نصائحى عن كل شىء فى الهونداى اكسيل موضوع اسطورى

[sayed2077]

السلام عليكم ورحمة الله وبركاته

الموضوع ده ان شاء الله هيكون فيه خلاصه ما اعرف عن الهيونداى اكسيل فى كل شىء ميكانيكا و كهربا وعفشه و شاسيه وصاج و واى معلومه انا عرفتها عن الاكسيل الى يومنا هذا

الموضوع ده هيكون موسوعه ان شاء الله هامه جدا عن الهيونداى اكسيل وانصح الجميع يقرؤوه بعنايه تامه لانهم بعد قراته هيكونوا ان شاء الله ملمين بأغلب خبايا ومشاكل ومميزات الهيونداى اكسيل سواء هاتش باك او سيدان

والحمد لله رب العالمين الذى علمنى

نبداء بسم الله الرحمن الرحيم

مقدمه عن الاكسيل

هيونداى اكسيل هى سيارة بدائت شركة هيونداى الكورية تصنيعها فى اواخر الثمانينات وكانت نازلة باسم (بونى) وطبعا كانت السيارة واخده تكنولوجيا بتاعت شركة ميتسوبيشى بالتحديد من لانسر 93 او ما يعرف عندنا فى مصر (لانسر بطه)

ويعتبر فيها اجزاء كتير اووى تركب من هيونداى للانسر بطه و العكس صحيح ومن ضمن الاشياء ديه العفشه اغلبها تركب فى الاتنين بدون مشاكل او تعديل و حتى ماتور اللانسر بطه بردوا هيركب فى الاكسيل بدون تعديل وهيركب على نفس القواعد بدون اى تعديل او اى شىء الموضوع كله يتلخص فى شيل ماتور حط ماتور فقط

الموضوع ان شاء الله هيتكلم عن كل جزء عن العربيه لوحده

واول جزء هنتكلم عنه ان شاء الله هو

الميكانيكا والات الجر

زى ما احنا عارفين ان الهيونداى اكسيل بتنزل بمحركين

1300 سى سى كاربراتير

وده هتلاقيه فى اغلب العربيات الهاتش باك او السيدان اللى بدون اوبشن

او

1500 سى سى

وده بينقسم لنوعين

الاول : 1500 سى سى كاربراتير وده هتلاقيه فى اغلب العربيات السيدان الفل اوبشن يعنى اربعه ازاز كهربا وتكيف وباور

وده من راىء الخاص الافضل لأن الكرباتير بتاعها مش بياكل بنزين كتير واعطاله قليلة جداااا وحتى يوم ما بيحصله عطل ياما تصلحه عند بتاع كربراتير كويس (انا هبقى اذكر افضل من تعاملت معهم فى اغلب صيانات السيارة اخر الموضوع ان شاء الله ) او تشيله وتجيب كربراتير استيراد وهيبقى غالى شوية لان اغلب سيارات الخارج بتبقى انجكشن بس هتلاقيه يعنى متقلقش وعموما سعره استيراد حوالى 500 جنية بس طبعا الكربراتير مش بيبوظ بسهولة ومادام وديته عند واحد بتاع كربراتير كويس هيظبطه مره وخلاص.

اما بقى النوع التانى : 1500 سى سى انجيكشن والماتور ده بيكون واحد ماتوره القديم باظ فبدل ما يعمل عمره بيشترى ماتور استيراد وخلاص ويركب بس طبعا اغلب مواتير الاكسيل الاستيراد بيكونوا انجيكشن فبالتالى بيجيب الماتور انجيكشن وانا عموما منصحش بيه لان انجيكشن الاكسيل مش متوفر فى مصر وقطع غياره مش متوفرة الا استيراد ويوم ما بيحصل فيه مشكلة بتبقى مش عارف تجيبله قطع غيار منين .

