أحترس من التاكسى الأبيض الجديد

[mainz]

المشاركة الأصلية كتبت بواسطة خالدخليفة كنت انوى التحدث فى هذا الموضوع منذ شهرين ونظرا لظروف خاصة تأخرت فى الحديث عنه وبداية نقدم تعريفا بنظام التاكسى الأبيض الجديد عند بداية كسر العداد يبدأ من 2.5 جنيه ثم كل كيلو يعد ربع جنيه طيب لو الطريق واقف يبقى كل 7 دقايق يعد ربع جنيه فان كان الطريق متوقف لفترة أقل من 7 دقايق ثم تحرك التاكسى يعد ربع جنيه برضه ولذلك التاكسى الجديد يوافق على جميع انواع الطرق المزدحمة لانها من مصلحته ولايحاول التصرف أبدا سواء بالدخول من الشوارع الجانبية أو الهروب من الزحام أو اى شىء يفعله قائدى التاكسى الأبيض وأسود او أى قائد سيارة طبيعى يريد أختصار الوقت فضياع الوقت من مصلحته لان العداد بيعد وهو واقف مكانه لايتحرك وموفر موتور العربية والغاز لان كل التاكسى محول عربيته الى غاز وكل شىء في العربية متوفر لأنها واقفة مكانها وأذكر مرة جاى فى صلاح سالم من الأزهر الى مصر الجديدة وقبل طلعة كوبرى العباسية التى تنزل منها أمام مستشفى اللأمراض النفسية والمعرض وجدت أمين شرطة أشار لى بالتوقف عند طلعة الكوبرى لان فى تشريفة (الريس أو وزير من الوزراء معدى )ووقفنا جميعا والموضوع مطول فنزلت لامين الشرطة وسألته ان كان الاوتوستراد مقفول برضه فقال لأ وسألته / لو مشيت من ورا المعرض لقاعة المؤتمرات ثم صلاح سالم مرة أخرى هعرف أخرج فقال / لأ لانك هتقابل نفس المشكلة فقررت السير من الأوتوستراد حتى عباس العقاد والتخريم من شارع النزهة الى السبع عمارات ولما قلت لسائق تاكسى من الأبيض كان يقف بجوارى / خش من هنا واطلع على الاتوستراد ولف من هناك لاختصار الوقت فقال / انا مش هتحرك انت عارف بقى عداد بيعد واحنا واقـفين ومريحين وكلام كبير هههههههههه و ضحك وغمز بعينه وفهمت انه طبعا قال الكلام ده من ورا الزبون اللى كان جنبه وطبعا استأذنته فوسع لى ثم عاد مكانه وتركته واقفا ومشيت فأن كنت مستعجل أو رايح مكان والطريق اليه مزدحم نسبيا فلاينفع التاكسى الأبيض لأنه لن يحاول التصرف ولا الهروب من الزحام بل سيمشى فى الطابور وسيبقى فى مكانه وأن كلمته سيقول / الطريق واقف هعمل أيه ؟؟؟ أطير فوق العربيات ؟؟؟؟؟؟ وطبعا لن تملك ردا وستكظم غيظك وتسكت أما ان كان مشوارك طويل والسكة سالكة فالتاكسى الأبيض أرخص من الأسود وأن كان بعض السائقين الأن يقاولك احسن منهم

