معايه عشرين ألف ومحتاج عربية ضروري، محتار

[mohamed.salama]

بسم الله الرحمن الرحيم
من سنه كنت كتبت موضوع في أحد منتديات السيارات وكان املي الاقي سيارة جيدة بمبلغ ( 10000 ) وبرغم اني عارف انه مبلغ بسيط اوي لكنه ساعتها كان ممكن يجيب اللي حيران الاقيه دلوقتي وانا معايه 20000 وربنا يخللي الزعيم مطرح ما هو قاعد اللي خللى قيمة العشرين تمانيه .. المهم
الخلاصه ،، أنا شاب ( ههههههه شاب ايه 33 سنه ومعنس أساسا ونص الفلوس دي كانت بتاعة الشقة ) ما علينا ، انا شاب فاتح محل في ريف ميت غمر ، بعد فصلي سياسيا من شريعه وقانون ( قبل التخرج بشهرين) .. انا بتاجر في حاجات كتير وبحتاج اروح أماكن متفرقه لجلب البضاعه ، محتاج سيارة بالمواصفات الآتية : (مع العلم انا حيران جداااااااا) من ساعة ما بعت الموتوسيكل الصيني اللي كان معايه واغلب الناس بيستعبط في تسعير عربيته اعتمادا على الأسعار المرتفعه بالفعل وعلى جهلي أنا بالسيارات ..
المواصفات وأسبابها وايه ينفع ليا دي النصيحه اللي بطلبها من العارفين وهتكل على الله اخر كلام واشتري
السيارة
1 – صغيرة الحجم (بسبب) بيتي عرضه 6 متر فقط وفيه محل تحت وهيكون صعب اقفل مدخله كله وكمان على الطريق واخاف عليها من (الحك)1 فيها بالإضافة اني طول عمري لوحدي وعلى ادي في كل حاجه، هاتشباك افضل كتير ليا من السيدان.
2 – اعتماديه في المصاريف الدورية ( ارباحي الشهرية تتراوح من 2000 إلى 4000ج ( باكل واشرب سجاير بس بنصهم تقريبا ! )
- وبالنسبة لإعتمادية السيارة أنا ضد كل الكلام الفارغ بتاع هات فيات 128 عشان مصاريفها على الأد ومتجيبش عربية قطع غيارها غاليه لأني شايف الغالي تمنه فيه وتركيب حاجه بمية جنيه تقعد سنه ارخص من تركيب حاجه بعشرة جنيه كل شهر !! انا تاجر واعرف ان الأغلى هو الأرخص . المشكلة اني اسافر عشان اجيب الحاجه دي ، ده اللي انا مقدرش عليه.

3- انا مش مهمل ولا بحب اسابق حد انا باكل عيش ومحتاج العربية في الشغل بس مش معنى كده اني اجيب عربية متستحملش مشوار اسكندرية مثلا لو حبيت افصل من جو الريف واروح اقعد مع نفسي ادام البحر واعمل فيها المتنبي شوية واكتبلي بيتين شعر واجي من غير ما اسب والعن في حظي والعربية واقفه مني في نص الطريق.

4- انا جاهل في العربيات ، ومبحبش الصنايعيه ولا اشتغالاتهم فمش عايز اتعود اصرف على العربية اكتر ما بجيب منها.
5 – انا معنديش استعداد ابدا اسافر من ريف ميت غمر عشان اروح اجيب حتت حديد مش موجوده الا على مسافة تعي 150 كيلوا لأن معنديش حد يقف في المحل بتاعي ولا يحضرلي اكل لما ارجع ولا ياخد باله من حاجتي ولا انا بكسب اللي يخليني اقفل يوم كامل عشان مشوار زي كده مع اني بميل وبحب للعربيات اللي للأسف ده احد عيوبها زي السمارا والمازدا

