تلميحات عن جيلي mk بعد صيانة 50 الف كيلو

[drift]

بعد صيانة ال40 الف كيلو خوضت بالسيارة 10 الف كيلو من الخدمة الشاقة ظهرت فيهم بعض مميزات السيارة وبعض عيوبها نبدا بالعيوب كما ذكرت في الموضوع السابق ان الدبرياج بيحتاج تزبيط كتير مثلا مرة كل شهر لاحظت في السيارة رعشة خفيفة جداا عند بداية الحركة بالسيارة طننشط وقولت عادي بتحصل في اغلبية السيارات بعديها بشهر زادت الرعشة الي رعشة قوية في بداية الحركة روحت للميكانيكي قالي دي اسطوانة الدبرياج استغربت جدااا العربية تعتبر لسة جديدة بس الرعشة كانت بتنتهي تماما لما اسيب الدبرياج دة اللي كان مجنني والسحب بتاع العربية زي الصاروخ ولا اكن في حاجة لكن هي بداية الحركة فقط اللي فيها رعشة روحت للتوكيل قالي اسطوانة الدبرياج 240 جنية استغليت التوكيل خاصااا انها حاجة مش مستاهلة توكيل اي حد يركبها روحت جبت اسطوانة دبرياج تويوتا كرولا 2004 ودي نفس مقاسات اسطوانة دبرياج الجيلي لانة نفس المحرك والفتيس بتاع الكرولا وكان سعر الاسطوانة 130 جنية ركبت الاسطوانة حسيت ان العربية اتغيرت جداا في بداية الحركة الرعشة اختفت تماماا ودواسة الدبرياج بقت خفيفة وسلسة للغاية ودلوقتي بدات الرعشة ترجع علي خفيف جداا سالت تاني قالولي في التوكيل ان الفتيس والدبرياج التويوتا عامااا ضعيف لا يتحمل كثيرا وقالولي لذلك تلاقي كل اللي راكب تويوتا كرولا 96% منها اتوماتيك لانها لا تثبت كفاءة في المانيوال بس دة علي المدي البعيد ففكرت اركب للعربية فتيس تويوتا كرولا 2005 اتوماتيك وهيبقي مظبوط عليها جداا بس هو العيب الوحيد في دبرياج الجيلي هو الرعشة بس لكن سحب العربية متغيرش حتي بعد تغيير الاسطوانة السحب صاروخ وعيب اخر بسيط يمكن ان نتلاشاة هو ان الكاوتش الي في العفشة والمقصات بتاع العربية من خامة رديئة حيث فوجئت بسوط خبطة خفيفة في العربية من تحت في الطرق الغير ممهدة بعد اسبوعين الخبطة زادت بقت خبطة جامدة روحت التوكيل فوراا كنت حاسس ان هيكون في مصيبة وقولت العفشة بتاعت العربية باظت باظت باظت؟؟؟؟؟؟ طلع ان الكاوتشات بتاعت المقصات والدريكسيون كانت تالفة وهي الكانت بتخلي العربية تصدر صوت مزعج في المطبات وقولت الحمد للة ركب طقم كاوتش ب80 جنية بس من نوع نضيف جودتة عالية ومن بعديها العفشة بقت زي الفل وهي دي العيوب اللي بانت في العربية الفترة اللي فاتت اما عن المميزات 1-تحمل الحرارة الشديدة مع تشغيل التكييف لفترات طويلة دون الافراط في الوقود محرك قوي جداا ودي احد مميزات شركة جيلي في سياراتها عامااا العفشة عليها قوة تحمل جبارة جدااا غير اي عربية صيني تسمع ان عفشتها اي كلام بامانة ياجماعة عفشة الجيلي قوية للغاية ودة عن تجربة لان انا من هواة اللعب بالسيارة ولحد دلوقتي الكبالن زي الفل وعمرها مشتكت من العفشة نهائياا بصرف النظر عن تغيير الكاوتش وانا كنت مسافر قبل كدة علي طريق بنها دمياط الزراعي ليلا كلت بيها مطبات بعدد شعر راسي قولت اكيد هوصل هلاقي العفشة متكسرة والحمد للة العفشة زي الفل ومن مميزات السيارة ايضا الباور استيرينج ناعم جداا ودقيق جداا بطريقة ملحوظة تلاحظها من اول مرة تركب الجيلي واجمل ما في الجيلي mkالعزل التام جدااا خاصة عند السرعات العالية لا تسمع صوت الموتور منعا بتاا وكل ما تزيد السرعة تزيد نعومة العربية لان عفشة الجيلي طرية بتتعامل مع الطريق سواء نازل سواء طالع بدون احساس السائق ودي من اهم مميزات الجيلي وعلي فكرة انا ساعات كنت بحط ليها بنزين 80 ومبحسش بفرق خالص واختم موضوعي باهم اشياء يلاحظها اي شخص يركب الجيلي mk لاول مرة 1-قوة محركها 2-نعومة الباور الغير عادية 3-عصا الفتيس الغريب بمسافة الغيارات القريبة من بعضها التي تعطيك احساس اكنك سايق سيارة رياضية قوية 4- قوة التكييف 5-فخامة التابلوة 6-سرعات عالية مع rpmقليل 7-صوت محرك السيارة رياضي جدا

[حازم شاهين]

شكرا لنقل تجربتك المفيدة جدا لينا كلنا
و العربية الجيلى من العربيات إللى بدأت تلفت الأنظار تانى و خصوصا بعد تخطى التجربة السيئة للتوكيل السابق

فى إنتظار نقل تجارب أكتر و ربنا يباركلك فى العربية

[king mimo20]

فى اعتقادى الجيلى لا تحسب على الصينى ابدا
وانا عامل موضوع عن كدة
وشكرا جزيلا لحضرتك

[بدر بسيونى]

شكرا ليك على نقل خبرتك للاعضاء بكل صراحة وبدون تحييز ولو تساعد القارئ وتحاول بعض اسعار الصيانة و وقطع الغيار وراى حضرتك فى التوكيل ومعاملتهم وهل فى تاخير ولا منظيبتين وشكرا لحضرتك جدا جدا

[m_o_sakr]

شكراً ليك يا استاذ دريفت
و ربنا يباركلك فى العربيه