مين نازل يوم 30|6 ؟؟؟؟؟

[memo59]

المشاركة الأصلية كتبت بواسطة YahiaAshraf لن أنزل يوم 30 -6 لان مرسى هو الرئيس الشرعى وللاسف اللى هما بيعملوه ده تنظيمات ارهابيه مش بتستهدف مصر بس بكل كل البلاد التى يحكمها الاخوان المسلمون او الجماعات الاسلاميه زى ما بيحصل فى تونس و تركيا الان على العموم باذن الله مهما يعملوا ربنا موجود و مش هيقدروا يعملوا حاجه

تنظيمات ارهابية ايه ؟؟؟ لما اللى نازلين ارهابيين يبقى الاخوان ايه ؟؟ مين اللى قتل السادات كلهم ارهابيين زى الاخ عاصم عبد الماجد عضو مجلس شورى الجماعة هاجم مديرة امن اسيوط فى التمانينات و التسعينات و قتل الظباط و طالع على القنوات الفضائية كأنه قائد جيوش المسلمين و فرحان بنفسه و غيره كتير بلاش كلمة ارهاب كل واحد بيدور على العيب اللى فى نفسه و بيطلعه فى غيره

و الحاجة التانية ليه ساعة الخروج على مبارك حلال و الخروج على مرسى حرام ؟

[memo59]

المشاركة الأصلية كتبت بواسطة الكردي2000 مش نازل طبعا لعدة اسباب : 1 - مرسي هو الرئيس الشرعي لمصر( رغم تحفظي علي أداءة ) ولانه جاء عبر الصناديق بإراده شعبيه حره 2 - هناك قاعده فقهيه تقول ( درء المفاسد مقدم علي جلب المنافع ) حيث ان عزل الرئيس بهذا الاسلوب هو اسلوب لي زراع لا يجوز ويؤدي الي مزيد من الدم ويدل ايضا علي أن المصريين لا يحترمون الديموقراطيه في مصر 3- لا يوجد علي الساحه من هو خير منه او أفضل منه علي الاقل في هذه المرحله , فأذا سقط مرسي سنعود للمربع صفر ( لا رئيس - لا مجلس شعب - لا مجلس شوري - لا دستور ....لالالالا ) وسندخل في حرب اهليه لا محاله للصراع علي الكرسي 4 - هل الاحتياطي النقدي سيسمح بأنقلاب أو ثوره اخري .... ام ستعلن مصر افلاسها ونصبح مثل سوريا أو العراق تقطعها الصراعات 5- من يضمن انه اذا جاء رئيس اخر لا يظهر لنا فريق اخر يطالب بإسقاطه بعد شهرين أو ثلاثه 6 - هل من أيد الرئيس مرسي سيسمح بأسقاطه من قبل المعارضين الذين طالبوا باسقاطه يمكن حتي قبل ما يوصل لقصر الرئاسه 7 - مقتنع تماما بأن الصراع الحالي ليس له اي صله بمصلحة الوطن بقدر ما هو صراع للوصول للكرسي حتي لو كان علي جسد المصريين من القتلي والجرحي 8 - كيف اثق في المعارضه بعد أن خانوا الثوره وتعاونوا مع الفلول والبلطجيه المأجورين لإحداث فتن وصراعات في الشارع لخلق تصور للمصريين أن هكذا سيكون حكم الاخوان وانهم غير جديرين بالحكم 9 - السؤال المهم والخطير للساده الداعين لتظاهرات 30 - 6 .... ماذا بعد اسقاط الرئيس ؟؟؟ هل ستستقر الامور ويعود الامن والامان وتحل مشكلة المرور والخبز وسد النهضه والحد الادني للاجور وتصبح مصر ذات ترتيب عالمي في الاقتصاد ..... لو ضمن لي حد هذا سأكون أول من ينزل ويطالب بأسقاط الرئيس

