مساعدة فى محرك الفيرنا

[النمر1]

السلام عليكم ورحمة الله انا عضو جديد فى هذا المنتدى الرائع وارجو من الله ان افيد واستفيد من خبراتكم وتجاربكم لقد قمت بشراء سيارة فيرنا 2008 مستعملة وحدث ثقب فى الردياتير ادى الى تغييير جوان وش السلندر ومن ساعتها وصوت المحرك عالى وخشن مثل صوت محرك سيارات الشيفروليه الربع نقل وقد افتى احد الصنايعية بانها تحتاج تغير طقم كستبانات واخر قال افضل تغيير وش سلندر كامل ولااعرف اصدق مين فيهم ارجو النصيحة وماهو اضل زيت مناسب لها ويؤدى الى تهدئة صوت المحرك وماهو سعر طقم الكسبانات ووش السلندر اعتذر على الاطالة ولكم وافر الشكر والتقدير

[النمر1]

31 مشاهدة ولارد واحد للدرجة دى الاسئلة صعبة

[mr_astra]

بعتزر للتاخير
طالما العربية سخنت يبقى من المحتمل ان الوش قفع
ولو افترضنا ان الوش قفع يبقى عمرة ما هايقفل على البلوك بنسبة 100%
مفروض الوش كان راح للخراط وقشطة (حل غير عملى ) وركب جوان دوبل او 2 جوان عادة لنجريد
انا معرفش اية اللى تم فى الوش عند حضرتك
لكن واضح ان المشكلة فى الكستبانات فعلا بقى فيها صوت تاكيهات بسبب اما ان الكامة بقى فية فرق بنها وبين الكستبان
او
الزيت لما سخن بقى غير قادر على تزييت الكستبانات فعملت عضعضة او تاكل جزئى فى شميز الكستبان
والكلام دة ممكن يكون حصل فى كستبان او اكتر
الحل
على حسب قدرة حضرتك على الاصلاح
الانسب انك تغير الوش بالكامل
لو مش جاهز دلوقتى ممكن نغير الزيت طبعا وتعمل مشوار كبير شوية على سرعات عالية

[Hisham.Elgazzar]

المشاركة الأصلية كتبت بواسطة النمر1 السلام عليكم ورحمة الله انا عضو جديد فى هذا المنتدى الرائع وارجو من الله ان افيد واستفيد من خبراتكم وتجاربكم لقد قمت بشراء سيارة فيرنا 2008 مستعملة وحدث ثقب فى الردياتير ادى الى تغييير جوان وش السلندر ومن ساعتها وصوت المحرك عالى وخشن مثل صوت محرك سيارات الشيفروليه الربع نقل وقد افتى احد الصنايعية بانها تحتاج تغير طقم كستبانات واخر قال افضل تغيير وش سلندر كامل ولااعرف اصدق مين فيهم ارجو النصيحة وماهو اضل زيت مناسب لها ويؤدى الى تهدئة صوت المحرك وماهو سعر طقم الكسبانات ووش السلندر اعتذر على الاطالة ولكم وافر الشكر والتقدير

قدر الله وماشاء فعل
كلام مستر أسترا مظبوط جدا لأن عن تجربة حصل ان كاتينة قفشت فى عربية اخويا واضطرينا نعمل صبابات وخراطة وش
وبعد تركيب الجوان الأصلى بقى صوت المكنة الصبح زى الديزل وبعدين دقيقة ولا 3 دقايق بالظبط وتخرس لكن المكنة كانت بتسخن وبعناها

الحالة دلوقتى ايه هل عربيتك بتسخن معاك والا الدنيا مظبوطة
لو مظبوطة خليها على كدا لأن مش عوزين نجازف ونروح نشترى وش استراد وبختك يبو بخيت هتصرف والله أعلم الوش عاوز جلد صباب ولا ايه ولا ايه
عموما طلاما مفيش اى حرارة زيادة توكل على الله وحط لها زيت نضيف واطلع بيها مشوار ممكن الكستبانات ترجع صوتها يهدى شوية
وعلى فكرة لمعلوماتك فيه إضافات بتتحط ع الزيت بتهدى صوت الموتور من جوا وبتحافظ عليه
وانتظر شوية وسايسها على ما ربنا يفرجها ربنا يعينك

[حسام البورسعيدى]

لو الموضوع طقم كستبانات بس غيرهم بدون ما تشترى وش كامل وسعرهم اعتقد فى حدود 400 جنية للطقم كامل 16 كستبان

بس ده لو وش السلندر سليم ومحصلش فيه تقفيع وكشط فى المخرطة (standrd يعنى)