نيجى بقى لخلاصه تجاربى مع ماتور الاكسيل

ماتور الاكسيل ماتور ناعم اووى بس للاسف صوته عالى شوية بخلاف المواتير الحديثه وغير كدا فيه مشكلة اجمع عليها اغلب ملاك الاكسيل وهى ان يوم ما بيحصله حاجه صوته بيبقى خشن ومش بيرجع زى الاول خلاص غير كدا الماتور ليه اربع قواعد ماسكينه واحده يمين وشمال وورا وقدام ولازم لو حسيت ان فيه رجه جامده انك تغير القواعد ديه علشان بتخلى العربيه كلها ترج

وبرضوا ارجع واقول ان ماتور الاكسيل على قد كدا حاجته متوفره فى كل مكان وبسعر رخيص وهتلاقى حاجته الاصلية متوفرة وهتلاقى كورى مش اصلى بمعنى اخر قطع غياره موجوده فى كل مكان وبسعر رخيص فديه ميزه تتحسب له ونصيحتى عموما للحفاظ على مواتير الاكسيل تخلى بالك من الزيت دايما لو جوان وش السلندر ضرب عندك اوعى نهائيا تمشى والجوان ضارب وبيخلط زيت على مايه لانه هيؤدى ان طقم الشنابر بتاعت البساتم تبوظ والماتور ياكل فى زيت جامد و دايما حافظ على دورة التبريد سواء مراوح او ردايتير ده اهم حاجه

ولو ماتورك باظ خالص ممكن تجيب ماتور لانسر بطه بالفتيس بتاعه بيركب على قواعد الاكسيل عادى جداااا وبيكون ناعم اووى بس هيقابلك كام مشكلة وهما ان الاسبراتير بتاع اللانسر بطه بتكون الموبينه موجوده جواه والاسبراتير ده مش بيتصلح بيترمى ويتجاب واحد جديد ومشكلتة ان سعره حوالى 400 جنية فبالتالى بيكون مبلغ كبير شوية والمشكلة التانية ان قطع غيار ماتور اللانسر البطه مش متوفرة بكثرة زى ماتور الاكسيل

بس زى ما قولنا ان ماتور اللانسر بطه بيكون انعم من ماتور الاكسيل

وده كل اللى فى دماغى حاليا عن الماتور بتاع الاكسيل ولو فيه حاجه جديده هتضاف دايما هنا فى مكانها والكلام ده لكل اجزاء الماتور.

بالنسبه للفتيس بتاع الاكسيل

الاكسيل بتنزل بثلاث انواع فتيس

الاول : بيكون مانيوال 4 سرعات امامية وده مش منتشر بكثرة بس عموما شغال يعنى مش مؤثر اووى يعيبه فقط انك بتنقل بعد ما تجيب سرعه على كل غيار بس مش لازم تحرق على الغيارات علشان تنقل مستريح نقدر نقول عليه انه شغال وبيؤدى الغرض المطلوب منه.

الثانى :بيكون مانيوال 5 سرعات اماميه وده منتشر جدا فى الاكسيل ونقدر نقول انه يعتبر فى 80 % من الاكسيل اللى موجود فى مصر وبينزل للموديلين 1300 و 1500 سى سى وده يعتبر افضل فتيس للاكسيل .

الثالث : بيكون اتوماتيك 4 سرعات اماميه وده اسوء فتيس للاكسيل وخسارة فيه الفلوس ولو قدامك عربيه بفتيس 4 سرعات امامية مانيوال هيكون احسن من الاتوماتيك بتاع الاكسيل وده بسبب انه كثير الاعطال جدااا ومش معمر نهائى فملوش لازمه انى اوجع دماغى كل شوية تصليح او اروح اجيب واحد تانى استيراد ونصيحتى لو معاك عربيه اتوماتيك انك يوم ما الفتيس يبوظ انزل اشترى فتيس مانيوال 5 سرعات احلى 100 مره من الفتيس الاتوماتيك او لو قدامك عربيه اتوماتيك وهتشتريها فخلى معاك احتياطى 1000 جنية علشان يوم ما الفتيس الاتوماتيك اللى معاك يبوظ انزل اشترى فتيس مانيوال 5 سرعات افضلك.

نصائح للفتيس بتاع الاكسيل

لو معاك فتيس مانيوال فيعتبر مفيش نصائح ليه لانه يعتبر قليل المشاكل جدا وقليل او نادر ما حد اشتكر من الفتيس المانيوال سواء 4 سرعات او 5 سرعات وغير كدا الفتيس بتاعها ناعم جدااا وممتع فى السواقه والدبرياج بتاعها متوسط مش خفيف اووى زى الفيرنا مثلا ومش تقيل زى ال 128 او اللادا هو وسط وعموما مش بيكون تقيل او بمعنى اخر مش بيتعب اثناء السواقه

