تجربة مصورة للهيونداي توسان (Ix35)

[horas3000]

السلام عليكم جميعا

موعدنا اليوم مع تجربة للهيونداي توسان او Ix35

نبدا بالشكل الخارجي:
التصميم امتداد لتصاميم هيونداي الجديدة و فيه كتير من السوناتا خصوصا في الواجهة الاماميه و اللي بتوحي بالشراسه بعكس الواجهة الخلفيه اللي الامور فيها بتستقر و تصميمها اهدي و يتغلب فيه العملانيه علي الشكل و اللي يعتبر جميل برضة. من الجانب العربية بتتمير بشكل اسفيني مميز لزيادة الايروديناميكية و اكثر ما يلفت النظر فيه التصميم الجميل للمساحات الزجاجية. بشكل عام العربية تعتبر جميله مع اختلاف البعض حول الواجهة الامامية. راي الشخصي التصميم و الشكل متميز لكنه موجه اكتر للشباب و خاصة الجنس الناعم لكنه ممكن ينول علي اعجاب الكثير من الناس. بالاضافة الي ذلك التصميم بيحمل العلامة الجينية لسيارات هيونداي و السيارات الاسيويه عموما و الكورية خصوصا

الانتريور:
تتميز السيارة بانتريور يحمل ايضا الكثير من جينات هيونداي و خصوصا الالنترا. بشكل عام اللانتريور جميل و خاماته جيدة و سيارة التجربة كانت بتتميز بالكراسي الجلد ذو اللون الطوبي و اللي كانت عامله تناسق هايل مع الطبلون الاسود و الحليات النيكل اللي فيه. جودة التقفيل لا باس بها علي الاطلاق خصوصا في الفئة دي من السيارات و في الفئة السعرية دي. المساحات داخل السيارة معقوله و مناسبه جدا لكثير من الناس و الكراسي مريحة و توفر الدعم من الجانب. و للعلم انا طولي 182 سم و قدرت اقعد براحه تامه في الامام و الخلف مع ظبط الكرسي الامامي علي طولي. الشنطة لا باس بيها ايضا و تعتبر متوسطة الوسع. راي الشخصي الانتريور يفي بالغرض تماما الخامات و التقفيل لا باس بهم اما من حيث الشكل فهو منظم و كل حاجة في متناول اليد و المساحات جيدة جدا و تفوق التوقعات من خلال الحكم عن حجم العربية.

الكماليات:
سيارة التجربة كانت اعلي مواصفات و تشمل جنوط 18 انش, كراسي جلد, سقف بانوراما,Multifunction wheel,دخول بدون مفتاح (بصمة) مع زر تشغيل,كاميرا رجوع للخلف مع سينسور خلفي, 6 CD Changer مع امكانيه تشغيل MP3, وصله AUX و Ipod, كشافات زنون مع كشافات ضباب, كراسي مدفئة و اخيرا مكيف Duel Zone
زي ما هو واضح مفيش حاجة مش موجودة تقريبا و وجود الحاجات دي كلها و بالسعر ده شيئ رائع

المحرك و الجير:
سيارة التجربة كانت بالمحرك الاكبر ذو ال 4 سلندر بسعة 2400 سي سي و بقوة 177 حصان و ياتي مع فتيس اوتوماتيك 6 سرعات مع امكانيه التعشيق اليدوي Steptronic و تاني الفئة الاقل بمحرك 4 سلندر ايضا 2000 سي سي و بقوة 165 حصان مع نفس علبة التروس

عوامل الامان:
تاتي السيارة ب 8 وسائد هوائية و نظام عدم غلق المكابح ABS و نظام الثيات الالكتروني ESP و دع يعتبر مناسب جدا


تجربة القيادة:
اول ما يلفت النظر هي هدوء السيارة عند التشغيل. صوت المحرك صعب سماعة في حاله الوقوف و مع تشغيل النظام الصوتي الجيد جدا يختفي الصوت تماما. السيارة بشكل عام تتميز بالهدوء و الراحة و نظام التعليق قادر علي امتصاص معظم عيوب الطريق و عزلها عن المقصورة.
عند الضغط علي المحرك لاستخراج كامل قوته يبدا صوته في الارتقاع و ان كان الصوت غير مميز علي الاطلاق و يميل الي العصبية ( السيارة 4 سلندر برضه )
المحرك بشكل عام قادر علي التعامل مع السيارة جيدا و لا ننسي انه محرك اقتصادي و العربية مش مخصصة للقيادة الرياضة. التسارع لا باس بيه و العربية بتوصل لل 100 في حدود ال 9 ثوان و طبعا الكلام ده و التكيف شغااااال (درجة الحراره كانت 50 وقت التجربة)
من ناحية الثبات فهو جيد جدا بالنسبة لعربية عاليه عن الارض و تم اختبار نظام ال ESP باخد ملف فجاه و بسرعة عاليه و العربية ما شاء الله لم تتاثر الا ببعض التمايل الجانبي و ده يعود الي ظبط التعليق المخصص للراحة اكتر من القيادة الرياضية.
الفرامل ايضا تم اختبارها و اختبار نظام ال ABS و العربية توقفت في مسافة مناسبة جدا لكن لوحظ تغير العربية لمسارها بنسبه قليله و ده ممكن يعود لعده اسباب زي نوعية الطريق او تاكل احد فحمات الفرامل في جهة اكتر من الاخري و اعتقد ان هو ده السبب لان العربية مخصصة للتجارب و اعتقد الفرامل بيتم اختبارها كثيرا

