ماذا فعلت حين تعطلت بك السياره على الطريق ارجو الاجابه من اصحاب التجارب واصحاب الخبره

المشاركة الأصلية كتبت بواسطة Devill Blood لما كان معايا 128 يا خراب أسود على دى أيام لما كانت تعطل بقفلها وأروح للميكانيكى واللى يغيظك أن المشكلة بتطلع أهيف من الهيافة

ابو زومل والله يا معلم فكرتني بالذي مضي انا بردك ايام الله يحرقها بجاز ال 128 طلعت عين اهلي ومن ضمن المرات العديدة وانا ماشي في امان الله لقية العربية حصل فيها فرقعه ووقفت مكانها في الجنب الشمال علي الدائري يعني مني للتريلات والعربيات الطيارة المهم بفتح الكابوت لقية الشاكوش بتاع مجموعة الكهربة فلت ودغدغ المجموعه كلها المهم طلع عين اهلي علي ما لقيت حد فاتح لان الكلام ده كان الساعه 9 الصبح يوم الجمعه المهم جيبت علبة جديدة والميكانيكي طلع معايا بعد عناء شديد وتحايل عليه للصبح وعملتها وخدت بعضي ومشيت

[mr_astra]

راجع من فرح الساعة 12 باليل عربية اكسل ومعايا الاسرة بالكامل وسلك الدبرياج اتقطع .... الكلام دة كان فى اشارة روكسي دورت على ميكانيكى يغيرلى سلك الدبرياج ما فيش اضطريت انى امشي بيها كدة لغاية البيت والطريق حوالى 60 كيلو ....المشكلة مش انك تدور العربية وهى واخدة غيار وتدى بقية الغيارات وهى ماشية والطريق واقف لكن المشكلة ان الهونداى اكسيل فيها اوبشن انك لازم تدوس دبرياج عشان تدور ودى كان اصعب حاجة لانى بايد كنت بدوس على السنسور بتاع الدبرياج وانا مدى غيار وايد تانية بتدور من الكونتاكت والعربية تدور وتتحرك ولما اكون داخل على اشارة امور وهى ماشية وافضل سايب مسافة بينى وبين اللى ادامى واسايس امورى

[MmFFoR]

انا الحمدلله عندي واحد صاحبي كهربائي سيارات
كل ما بتعطل العربية مني في اي حته فيكي يا مصر اقوم اتصل بيه اشرحله الوضع يقوم هوا يستنتج المشكلة فين او يسأل ميكانيكي زميله و يعرف المشلكة - يقوم يشتري اي قطع غيار محتاجاها العربية قبل ما ييجي و ياخد اي عربية في الورشة او يخللي زبون او صاحبه يوصله لحد عندي و في الاخر ياخد بعضه و يمشي من غير ما يرضى ياخد فلوس حتى
و لو المشكلة محتاجة ميكانيكي ممكن يجيب ميكانيكي معاه
طبعا انا عندي دم - بدفع تمن المواصلات لو جه مواصلات و بدفع تمن الميكانيكي و قطع الغاير
و بردله الواجب 3 مرات في اي مناسبة - يعني انا برضه جدع معاه في حاجات تانية كتير
بس الحمدلله لانه فعلا بينقذني في مواقف بايخة قوي
و طبعا انا برضه عندي خلفية - يعني لو حاجة عطلت ساعات بعرف احلها بنفسي

[نبيل عبدالرحمن]

أول سيارة ركبتها فى حياتى كانت سيارة سيات 133 موديل 82 وورتنى الويل ، فى مرة كنت رايح بيها الشغل فى الكيلو 23 على الطريق الصحراوى وإذا بالسير بتاع المروحة يتقطع والعربية تسخن فتحت كبوت العربية ( اللى هو شنطتها ) لقيت سير مستعمل بس حالته كويسة ومعاييش أى عده ، بس كنت شفت واحد بيركب سير لغسالة عادية بين طارتين رحت عامل زيه ودورت العربية ودارت وكملت على الشغل

[عبدالله عبدالوهاب]

المشاركة الأصلية كتبت بواسطة نبيل عبدالرحمن أول سيارة ركبتها فى حياتى كانت سيارة سيات 133 موديل 82 وورتنى الويل ، فى مرة كنت رايح بيها الشغل فى الكيلو 23 على الطريق الصحراوى وإذا بالسير بتاع المروحة يتقطع والعربية تسخن فتحت كبوت العربية ( اللى هو شنطتها ) لقيت سير مستعمل بس حالته كويسة ومعاييش أى عده ، بس كنت شفت واحد بيركب سير لغسالة عادية بين طارتين رحت عامل زيه ودورت العربية ودارت وكملت على الشغل

اين اصل الموضوع ؟؟؟؟؟؟؟؟؟؟؟؟؟؟؟؟؟؟؟؟؟