الموضوع المبين لمعرفة خبايا البنزين 80

[sayed2077]

السلام عليكم ورحمة الله وبركاته

الحقيقة انا مش عارف انا كتبت الموضوع ده ليه يمكن كتبته علشان مثالا السؤال ده اكتر سؤال بيتسأل هنا فى المنتدى او كتبته علشان كل شوية بلاقى موضوع جديد بيسأل عن البنزين 80 واضرارة ايه
ويمكن كتبتة لانى من فترة كان عندى حب انى لازم اكتب موضوع زى ده عن البنزين 80 لان تقدروا تقولوا ان فيه حالة من العشق الممنوع بينى وبين البنزين 80 مش عارف ليه بس هى موجوده

المهم بصراحه الموضوع ده هيكون فيه حاجات مقتبسة من اخويا الكبير Mr Astra


وهنشرح فيه مزايا وعيوب البنزين 80

وكمان هنقول كام اسطورة من اللى بتتقال عن البنزين 80

على عربيات حديثه شغالة ببنزين 80 زى الفل بدون مشاكل


نبداء على بركة الله


أولا: لانى من الناس المتفئلين دائما فهنبداء ب مزايا بنزبن 80


1:وده اكتر حاجه بتخلينا نلجاء كتير للبنزين 80 سعره
لانه ارخص نوع بنزين فى مصر هو المفروض التر ب 90 قرش بس احنا بنمشيها بمزجنا وبنقول اللتر ب جنية وخلوا بالكوا انه بمزاجنا مش غصب عننا خالص ولا بتوع البنزينات هما اللى فرضين علينا السعر ده نهائيا يا جماعه .

2:هو مش مميزات ولا حاجه بس نمشيها انه من مميزاته انه اكتر بنزين تحس فيه بركة عن باقى انواع البنزين ومبيخلصش


3:بصراحه مش لاقى حاجه رقم تلاته احنا اصلا بنشترية علشان سعره بس بس لو كان ال 92 قريب من سعر مكناش اشتريناه اصلا


ثانيا:العيوب
وهى بصراحه قليلة جدا مثلا حوالى عشرة عشرين عيب بس

1:البنزين ده بيقلل القدرة الحصانية الخارجه من الماتور جددااا: وده للمواتير اللى مش مصممه للعمل عليه زى مثالا انا واحد معايا اكسيلمكتوب فى الكتلوج ان اقل بنزين احطه هو بنزين 87اللى هو مثالا 90 اللى مش موجود عندنا لما اجى احط بنزين 80 والماتور مثالا بيطلع 80 حصان فى حالته الطبيعية بالبنزين بتاعه الطبيعى اللى هو المفروض اوكتان 87 فأكيد لما انا اجى واحط بنزين اوكتان 80 عمر ما الماتور هيطلعلك قدرة 80 حصان ابدا وده عن تجربة بص بتبقى راكب بطه بلدى خصوصا الكلام ده بيظهر بقى فى المطالع بجد حدث ولا حرج مثالا طالع من يومين المقطم اضريت غصب عنى اجيب الثالث وللاسف بيبقى لاازم اقل حاجه 60 على الثالث لانى لو جبت الرابع العربيه مش هتطلع وهتسمع صوت تسقيف وده غلط جدااااااا ولو قللت عن ال60 وانت على التالت عمرك ما هتعرف تجيبها تانى غير بالحرق الجامد على الماتور علشان تجيب ال 60 تانى علشان تعرف تطلع
والكلام اللى بقولكم عليه ده يمشى عموما على اغلب العربيات حتى القديم منها

2:ظاهرة التسقيف :وديه عامله زى بالظبط ما تكون ماشى على سرعة 20 وجبت الرابع مثالا ودوست بنزين للاخر هتلاقى الماتور راح عامل صوت فظيع كدا وهتلاقى ان الماتور هيشتم بس بالغة بتاعته اللى هى التسقيف وهيقولك ارحمنى هو ده نفس الكلام اللى هيحصل معاك لو حاطط 80 بس مش بقى وانت جايب على الرابع لا ده لو انت مثالا فكرت بس فكرت تطلع على التانى مثلا او حبيت تعملها فى مره وتدى غيار بدرى مثالا عن ميعاده مهما هتدوس بنزين هتلاقى صوت التسقيف ده طالع وطبعا خالى بالك ان التسقيف ده زى ما اتفقنا ده الشتيمة بتاع الماتور بلغته اللى هيقولهلنا لو فضلنا مطنشين الموضوع ده ولو طنشت الموضوع ده بزياده عن كده شوية هتلاقى الماتور هيقولك طب والله لاوريك وهيكسر البيلات بتعتك وده اقل واجب او بقى يكسرلك الكرنك لان بيبقى عليه اجهادات ميكانيكية وانا مبحبش الشرح العلمى اووى ساعات فهستعين بكلام اخويا مستر استرا الى قالو فى موضوع سابق عن البنزين ال 80


