موسوعة اسئلة سيارة الشعب 128(لو عندك سؤال او مشكلة ادخل حطها وهنجوبك فى اسرع وقت)

[ابو الفضل]

دى فعلا لمبه النور العالى لان عربيتى نفس التابلوه

[KAREKA87]

عربتى موديل 128 موديل 83 مش بتسحب وبحس انها مخنوقة مع العلم انى غيرتلها ( ديسك وأسطوانة ورمبيل ايطالى - موبينة تكرير- فلتر هواء - قمت بتنظيف الكرابارتير وظبطه - علبتين جكمان جدا د ) ممكن حد يقولى اعمل ايه بالله عليكم ------- وفيها صوت سرخة لما بجيب بيها الغيار الرابع السرخة ده بتروح لما بشيل رجلى من على البنزين =_ ملحوظة لما الربية تكون دايرة وهى واقفة صوت السرخة ده بيكون مش موجود =_
ممكن سؤال أخر = هل البيجوهات ممكن تقصر على سحب وسرعة العربية
اشكركم على حسن تعاونكم معانا والسلام عليكم ورحمة الله وبركاته

[ابو الفضل]

انا امبارح عملت تغير علبه دركسيون استراد وبارات جديده وكاوتش ميزان جديد وكاوتش بارات
العفشجى خد مصنعيه 160
وخد ثمن الحاجات دى 290
ايه رايكم الحاجات دى تمنها ولا لا ؟
وكمان العربيبه بتحدف يمين والدركسيون تقيل ولفة العجل بزاويه صغيره مش كامله
شكرا يا اخوانى

[sayed2077]

المشاركة الأصلية كتبت بواسطة SaiFatSak86 ياجماعة ليه سؤال .............. أيه هوه الفرق بين ال128 النصر وال128 الجراند لوكس وال128 الFiat وال 128 النوفا ........................ أيه هوه الفرق بالظبط بينهم

بص يا باشا
ال 128 اول ما نزلت فى السبعينات

كانت بتنزل تحت اسم Fiat وكانت مستورده ايطالى 100%

وكانت بتنزل بفوانيس مدورة و ماتور 1100 سى سى

وبعدين فى منتصف السبعينات
شركة النصر للسيارات اشترت حقوق تصنيع ال 128
وبدائت تصنعها برضوا بفوانيس مدورة و ماتور 1100

بعدين فى اول التمنينات
شركة النصر مازالت تصنع ال 128
بس بدل ما كانت الفوانيس مدورة خلوها مربعه
وبرضوا بنفس الماتور ال 1100

وبعدين يقال والله اعلم انه على اخر التمنينات شركة فيات العقد اللى بينها وبين شركة النصر خلص
بس شركة النصر لسه عاوزه تصنع 128 فراحت لشركات زى شركة يوجو اليوغسلافيه
واشترت منها حقوق تصنيع ال 128
بس بالماتور الجديد ال 1300 سى سى

والناس سميتها جراند لوكس
بتنزل بفوانيس مربعه بس بماتور 1300 سى سى و فتيس خمسه غيارات امامية

و بعدين على اول التسعينات ظهرت حاجه اسمها
128 نوفا
وكانت على ما اظن 1300 سى سى و خمسه غيار امامى برضوا وشكلها من قدام زى كل ال 128 بس الشنطه بتاعتها كانت غريبه شوية وكانت مقطوشه كده
فالناس سموها 128 نوفا

بس النوفا مقعدتش كتير يعنى كانت بتتباع باين لاخر التسعينات بس


بس كانت الجراند اللوكس بتتباع لغاية سنه 2008 لغاية ما المصنع بتاع النصر فلس لانه بيعمل عربيه بقالها 40 سنه ومازال برضوا راضى يصنعها فى زمن الالفيه الثالثه حيث التكيف والباور و الازاز الكهربا والانجيكشن وديه نهاية اللى ميطورش نفسه

[sayed2077]

المشاركة الأصلية كتبت بواسطة KAREKA87 عربتى موديل 128 موديل 83 مش بتسحب وبحس انها مخنوقة مع العلم انى غيرتلها ( ديسك وأسطوانة ورمبيل ايطالى - موبينة تكرير- فلتر هواء - قمت بتنظيف الكرابارتير وظبطه - علبتين جكمان جدا د ) ممكن حد يقولى اعمل ايه بالله عليكم ------- وفيها صوت سرخة لما بجيب بيها الغيار الرابع السرخة ده بتروح لما بشيل رجلى من على البنزين =_ ملحوظة لما الربية تكون دايرة وهى واقفة صوت السرخة ده بيكون مش موجود =_ ممكن سؤال أخر = هل البيجوهات ممكن تقصر على سحب وسرعة العربية اشكركم على حسن تعاونكم معانا والسلام عليكم ورحمة الله وبركاته

بالنسبه ان العربيه مش بتسحب وحضرتك عملت كل اللى بتقول عليه ده فاعتقد مفيش غير حاجه واحده وهى ان الشاسيه قافل عند حضرتك على الكبالن وبالتالى العربيه هتكون متكتفه وديه اللى يشوفها لحضرتك سمكرى
وعموما حكاية ان العربيه مبتسحبش ديه تختلف من شخص لاخر
يعنى مكن انا اكون شايف انها حلوه وبتسحب كويس وواحد تانى يكون شايفها انها مبتجريش


اما بالنسبه لحكاية ان البوجيهات ليها علاقه بالسحب فهى مالهاش علاقة اووى بس تأثيرها بيبان لو فيه بوجيه قاطه بالتالى العربيه هتبقى شغالة 3 سلندر بس و طبعا ده هيأثر على السحب جدااااااا

اما بالنسبه لصوت الصرخه
فكل الحكاية حضرتك اشترى سير دينموا جديد كورى بحوالى ب 12 جنية وان شاء الله كله هيبقى تمام التمام ومش هتسمع اصوت بتاع الصرخه تانى ان شاء الله