و انا هاوريك الفرق لما كنت لواحدك و لما يبقى معاك حد اثبات لكلامى الى ذكرته

استعوض الله فى الخساره لو اطلعتم على الغيب لاخترتم الواقع

[eman2205]

الله ينور يا أستاذ عمرو
انت قلت المفيد


بس دة ما يمنعش ان فى شركات تأمين بتحط شروط فى الوثيقة بتضيع حق العميل و دة هيبقى موضوع نقاشنا فى الفترة القادمة ( هندرش كل شركة تأمين و نعرف اية مميزاتها و اية عيوبها ) و دة طبعا هيكون بمساعدة الزملاء فى شركات التأمين المختلفة