لازم نعرف ان كل محرك لة نسبة انضغاط وهى بكل بساطة
النسبة او الحجم المزاح من اول ما البستم بيكون فى النقطة الميتة السفلى وبين النقطة الميتة العليا
ولو جينا نكتبها فى صورة معادلة هانقول ان
نسبة الانضغاط = الحجم المزاح + حجم غرفة الحريق مقسوم على حجم غرفة الحريق
وكل لما النسبة دى زادت يبقى بنزين الـ 92 مناسب او الامثل ليها
تعالو ندى مثال
العربيات القديمة مثل الفيات وموديلات التسعينات كانت نسبة الانضغاط هى 8:1
فى الحالة دى احسن بنزين هو بنزين 80 وبنزين 92 هو مضيعة للمال

انما فى العربيات الحديثة اللى نسبة انضغاطها 10:1 بنزين 80 لا يصلح ليها وانما الامثل هو بنزين 92

طب اية الفرق بين الـ 80 والـ 92
هو قدرة البنزين على عدم الاحتراق المبكر تحت تاثير الضغط
يعنى نفهم من كدة ان بنزين 80 بيتحرق تحت الضغط اسرع من الـ 92
الاجابة نعم
وهو دة اللى بيعمل ظاهرة الصفع او ( التسقيف)
كلنا عارفين ان افضل توقيت للاشعال هو لما يكون البستم فى النقطة الميتة العليا او بعدها بقليل جدااااا
وفى حالة نسبة الانضغاط العالية مع استخدام بنزين 80 بنلاقى ان البنزين انفجر قبل وصولة للنقطة الميتة العليا مما يسبب قوة ضغط عكسية على سطح البستم وبالتالى يبقى البستم لسة فى مشوار الضغط ويلاقى قوة ضغط عكسية مما يسبب فى سماع صوت التسقيف

وزى ما انتم شايفين ازاى استاذ Mr Astra شرح بشكل بسيط سبب التسقيف بطريقة علمية مبسطه ليستوعبها الجميع


3:ان البنزين 80 متوافر جداا وبصراحه من وفرته مش عرفين نوديه فين: ههههههههههههه طبعا انا بضحك على نفسى اوعوا حد يصدق البنزين التمانين فى الحقيقة فى الاغلب دائما عليه زحمة حتى فى غير اوقات الازمات دائما هناك زحمة عليه لان تقدروا تقولوا 75% من العربيات اللى بتشتغل بالبنزين فى مصر سواء ملاكى او تاكس او نقل بتستخدم البنزبن 80 وده طبعا نظرا للحالة الاقتصادية والرفاهية العالية اللى بيتمتع بيها الشعب المصرى فالشعب المصرى حب يبقى زاهد فى الحياه شوية فقال الحمد لله المرتب بيكفى وزياده وبيفيض فلازم بقى نبقى زهدين شويا مش كل حاجه نجيبها غالية ونبزر على نفسنا فنحط بنزين 80 علشان نحس بالفقير ده لو الفقير عنده عربيا اساسا


نيجى بقى لبعض الاساطير اللى بتتقال عن البنزين التمانين

ومع اول واشهر اسطورة

ان البنزين التمانين مليان قذورات وان ده بيبقى فى شوائب كتير وبيسد الرشاشات لو العربيه انجكشن وبيسد الفلاتر وبيبوظ طرمبة البنزين والكلام ده


طبعا الكلام ده عارى تمام من الصحه ومفيش حاجه من الكلام ده خالص والدليل على كدا انا كنت عامل موضوع عن طرمبة بنزين بريلينس جالينا بيتحطلها على طول 92 وعمرها ما شافات ال80 وعلى الرغم من كدا جابت طرمبة بنزين برضوا ولما فكينا الطرمبة لقينا فيها كمية شوائب تبوظ اى طرمبة بنزبن طيب ما البنزين ال92 كمان فيه شوائب اهوه زية زى ال80 زى ال95 كله زى بعضه تماما

وموضوع الشوائب ده برضوا كان علق عليه اخويا Mr Astra وقال

اولا مصر مش بتستورد بنزين من الخارج ولا حتى دول الخليج
وانما بتعتمد على الانتاج المحلى من البنزين
البنزين فى صورتة اولالى واحد الـ 80 والـ 90 والـ 92 والـ 95
اللى بيفرق بنهم هو المادة اللى بتتحط وبتدى رقم اوكتان للبنزين
يعنى البنزين فى صورتة الاولى واحد ولكن الاضافة اللى بتتحط ودى بنستوردها من الخارج هى اللى بتدى رتبة للبنزين وبتخلية اما 80 او 92
يبقى كدة شبهة النقاء والرواسب مش موجودة اطلاقا
وبكدة الاجزاء المتعاملة مع سائل البنزين هى فى امان
وهى
تانك البنزين
طلمبة البنزين
خراطيم السحب
فلتر البنزين
مسطرة الرشاشات
الرشاشات

وزى ما وضح اخونا مستر استرا ان كل البنزين نوع واحد الفرق ما بين ده وده كمية الماده اللى بتتحط على كل نوع علشان تخلى ده 80 وده 92 وده 95

