التكيف

[tham1010]

يا جماعة. أنا أول مرة أركب عربيه وفيها تكيف. والحقيقة بالفعل التكيف نعمة فى العربية ولكن مش بأفهم أوى فى شغله.

1- التكيف بيأخذ طاقته منين؟ من البطارية ولا الماتور؟ يعنى لو العربية فيها بنزين شوية بسيطة العربية مش يشتغل تكيفها؟ ولو البطارية ضعيفة التكيف مش يشتغل أو يطلع هواء بارد.؟
2- هل لابد أن تكون العربية بتجرى علشان التكيف يشتغل بأقوى طاقته؟ أم أن التكيف يمكن أن يشتغل ويطلع هواء بارد والعربية واقفة؟
3- ما هو الأكثر حملا على العربية؟ التكيف البارد أم التكيف الساخن ؟
4- ما هى الصيانة المطلوبة للتكيف حتى يعمل بكامل كفائته؟

أحتاج من الخبراء إعطائى بعض أسرار هذا الجهاز الغريب الذى ليس لى به دراية؟؟

[فادي مكرم]

انا هقولك المعلومات اللي اعرفها بس من مبتدىء يعنى هههه

1-التكييف بياخد طاقته من الموتور وليه سير من الموتور , وطبعا بيبقى حمل على الموتور و بكدة المكنة هتاكل بنزين اكتر من الطبيعي , موضوع البطارية مش عارف بس اعتقد مالهوش دخل عشان ليه سير لوحده من الموتور
2-على الطرق السريعة معدل دوران الموتور بيبقى مستقر فتلاقى التكييف شغاال زى الفل , داخل المدينة او و العربية واقفى هتلاقى السحب بقى اقل و معدل دوران الموتور " RPM " اعلى طبعا عشان يحافظلك على درجة البرودة بس كدة بتتعب المكنة.....يعنى احسن لو تشغله ع الطرق السريعة
3-4معرفش المعلومة دى
وارجو اني اكون فيدتك و معلش على عدم توافر معلومات بس دلوقتى ان شاء الله الناس الخبرة ترد عليك

[احمد على 1999]

