#1
|
||||
|
||||
سبحان الله الذى يغير ولايتغير
الحمد لله اشتريت النهارده النترا 2011
اول لما وصلت البيت ... ريحت شويه على الكنبه وقعدت افتكر مشوار شار العربيه ده, وافتكرت اغنيه قديمه كده مش فاكر تقريبا بتاعه الست ام كلثوم "كان خاطر ثم غدا احتمال " الغريب مش انى اشتريت عربيه ولكن انى جيبت النترا !!! ليه!!! اقولك ليه: الموضوع بدا فى شهر 6 اللى فات لما عمى اشتره عربيه سيراتو وانا كان عندى عربيه 128 شاريها من وانا فى الجامعه " اربع سنين" .. فا قعدت افكر يا نفسى اركب عربيه جديده بقى.. واللى خلانى اشترى مجموعه عوامل احكيىها بسرعه كده: 1-عامل نفسى : وده بسبب موقفين حصلو معايا الموقف الاول: كنت واقف فى اشاره مرور وجنبى " واحد محترم" راكب شيروكى ليبرتى فعادى رد فعل طبيعى بصيت على العربيه .لاقيت الشخص المحترم منزل الزجاج وقالى ايه بتبص على ايه بطلو حسد ونفسنه بقى ! الموقف الثانى: كنت خارج من الجراج بالعربيه ولاقيت "توك توك" جاى بسرعه عكس وراح ضرب فرامل مره واحد ووكان هيلبس فيافلما عاتبته رد عليا وقالى :ياعم يعنى راكب الشبح ده التوك توك بتاعى اغلى من عربيتك وطبعا انا بعد ما سمعت الكلمه دى اتسمرت وسكت ههه.. 2-عامل اقتصادى: وده ببساطه ان الحمد لله فى امكانيه انى اشترى عربيه 3-عامل شخصى: انى كان نفسى اركب عربيه حديثه كده وبرستيج واصحابى كانوا ساعات على سبيل الهزار يعنى كانو بيلسنوا على العربيه بتاعتى وده كان بيغظنى اوى!! *المهم بعد بحث ودراسات واراء ومقارنات وخبرات كتير من بره وجوه ومن اصحابى الجامدين فى المنتدى بتاعنا قررت اشترى "كيا سول"!! اوعى تستغرب استنى على رزقك بس. -بعد لما كنت مقرر ومسيطر وخلاص طلعى عده حوارت: 1-والدى قالى استنى 2011 ينزل 2-والدى قالى استنى نخلص الشغل بتاعنا " عندنا شركه سياحه وكنا شغالين فى موسم الحج والعمره" 3- والدى كان عايش اكتر من 20 سنه فى السعوديه فكان عايز عربيه 4*4 كبيره ههههه مفكر الاسعار زى هناك معلش غلبان ميعرفش.. المهم تانى بعد دراسات وابحاث لقيت انسب حاجه فى حدود الميزانيه "ديهاتسو تريوس".. اصبررر!! المهم اتوكلنا على الله ورحنا البنك التجارى الدولى علشان ناخد قرض السياره بضمان ودائع بنكيه وفعلا عملنا القرض وكله فى السليم.. روحت البيت اليوم ده ولاقيت ابويا عامل مجلس حرب اه سورى مجلس اسرى وقعد يقولى القسط حرام واحنا نجيب كاش قوتله امين اروح اكنسل القرض بكره رحت كنسلت وكله تمام وقوتله هاااهنفذ امتى قالى بعد الحج قوتله مااااااشى ياعم... فى اخر ايام العيد لاقين نفس مجلس الحرب منعقد بس بقياده والدتى "المستشار السياسى والعسكرى والتنفيذى" صدر قرار بالاجماع ان الميزانيه هتخرم علشان توضيب شقتى الجديده فاحنا عايزين نجيب عربيه اقل من 100الف... قولت ماشى رحعت تانى للدراسات والابحاث فى المنتديات وكان القرار ينحصر بين "نيو اكسنت-اوبترا-صنى" وطبعا كان القرار " هيوانداى نيو اكسنت" قولت بارك الله فيما رزق ومش وحشه والحمد لله واهى عربيه امشى بيها سنه واجيب غيرها واخويا ياخدها وقشطه.. المهم نزلت عند المعرض انا وابويا وعمى لمعرض "سمير ريان-المحترم جدا" وطبعا كان عمى لسه جايب السيراتو من عندهم من اربع شهور فراح لمسئول المبيعات اللى هو يعرفه والراجل طلع فوق المحترم وعرض علينا الاسعار والانواع والحاجات دى ....فجاء لاقيت ابويا وقف قدام الالنترا واتثبت !! ايه يا عم الحج ,قالى انا عايز دى سئلت بكام الراجل قالى 104 الف ابويا قالى لا انا هدفع 100 بس قوتله وانا مش هزعلك يا حج هحط الاربعه من معايا والترخيص كمان يا سيدى... وفجاه لاقيت نفسى من كايا سول الى هيونداى النترا ... كل اللى اقدر اقوله ان الموضوع الشرا نصيب والحمد لله على كل شئ وربنا رزقنى بعربيه كويسه جدا جدا وسبحان الله الذى يغير ولايتغير ودمتم فى خير |
