تعديل الاسبراتير

[حسام البورسعيدى]

مواتير العربيات بتسمى مواتير رباعيه الاشواط .. وده لأن لكل بستم 4 اشواط فى الدوره الواحده ...

الاربع اشواط دول هم :

1 - السحب : وده لما بنضخ خليط البنزين والهوا فى غرفه الاحتراق اثناء نزول البستم

2- الضغط : لما البستم بيطلع تانى بيضغط خليط البنزين والهوا علشان الاحتراق يتم ..

3 - القدره او الحرق : البوجيه بيعمل شراره ويحصل انفجار يخلى البستم ينزل لتحت تانى

4- العادم : البستم بيطلع لفوق تانى ويطرد العادم ...

الاشواط دى بتحصل لكل بستم لوحده مش مع بعض علشان حرق الموتور يكون متوازن ...

وزى ما انت عارف بستم 1 و 4 مع بعض و 2 و 3 مع بعض ..

لكن مثلا بستم 2 و 3 لما بيكونوا نازلين تحت بيكون واحد فيهم فى شوط السحب والتانى فى شوط الحرق .. مينفعش ابدا الاتنين يكون فى نفس الشوط والا الموتور مش هيكون متوازن ومش هيقدر يدور ....

الموضوع اشبه ببدال العجله .. البدال اليمين بيكون عكس الشمال .. طب تخيل لو الاتنين زى بعض .. هل هتقدر تسوق العجله ؟؟!!!!