مع العلم ان الدبرياج فى الاكسيل بيكون على سلك و السلك ده بيبقى معمر جداااا بخلاف مثلا دبراياج ال 128 الى السلك بتاعه بيتقطع كل شوية (الناس اللى كان معاهم 128 وانا من ضمنهم )

اما بقى نصائحى فى الفتيس الاتوماتيك

اهم حاجه كل 10 الاف كيلو تغير زيت الفتيس الاتوماتيك والفلتر بتاعه ده لو فيها فلتر مش متأكد اووى و تمشى عادى لغاية اول مشكله تحصل انزل ارمى الفتيس الاتوماتيك اللى معاك وهات واحد مانيوال ورايح نفسك .

نيجى بقى لالات الجر اللى هى عندنا الكبالن

كبالن الاكسيل ما دام الشاسيه مظبوط بتعيش معاك حوالى من سنه الى ثلاث سنوات طبعا لو عاشت اقل من سنه يأما نوع الكبالن وحش او يأما الشاسيه عندك مش مظبوط والكلام ده هتكلم فيه بعدين لما نيجى عند الشاسيه وعموما فيه من كبالن الاكسيل صينى وديه لا افضلها او بمعنى اخر مفيش ناس كتير جربوها و عندك التايوانى وده من راى الخاص كويس ولو حتى قعد معاك سنه او سنه ونصف يبقى كتر خيره اووى ومش وحش انك تغير كبالن كل سنه او سنه ونص طبعا ده بنقولة علشان سعر الكبالن التيوانى حاليا حوالى 200 جنية للجوز يعنى كتر خيرهم اووى لو قعدوا سنه وفيه نوع تالت اللى هو اليبانى وديه بتكون كبالن اللانسر بطه وسعرها بيكون حوالى 400-450 جنية وطبعا انا شايف ان حرام تجيب كبالن ب 450 جنية للاكيل فى حين عندك الكبالن التيوانى بتؤدى الغرض المطلوب منها مع العلم انها لو عندك كل حاجه مظبوطه واستخدامك كويس للعربيه ممكن عمرها يكون اكثر من سنتين ويمكن اصلا اليبانى ابو 450 يكون مضروب ويبقى اسمك اشتريت حاجه مضروبة بسعر غالى وفى الاخر مكملتش معاك سنه حتى

وده اغلب ما اعرف عن الكبالن بتاعت الاكسيل ولا اعرف هل لها كبالن كورى او لا لانى اغلب اللى شوفتهم بيركبوا كبالن للاكسيل بيركبوا التيوانى لانها كويسه وسعرها مناسب وفى نفس الوقت بتعيش مده كويسه .

العفشه

عفشة الاكسيل من ابسط ما يكون بجد انا شايف انها بسيطه جدااااا مقارنه مثلا بالنوبيرا اللى عفشتها مكونه من مليون قطع بخلاف عفشة الاكسيل اللى مكونه من قطع معدوده تعد على اليد كما انها غير مكلفه واقتصاديه جداااا بطريقه رائعه

بالنسبه للعفشة الامامى فبتتكون من الاتى

1:اتنين مساعدين

2:بطاحتين

3:سوستيتين مساعد

4:اربع جلب

5:بارتين بتوع علبى الدركسيون (الاسكترا )

6:بضتين مقصات

7:مسمارين ميزان

8:ميزان

اما العفشه الخلفية فهى عفشه منفصلة من ابسط ما يكون

1: سربنسيه

2:اتنين مساعد

3: اتنين سوسته

وزاى ما حضراتكم شايفين عفشتها بسيطه جدااااا وتتلم باقل مبلغ

يعنى مثلا الاربع جلب ثمنهم حوالى 60 جنية والبطاحتين ب حوالى 130 و مسمارين الميزان ب 20 وهبقى اذكر اسعار قطع الغيار فى اخر الموضوع المراد او اللى عاوز اقوله ان عفشة الاكسيل بسيطه واقتصاديه جدااا فمتبخلش عليها لو باظت على الاقل لو مش علشان راحتك فعلشان العربيه ميحصلش فيها حاجه

نيجى بقى لنصايحى لعفشة الاكسيل

افضل مساعدين للاكسيل هى ماركة ماندو الكورى والمساعدين الامامى هاتها زيت والخلفى هاتها غاز على زيت علشان العربيه تبقى ماسكه نفسها من ورا لان المساعدين الزيت فى الخلف بيخلوا العربيه زى مراجيح السيده لو خدت اى مطب هوا

