(لدواعى السفر والهجره) كلمات اصبحت مشهوره فى بيع السيارات

[محمد اشرف]

السلام عليكم

انا فى الشهور الى فاتت دى بشوف الكلام ده كتير الصراحه يعنى الى هيفتح مواقع بيع السيارات هيلاقى حوالى نصف السيارات الى معروضه مكتوب فى العنوان بتاعها لدواعى السفر او لدواعى الهجره حتى الى يسألهم انت عايز تبيع ليه ده يكون رده
ده على كده كانت مصر فاضيه !!
فانا استغربت الصراحه وعايز اعرف ليه الناس مش بيكتبوا السبب الرئيسى فى البيع زى مثلا دول الخليج الى بحترمهم جدا فى الحته دى تلاقيه مصورلك كل خربوش فى السياره وكتبلك كل عيوبها قبل ماتروح تعمل معاينه
عشان ماظلمش ناس برضه فيه ناس ممكت تكون عايزه سعر السياره لظروف
وممكن ناس تكون فعلا عايزه تسافر بس ده ممكن سياره من 100 سياره مش بشوف فى موقع صفحتين حوالى 24 سياره منهم حوالى 15 سياره كاتبين لدواعى السفر او لدواعى الهجره
على فكره ده كده هيضرك انت يا صاحب الاعلان لان الى هيجى يشوف عربيتك وهيلاقى فيها عيب هينقصلك من ثمن السياره كتير
غير لما تكتب عيوب السياره فى الاعلان وانت كاتب السعر بالعيوب الى فيها عشان الى يجي يشوف السياره يكون فاهم

يا ريت يا جماعه الموضوع ده يكون ارشاد للى بيبيع سيارته ان هو يكون امين فى بيع سيارته وده غرضى من الموضوع والكلام ده لمعارض السيارات المستعمله والتجار ايضا الى مش بيذكر اى عيب فى العربيه ويذكر المميزات فقط بالعكس ده انت لو ذكرت عيوب السياره هتخلى الناس تحترمك اكتر وسمعتك مابين كل المعارض والتجار هتكبر وهتخلى الناس تجيلك اكثر
ومن كتر اعلانات بتاعت دواعى السفر دى
والله شايف النهارده اعلان واحد عايز يبيع طاره لدواعى السفر
ناقص كمان تلاقى واحد كتبلك للبيع حامل موبايل للسياره لدواعى السفر
وده الى خلانى اتشجعت وعملت الموضوع ده

يا ريت الى بيفكر يبيع سيارته يكون امين ومفروض مواقع بيع السيارات المستعمله تعمل خانه مكتوب بيها عيوب السياره ايضا مثل موقع شفته
وشكرا

[zing0]

والله شايف النهارده اعلان واحد عايز يبيع طاره لدواعى السفر

يمكن لدواعى السفر للمصيف أو السفر الداخلى و بيلم ثمن التذكرة

[احمد على 1999]

و الله انا فعلا كنت ناوى ابيع عربيتى و كنت ناوى اكتب عيوبها بامانة
بس شكلى مش حبيع لدواعى السفر

[ميدو عمر ايمن]

كلام تمام وانا متابع مواقع بيع السيارات المستعمله من شهور وفعلا تحس ان مصر كلها هتسافر وتبيع العربيات بتاعتها دا واحد ممكن يكون رايح الشغل في محافظة تانيه ويقولك لدواعي السفر

[ميدو عمر ايمن]

وعلي فكرة اكتشفت ان معظم الاعلانات بتاعة تجار اصلا مش اصحاب عربيات من رقم التليفون تلاقيه منشور ييجي في 10 - 15 اعلان في اماكن مختلفة يقولك وسط القاهرة ونفس الاعلان الجيزة ونفس الاعلان شبرا
فسالت نفسي ايه الراجل اللي مسافر ده وبيبيع عربيات الشارع كله ده مسافر القمر ولا ايه