١٠ أجهزة رادار مزدوجة تبدأ عملها على طريق المحور

[Bahi]

فعلا أنا شفت الأجهزة الجديدة النهاردة الصبح وأنا نازل من البيت فى أكتوبر للشغل فى المهندسين لأن دة طريقى المعتاد يوميا وعديت 6 رادارات فقط وفية أماكن فاضية لأربع رادارات تانية متركبوش لسة ... ان شاء الله أول لما يخلصوا أشيل أماكن الرادارات القديمة من على الGPS وأحط علية الأماكن الجديدة ولو انها مش فارقة كتير لأنى بمشى على 80 كم/ساعة توفيرا للبنزين وبشوف حوفر كام آخر الشهر وكل ما أوفر حاجة أشترى بيها حاجة جديدة للعربية (فرش - كاسيت - سماعات - DVD ...الخ) ... سيبكم من الرادارات وأعملوا زيى: وفروا فى البنزين وأشتروا اللى أنتم نفسكم فية لعربياتكم.

[mesho70]

- الرادار لو لتحديد السرعة وتجنب الحوادث يبقى اهلا ً بة
- اما ان كان عبارة عن مصيدة وفخ لجمع الفلوس
- كما ان اغلب تلك الرادارات -اعتقاد شخصى وبتجربة - غير دقيقة فى القياسات
- كما ان السرعات المحددة 90 كم/س فى الطرق الصحراوية المفتوحة بالسيارات الحديثة وامكانياتها اعتقد حاجة تخنق خصوصا ً وانا اغلب الاوقات مسافر
-انا اعمل فى محافظة الوادى الجديد وهى صحراء فى اغلب طرقها والتجمعات السكنية محدودة للغاية وتلاقى مسافة تزيد عن 130 كم يطلب منك السير على سرعة لا تتجاوز 60 كم/س
- وتفاجىء على الطريق الصحراوى برادار فى منطقة مكشوفة لدرجة ان العسكرى اللى على الكاميرا نايم على بطنة علشان يستخبى لانة مفيش حتى صخرة كبيرة يقعد وراها وتدفع غرامة على سرعة 72 كم س !!!!

[نبيل عبدالرحمن]

إحنا لو التزمنا بالسرعات التى تحددها إدارة المرور فلن نعطيهم فرصة لجمع الفلوس ومش هايلاقوا حوافز ولا مكافآت وفى نفس الوقت إحنا بنحافظ على نفسنا وعلى عربياتنا وعلى أولادنا

[gadix]

هي كام غرامة الرادار؟
و يا تري لو اكتر من رادار صورك علي نفس الخط بتدفع لكل واحد و لا بتتحسب ازاي؟

[Badr Salah]

اهم حاجة انهم اختارو احسن وانضف طريق للجري في القاهرة
اصل طريق المحور فعلاً يشجع على الجري لانه طريق ناعم والعربية بتزحلق عليه
وده الطريق الوحيد في القاهرة اللي يعرفك اذا كانت عربيتك مظبوطة ولا لا