نصيحة اغير ماتور ولا اعمل عمرة

[gohaaa707]

السلام عليكم ورحمة الله وبركاتة

اخوانى اعضاء احلى واجمد منتدى فى الدنيا محتاج نصيحة سريعة فى موضوع مهم جدااااااااااا جدااااااااا...
انا اشتريت عربية اكسيل 1300 موديل 1994 مانيوال 4 زجاج كهرباء تكييف بس عطلان ومفيش باور...
وكانت معقولة فى المشى بتاعها وفجأة ظهرت عيوب كتيرة مرة واحدة فى الكهرباء والميكانيكا والموتور وبعد كدة طبلت على دماغى بواحد راكب نص نقل الله يكرمة خبطلى الجنب اليمين كلة فبقت العربية مشوهة وانا دلوقتى مش عارف اعمل اية لو بعتها اكيد هتبقى بخسارة ولو شديتها مش عارف التكاليف كام ..فلو تكرمتم اخوانى ذوى الخبرة قولولى اعمل اية واية الاسعار والاماكن اللى اجيب منها الحاجات دى

ابتدى بالميكانيكة

هو من اول ما اشتريتها وانا عارف ان الماتور خفيف واكتر من واحد ميكانيكى قالى كدة بس النصيب وعدم الخبرة المهم بقالى فترة بسمع صوت الماتور عالى جداااااااااا وصوت زى ترزيع كدة ونقر تحت الدواسة بتاعت البنزبت وساعات كتير لما ازود سرعة الخبط دا بيزيد واحس ان الماتور هيقع او هيقطع العلب من تحت وطبعا السحب وحش جداااااا خصوصا لو طالع كوبرى او حد راكب معايا كتير علما باننى لسة مغير طقم دبرياج كامل والميكانيكى بيقولى ان الماتور بينتهى ومش عارف اجيب ماتور جديد ولا اعمل عمرة والاتنين تكلفتهم كام واية الاسعار واية الاحسن ولو اشتريت منين؟؟؟ وقابلت واحد عند الكهربائى بيقولى انة مركب ماتور انجيكشن هيونداى النترا 2004 على الاكسيل ماتور 1500 بحوالى 2500 جنية كامل الماتور بالتكييف بتانك البنزين
وماشية معاة كأنها زيرو اية مدى صحة الكلام دا ؟؟؟؟؟

ثانيا الكهرباء

الكهربائى بيقولى العربية محتاجة ضفيرة كاملة وانا مش عارف اعمل اية دا صح ولا اشتغالة وروحت لواحد تانى قالى ممكن تترم مفيش حاجة اسمها ضفيرة جديدةوكل واحد برأى حاجة تحير اية الاسعار والمصنعية ولو انا غيرت الماتور لازم اغير ضفيرة الكهرباء ؟؟؟

ثالثا العفشة

اية اسعار المساعدين الاماميين واية افضل الانواع لان العرببية مكفية شوية من قدام ولو هعمل عفشة كاملة جديدة تتكلف حوالى كام ؟؟؟؟
رابعا السمكرة والدوكو
لو حبيت ارش العربية بعد الحدثة اللى عملتها تتكلف تقريبا كام واية اسعار الرفارف الامامية والكبوت والاكصدام الخلفى
معلش انا اسف طولت كتير بس مش عارف اعمل اية والدنيا زى ما انتوا شايفين مفتوحة معايا قوى

[حسن شرف]

مش هقولك اكتر من كلمة يعينك ربنا عليها انت فى حيرة وورطة كبيرة بس ان شاء الله ليها حل
أولا اشترى موتور استيراد ويكون بتاعها ودا افضل
ثانيا لو تعرف كهربائى كويس خليه يعملك ضفيرة عمولة على ايده
ثالثا تشوف عفشجى شاطر يبص على المساعدين وعلى العربية عموما والى محتاجاه العربية يعمله
رابعا تشوف سمكرى كويس يظبط العربية
خامسا شوية بوهية حلوين وترجع العربية جديدة من تانى ان شاء الله
وأخيرا تمتع بالعربية وحب العربية علشان تستريح ليها علشان دى بيتك التانى وتعتبر ايدك ورجلك فى اى مشوار
للاستفسار حسن شرف 01112535152

[m.e.y]

ربنا يكرمك و يقدرك عليها ولو ماتورك مش سليم هات ماتور استيراد ويفضل زى ما قال الاستاذ حسن انه يكون بتاعها عشان ماتغيرش فى القواعد والكلام ده

اما لو ماتورك سليم يبقى انصحك بالعمرة وده افضل من انك تجيب ماتور استيراد لأن المواتير دى عامله زى البطيخة المقفوله

يا حلوة اوى يا لا قدر الله سيئة

وربنا يوفقك ان شاء الله

[abozeen]

هات ما تور استيراد احسن واريح ليك...
http://www.fcom.bu.edu.eg/

[حسام البورسعيدى]

هات موتور استيراد اكسيل 1500 كربراتير وركبه على طول واشترى دماغك .. موضوع تعديل موتور انجيكشن ممكن بس هيبقى حوار كبير ومكلف جدا لان هتحتاج موتور بضفيرته وكنتروله وكهربائى ممتاز يشغلهولك ويقفلك الضفيرة فانسى الحوار ده .. موتور الاكسيل مش غالى ممكن يعمل 2000 جنية وهنا فى بورسعيد مرطرط ورخيص .. على فكرة هو موتور الانسر بطه برضو .. بس ابقى خد الميكانيكى معاك وانت بتجيبه وخليه ينقيه ويشوف كبسه مبدئيا كده قبل ما يركب وتتفق مع التاجر على اسبوع للتجربة ...

بالنسبة للسمكرة متلقلش .. صاج الاكسل مش غالى انا هقولك اسعار تقريبيه كده .. يعنى الرفرف حوالى 150 الكبوت حوالى 500 الاكصدام اللى ممكن يبقى غالى شوية ..

ورشه نضيفه ممكن تكلفك 1500 جنية ..

بالنسبة للعفشة اللى يحكم هو العفشجى بس يكون حد معروف وبيفهم وتقوله يشوف العربية محتاجه ايه وتعمله ..

اما الكهربا فموضوع الضفيره ده محتاج كهربائى "نضيف" يلمهالك ويعالجها او يعمل ضفيره كاملة جديدة ..

عموما انا عاوز اقولك ان العربية دى هتصرف كده معاك جامد يعنى اللى فيها ده هيكلفك مش اقل من 6000 جنية فلو عرفت تبيعها على كده بسعر معقول فخسارة قريبة ولا مكسب بعيد لانك هتخسر ووقت ومجهود لو شديتها .. وعموما ربنا يعينك ولو احتجت اى مساعدة تحت امرك ...