عاوز اسافر الغردقه بعد العيد ... حد يفيدنى !!!

[alaaeldeinm]

السلام عليكم وحمه الله وبركاته
انشاء الله ناوى اسافر انا و الاواد نصيف ف الغردقه بعد العيد على طول
وقررت اسافر بعربيتى عشان الشنط و بهدله الاولاد
ياريت لو حد سافر قريب يعرفنى شويه حاجات مهمه :

- الطريق اخباره ايه امان ولا لا .... انا هسافر انشاء الله بعد الفجر ان شاء الله
- الاحتياطات اللى لازم اعملها قبل ماطلع عشان الامان على الطريق
- المسافه تقريبا كام كيلو تاخد وقت أد ايه
- ايه اللى هحتاجه معايا ف رحله السفر دى
لو حد عنده فكره عن اماكن الخروجات و الفسح هناك و الاسعار يبقى ليه جزيل الشكر
وادعولى ياخوانا لان اول مره هسافر مشوار طويل كده

[Hisham.Elgazzar]

طريق القطامية -العين السخنة وبعدين على طريق الغردقة الزعفرانة
عند العين السخنة لازم تهدئ السرعة
طريق الغردقة كويس ونضيف لكن اتأكد من الكاوتش والإستبن

الغردقة جميلة والممشى السياحى تحفة ، وفى هناك شواطئ وكورنيش تحفة بالليل

الأسعار معقولة مش كلها سياحى

رحلة سعيدة وموفق بإذن الله

[أيمن الروبي]

المشاركة الأصلية كتبت بواسطة alaaeldeinm السلام عليكم وحمه الله وبركاته انشاء الله ناوى اسافر انا و الاواد نصيف ف الغردقه بعد العيد على طول وقررت اسافر بعربيتى عشان الشنط و بهدله الاولاد ياريت لو حد سافر قريب يعرفنى شويه حاجات مهمه : - الطريق اخباره ايه امان ولا لا .... انا هسافر انشاء الله بعد الفجر ان شاء الله - الاحتياطات اللى لازم اعملها قبل ماطلع عشان الامان على الطريق - المسافه تقريبا كام كيلو تاخد وقت أد ايه - ايه اللى هحتاجه معايا ف رحله السفر دى لو حد عنده فكره عن اماكن الخروجات و الفسح هناك و الاسعار يبقى ليه جزيل الشكر وادعولى ياخوانا لان اول مره هسافر مشوار طويل كده

انا كمان ان شاء الله مسافر الغردقه بعد العيد بأسبوع وانا ساكن من الجيزه وطبعا سألت ناس كتير سافرو الغردقه قريب علشان انا مروحتش بعد الثوره
الطريق بيقولو امان الحمد لله وانا هسافر ان شاء الله بعد الفجر من القطاميه للعين السخنه حوالي 90 كيلو وبعد كده من السخنه للزعفرانه بس خلي بالك متحاولش تزود عن 80 كم علشان من السخنه للزعفرانه طريق مزدوج وكله ملفات بعد كده الطريق من الزعفرانه لحد الغردقه جميل مفرد حوالي 250 كيلو وياريت تريح في بنزينة وطنيه اللي في الزعفرانه وبعد كده تكمل والغردقه جميله جدا وخصوصا الممشي السياحي وطريق المنتجعات بس الخوف يكون الجو يكون حر هناك بعد العيد ولو عاوز تحجز في مكان ابعتلي علي الخاص وانا اقولك وياريت يكون معاك جركن مياه وجركن بنزين علشان الطريق من القطاميه للسخنه مش فيه بنزينه ولازم تفول في الزعفرانه

[أيمن الروبي]

المشاركة الأصلية كتبت بواسطة alaaeldeinm السلام عليكم وحمه الله وبركاته انشاء الله ناوى اسافر انا و الاواد نصيف ف الغردقه بعد العيد على طول وقررت اسافر بعربيتى عشان الشنط و بهدله الاولاد ياريت لو حد سافر قريب يعرفنى شويه حاجات مهمه : - الطريق اخباره ايه امان ولا لا .... انا هسافر انشاء الله بعد الفجر ان شاء الله - الاحتياطات اللى لازم اعملها قبل ماطلع عشان الامان على الطريق - المسافه تقريبا كام كيلو تاخد وقت أد ايه - ايه اللى هحتاجه معايا ف رحله السفر دى لو حد عنده فكره عن اماكن الخروجات و الفسح هناك و الاسعار يبقى ليه جزيل الشكر وادعولى ياخوانا لان اول مره هسافر مشوار طويل كده

