طريقة عمل اضاءة تلقائية لدرج تابلوة لانوس .. بالتفاصيل والصور

[مصطفى-حسن]

كتير مننا بييجى علية وقت بالليل وهو سايق او وهو واقف بيبقى عايز يطلع حاجة من درج التابلوة

وللاسف عشان درج تابلوة الانوس بينزل من غير اضاءة
فيضطر انة ينور نور الصالون ويدور على نورة

وياسلام لو نور الصالون ضعيف شوية يفضل يلوش بصوابعة لحد ما يشوف او يلاقى الحاجة اللى هوة عايزها وبيدور عليها

طبعا اللى عايز يحل المشكلة دى بيجيب شريط لدات ويلزقة فى التابلوة ويوصلة للضفيرة بتاعة العربية بحيث ينور مع اول تكة فى الدراع ( النور الصغير)

وهوة بصراحة حل سريع ومنجز بس بدائى وفية كام ملاحظة
1 - ان شريط اللدات اللى انت عملتة فى الدرج هيفضل منور علطول فدة هيقصر عمر شريط اللدات نفسة وكل شوية تلاقى نفسك عمال تغير شرايط

2 - ان درج التابلوة لو مش بيتقفل كويس هتلاقى النور طالع من جوة ضارب فى عينك وانت سايق بالليل

3 - لو انت جيت تفك درج التابلوة وتطلعة برة عشان تعمل اى حاجة لازم تفك السلوك واللزق اللى عليهم وبعد ما تخلص اللى انت عملتة ترجع توصل السلوك وتلزق عليهم تانى ( شغلانة يعنى)

ففكرت انى اعمل الشغلانة دى ( اضاءة درج التابلوة ) بس بشياكة شوية

يعنى افتح الدرج النور ينور ....اقفل الدرج النور يطفى .....وفى نفس الوقت لما اجى اطلع الدرج خالص من مكانة واركبة تانى يبقى نظام فيش فك وتركيب مش سلوك ولحام وعك وكدة

الفيش امرها سهل هتبقى كلبسات دكر ونتاية
الفتح والغلق التلقائى ملقتليوش حل غير مفتاح باب التلاجة اللى ب 2ج
اخر حاجة هيا كنت هثبت مفتاح باب التلاجة فين

فكيت درج التابلوة الاول وطلعتة من مكانة عشان ابص على المكان اللى هينفع يركب فية مفتاح باب التلاجة


وحاولت اتخيل مكان يتثبت فية المفتاح ويبقى اللسان بس هوة اللى طالع لبرة عشان يصد فى الدرج لما يتقفل لقيت نفسى فى كل الحالات لازم اخرم فى فبر التابلوة

وفى الواقع انا معنديش اى مشكلة انى اخرم واعدل فى الفبر بس بصراحة الشغلانة كانت بسيطة ومش هيا دى اللى الواحد يخرم ليها

لحد ما خدت بالى من فتحة مستطيلة موجودة جاهزة فى الفبر من تحت


جربت المفتاح فيها لقيتة ركب مرتاح جدا




ومع تركيب السلوك فى المفتاح ولفة بشريط عازل هيبقى تخن شوية
فلما اجى ادخلة هيكون بيدخل حشر فى مكانة
يعنى مش محتاج اى تثبيت من مسامير او خلافة
وفعلا دة اللى حصل بعدين

خدت الدرج وغسلتة ونضفتة الاول



وفية كلبسين بلاستيك فى الجنب بيقفلوا اللسان الصغير الموجود فية
فكيتهم بصوابعى عادى جدا



وجبت امير عشان يبقى لزق اشد فوق اللزق الذاتى اللى بيبقى جاى مع شريط اللدات
لان اللزق اللى بييجى مع شريط اللدات بيبقى دبل فيس رفيع قوى وبيفك من الحرارة



ورحت العربية
وجبت المفتاح والكلبسات عشان ابدأ توصيلات


وعشان تبقى متابع معايا وفاهم
انا هخلى توصيل المفتاح بالدرج بكلبسات ملونة دكر ونتاية
عشان لما افك الدرج واركبة متلخبطش بين السالب والموجب
وبعدين هاخد طرف من المفتاح وطرف من اللدات على الكهرباء علطول
والطرف التانى من المفتاح مع الطرف التانى من الليد
دايرة كهربية عبيطة قوى يعنى












وفكيت الفبرة بتاعة الكاسيت
وطلعت الكاسيت
والتجويف اللى تحت منة
ودرج حامل الاكواب
ببساطة مكنتش عايز العب فى الضفيرة
كنت عايز اخد من طرفين نور اللى بينورا درج الطفاية بتاعة السجاير
عشان ملعبش فى الضفيرة
لان دول بينورا مع النور الصغير










وبالمرة انا شغال عملت اضاءة للتجويف اللى تحت الكاسيت



ولقيت اللمبة الصغيرة بتاعة درج طفاية السجاير محروقة فغيرتها



وظبط السالب والموجب بتاع شريط اللدات
مع السالب والموجب بتاع الضفيرة
وبدات اقفل




وقفلت كل حاجة
وبدات اختبر
وطلعت كلة تمام
افتح الدرج النور ينور
اقفل الدرج النور يطفى
التجويف اللى تحت الكاسيت بقى منور
ودرج طفاية السجاير بقى منور
ودى صورة وانا مشغل الفلاش بتاع الكاميرا


ودى صوة تانية ونا طافى الفلاش بتاع الكاميرا


اضاءة الدرج جامدة قوى وشديدة الصراحة
والذ حاجة انى عملتها تلقائى
مش منور علطول بشكل بدائى
وتمت بسرعة وبحمد الله
ولو اى حد محتاج استفسار انا حاضر

[meno elsaher]

الله ينور عليك شغل جااااااااااااااامد والله

[eng/walaaeldeen]

السلام عليكم
الله ينور عليك شغل محترم ويجعله في ميزان حسناتك
ومنتظرين اكثر واكثر من مواضيعك المفيده
والله المستعان

[محمد فيصل]

دائماً افكارك متجددة مثمرة مفيدة
بارك الله لك فى العلم والصحة والموهبه وسيارتك

[مصطفى-حسن]

المشاركة الأصلية كتبت بواسطة meno elsaher الله ينور عليك شغل جااااااااااااااامد والله

متشكر جدا لحضرتك

المشاركة الأصلية كتبت بواسطة eng/walaaeldeen السلام عليكم الله ينور عليك شغل محترم ويجعله في ميزان حسناتك ومنتظرين اكثر واكثر من مواضيعك المفيده والله المستعان

متشكر لدعائك
وان شاء الله الموضوع القادم
طريقة تغيير او اصلاح سربنتينة السخن فى الانوس

المشاركة الأصلية كتبت بواسطة محمد فيصل دائماً افكارك متجددة مثمرة مفيدة بارك الله لك فى العلم والصحة والموهبه وسيارتك

بارك الله لك اخى الفاضل