كاسي فيرنا 2012 وتجربه مع ضمان رودستار طارق بدر

[ehab_nnnn]

السلام عليكم ورحمه الله وبركاته
انا كنت النهارده فى توكيل رودستار وعاوز انقل لكم التجربه دى بس استحملونى شويه
نسمع الحكايه من أولها
يا شباب انا معايا فيرنا 2012 gls لسه يادوب مستلمها من 15 يوم وعامله 500 كيلو بس
العربيه دى فيها كاسيت رودستار سى دى وفلاشه وراديو وعلى حد علمى أول مره غبور باشا ينزله فى العربيات بتاعته(2011 كان كين وود)
المهم الفلاشه والسى دى فجأه والكاسيت شغال فصلو وحلفو ما يشتغلوش
حبيت أعمل reset للجهاز برضه مافيش فايده
قلت مابدهاش لازم اروح التوكيل
وصحيت بدرى ومن الساعه 10 بتصل بيهم عشان اعرف العنوان فين بالظبط وهما ما ردوش الا الساعه 1 الظهر
المهم وصلت على الساعه 3
أول ما دخلت لقيت عيل تانى واقف زعلان جدا وصوته عالى وبيقول تالت مره أجى على نفس العيب حرام عليكم
دخلت قعدت فى استراحه العملاءولقيت خمسه (فى وش العدو) قاعدين
كلهم فيرنا 2012 كامله ونفس عيب الكاسيت اللى عندى
وبعدين اطلعوا على الضمان ورخصه العربيه ونزلوا معايا مهندس يفك الكاسيت
وبعد ما طلع الكونسول وحل الكاسيت قالى خليك جمب عربيتك عشان ما تتسرقش
وفضلت واقف ثلاث ساعات فى الشمس لحد ما جابو الكاسيت وركبوه
ملاحظاتى على التوكيل
1- الناس بصراحه مؤدبين ومعاملتهم طيبه بس تحس انهم ماشيين بمثل (كلمه حاضر بتريح) أو معنى أدق بيسجدوا الزبون
2- ما بيخلوش أى عميل يتكلم فى مشكلته أدام التانى بمعنى أنا عرفت مشكله الناس لما كنا كلنا واقفين جمب العربيات
3- واضح ان الكاسيت جت منه شكاوى كتير أوى وفى ناس راحت لهم اكتر من مره واتنين وتلاته
4-لما تيجى تسأل المهندس ايه العيب يقولو لك انت ليك تصليح وبس بس بطريقه مهذبه شويه
5- انا عارف ان أنا رغاى ومش بعرف احكى كمان ههههههه
بس بصراحه انا مرارتى اتفقعت النهارده وخصوصا لما تبص على عربيتك الزيرو وهى بتفك ادام عنيك وتقعد كده تلات ساعات بصراحه حاجه تفور الدم
واظرف حاجه ان واحد صورنا كلنا وصور العربيات بكاميرا فيديو وقالك هطله على غبور بالفيديو ده وارفعه على النت وأعمل ثوره
وحاجه تانيه حصلت .. واحده قعدت تقول لكل الناس جربوا نص ساعه قبل ما تمشو عشان انا مشيت وقبل ما الف واطلع الشارع الرئيسى كان الكاسيت وقف تانى
وتفاصيل كتيييير بس مالهاش لازمه
بس اللى عاوز يعرفها يقول انا بحب النميمه جدا هههههههههه
والسلام عليكم ورحمه الله وبركاته

[tamer.koko]

طب انا بحب النميمه جدا
احكي بقي

[mody_mt2007]

والله غبور بية بيستعبط جدا و بيسترخص اوى فى الكماليات اللى منزلها انا بدفع فلوس علشان حاجة نضيفة مش اللى هو بيعملة دا شيشيل الكاسيت الأوريجينال و يحط كاسيت ب 100 جنية والله حرام بجد

[ehab_nnnn]

المشاركة الأصلية كتبت بواسطة mody_mt2007 والله غبور بية بيستعبط جدا و بيسترخص اوى فى الكماليات اللى منزلها انا بدفع فلوس علشان حاجة نضيفة مش اللى هو بيعملة دا شيشيل الكاسيت الأوريجينال و يحط كاسيت ب 100 جنية والله حرام بجد

والله يا باشا كلامك مظبوط
بس اليومين دول بيقولوا ان غبور هيشيل الرودستار وينزل ال جى مكانه وفى ناس تانيه بتقول انها شافت ال جى فى الفيرنا يعنى نزل فعلا

[samihanwar]

ده كاسيت اسغفر الله العظيم يا رب
ياعم كبر دماغك وارميه وهاتلك واحد بايونيير وسماعتين كينوود وهتلاقى كل حاجه زى الحلاوه