مابقتش طايق العربيه

[melkhayat83]

بسم الله الرحمن الرحيم
الموضوع متجزا لكذا حاجة هاحاول اوصفها بالتفصيل
العربيه لانوس 1 مو 99 اوتوماتيك 1500 عامله 163 الف
العربيه فيها عفريت وعمال اصرف عليها من ساعه ماجبتها علشان انا من النوع الموسوس شويه اول اما بسمع صوت بجري علي الصنايعيه المهم نبتدي بالمشاكل الي لسه موجوده
1- هزة او رعشه في الدركسيون والأبواب علي السلانسيه وبتقل مع السرعه مع ان الأر بي أم بيبقي طبيعي علي 850 مثلا ومابيتحركش .
2 - سحب العربيه وده اخدت فيه ريقات وديتها للميكانيكي ركبها و قالي هي عزمها حلو بس مخنؤه اوي شوف بتاع الشكمان كده وتعالي هانغير بوجيهات وفلتر هوا المهم روحت لبتاع الشكمان قاعد يشتملي في صاحب العربيه القديم ووراني الشكمان الي فيها وشكمان في عربيه تانيه كانت عنده لانوس برده
لقيت الشكمان الي راكب عندي حجمه ربع الشكمان التاني مثلا وتحس انه معمول تحت بير سلم
المهم غيرت علبتين الشكمان حسيت بعدها ان العربيه طايره من لمسه وغيرت البوجيهات والفلتر وكله تمام طيب فين المشكله
المشكله ان السحب قل تاني وديتها لواحد تاني قالي البوجيهات الي راكبه دي مش بتاعتها انت عربيتك الكتروني وعاوزة بوجيهات الكتروني برده غيرتها ساعتها وحسيت ان العربيه نطقت تاني
وساعتها قست عنده كبس الموتور بستم بستم قالي الفروقات قريبه والمحصله 70 % وقستها برده علي الكومبيوتر ساعتها علشان مشكله تانيه هاقولها كمان شويه قالي 75% .
المشكله هو موضوع السحب ده بيتزامن مع حاجة انا بحسها وانا ماشي بحس كده بتروس مخشنه ولما بشيل رجل من علي البنزين بحس ان العربيه بتكلبش شويه مش عارف هل ممكن ده يكون من الفتيس واعرف منين نيجي للمشكله الي بعد كده والي ممكن يكون ليها علاقه بالموضوع ده
3- لمبه Check بتنور بعد ال 100 وده الي بيحصل بالظبط
لحد 100 كله تمام بعد ال100 حاجه من اتنين لو سبتها تذود من غير مادوس بنزين تيجي لحد 120 واللمبه تنور والسرعه تنزل والأر بي ام ساعتها بيبقي قبل ال 3 ولو زودت سنه بسيطه الأر بي ام يبقي علي 5 مرة واخده واللمبه منورة طبعا وتبقي بتاكل بنزين زي الباشا
لو خدتها واحده واحده من الأول وسبتها تشبع غيراتها من غير مانا ازود بتجيب معايا اخرها 140 او 150 بس برده اللمبه بتبقي منورة من عند 110 او 120 يعني بعد 120 بتهيس معايا لو رجلي اتهزت الاقي عاااااااااااااااااا الموتور يعلي قوي ولو نزلت الاقي السرعه هديت
المهم روحت كشفت عليها الراجل قالي ده حساس الأوكسجين مدي عطل هي بتاكل بنزين قولتله العادي ال 100 كيلو بياخدوا ربع التانك قالي انا هامسحلك العطل بس هو هتحتاج تغيرة بعد كده
واحد تاني شافها وقالي انا شايف الحساس كويس وجابلي رسم بياني كده ليه لقيته عامل زي خط مستقيم بس متعوج شويه وقالي ساعتها هو المفروض يبقي ثابت بس بعد ماقريت في الموضوع عرفت انه مابيمفهمش لأنها المفروض تبقي علي شكل Sin wave ولقيتها بتتغير قدامه مابين lean , rich حاولت افك انا الحساس انظفه بصراحه معرفتش بس لقيته بيتهز معايه مش عارف ده طبيعي ولا ايه
وهل ده ليه علاقه بالسحب ولا لا الي فهمته من الي قريته في المنتدي هنا انه الحساس ده في السرعات العاليه الكومبيوتر مابيعتمدش عليه فا ليه اللمبه بتنور مادام مش بتعمتد عليه
انا عارف اني طولت عليكم بس فعلا قرفت من العربيه لدرجه اني مش طايق اركبها
وهابقي اتكلم عن الي لقيته في العفشه بس بعدين علشان ماطولش اكتر من كده

[amdd]

متابع بإهتمام

[samirayad]

غير حساس الأوكسجين أولا علشان موضوع إستهلاك البنزين وإنارة لمبة الأعطال

وبالنسبه لموضوع الهزه المشار إليه بأول الموضوع

- هزة او رعشه في الدركسيون والأبواب علي السلانسيه وبتقل مع السرعه مع ان الأر بي أم بيبقي طبيعي علي 850 مثلا ومابيتحركش .

ياريت تكشف على حالة قواعد المكنه والفتيس

ولو لقيتهم سلام

خللى الميكانيكى يشيك على رباط مسامير القواعد

[Neo206]

متابع للمعرفة و التعلم

[melkhayat83]

اسف اني اتاخرت في الرد بس كانت الأدارة لسه بتشوف موقفي المهم
بص ياباش مهندس سمير انا امبارح روحت جبت حساس اوكسجين اصلي وركبته وغيرت فلتر البنزين كمان وطلعت جربت العربيه علي الصحراوي وفعلا اللمبه مانورتش واستهلاك البنزين بقي افضل انا تقريبا عامل لحد دلوقتي 105 كم ولسه قبل ربع التانك بشويه يعني خدوا حوالي 10 او 11 لتر بس برده ماجبتش اكتر من 140 ولو اديتها سنه كمان بنزين بتدخل في مرحله الكيك دون الأولي الموتور بيعلي جامد وال ار بي ام بيبقي علي 5 ( بس سيبك هي كده حلو
المشكله دلوقتي ان لسه العربيه تحس انها مكلبشه عارف كأنك طالع مطلع كده حتي في المنازل بتاع الكباري برده مكلبشه شويه مع انها ماكنتش كده الموضوع ده ظهر معايا من حوالي اسبوع كده
والحاجة الوحيده الي كنت عاملتها في الفترة دي اني غيرت تيل الفرامل قدام ورجلشت الي ورا وظهر الموضوع ده بعدها بيومين كده بس انا بشيك علي العجل مابلاقيش عجل سخن او حاجة
تفتكر دي حاجة ليها علاقه بالفتيس

معلش انا عارف اني رغاي بس استحملني