تقرير عن مقابلة بورسعيد الصيفية يوليو2010

[نبيل عبدالرحمن]

كان من المقرر طبقاً للبرنامج الموضوع بمعرفة الأستاذ / حازم شاهين أن تكون هناك سهرة يوم الخميس بمجمع الكافيتريات ، وفى صباح اليوم التالى سيكون لقاء الأعضاء مع شاطئ البحر ثم الغداء ثم جولة حرة للتسوق .
وقام الأستاذ حازم شاهين بتجهيز شاليه بقرية الفردوس وكان ينوى تزويده بالمياه الباردة والمشروبات واتفق مع أحد الأفراد لتجهيز الغداء ( أسماك ومستلزماتها )
ولكن .....
حضر سهرة الخميس ( 3 أفراد فقط ) :
-الأستاذ حازم شاهين
-الأستاذ أحمد بدر
-الأستاذ بدر بسيونى
واستمر اللقاء حتى ساعة متأخرة من الليل
وفى صباح الجمعة كنا على أمل أن يحضر عدد كبير من أعضاء المنتدى من أنحاء المعمورة ليتمتعوا بمصيف مجانى ولو ليوم واحد فقط
ولكن دائماً ما تأتى الرياح بما لا تشتهى السفن
حضر مقابلة الصباح والتى جرت على غير ما وضع بالبرنامج فى مجمع الكافيتريات كل من :
- الأستاذ / حازم شاهين
-الأستاذ / أحمد بدر
-المهندس/نبيل عبد الرحمن ، والذى جاء من الإسكندرية صباح اليوم
واستمر اللقاء حتى صلاة الجمعة ثم توجه ثلاثتهم الى مسجد الشاطئ لأداء صلاة الجمعة ثم تفرق الجمع وانتهى اللقاء عند هذا الحد ، وتم إلغاء البنود الآتية :
1.النزول للبحر
2.قضاء جزء من اليوم بشاليه قرية الفردوس الجميلة
3.وجبة الغداء الفسفورية التى كان من المقرر تجهيزها
4.الجولة الحرة لعمل بعض الشوبنج لإنعاش إقتصاد مدينة بور سعيد
5.مقابلة أحلى أعضاء هذا المنتدى المحترم
6.أخذ بعض الصور التذكارية ( والله كانت هناك كاميرا جاهزة ولكن مافيش نفس للتصوير )
أما الأحاديث التى دارت فى اللقاء القصير هذا فكانت عن ذكريات كل واحد مع السيارات والحوادث التى واجهته ، كما تم الإتفاق على الإفطار المجمع فى شهر رمضان وإقترح أن يكون فى الإسكندرية وأن يحضره عضوان فقط ممثلين لباقى أعضاء المنتدى

[hazem_khidr]

انا بصراحه مش عارف اقول ايه
طب الناس اللي قالت جايه و ما جتش دا يبقي اسمه كلام؟؟
انا كان بودي اجي الصراحه لكن كنت مزنوق وقولت لاحمد بيه بدر
معلش متعوضه في مقابله رمضان
ما تزعلش يا باشمهندس نبيل
انا شكلي حبقي مندوب ال 55 الف عضو في مقابله رمضان

والله يا استاذ نبيل انا كان غصب عني وبعتذر لحبيبي الاستاذ بدر لان الاجازة بتاعت عيد الثورة اتلغت يوم الجمعه وادوهلنا يوم السبت ونزلت الشغل يوم الجمعه ومعرفتش ازوغ لان زميلي اللي معايا في مصيف اسبوع في مارينا عبالي ولسه هيجي يوم الثلاثاء القادم

فطبعا مينفعش اني ازوغ والدنيا تخرب

معلش يا استاذ نبيل هتتعوض ان شاء الله في رمضان بس يا ريت تكون يوم حد ويكون في اول رمضان علشان الواحد يعرف يجي اسكندرية

وتقبلوا تحياتي

[حازم شاهين]

نقدر نقول إن اﻹسكندرانية نصفونى

المقابلة رغم إنها ما كانتش وفق المتوقع لكن كانت جميلة و الحمد لله

هى كانت مقابلة سكندرية على أرض بورسعيد

و الحمد لله لله تمت على يومين كما هو مخطط
يوم الخميس جالنا أ. بدر بسيونى فى المساء و أنا و أ. أحمد بدر و قضينا سهرة ثلاثية فى جو رائع فى الحقيقة هواء عليل و الرطوبة كانت قليلة ، و لا عزاء للحرانين
و اتكلمنا فى مواضيع كتير جميلة و مفيدة و مر علينا الوقت بسرعة رهيبة من غير ما نحس
و كلمنا على التليفون أ. خالد الشريف إللى متوعك شوية اليومين دول و هو كان ناوى يكون موجود معانا لولا الدور المفاجئ ربنا يمتعه بالصحة و العافية و ياخد بيده يا رب

و فى يوم الجمعة إيتدى يوم م. نبيل عبد الرحمن من ساعات الصباح اﻷولى علشان يوصل بورسعيد فى وقت مناسب و بالفعل وصل الساعة 10 صباحا و نظرا ﻹن محدش تانى جه إقترح أحمد بدر إننا نلغى قرية الفردوس و نقضى المقابلة فى بورسعيد و فعلا جلسنا فى أحد كافيتيريات مجمع المطاعم على الروف و برضة الجو كان جميل و الهواء عليل و الصحبة حلوة و الوقت طار.

فى النهاية أحب أشكر كل السكندرية إللى شرفونى فى بورسعيد
و أشكر كمان كل الناس إللى كان نفسها تيجى و ظروفها ما سمحتش و إن شاء الله تتعوض فى المقابلات الجاية

[AbOnOrA]

سلامات سلامات ............ الاتحاد والمصرى ............ اخوات اخوات
(هتاف جماهير نادى الاتحاد الاتحاد السكندرى والمصرى البورسعيدى)

اولاُ الف حمدالله على السلامة ليكم جميعاً وياااااااااااااارب تكونو استمتعتوا بالرحلة فى ضيافة الكريم الخلوق حازم شاهين

انا عارف ان القاهريين قصرو معاكو جامد بس ربنا يعلم الظروف اللى الواحد فيها انا عن نفسى كنت محتاج اليوم ده جداً اولاً كان نفسى اقعد معاكم كفاية لانى ملحقتش اقعد معاكم يوم عيد ميلاد المنتدى وثانياً كان نفسى اقضى يوم بره القاهرة اخرج بيه من ضغوط الشغل اللى خانقة الواحد اخر حاجة بجد

بس معلش قدر الله وماشاء فعل وتتعوض قريب ان شاء الله وانا متأكد ان المقابلة كانت جميلة حتى ولو بين اتنين بس

ومرة تانية
سلامات سلامات ............ الاتحاد والمصرى ............ اخوات اخوات