متسوبيشى لانسر بومة 2013 التقرير التالت المصور عن صيانة الالف كم

[شريف رشيد]

النهاردة كان ميعادى مع التوكيل فى صيانة الالف الاولى للنسر 2013 ستاندرد.
كلمتهم بالتليفون من يومين و فعلت الخدمة وأدونى كود من 8 ارقام وادونى ميعاد فى اقرب مركز صيانة لبيتى و كان دايموند ابو رواش يوم الاربعاء الساعة 12 ظهرا.

كنت هناك الساعة 11.30 و كان معايا رخصة العربية و دفتر الضمان الازرق و كود تفعيل الضمان و الاجراءات للى مارحش قبل كده كالاتى:

1) تروح للبنت اللى فى المكتب اللى فى الشمال (رقم 1 فى الصورة) علشان تسجل زيارتك فى الكومبيوتر و تكتب الكود فى الدفتر. بعد ما تخلص حتطلب منك تنتظر فى الاستراحة.




2)حتقعد حوالى عشر دقايق تتفرج على TVو تشرب شاى او نسكافيه



3) بعد شوية حتلاقى واحد بينادى عليك و ده المهندس للى حياخد منك اى تعليق ليك عن العربية. فى حالتى كانت تربيط العفشة خصوصا ناحية اليمين و احيانا فى رجه خفيفة قوى على السلانسية محتاجة تظبيطة كهربا. و قالى لى حنغير كمان زيت و فلتر. الزيت بقى TOTAL الرمادى اللى بيقعد 10.000 و قالى انهم بطلوا يستخدموا موبيل 1 علشان معدل البخر بتاعة عالى و صيانة الميسوبيشى كل 10.000 فكانت شكوى العملاء فى صيانة 10.000 ان الزيت بينقص.
حياخد منك المفتاح و حيخليك تمضى جنب تكلفة تغيير الزيت و الفلتر انك موافق على التكلفة و كانت 388 جندى ( يظهر فى ناس بتعمل حركة نص كم بعد ما يغيروا ليهم الزيت )

4) قعدت فى الاستراحة و كانت عينى عليها. لقيت بعد 10 دقايق بالضبط دخلها عامل من التوكيل و قعد يشيك على كل حاجة فيها! شايفة بيرفع الازاز كله واح ورا واحد. فتح الشنطة و تاكد من قفل الكالون كويس. يعنى عمل شيك على السريع بالرغم انى مابلغتهمش ان فى عندى مشكله. وعلى فكرة وانا مروح ليت الكاسيت ملعوب فيه يظهر كانوا بيشيكوا على التوزيع بتاعه.

5) بعد ما عمل التشييك السريع دخل الصيانة من الخلف وانا متابعه (ما غبش عن عينى ثانية )

6) دخل مدخل الورشة من اليمين حط عليها رقم على السقف كان واخده من الاستقبال و و لقيته حاطط كيس كبير على كرسى السواق علشان مايوسخش فرش العربية بالكفارول بتاعهم. و الحكاية ده عجبتنى بصراحة. ولاحظت ان الورشة نضيفة جدا





7) بعد ما دخل رفعوا العربية و ربطوا العفشة و غيروا الزيت و الفلتر و فى خلال نص ساعة كانوا مخلصين.





8) بعد ما خلصوا قعدوا ينضفوها من جوه و لقيت واحد بيحط علامة زيت توتال على الزجاج الخلفى و ده ضايقنى لانى بكره كل أنواع الاستيكرات خصوصا النوادى.











9) خرجوها بسلامة و رجعوها للبارك الأولانى فى مكانها تانى و رجع للمهندس بورقة كده. بعدها نادى عليا المهندس و قالى انهم ربطوا العفشة و غيرو الزيت والفلتر و مافيش مشاكل تانية. و ادانى وصل تدفع فيه فى الخزنة. الموضوع كله اخد ساعة بالضبط.





ملحوظاتى على التوكيل:
المكان نظيف ومكيف و قاعة الانتظار ماكنتش زحمة و مابتلحقش تزهق (يمكن علشان دى صيانة الالف) و ممكن وان قاعد تتفرج على عربيتك و هما شغالين فيها.


لاحظت هناك ضباط جيش كتير جدا و لم سألت قالولى أن الجيش حجز 3000 عربية لانسر من التوكيل.
ورشة الصيانة نضيفة جدا و لما بيشتغلوا فى العربيات بيغطوا مكان الشغل علشا البودى مايتبهدلش زى ما هو باين من الصور.

* اهم حاجة فى الموضوع ده انى سألت مهندس الصيانه على موضوع الإنزار ده وانى مش عايز أركب النوع اللى فى التوكيل . قال لى حضرتك ممكن تركبه بره التوكيل و حيفضل الضمان سارى بشرط أنك تركبه عند حد معروف. قولتله زى أدريان مثلا؟ رد على ممكن.
المهم يكون حد فاهم لانه لو بوظلك الضفيرة و جيتلى بعدها حقولك الضفيرة ملعوب فيها. لكن لو جتلى بعدها بكام شهر فى ميعاد صيانتك مثلا و كانت عند مشكلة فى الكهرباء حشيلها عادى لانك مركبه من زمان عند ناس فاهمه و ماعملش مشاكل. مش عارف ليه حاسس أن الموضوع عايم و ممكن لا قدر الله لو حصلت مشكلة التوكيل حيقولك ماليش دعوة. ايه رأيكم؟

[memodina1]

تقرير رائع والصور تحفة واللانسر عربية جميلة ثابتة وراسية وماتورها قوى وفتيسها رائع والاجمل من كدة عفشتها تستحمل
بس انت مقولتش ظبطوا الرعشة اللى على السلانسية

[AbOnOrA]

تقرير رائع تسلم ايدك ومبروك الصيانة

[محمد فيصل]

: 01FDAB~189::0 1FDAB~189::01 FDAB~189::01F DAB~189:
يسر لك امرك وحفظك الرحمن من كل سوء

[شريف رشيد]

المشاركة الأصلية كتبت بواسطة memodina1 تقرير رائع والصور تحفة واللانسر عربية جميلة ثابتة وراسية وماتورها قوى وفتيسها رائع والاجمل من كدة عفشتها تستحمل بس انت مقولتش ظبطوا الرعشة اللى على السلانسية

قال لى أن العربية كهربتها مظبوطة و ده ممكن يحصل لو البنزين مش نضيف!! و نصحنى بتغيير المحطة. حجرب و أشوف