تقيمي الشخصي:
بشكل تلقائي و بحكم تجاربي الشخصية التوسان دخلت في مواجهة مع اتنين من اشرس و اكبر سيارتين في الفئة دي و هم الميتسوبيشي اوتلاندر و السزوكي الجراند فيتارا و اللي تحت ايدي علي طول بحكم انهم مع اخواتي.
من حيث الاداء فالتوسان تقع ما بين السيارتين تحت الميتسو و فوق السزوكي علي الرغم من انهم 6 سلندر بعكس التوسان و تتفوق عليهم في بعض الكماليات لكن مش في عوامل الامان. من حيث جودة المكونات و التقفيل فالاتنين يتفوقوا عليها. اما من حيث المساحات الداخليه و الوسع فالميتسو تتقوق و بجدارة في النقطة دي بينما تتساوي الفيتارا و التوسان.
نتيجة لذلك انا شايف ان التوسان كعربية جيدة جدا و منافس قوي في الفئة دي و حجمها و ارتفاعها مناسبين جدا خصوصا للطرق المصرية لكن سعرها محتاج يتدرس اكتر من كده لانها قريبة جدا من منافستها اليابانيات و اللي بيتفوقوا عليها في الجودة و الاعتمادية و ان كان الفرق مش كبير لكن برضة عند مقارنه الكوري بالياباني خصوصا في اسواق الخليج النتيجة معروفة مقدما


دلوقتي اسيبكم مع الصور
و للعلم السيارة البيضاء هي الكامله و البني هي القئة الاقل




المواصفات الفنيه مع السعر (المعلن)















السقف البانوراما





كاميرا الرجوع و للعلم الشاشة في المرايا الوسطية
















في الاخر اتمني الموضوع يحوز علي اعجابكم

الله عليك يا حورس دايما بتتحفنا بتقاريرك زي ما قال وديع اســـــــــتـــــــــــاذ

[bmkbmk]

تسلم ايدك يا باشا على الموضوع المفصل و الجميل
انا كمان عجبتنى العربية جدا بصراحة و اكتر حاجة عجبتنى فيها انها ادتنى اكتر من اللى كنت متوقعه
زى ما قال شريف باشا العربية ممتارزة جدا من ناحية التقفيل و توزيع المساحات الداخلية .. بصراحة كنا قاعدين براحة تامة فى الامام و الخلف.. ده طبعا غير الاوبشنز الكتير و اللى اهم منها نظام الثبات ESP التى كانت تفتقد اليه النسخة القديمة من السيارة ...
اما بالنسبة للسحب فا انا كنت قاعد جنب شريف باشا و هو سايق و بيجيب اخر العربية و سامع الموتور و هو بيصوت منه بس انا بصراحة ماعجبنيش التسارع قوى مع انى ماسقتهاش بس صوت الموتور بالمقارنة مع التجميع فكرنى بالعربيات ال 1600 .. عموما دى مش مشكلة كبيرة يعنى .. مش لازم العربية تدينا اكتر من المتوقع فى كل حاجة

اما لما كان شريف باشا بيختبر نظام الثبات .. انا اللى اتمخمضت فى العربية ههههههه من الميلان اللى حصل .. بس للامانة العربية ماتحركتش سنتى واحد برة المسار .. ما شاء الله نظام الثبات فعال جدا و نظام الفرامل برده جيد الى حد كبير

العربية دى فى مصر بصراحة تبقى ممتازة جدا لأنها من برة ملمومة و عالية فا مش هتضايق اللى سايقها فى شوارع مصر العظيمة و فى نفس الوقت مريحة جدا و المساحات الداخلية فيها ممتازة

و بعد ما خلص شريف باشا تجربة القيادة .. كان من المفترض ان احنا نعمل تجربة اخرى للنسخة الكياوية من العربية اللى هى السبورتاج .. فا سمحلى شريف باشا انى اسوق عربيته التعبانة دى .. علشان طبعا ماتأثرش على اعجابه بالهيونداى و ما بعدهااااا
و مع انى كنت منهك تماما لأنى مانمتش قبلها بيوم الى انى وافقت فورا طبعا .. حد برضه يرفض يسوق البورش ..هههه

و بشكر شريف باشا مرة تانية على نقل التجربة الرائعة و انطباعاته الدقيقة

[bmkbmk]

للرفع ,, لاستفادة اكبر عدد من الاعضاء

[horas3000]

المشاركة الأصلية كتبت بواسطة bmkbmk للرفع ,, لاستفادة اكبر عدد من الاعضاء

هههههه
واضح ان الموضوع مش علي مستوي القاعده
الناس متعوده منا علي البورش و المرسيدس و ما شابهم
و نزولنا لمستوي الهيونداي مش جاي علي هوي الناس