اما بالنسبه لو بتاخد مطب وبتسمع صوت ترزيع بعد المطب يبقى البطاحات وحشه

صوت شخلله او تزيق يبقى جلب وبيض و بارات

ولو لقيت ان العربيه ناشفه اووى يبقى اكشف على المساعدين ولو لقيتها طريه اووى يعنى بتتنطط مع اى مطب برضوا اكشف على المساعدين

الشاسيه

شاسيه الاكسيل من عند الحوض بتاع الماتور مشكلتة انه بيشرخ طبعا مش بيشرخ زى ال 128 اللى بتشرخ فى كل حته وكل سم مش فى الحوض بس لا ده فى العربيه كلها

بس عموما هو بيشرخ بس فى مكانين بس ده طبعا يعيب العربيه وحل مشكلة التشريخ ده نهائيا هو انك تركب بارة من تحت بتمسك الجزء اليمين بالجزء الشمال وبيكون البار ده عبارة عن خوصه حديده وبكده بتقضى نهائيا على مشكلة التشريخ ومش هيظهر اى حاجه عندك طول ما البار متركب وعفشتك سليمة

ديه كانت مشكلة التشريخ

نيجى بقى للمشكلة التانية وهى الكابوت اللى العضم بتاعه بيفارق الكابوت كل شوية ده بقى لغاية النهارده انا مش لاقيله حل

بصراحه ناس تقولك هات كابوت استيراد وناس تقولك الزق بسيلكون كويس ولغاية النهارده انا عن نفسى مش لقيلها حل فاللى عنده حل ياريت يقول

ديه كانت اكثر مشكلتين بيبقبلوا اى حد معاه اكسيل فى الشاسيه

وعلى حسب علمى مفيش نصايح تانيه للشاسيه

كهربة السيارة والتكيف

بالنسبه لكهربة السيارة فطبعا انا هتكلم عن التعديلات اللى الناس بتعملها علشان تحول عربياتهم لفل اوبشن

اولا الزجاج الكهربا حضرتك هتجيب المكن بتاع الاكسيل بالماتور بكل حاجه من من بتوع الاستيراد وطبعا اوعى تجيب مثلا مكن يبانى او كده لا هات المكن بتاعها معمر و بيركب مظبوط ومش هيخلى الازاز يقرفك فى الطلوع والنزول

وطبعا ما دام قلبت الاربع ابواب ازاز كهربا يبقى بالمره هات الكنسولة اللى فيها مفاتيح الازاز الكهربا للعربيه علشان يبقى الموضوع تركيب وتوصيل فيش وخلاص

اما بالنسبه للتكيف

تكيف الاكسيل الى بينزل معاها بيبقى عاوز الحرق لانه شغال على تصميم دايرة قديم جدا وتسمى دايرة تكيف امريكانى و بتتكون من الاتى كباس و سربنتينه و ثلاجه وخزان و اكسبنشن تيوب

عيب الدايرة ديه من وجهة نظرى كذا حاجه منهم

ان الاكسبنشن تيوب اللى فى الدايرة ديه عبارة عن صباع بلاستيك بيتسد كل شوية و بالتالى بيخلى الكباس يقفش او بمعنى اخر يتحرق تانى حاجه دايرة التكيف ديه بيحصل فيها سدد مع التشغيل الطويل شوية وثالث شىء انها شغالة بفريون 12 المضر بطبقة الاوزون ويعتبر فريون محرم دوليا ومشاكله كتير اووى

وعلى فكره الاكسبنشن تيوب ده موجود جوه التلاجه يعنى موجود بداخلة دايرة الفريوت بالتالى علشان تغيره لازم تفضى الفريون كل شوية وكل شوية تشحن فبالتالى هتلاقيك بتصرف على شحن الفريون اااد كدا بسبب الاكسبنشن ده غير طبقة الاوزون اللى حضرتك عمال تخرم فيها كل شوية هههههههههههههه