لو حابب ممكن ابعتلك علي الخاص اقولك ان مسافر امتي ولو حابب ممكن نتقابل علي الطريق ونروح مع بعض لحد الغردقه وبعد كده كل واحد مع نفسه وياريت تعرفنا عربيتك نوعها ايه

[Felefel Ahmed]

السلام عليكم
طريق القاهره - الغردقه من امتع الطرق فى مصر (انا بسافر عليه مره كل شهر تقريبا بروح اأنتخ)
نمسك كل حاجه بالترتيب والتفصيل (هتكلم علي السفر عموما وبعدين افصصلك الطريق مطب مطب)

1) تجهيزات العربيه (المفروض تعمل كده بدون سفر حتى)
- ظبط زوايا
- اعمل ترصيص (للأربع فرد)
- يفضل كاوتش مش ممسوح
- تتأكد من التيل سليم مش مصفر
- الزيوت وميه العربيه
- سيور العربيه مش بيظيين
- التكييف تمام

2) تجهيزات الخاصه (للي عايز راحه بال)
- منفاخ كاوتش كهرباء (ب 200 جنيه) علشان لو فرده نامت فى الصحراء زود وأمشي متنزلش الشنط فى الشارع وأستبن ومفتاح وخنقه) مجرد حط الفيشه فى الولاعه وأنفخ العجله وأمشي لأقرب بنزينه

- كورييك تمساح (ب 125 جنيه)
- كشاف اناره للرأس (استيك وفيه لمبه بيتلبس علي الرأس)محدش يضمن الليل (ب 25 جنيه)
- مفتاح صليبه (يا رييت محدش يشتري المفتاخ أللي فيه بنط لحام مسامير) (ب 25 جنيه)
- حبه مفكات و عده لزوم الطوارء

نمسك الطريق طبعا فولت عربيتك

-المرحله الأولى الي العين السخنه
- أول الطريق من القطاميه الدائري بعد كرفور المعادي بشويه(القطاميه - العين السخنه) الطريق من أوله حتي العين السخنه 119 كيلومتر
- السرعه علي الطريق الرسميه 120 ك/س
- الطريق بعد الكارته (محطه التحصيل) بيصوب فى طريق الغردقه - السويس
- بتلاقى كمين قبل منطقه الجبال (اول العين السخنه) تهدي جدا ولو منور النور تطفيه لأن ديه مخالفه فى القانون



- المرحله الثانيه (داخل العين السخنه الي الزعفرانه)
- هنا الطريق هيكون من غير فاصل بين الأتجاهين
- الطريق 84 كيلو 3/4 طريق جبلي
- طول ما انت سايق (البحر علي شمالك والجبل علي يمينك)
- الطريق كله منحنيات وفيه اربعه ملنحنيات اكثر من 90 درجه
- متحاولش تجري علشان انت اول مره
- وأنت سايق حتلاقى البحر حصيره و 80 % هتشوف سرب دولفين في البحر
- بعد ما الجبال تخلص هتشوف مسطح مهول من طواحين الهواء (منظر يحسسك انك بره مصر) متدقش ان نصهم بايظ
- طبعا طول ما انت سايق سواء صبح او ليل لازم اشاراتك شغاله مع اتجاهك
- يفضل اول مره تركب ورا عربيه تانيه ويكون الصبح
- بعد بورتو السخنه هدي اكتر مع المرتفعات علشان فيه تعريج بسيط فى الأسفلت مع النزله
متقلقش الطريق ممتع جدا لو بتسوق بعقلك



ثالثا وصلنا الزعفرانه
خلي بالك الطريق بيرجع اتجاهين عادي (اوعي تكمل طوالي فى المخالف)
- هتلاقي كمين تاني
- فيه بنزينه وريست علشان الحمام والأولاد وكده
- كوب القهوه ب 7 جنيه والحمام ب جنيه
- متنساش تحط بنزين (متضمنش فى راس غارب تلاقى أو لأ)



رابعا الزعفرانه - راس غارب - الغردقه

السرعه علي الطريق 110 ك/س
المسافه حوالي 250 كيلو متر
هنا الطريق تحفه وحته واده
فى راس غارب بس فيه كمين و3 بنزينات
طبعا فيه رادار قبل راس غارب ب 35 كيلو وواحد بعديها ب 20 كيلو

توصل لكمين الغردقه (تعرف انك تهت خلاص)