تجربتي مع لانسر 2013..

[عصام غنايم]

فعلا بومه ولا شارك

[Adham mh]

اكيد يقصد علي البومه لانه بيقول الشبكه الجديده وشارك
ماغيروش الشبكه

[نبيل عبدالرحمن]

بصراحة زى مايكون بيتكلم على عربية تانية ، أنا معايا اللانسر بومه GLX موديل 2013 ومافيهاش كل العيوب اللى حضرتك ذكرتها ، صحيح التكييف بتاعها مش حلو لكن ما شفتش فيها أى عيب من اللى حضرتك قلت عليه

[the ultimate opportunity]

معلش يا بشمهندس لكن انا معايا لانسر بومة 2013 GLX كلاسيك مافيهاش اى عيب من اللى حضرتك قلته خالص حتى التكييف زى الفل مافيش مشاكل

وكمان انا حرد على كل مشكلة حضرتك قلتها بالترتيب

1.القعدة مريحة جدا والله (وعلى فكرة انا مليان بردو شوية و لما بخدها من بابا عشان اسوقها برجع الكرسى للاخر بردو بس

ممكن حد يعض ورايا عشان العربية واسعة)احنا 5 افراد فى العيلة ال3 اللى بيعضوا ورا بيبقوا مستريحين مش مديقين.

2.خامات الكراسى انا اعتقد ان هى مش وحشة اوى (ممكن حضرتك كنت تعمل فرش جلد طبيعى زى ما عملت و تبقى اتحلت المشكلة)

3.الشكل انا شايفه جميل (نينتى او جدى) و يدى احساس بالفخامةو دا مش رايى لوحدى فى ناس من الموقع تاكد كلامى دا و كمان صحاب بابا بردك اكدوا الكلام دا.

4.الماتور و العزم: على فكرة العربية كلها يابانى حتى الماتور مش صينى لان ببساطة ميتسوبيشى ملهاش خطوط تجميع فى مصر اصلا و العزم بتعها ميه ميه والسحب كمان. حضرتك بتقول ان التكييف مع الكاسيت الcd العربية مابتعديش ال100 و بتسحب بنزين كتيررررررر بجد هما مبياسروش على حاجة احنا بنبقى خمسة مسافرين وطول الطريق الكاسيت شغال هو و التكييف مابيافوش ثانية و بنجيب 150 كمان و ممكن نزود بس عشان العدد و الشنط وكل دا مابيخدش بنزين كتيررررر لدرجة كبيرة.


5.انا عن نفسى لما بلف ماعنديش صوت طقطقة خالص فمعرفش ايه السبب اللى عند حضرتك.


6.الزجاج:مافيش حاجة بتحصل خالص معايا من اللى حضرتك بتقولها فبردو معرفش ايه السبب.


7.الفتيس:العربية عندى اوتوماتيك ستبترونيك و الفتيس ناعم جدا جدا جدا.


8.الشبكة الامامية جميلة جدا مش عارف حضرتك مش عجباك ليييه؟؟؟



9.العدادات الجديدة عمليه جدا و شكلها حلو جدا (ممكن ازواق بس انا شايف انها جميلة).



10.الكماليات:هى فعلا قليلة شوية بس (الجودة بالموجودة)اللى موجود مش قليل قوى يعنى مش زى الاوبترا ولا وسيلة امان توحد ربنا...



11.بالنسبة للحادث انا مش عارف جت ازاى انا ححكى لحضرتك على حادثة انا عملتها بعد ما جبناها بتلات شهور جيت مرة اركن و.......هباااااا فى عربية من بتوع الخمسينات(عندنا واحد فى الشارع لسة محتفظ بيها بالرغم انو معاه اكسنت يلا ما علينا نسيب الناس فى حالها...)وتركككككككككككك انا قولت خلاص العربية بقت كفتة من ورا نزلت لقيت يدوبك حتة من الصاج داخلة لجوه ممكن تترد ع السخن بس كدا انا اللى افتكرتها كارثة...



12.الانخفاض:انا قولت لحضرتك احنا 5 لما بنكون راكبين بناخد اجدعها مطب و الحمد لله ولا بيحصل حاجة.



13.التكييف: زى ما قولت لحضرتك كويش مش وحش خالص



14.التوكيل:بجد المعاملة جميلة جدا لما روحت عملت صيانة الالف كانت المعاملة جميلة جدا و الاسعار معقولة (انا عامل لحد دلوقتى حوالى 3798 كيلو الحمد لله)



15.تيل الفرامل مفيهوش مشاكل و مغيرتوش ولا مرة واحدة (و على فكرة العربية معايا بقالها حوالى 8 شهور)



16.العربية لما بتسخن ولا بتقف ولا بتبطل وانا معرفش اللى حضرتك بتقول عليه دا......

انا فى اخر الكلام ياريت مكنش طولت عليك بس
انا كنت عايز اقول لحضرتك ان ولا حاجة من اللى حضرتك قلتها بتحصل معايا
وطبعا الاختلاف لا يفسد للود قضية
وعايزين من حضرتك تجربة الفانتازيا الهاى لاين بس بالتفصيل الممل
ماتتاخرش علينا يا بشمهندس.

[sasa79]

انا معايا مو 2007 والعربية الحمدللة زى الفل ومن افضل العربيات اللى ركبتها .. ف اول يوم فى رمضان وانا واقف واحدة ست وهى بتلف وبتكلم اللى قاعدة جنبها وسرحانة خبطتنى . الحمد للة قدر ولطف وعربيتها هى اللى اتبهدلت .