وحل التكيف ده كالاتى

ان حضرتك ترمى الكباس بالسربنتينه بالخزان بالاكسبنشن تيوب

كده مش هيتفضل عندك غير التلاجه لو حالتها وحشه هترميها بالمره لو حالتها حلوه بتسيبها وبتعمل عاليها تعديل معين و بتجيب الاتى كباس بتاع فريون 134 و سربانتينه وفلتر فريون و اكسبنشن اللى هيركب على التعديل اللى عملناه على التلاجه القديمه والفرق بين الاكسبنشن ده والاكسبنشن القديم ان الاكسبنشن ده غالى عن القديم وبيبقى مصنوع من معدن وبيختلف تماما عن الاكسبنشن البلاستيك اللى فى الدايرة القديمة وغير كدا عمره طويل اوووى ونادرا لما بيحصل فيه سدد

فوائد الدايرة الجديده اول حاجه اعطالها قليله جدااا

ثانيا تبريدها ممتاز

ثالثا غير مضر بالبيئه

وبالتالى كده خلاص انت اتغلبت على مشكلة التكيف بتاعتك

وبقى معاك تكيف ممتاز

نيجى بقى

لخلاصة النصايح

لو حبيت تقلب عربيتك لباور هترمى الاسكترا القديمه و هتجيب سكترا باور و طرمبة الباور وخزان زيت الباور وخراطيم الكلام ده كله هيكلفك حوالى 800 جنية و تركيب 100 ومصاريف اخرى وزيت وكدا حوالى 100-200 جنية

بالنسبه للعربيات الهاتش باك انت زيك زى السيدان فى كل حاجه حتى حجم الشنطه يعتبر مقارب جدااا للسيدان وشنطتك واسعه على فكره وبتاخد حاجات كتير بس خلى بالك من حجتين

فوانيسك الخلفى لانهم نادرين شوية و اكصدامك الخلفى لانه برضوا نادر

الطابلوه بتاع الاكسيل بيشرخ من الشمس بالتالى يفضل تحط عليه مفرش من بتاع التابلوه علشان ميشرخش وحتى لو شرخ متزعلش ناس كتير زيك تابلوهاتهم مشرخه وعادى يعنى وابقى حط مفرش برضوا على التابلوه علشان يدارى منظر التابلوه المشرخ

لو اشتريت عربيه اكسيل اول حاجه تبص عليها تنزل تحت العربيه وتشوفها مركبه البار اللى ماسك العربيه من تحت ولا لا لان البار ده هيخلى العربيه الشاسيه بتاعها ميشرخش من قدام ولو مش موجود ولقيت حالة العربيه نضيف يبقى اول حاجه تعملها انك تركبلها البار ده واوعى تسمع لكلام حد يقولك ده هيقلل من تمن العربيه لانك لو مركبتهوش العربيه هتشرخ وفعلا تمنها هيقل ساعتها

عدادات تابلوه الاكسيل ممكن تقلب نورها لنور ابيض وده انك تشتريلها لمبات الالنترا 2009 اللمبتين ب 10 جنية وهيديك نور عدادات التابلوه ابيض وقوى جداااا

نور الصالون هات كرت ليدات ب 10 جنية فيه حوالى 36 ليد نوره ابيض هيخليلك اضائة الصالون حلوه جداااااا وقوية

عفشة الاكسيل مش مكلفه فارجوك لو فيها حاجه بايظه روح غيرها علشان ميحصلش شروخ فى العربيه و كل شهرين ربط عفشه وازبط زوايا

طمبورة كرنك بتاعت الاكسيل اللى متوصل عليها سير الدينموا الطمبوره ديه فيها جزء من كاوتش الجزء ده على مر الزمن بيتاكل وبيخلى الطمبورة تتهز وهى بتدور وبالتالى هيخلى العربيه تاكل سيور كل شوية ولو اهملتها اكتر هتلاقى الطمبورة مبقتش بتلف وحلها تغيرها بواحده جديده اصلية او لو جبت استيراد ابقى بص كويس على الكاوتش اللى فيها و بص كويس على السنون بتاعتها لو فيها سن مكسور متاخدهاش علشان متكلش فى سيور كل شوية