مفيش بنزين و مية و لا كهربا و لا العيش موجود نستنى لما نموت ولا ايه ؟ قوللى الحل عمل ايه ؟ البداية بتاعته كذب و قالك 100 يوم و طلع كداااااااااب من مشاكل المحكمة الدستورية لمجلس الشعب و العك كله لحد سد النهضة سنة مليانة مصايب استنى ايه ؟؟؟ سد النهضة لما يتبنى الكهرباء اللى جاية من السد العالى هتقل و بعد 5 سنين فى 4 محافظات هتظلم ( وده مش كلامى على فكرة ده كلام اساتذة هندسة جامعة القاهرة ) حصة الفرد من الماء هتقل من 2000 متر مكعب الى 640 متر مكعب فلو سمحتم كفاية كلمة رئيس شرعى اللى جاى بالزيت و السكر و مستغل الفلاحين و الناس الغلابة الجهلة و استغلوا جهلهم و البطاقة الدوارة و صناديق الانتخابات اللى كانت بتيجى متشمعة والاصوات بيها كفاية حرام

[memo59]

المشاركة الأصلية كتبت بواسطة reda310 عموما من غير مسببات ولا اعذار اللى عاجبه الوضع على كدا مينزلش واللى مش عاجبه ينزل يقول وكل واحد ادرى بمصلحته بس فى مثل بيقول اللى ميشفش من الغربال يبقى اعمى تحياتى لصاحب الموضوع ......والاخوة الاعضاء

شكرا على ذوق حضرتك و على رأى الاعضاء و الاختلاف فى الرأى لا يفسد للود قضية

[tham1010]

الناس اللى بتقول ان مرسى الرئيس الشرعى للبلاد. هل معنى شرعى انه لا يتم الاطاحة بيه؟ إذا كان الامر هكذا فلماذا اطحتم بمبارك ( انا ضدد مبارك)؟ ألم يكن هو الرئيس المنتحب؟ هتقول الانتخابات بتاع مبارك مزورة. هقول لك لو الشعب كله كان نزل ايام مبارك الانتخابات ووقف نفس الوقفة امام لجان الانتخاب زى ايام انتخابات الرئاسة بعد الثورة مش كان هيبقى فى تزوير ولكن الناس مش كانت بتنزل. انا كنت بروح كل مرة وكانت اللجان خاوية ومجرد شوية ناس من الحزب الوطنى اللى كانت بتنتخب.

واحد هيقولى هنعرف نشيل مرسى بانتخابات حرة نزية بعد اربع سنوات. اقول له ومين يضمن ان اللى كان بيحصل فى عهد مبارك مش يحصل فى عهد مرسى. على الاقل ايام مبارك كان الناس بتحارب لبقاءه علشان المصلحة. اما الان فالناس بتحارب لبقاء مرسى لاسباب اخرى بعيدة عن السياسة. الاخوان خرجوا من القمقم ومش نوين يرجعوا تانى للصفوف الخلفية. والايام ستثبت هذا، الرئيس القادم لمصر اخوانى والذى بعده اخوانى والسياسة ستبقى واحدة وستبقى نغمه انه الرئيس المتدين يصبر بيها الناس نفسها على اختيار مرسى..

انا متأكد ان كل اللى قال انه مش نازل علشان استقرار مصر من جواه عارف ان الرئيس مرسى هو اسؤ شئ حدث لمصر. الرجل عندما لا يستطيع العيش مع امرأه بيطلقها ويبحث عن غيرها، بينما الناس تريد لمرسى ان يستمر كابس على نفس مصر ومطلع روحها بقراراته المهتزه المرتعشة وشخصيته الغير حازمة.

اعطيكم مثل اخر لما واحد بيودى ابنه درس خصوصى وبعد حصتين ثلاثة تجد ان ابنك مش مستجيب مع هذا المدرس والمدرس مش على قدر مناسب من الكفاءه بتسحب الولد من عندة وتروح لمدرس تانى، لماذا لم نقل نصبر على المدرس ونعطية فرصة لاننا تعاقدنا معه فى بداية العام وهو المنتخب بين كل المدرسين. لا تصبر لان هذا مستقبل ابنك،

[emadwady]

هو كل واحد يتكلم يقلك شرعى يعنى اية شرعى
يعنى يخرب البلد ويملاها خراب وجوع وفقر وانهيار اقتصاد وانهيار سياحة وانهيار اخلاقى وخيانة ويبقى شرعى ... طب ازاى