مابقتش طايق العربيه

[mr_astra]

المشاركة الأصلية كتبت بواسطة melkhayat83 اسف اني اتاخرت في الرد بس كانت الأدارة لسه بتشوف موقفي المهم بص ياباش مهندس سمير انا امبارح روحت جبت حساس اوكسجين اصلي وركبته وغيرت فلتر البنزين كمان وطلعت جربت العربيه علي الصحراوي وفعلا اللمبه مانورتش واستهلاك البنزين بقي افضل انا تقريبا عامل لحد دلوقتي 105 كم ولسه قبل ربع التانك بشويه يعني خدوا حوالي 10 او 11 لتر بس برده ماجبتش اكتر من 140 ولو اديتها سنه كمان بنزين بتدخل في مرحله الكيك دون الأولي الموتور بيعلي جامد وال ار بي ام بيبقي علي 5 ( بس سيبك هي كده حلو المشكله دلوقتي ان لسه العربيه تحس انها مكلبشه عارف كأنك طالع مطلع كده حتي في المنازل بتاع الكباري برده مكلبشه شويه مع انها ماكنتش كده الموضوع ده ظهر معايا من حوالي اسبوع كده والحاجة الوحيده الي كنت عاملتها في الفترة دي اني غيرت تيل الفرامل قدام ورجلشت الي ورا وظهر الموضوع ده بعدها بيومين كده بس انا بشيك علي العجل مابلاقيش عجل سخن او حاجة تفتكر دي حاجة ليها علاقه بالفتيس معلش انا عارف اني رغاي بس استحملني

اعتقد ان هى دى مشكلة الخنقة واللى مكلبشة العربية ولو سالت وقلتلك الهاند بريك فيها كام سنة بيتهيالى هتقولى 3 او اربعة بالكتير صح؟ لان بتوع الفرامل تملهم بيعملو الحركة السيئة دى عشان الزبون يمشى من عندهم متكيف
راجع رجلاش الفرامل مرة اخرى هاتتحل المشكلة بامر الله

[Hisham.Elgazzar]

متابع لأنى عندى مشكلة مشابهة فى سحب العربية و السرعات

[samirayad]

بس سيبك هي كده حلو

طيب كويس أنك راضى بالوضع ده علشان متدخلش فى متاهات تانيه

وأنا فعلا شايف الوضع الجديد معقول أوى بالنسبه للعمر الإفتراضى للمكنه والدبرياج

المشكله دلوقتي ان لسه العربيه تحس انها مكلبشه عارف كأنك طالع مطلع كده حتي في المنازل بتاع الكباري برده مكلبشه شويه مع انها ماكنتش كده الموضوع ده ظهر معايا من حوالي اسبوع كده والحاجة الوحيده الي كنت عاملتها في الفترة دي اني غيرت تيل الفرامل قدام ورجلشت الي ورا

هقولك على فكره حلوه

وأنت ممور بدون ماتدور

جرب تزق العربيه لقدام مثلا

لقيتها تقيله وبتقاومك فى الحركه عن الأول

فلتعلم أن مشكلتك حاليا

تكمن فى الرجلاش الكبير للتيل الخلفى

وهنا هتحتاج توسع خلوص الرجلاش شويه عن الوضع الحالى

[melkhayat83]

المشاركة الأصلية كتبت بواسطة samirayad طيب كويس أنك راضى بالوضع ده علشان متدخلش فى متاهات تانيه وأنا فعلا شايف الوضع الجديد معقول أوى بالنسبه للعمر الإفتراضى للمكنه والدبرياج هو السرعه القصوي في الموديل ده علي حسب المانيول بتاعها انها 160 فلو خدت في الأعتبار ان المكنه كفائتها 70 % علي حسب اختبار كبس الموتور + مقاومه الهوا الشنيعه الي علي الصحرواي فكتر الف خيرها بس انت تقصد ايه بمتاهات تانيه هقولك على فكره حلوه وأنت ممور بدون ماتدور جرب تزق العربيه لقدام مثلا لقيتها تقيله وبتقاومك فى الحركه عن الأول فلتعلم أن مشكلتك حاليا تكمن فى الرجلاش الكبير للتيل الخلفى وهنا هتحتاج توسع خلوص الرجلاش شويه عن الوضع الحالى

هو بصراحه اني عمري مازقتها قبل كده علشان اعرف الفرق دلوقتي
بس الهاندك جربته عامل 7 او 8 تكات ؟؟ بس وانا ماشي بسرعه لو مورت العربيه وجبتها علي ال N بحس ان الكلبشه خفت اوي وده الي مشككني في الفتيس

[samirayad]

بس انت تقصد ايه بمتاهات تانيه

زى حاجتك لعمرة دبرياج على سبيل المثال

وعلشان كده مش عاوزك تتكلف كتير طالما العربيه ماشيه كويس بالشكل ده

بس وانا ماشي بسرعه لو مورت العربيه وجبتها علي ال N بحس ان الكلبشه خفت اوي وده الي مشككني في الفتيس

لا أعتقد بتواجد مشكله بالفتيس طالما مفيش صوت وره ظاهره منه

ولكن

ممكن نفكر فى إتجاه آخر

زى أنك تعمل إختبار ترصيص على جهاز الإتزان المسمى بالموتوسيكل فى السوق

المحلى ( بهدف التعرف على حالة بلى العجل )

جايز يكون عندك بليه أو أكثر من بلى العجل تقيل وخشن حبتين