ديه بعض اسعار قطع غيار الاكسيل

مع العلم الاسعار تقريبا لانها بتختلف من مكان لمكان ومن تاجر لتاجر

ماتور 1500 بالفتيس 3500

ماتور لانسر بطه بالفتيس 3500

كبالن تيوانى 220

كبالن يبانى 400-450

بطاحه مساعد جديده 65

اربع جلب بتوع العفشه الامامى 60-75

بيضتين مقص 100-120

بارتين اسكترا 120

فلتر بنزين 15

فلتر هوا 20

فلتر زيت 20

طقم تيل امامى تركى ممتاز 50-60

طقم تيل خلفى 70

بليتين امامى لعجلة واحده فقط 70 -100 حسب نوع البلى

اويل سيل شحم بتاع البلى الامامى الواحد ب 15

كتاوت مروحة ب 20

ترموثتات حرارة بيبين حرارة الماتور على عدادات التابلوه 20

جوز مساعدين ماندو كورى امامى 400

جوان وش سلندر 20

مشط الاسبراتير 120
الاربع قواعد بتوع الماتور 250




افضل صنايعية تعاملت معاهم فى السيارة

كهربا وتكيف اكيد غنى عن التعريف الاسطى احمد حنفى محفوظ بالمعادى ويمكن لكم مشاهدة الموضيع التى تذكره فى قسم التكيف




الموضوع كاملا من كتابتى الخاصه

غير مسموح نقله لاى موقع اخر الا باذن منى شخصيا



كل ما ذكر فى الموضوع قد يكون به بعض الاخطاء الاملائيه او العمليه فانا بشر قد اخطىء ولكنى ايضا اتعلم و يمكن لاى احد ان ينبهنى عن اى خطاء ذكرته لاتعلمه


و الحمد لله الذى اعطانى العلم الحمد لله حمدا كثيرا


تحياتى لكل زملائى بالمنتدى



و


السلام عليكم ورحمة الله وبركاته

[حسام البورسعيدى]

يشرفنى انى اكون اول رد على موضوعك الرائع والممتاز واللى بجد انا عاجز عن شكرك على المجهود الجبار اللى بذلته فى وخلاصه التجربة والخبره اللى انت شاركتنا بيها ..

بجد موضوع من المواضيع المميزه فى المنتدى ..

جزاك الله خيرا .. وجعله افاده لكل مالكى الاكسيل باذن الله ..

انا معايا بنت عمها افانتى (النترا كورى) 97 .. بس طبعا هى مش مشهورة زى الاكسيل و تعتبر نادره اوى بره بورسعيد .. غير كده كنت عملت موسوعه عنها برضو لانها حبيبه قلبى وعشره عمر ...

[sayed2077]

بجد انا مش عارف اشكر حضرتك ازاى استاذ حسام

انا كنت بدائت افقد الامل ان حد يرد او حتى يقول السلام عليكم حتى

خصوصا ان فيه 100 مشاهده

بجد رد حضرتك اسعدنى جدااااا جدااااا والف شكر لحضرتك

[amoor89]

الله ينور عليك يا أستاذ سيد حضرتك فصصت العربية كويس لاى حد بيفكر يشتريها عشان يبقى عنده فكرة كويسة عنها
بالمناسبة دى ليا سؤال عند حضرتك
بالنسبة للكاربرتير انا عندى كمية خراطيم مفصولة مش عارف دى فين ولا مين مع مين مش فاهم اى حاجة وحاولت ابص عليها فى عربية حمايا حسيت ان فى حاجة مختلفة عربية 1500 فكنت طمعان ان حضرتك تصور الكاربرتير بالخراطيم لو مظبوطة عند حضرتك وهل الخراطيم المفصولة دى تزود الاستهلاك ولا لا

[sayed2077]

المشاركة الأصلية كتبت بواسطة amoor89 الله ينور عليك يا أستاذ سيد حضرتك فصصت العربية كويس لاى حد بيفكر يشتريها عشان يبقى عنده فكرة كويسة عنها بالمناسبة دى ليا سؤال عند حضرتك بالنسبة للكاربرتير انا عندى كمية خراطيم مفصولة مش عارف دى فين ولا مين مع مين مش فاهم اى حاجة وحاولت ابص عليها فى عربية حمايا حسيت ان فى حاجة مختلفة عربية 1500 فكنت طمعان ان حضرتك تصور الكاربرتير بالخراطيم لو مظبوطة عند حضرتك وهل الخراطيم المفصولة دى تزود الاستهلاك ولا لا

الف شكر لرد حضرتك بجد

ومن عنيا حاضر هصورلك الكربراتير بس حاليا انا راكن العربيه لان فيها شوية اعطال وانا بعيد عنها حاليا اول ما اكون قريب منها هصورها ان شاء الله