الاسطورة التانية
ان البنزين ال80 ربنا بيبارك فيه ومبيخلصش بسرعه

من وجهة نظرى فده بيحصل للاتى لانك لما بتحط بنزين 80 مبتقدرش تفرك ولا تسحب ولا تشد ولا الكلام ده فهتلاقى دايما فى اغلب سواقتك بالبنزين ال 80 هتلاقيك بتعامل دواسة البنزين بهدوووء شديد جدا وده بيؤدى للاخر للى بيحصل ده وتلاقيه بيقعد معاك كتير وفيه نظرية تانية بتقول انك لما بتحط 92 فده بيكون زى المثل اللى بقول ان الفرح عمره قصير فنفس الشىء كده الحاجه الحلوه اللى هى بنزين 92 بنبقى فرحانين بيه فمبنحش بالوقت بيعدى معاه فبيخلص على طول

الاسطورة الثالثه بتقول

ان البنزين ال 80 مليان كربون و بيبوظ البوجيهات

طبعا الكلام ده نسبيا صحيح ونسبيا خطاء بمعنى

ان فعلا البنزين ال80 نسبة الكربون فيه عالية بس مش معنى كدا انه هيبوظ الماتور بالعكس ده هيحافظ على جدران البساتم اكتر من الكربون اللى هيترسب عليها وهيعمل زى عازل للاحتكاك بس عموما

انا كنت فاكر ان فعلا البنزين ال80 بيسود البوجيهات وكدا لغاية فتره قريبه لما روحت وظبت الكربراتير عند بشمهندس معتز بدار السلام ومن وقتها تيجى تفك البوجيها تلافى طالع ابيض بيبرق والعربيه مبقتش بطلع دخان والزيت مبقاش بيهبب زى الاول نهائيا بقى ماشى طبيعى عادى جدا مع العلم المشكلة اللى كانت عندى اتضح بس انها ظبط الكربراتير وعمل صيانه شاملة ليه كليا

نيجى بقى للعربيات اللى بتشتغل ببنزين 80

عموما كل ما قبل سنة 2000 اغلبه يعمل ببنزين 80 زى الفل حتى لو هنزبط اسبراتير ونأخر كهربا سنتين ونتعامل مع دواسة البنزين براحه و منخليش العربيه تطلع صوت التسقيف وبعد سنة 2000 فعندك بقى بعض العربيات زى اللانوس مثالا واقاربها نوبيرا و ليجانزا وبعض السيارات الاخرى

وفيه سيارات بتمشى عادى بال80 ليل ونهار والمفروض اقل بنزين ليها 93 بس اصحابها ممشينها ب 80 عادى زى الاسبيرانزا 516 و الفيرنا بس بصراحه اغلبهم كانوا تاكسى وبيقولوا انه مادام بتعاملوا مع العربيه بحنية فالعربيه مش هتقول لا على حاجه وهتمشى عادى وكان فيه منهم ناس ملاكى خصوصا الفيرنا وممشينها 80 عادى جدااا

بعض النصائح لو هتستخدم بنزين 80 فى عربيتك
1:تعامل برفق دائما مع دواسة البنزين واحذر من صوت التسقيف دائما
2:حاول تغير الفلاتر بتاعتك فى مواعيدها المنتظمة ومالوش لازمة تغيرها قبل ماعدها
3:ان البنزين ال 80 مش هيديك اقصى قدرة للماتور ابدا فعمرك ما هتعدى حاجز ال 140 ابدا ولو عديتها هتبقى اكيد نازل منزل بس انت مش واخد بالك وال140 بيبقى صعب اساسا اخرك اخرك 120 بس يعنى علشان لو حد جاب ال140 يعنى
4:لو هتسخدم بنزين 80 ارجوك متعملش موضوع وتفضل تسأل عن اضرار بنزبن 80 لانى زهقت من السؤال ده وعملت الموضوع اهو واتمنى يتثبت ويبقى مرجع للجميع ومحدش يعمل موضوع جديد عن اضرار بنزين 80 واللى ليه سؤال يسأل هنا فى الموضوع وانا او زملائى فى المنتدى هنرد عليه فى اسرع وقت ان شاء الله

واتمنى يكون موضوع مفيد ان شاء الله

و
اتمنى انكم تدعولى ربنا يصلحلى حالى و ويكرمنى فى دراستى ويوفقنى فى الدنيا والاخرة

واخر كلامى كلمات ادعوا بها الله لعل الله برحمته الواسعه التى وسعت كل شىء يستجيب لى
اللهم اغفر للمؤمنين والمؤمنات والمسلمين والمسلمات الاحياء منهم والاموات

قولوا أمين

و
السلام عليكم ورحمة الله وبركاته

[sherifabden]

الف شكر على الموضوع المميز

[myson medo]

[مايكل ذكرى]

:GR OWIN~12::GROWI N~12:

[zing0]

حبيب قلبى يا أستاذ سيد
ربنا يبارك لك فى وقتك و دراستك و يصلح حالك فى الدنيا و الآخرة.
بس عندى سؤال ذكاء حلزونى لولبى
ما هى أضرار بنزين 80؟

:w6w2 005041113562663:w6w200504 1113562663:w6w20050411135 62663 :w6w2 005041113562663:w6w200504 1113562663:w6w20050411135 62663