استاز خالد مع احترامى الشديد لوجهه نظر حضرتك لكن انا اختلف اختلاف كلى مع وجهه نظر حضرتك للاسباب التاليه
انا بنزل مصر اجازه كل سنه مرتين وطبعا مشاويرى كتير فى القاهره ودايما كنت بخلص مشاويرى بالتاكسى القديم لانى كنت فاكر ان الجديد طبعا اجره غاليه وكنت بدفع على طول السعر الى بيطلبه السواق بعد ما يوصلنى طبعا بقى اخر اجازه وكنت فى مصر من 15 يوم نزلت اسبوعين وكانت مشاويرى يوميه الى القاهره والى اكتر من مكانان خلال اليوم الواحد طبعا نصحونى ان طالما مشاويرى كتير جوه القاهره يبقى الافضل التاكسى الابيض لانه سعره مربوط بالعداد طبعا قولت مش مشكله اجرب التاكسى الابيض ركبت اول مشوار وهوا كان نفس المشوار الى بركبله التاكسى القديم والاجره كانت اقل 5 جنيه عن القديم طيب قولت والله حلو .
طبعا كل مشوار كان بالتاكسى الابيض والسواقين سراحه ما حسيتش فيهم حته الاستغلال والطمع بتاع السواقين بتوع التاكسى القديم الا فى مشوار واحد قابلت سواق من سواقين التاكسى الابيض كان شكله نصاب شويه ركبت معاه من شارع حسن صبرى وعاوز انزل فى الدقى معهد جوته طبعا جه فى وسط الطريق وحس انى غريب عن البلد فقالى انت عاوز تروح من الشارع ده ولا الشارع ده قولتله هوا شارع واحد الى هيوصلنى للمعهد جوته هتحب تلف بالتاكسى ماشى لف زى ما انت عاوز بس مش هاحسبك على الزياده ولو مش عجبك طلعنى على شرطه السياحه لانى ممعايش جنسيه مصريه وطالعتلوه جواز سفرى وفى اللحظه دى قالى معلش يا استاز الواحد دماغه مشغوله حبيتين ومش مركز فى الطريق على العموم وصلنى للمعهد على طول بدون لف ودوران وبدون اى زياده .
فى موقف تانى حصل معاى كنت جاى من بنك فيصل الاسلامى فى الدقى وعاوز انزل معهد جوته بردوه فى الدقى ركبت التاكسى السواق على طول قالى انا هلف بيك لفه صغيره بس هتريحنا من الانتظار فى الشارع العمومى لانه زحمه وكله راجع من شغله دلوقتى وبالاخص ان مشوارى مش بعيد علشان انتظر فى الزحمه وكان صريح معايا السواق ووصلت مشوارى بسرعه والله وما كان عاوزنى ادفع ليه الاجر الزياده وبكل زوق واحترام دفعت ليه الاجره ومن ساعتها انا بحترم التاكسى الابيض كتير جدا وان شاء الله مشاويرى كلها هتكون بالتاكسى الابيض فى كل اجازه .
المشكله بقى فى بعض السواقين هما الى ممكن يستغلوا الظروف شويه والعيب هوا الى فيهم سواء تاكسى قديم او جديد
وتقبل تحياتى استاز خالد

[خالدخليفة]

طبعا احترم كل وجهات نظر كل من ردو علي موضوع
ولـكن
اقول ان هذه تجاربى الشخصية وبعد دراسة لسلوكيات بعض السائقين
وبالنسبة لاخونا mffr
انا معرفش حسبها ازاى لان عداد التاكسى الابيض او اى تاكسى مرتبط بزمن ومسافة فقط
ولاعلاقة له بالسرعة ابدا مهما زادت سرعته او قلت
ولذلك ال 80 كيلو متر حسابها كالأتى
2.5 + (80*25 قرش) =22.5 جنيه
سواء كانت السرعة 80 او السرعة 50 فالسرعة لاعلاقة لها بالعداد
ولذلك اذا ذهبت الى الأسكندرية مثلا
فالمسافة رايح جاى 550 كيلو
وبالحساب فمشوار اسكندرية= 2.5+ (550*25 قرش) =140 جنيه
طبعا لن يتعامل معك بالعداد هنا ولكن هيقاولك ومش هياخد اقل من 300 جنيه

واما اخونا mainz
فسائق التاكسى الذى كان معك خاف من جنسيتك غير المصرية
وهذا موضوع رأيته انا شخصيا وسأحكيه فى موضوع ادب الرحلات
وللاسف المصرى لاقيمة له فى مواجهة اى جنسية غير مصرية حتى على أرض مصر
وللاسف ربما انا حظى قليل معهم فانا لم اركب تاكسى الا وكان لسانه طويل ومستغل الا فيما ندر
وعموما لكم كل الاحترام والتقدير واشكر كل من شارك فى موضوعى

[mostafa2000]

شكرا علي المعلومة

[acounter01]

فكرة التاكسي الابيض عملي جدا وارخص من التاكسي الابيض والاسود يا راجل دة انا بروح المطار ب 33 جنيه تقريبا لو انا حروح بالتاكسي الابيض والاسود مش اقل من 50 جنيه ويبقي بالاتفاق الاول طبعا
ثانيا العداد مريح جدا لما تنزل من العربية تدفع ال متوب ايا كان طالما رضيت انك تركبة أما التاكسي الابيض والاسود بعد متنزل من العربية حضر نفسك لخناقة جامدة جدا مع السوائق والكلام دة ممكن يكون علي 2 جنيه مثلا

[خالدخليفة]

احنا لم نختلف لان التاكسى الابيض ارخص فى الطرق السالكة فقط اما الطرق المزدحمة فلن يحاول الهروب أو التصرف وطبعا العداد شايفه بعينك مش هتقدر تتكلم
وخصوصا ان معظم الزباين لايعرفون مهارب الطرق فى مصر وبالتالى يستسلم لسائق التاكسى وهو لايدرى
لكن امثالى ممن يحفظون الخريطة اذا حاول مجرد اقتراح مهرب يجد معاملة جافة وقلة ذوق احيانا

وقد حسبت مشوار اسكندرية وقلت انه لن يكلفك بالعداد اكتر من 140 جنيه ومع ذلك فلن يأخذها السائق بل سيقاولك ساعتها ولن يعاملك بالعداد بل سيأخذ 300 جنيه تحديدا كما قيل لى انا شخصيا