6- عاوز عربية لو ربنا كرمني و حوشت قرشين وحبيت ابيع تتباع ، مش اقعد جمبها سنه وابيعها بخسارة
وأخيرا .. لو قررت مصبرش اكتر من كده لأني بعت الموتوسيكل خلاص ومحتاج جدا امشي حال المحل لأني مش عارف اجيب بضاعه بقالي فترة ، ايه ينفعني يا جماعه وتنصحوني بإيه ؟

وايه رأيكم لو لقيت عربية حالتها كويسه من الأنواع إيه احسن ليا : مع العلم انا لسه مش بسوق كويس بس دي مقدور عليها يعني بركب وبمشي وبسافر كمان بس عشان معنديش عربية اكيد محتاج اتعود
المحروقه اللي كل الناس بتنصحني بيها فيات 128 وضهري وجعني وانا بجربها / اللي عاجباني فشخ بس فلوسي قليلة عليها 131 مع اني مركبتهاش قبل كده / النادره شوية 132 ( 1600 سي سي ) / الوحش اللي مش بيجري بس بيستحمل قوي لادا نيفا / اللادا السمارا / المازدا 323 هاتشباك / البولونيز . وايه تاني برأيكم ينفعني .

[AbOnOrA]

اهلا بيك يا محمد فى مصر موتورز .. انا مقدر حيرتك والله وليك حق تحتار واى حد هتساله هيحتار برضو لان طلباتك كتير اوى على الميزانية ديه ومستحيل تلاقى حاجة تتجمع فيها المطالب الستة اللى انت كاتبها

فمثلا مفيش عربية فى الفئه ديه يتقال عليها اعتمادية وتسافر وتيجي بيها من غير مشاكل خالص الا لو كنت شيخ مبروك وكل عيلتك دعيالك مش بس الحاجة لان موديلات الفينات وعربيات باضعاف اضعاف القيمة ديه ويابانى او كورى او المانى كمان بيحصل فيها مشاكل فى السفر عادى خالص ويرجع بيها مقطورة

موضوع انك جاهل بالميكانيكا ومبتحبش الصنايعية ده برضو مش اوبشن فى مصر لان اى عربية طالما مش زيرو وفى ضمان الوكيل هتحتاج تزور بيها صنايعية وتلف بيها ع المشايخ كمان .. فلازم تتعلم ميكانيكا وكلنا مكناش نعرف حاجة واتعلمنا والمنتدى ده وظيفته انك تتعلم وتاخد خبرة ولازم هتصاحب صنايعية ويبقى ليك الميكانيكى بتاعك الىل تثق فيه والكهربائى والعفشجى كمان

الخلاصة فكر بشكل واقعى ودور على حاجة تلبى اولوياتك وتبقى عامل حسابك على ان حاجة على حساب حاجة
ولو تقدر تعمل جمعية او تتصرف وتزود المبلغ شويتين هيبقى احسن طبعا والحيرة هتبقى اقل بكتير

[mohamed.salama]

انا قررت هركب عربية بالعشرين الف ايا كانت ، سيبك من شروطي ، لو انت معاك العشرين الف ، وقررت .. هتعمل ايه ؟ اقولك ، انا هختصر ليك المسأله زي ما انا شايفها ، حط ال128 في كفة كأكتر عربيه ممكن تخدمني واقدر ابيعها في اي وقت ( دي ميزتها الوحيده للأسف عندي) وباقي العربيات اللي بحب ركوبتها في كفه ، وكلهم قريبين في السعر من بعض لو الحاله حلوة بس انا عشان جاهل بالعربيات باخد النصيحه ، ايه الأفضل من دول بغض النظر عن شروطي ، بوجه عام كعربيه قديمه يعني ..
مازدا 323 هاتشباك
لادا سمارا
دايهاتسو شاريد
فيات 132 ماتور 1600 cc
-----
أنا شايف ان واحده من دول انسب ليا كتير عن ال28 ، انت لو مكاني ، هتركب ايه ؟