مش لاقى اجابة محددة اشترى عربية ايه؟

[borio1704]

المشاركة الأصلية كتبت بواسطة ahmed20003000 شكرا ليك فى وجهه نظر ان المستعمل بيستهلك الفلوس فى الصيانة وبتبقى كلها مشاكل وكمان لما تيجى تبيعها تانى بتخسر مش اقل من 15 الف وان حتى الى بيعرف يسوق العربية بتتخبط منه برده لانك عارف السواقه فى مصر من ميكروباصات وخلافه فالجديد افضل من كل الوجوه وفى النهاية كلها وجهات نظر

اسمحلي أختلف مع حضرتك

إذا كنت حضرتك لسه جديد في السواقة.. فالأفضل أنك تتعلم على عربية مستعملة...

ليه؟؟؟؟؟

الأسباب كتير .. واسأل مجرب:

أولا: وارد جدا إنك ما تكونش متعود على أبعاد العربية... وده هيعرضك للاحتكاكات في الرصفان والعربيات المحيطة في الشوارع الضيقة + احتمال لصدمات بسيطة ممكن تكسرلك فانوس إشارة أو تحك رفرف... ده غير تأثير "العين" اللي عادة العربيات الجديدة بتاخدها في مصر.

ثانيا: قلة خبرتك بكيفية القيادة هتظهر في بعض الاستخدام الخاطئ (بدون قصد طبعا) للموتور والفرامل والدبرياج والأنظمة الأخرى في السيارة

ثالثا: العربية المستعملة ممكن يكون فيها مشاكل نتيجة الاستعمال... بس ده حيديك خبرة عالية إنك ما تعملش نفس الأخطاء اللي وقعت فيها قبل كده في العربية الجديدة إن شاء الله

رابعا: العربية المستعملة لو موديلها جديد نسبيا (2008 وانت طالع) مشاكلها قليلة جدا، والخسارة في تمنها تكاد لا تذكر لو قارتنها بعربية على الزيرو (الزيرو تمنه بينقص 10 آلاف جنيه على الأقل بمجرد ما تترخص)


عشان كده أنصحك إن تشتري عربية موديل سنتين تلاتة فاتوا أحسن ما تشتري زيرو طالما لسة بتتعلم، ويفضل تكون عربية منتشرة وبتتباع بسهولة وما تقعدهاش عندك أكتر من سنتين.



...

[adamlion]

هات نيسان صنى الشكل القديم ويكون فيها abs
وتكون اتوماتيك وتوكيلها محترم.
وعاليه عن الارض.تكييف ممتاز
ثابت على السرعات العالية واقوى صاج فى السيارات الحديثة.
تحياتى ادم

[Ayman_Aly]

المشاركة الأصلية كتبت بواسطة ahmed20003000 شكرا ليك فى وجهه نظر ان المستعمل بيستهلك الفلوس فى الصيانة وبتبقى كلها مشاكل وكمان لما تيجى تبيعها تانى بتخسر مش اقل من 15 الف وان حتى الى بيعرف يسوق العربية بتتخبط منه برده لانك عارف السواقه فى مصر من ميكروباصات وخلافه فالجديد افضل من كل الوجوه وفى النهاية كلها وجهات نظر

أتفق مع كلام الأخ borio1704

العربية الزيرو هى اللى هتخسر جامد أول ما ترخص، لكن المستعمل مش هيخسر أصلاً لو كنت شاريها بسعر حلو وقعدت معاك سنة مثلاً محافظ عليها ممكن تبيعها زى ما اشتريتها أو أقل حاجة بسيطة

لكن مخاطرة البداية فى عربية زيرو كبيرة.. الأفضل تتعلم فى مستعمل وكده انت الكسبان

[abdelrohman]

انا عمي جاب فيرنا زيرو ومكنش بيعرف يسوق وبعيد عنك دمر العربية وكل اللي يشوفها يقولي العربية دي ايجار؟؟

نصيحة هات عربية مستعملة اتعلم عليها بس تكون مانوال وبعد كدة هات زيرو براحتك حتى لو اتوماتيك بس اهم حاجة تتعلم على مانوال

وياريت تبعد عن التريوس لانها والعياذ بالله بتقلب بسرعة وخفيفة جدا وانا لو منك هجيب عربية جميلة جداااااا بس قطع غيارها نااااااااار لكنها بأمانة احسن عربية بحبها واللي هي
.
.
.
.
هــــوندا

[ahmed20003000]

شكرا ليكم جميعا على الردود

بس كالعادة اتلخبطت اكتر من الاول بسبب اختلاف الاراء

من الواضح ان كل واحد مقتنع بعربية من وجهه نظره هو - مفيش تقييم عملى للعربيات

بحيث يبقى كل عربية ليها مميزات ايه وعيوب وايه

شكرا ليكم جميعا على الردود مرة تانية ومفيش افضل من الاستخارة ان شاء الله