طبعا hooka جاوب اجابات جميلة
و بعد اذنه حاضيف حاجات

المشاركة الأصلية كتبت بواسطة tham1010 يا جماعة. أنا أول مرة أركب عربيه وفيها تكيف. والحقيقة بالفعل التكيف نعمة فى العربية ولكن مش بأفهم أوى فى شغله. 1- التكيف بيأخذ طاقته منين؟ من البطارية ولا الماتور؟ يعنى لو العربية فيها بنزين شوية بسيطة العربية مش يشتغل تكيفها؟ ولو البطارية ضعيفة التكيف مش يشتغل أو يطلع هواء بارد.؟ زى ما قال hooka بياخد طاقته ميكانيكيا من خلال سير التكييف الى بيبقى راكب على طارة فى عامود الكرنك و واصل للطارة الخارجية لكومبريسور التكييف و لما بتدوس على زرار التكييف فى طارة تانية كهرومغناطيسية راكبة على الكومبريسور و قريبة من الطارة الخارجية الى راكب عليها السير فلما تتمغنط بتنجذب و تعشق مع الطارة الخارجية و تخلى الكومبريسور يلف و يضغط الفريون طبعا بيبقى حمل اضافى على الماتور بيترجم الى استهلاك بنزين اعلى ملوش علاقة بالبنزين لو قليل و ملوش علاقة بالبطارية خالص 2- هل لابد أن تكون العربية بتجرى علشان التكيف يشتغل بأقوى طاقته؟ أم أن التكيف يمكن أن يشتغل ويطلع هواء بارد والعربية واقفة؟ التكييف بيعتمد على معدل التبادل الحرارى فلما تكون العربية بتجرى اسرع بيكون تدفق الهواء اسرع على السربنتينة الخارجية للتكييف ( المكثف الموجود فى مقدمة السيارة امام الرادياتير ) فطبعا حيبرد احسن و ساعات فى عز الشمس و العربية واقفه فى اشارة تحس ان التكييف كانه مش شغال 3- ما هو الأكثر حملا على العربية؟ التكيف البارد أم التكيف الساخن ؟ طبعا التكييف البارد لان السخن ملوش علاقة بالكومبريسور ده بيبقى عبارة عن سربنتينة ميه داخلية (تتبع دورة تبريد الماتور) ورا التابلوه شبه الرادياتير بس اصغر و انت لما بتحول على الوضع الساخن سواء كليا او جزئيا بتتحكم فى بوابة هواء داخل مجارى الهواء بتاعة التابلوه و على حسب وضع البوابة بيتم خلط الهواء البارد الى جى من بره مع الهواء الساخن الى جى من السربنتينة الداخلية و ده بيريح الماتور لو جبته على اخر السخن كانك بتساعد على تبريده 4- ما هى الصيانة المطلوبة للتكيف حتى يعمل بكامل كفائته؟ دى انا مش خبرة فيها بس من ساعة ما جبت العربية (لانوس 2002) ملمستوش بس فى بعض النصائح : 1- متشغلوش و العربية باردة لازم الماتور يسخن شوية (ده علشان الماتور مش التكييف) 2- فى الشتاء شغله كل اسبوع عشر دقائق على الاقل 3- لو حسيت باى خلل او ضعف كفائة لازم تروح لحد خبرة 4- فى بعض السيارات (معرفش الميتركس منهم و لا لأ) فلتر منقى هواء قبل ما يدخل على سربنتينة التكييف الداخلية (المبخر) زى تكييف البيت كده و لو موجود عندك لازم يتغيير او على الاقل يتنضف علشان مياثرش على قوة التبريد أحتاج من الخبراء إعطائى بعض أسرار هذا الجهاز الغريب الذى ليس لى به دراية؟؟

[محمد فيصل]

ا.احمد على قام بذكر كل المفيد الف شكر
ويبقى فلتر التكييف يتم تغيرة من اجل افضل اداء كل 10000كم
بالاضافة الى شد السير عند الحاجه وتغيرة كل 20000كم

[tham1010]

الحقيقة أنا عاجز عن الشكر لكم جميعا وخاصة العضو أحمد على. بجد كلام يساوى ثقلة فلوس. نورتونى وفهمتونى. الحقيقة أن كنت بسأل السؤال دة لانى أول مرة أشتريت العربية وكنت بفحصها لقيت التكيف مطلع هواء ساقع حلو وعجبنى أوى وكان الماتور دائر. ولما أخذت العربية ومشيت بيها ركنت فى مكان لمدة حوالى 20 دقيقة وطفيت الماتور وكنت مولع التكيف والكاست والعربية ماتورها واقف يعنى rpm اكان صفر. فلقيت التكيف مش مدخل هواء بارد ولكن هواء عادى فخفت وسكيته وسبت الراديوا بس هو اللى مشتغل. كان الجو خانق ومش كنت عارف هو بايظ ولا ايه. دلوقتى فهمت.. الماتور لازم يكون شغال ويفضل لو العربية بتتحرك كمان علشان أحصل على افضل نتيجة...

سؤال يا جماعة.. هو فلتر الهواء التكيف موجود فين؟ يعنى ممكن أنظفة أنا وسهل فكة وتركيبة ولا الحكاية محتاجة صنيعى؟ أنا شفت على النت فلتر الهواء وتنظيفه او تغيرة وعارف مكانة فى العربية هو بيكون شكله مربع زى المنخل كدة وبيكون محطوط فى علبة سوداء طالع منها خرطوم داخل الماتور باين.. هل هذا الفلتر هو المقصود بفلتر التكيف أم ان للتكيف فلتر منفصل...

أقول لكم الحق الواحد خايف من صنيعية المنوفية.. أغلب العربيات طراز قديم وحاسس انى مش هلاقى حد فاهم وكويس اصلح عنده العربية الماتركس المعقدة المملؤة بالتجهيزات والإمكانيات دى...