#2
|
|||
|
|||
رد: سبحان الله الذى يغير ولايتغير
ربنا يباركلك فيها ويكفيك شرها
وشكرا على العرض والأسلوب ، أكثر من رائع |
#3
|
||||
|
||||
رد: سبحان الله الذى يغير ولايتغير
السلام عليكم و رحمة الله و بركاته ألف مليون مبروك عالعربية و ربنا يكرمك و يعطيك خيرها و يكفيك شرها و عقبال ماتجيب السنة الجاية , الMAYBACH 62 ان شاء الله تعالى . بس أنا لما قرأت موضوع العامل النفسى الأولانى اللى حضرتك قولته , بصراحة قعدت أضحك كتير أوى على صاحب العربية الليبرتى ,و تخيلت الموقف ده, لأنك ممكن جدا و انت راكب الالنترا تيجى تقف فى اشارة مرور و تلاقى واحد جه جمبك بعربية MERCEDES S350 و كرد فعل طبيعى أنك هتبص عالعربية و هو ممكن يكون محترم زى بتاع الجيب و تلاقيه يقولك نفس الكلمتين اللى مالهومش لازمة , عشان كده أنا بدعيلك ربنا أنك فى أقرب فرصة ان شاء الله تجيب الMaybach 62 و لا الZippline , ساعتها أى واحد راكب عربية BMW 750Li هيحط لسانه جوه بقه و مايكلمكش نص كلمة . أصل الواحد لو مشى ورا كلام الناس , مش هيخلص , يعنى لو أنت بفضل الله , عندك المقدرة انك تشترى عربية جديدة لمجرد أنك اتضايقت من كلمة قالهالك واحد محدث نعمة راكب ليبرتى أو أى عربية فاخرة من أى ماركة , فيه ناس كتيييييييييييييييييير راكبين 128 و فعلا ماشيين بيها بالعافية و ماعندهمش المقدرة خالص أنهم حتى يجيبولها قطعة غيار لو باظ فيها حاجة , فأظن ده بأه هينتحر لو قابل الراجل بتاع الليبرتى . و بعدين الحرية الشخصية -لو احنا فى بلد محترم و شعب متحضر و متطور و مثقف- تحتم على أى شخص أنه يحترم خصوصية الآخرين الى أبعد الحدود و أكيد أنت لمست الموضوع ده لأنك اكيد بحكم عملك سافرت بره لبلاد أجنبية مش عربية و لا حتى عربية , هما بقوا أحسن مننا و متحضرين عننا بكتييييييييييييير و الناس هناك نفسياتها سوية جدا مش للأسف زى عندنا , الشعب حصلة فى خلال ال20 سنة اللى فاتوا تغيرات جينية كتيرة جدا من حيث الأخلاق , الموقف ده لو كان حصلك فى بلد محترم , غير مصر طبعا , كان ممكن تقاضى الراجل الناقص بتاع الليبرتى ده بسبب الكلام اللى قاله, بس نقول ايه بأه . MERCEDES E230
__________________
MERCEDES E-class بسم الله الرحمن الرحيم عَسَى رَبُّكُمْ أَن يَرْحَمَكُمْ وَإِنْ عُدتُّمْ عُدْنَا وَجَعَلْنَا جَهَنَّمَ لِلْكَافِرِينَ حَصِيرًا صدق الله العظيم
|
#4
|
||||
|
||||
رد: سبحان الله الذى يغير ولايتغير
بصراحه بعد كلامك مفيش كلام كل كلمه انت قولتها صح بس الفكره انى كنت مقرر اشترى وسبحان الله شويه حاجات كده هى اللى خلتنى اسرع الموضوع.. لكن لو انا واقف فى اشاره تانى وجيه جنبى مياباخ او حتى متوسكل صينى مليش دعوه هبص قدامى وخلاص وشكرا تانى على ذوقك يا جميل وكل سنه وانت طيب ياباشا |
#5
|
||||
|
||||
رد: سبحان الله الذى يغير ولايتغير
|
|
|