هيونداى ﻻفيتا 2001 - مشكلة وﻻعة السجائر

[sasso_soha]

السلام عليكم و رحمة الله و بركاته
وﻻعة السجائر ﻻ تعمل لدى و قد قمت بالتأكد من اسلاكها و لكنى وجدت بها صدأ فهل من الممكن ان يكون هذا هو سبب عطلها؟ ام علىّ ان اكشف عن الفيوز الخاص بها c/light 15A ؟ و اين اجده بمصر؟ وكم تكلفته؟

و عذراً للاطاله ..

[tham1010]

هو حضرتك جايب العربية دى من مدة؟ أنا هجيب واحدة معاقين الأسبوع دة وقلقان شوية من العربية لانى جديد فى حكاية السواقة وفحص العربيات..

[sasso_soha]

فعلا العربية جت شهر 7 الى فات و مجهزة و 36 الف . جت من بور سعيد . اهم حاجة ﻻزم تاخد بالك منها البارومة ﻷن معظم ان لم يكن كل عربيات ماتركس ﻻفيتا هناك عندها مشاكل فى البارومة (طبعا نسبية) - يعنى مثلا كنا هندبس فى عربية البارومه واكلة الجزء الخلفى بتاعها كله و كانوا مغطيينها بمعجون لون العربية و بفرش شنطة العربية بس ربنا سترها.

و حتى العربية الى استقرينا عليها اكتشفنا فيها بارومة فى الكبوت و تحت الموتور (عرفناه بعد عمل الفحص الفنى) و فى اماكن متفرقة بس بنسب بسيطة . الحمد لله على كل حال

على العموم خد بالك من الموضوع ده كويس جداً و فى حاجات تانية بس عشان مطولش عليك

نرجع لموضوعنا مفيش حد لسه عارف الموضوع بتاع الوﻻعه. انا عرفت ان الفيوزات الوان . يعنى مثلا فيوز 15A يبقى لونه ازرق !! فهل ده صحيح؟ و شكراً

[tham1010]

أستاذ ساسو.. أنا شكر للنصح وأرجو من حضرتك مساعدتى بخبرتك لانى هجيب وحدة يمكن الشهر دة بعد ظهور نتيجة الكشف الطبى.. ممكن تجاوبنى على الاسئلة اللى محيرانى دى

1- حضرتك كشفت على العربية أزى ( أخدت ميكانيكى ولا كهربائى ولا رحت بيها ورشة فحص)

2- هل قطع الغيار نفسها اللى بيستخدمها الماتركس المصرى ولا فى إختلاف.

3- حضرتك أشتريت العربية بكام؟ وما هو متوسط الأسعار للمتركس الموجودة فى بورسعيد لانى هشتريها من جمرك تانى....؟

أكون شاكر جدا لو تفضلت بالإجابة على الأسئلة السابقة....

شكرا...

[sasso_soha]

المشاركة الأصلية كتبت بواسطة tham1010 أنا محتاج مساعدتك لانى هشترى عربية ماتركس الشهر دة بعد ظهور نتيجة الكشف الطبى ولو سمحت راجع موضوعك الموجود فى موقع مصر موترز

السلام عليكم و رحمة الله و بركاته
بصراحه لما اشترينا العربية مكنش عندنا اى خلفية خلاف المشاكل الى كنا بنواجهها فى العربية القديمة و اكبرها البارومه (عشان كده اى عربية كنا بنتفرج عليها كنا بنتأكد لو فى اماكن فيها بارومه وﻻ ﻷ)
شوف حضرتك دى اهم الملاحظات الى انا اخدت بالى منها:

1- ﻻزم لما تنجح فى الكشف الطبى ان شاء الله يبقى اسمك عندهم فى الكشوفات ﻷن بصراحة لو اسمك مش موجود , يبقى انت جى تتفرج و بس و مابيهتموش.

2- لو هتاخد حد معاك يبقى ﻻزم يكون سمكرى شاطر جدا و اهم من ده تكون ضمنه بحياتك ﻷن هناك اول ما هتتدخل هتلاقى مليون واحد بيقولك تعال افرجك على المعرض بتاعنا و من معرض الى معرض وطبعا ده هيسمسر عليك مليون فى الميه غير الى هيخده منك .

3- اول حاجه تشوف العربية عاملة كام كيلو و عايزين فيها كام و اعرف انك ممكن تنزل عن السعر ده اد ايه (يعنى شوف هيناسبك ولا ﻷ)

4- طبعا لون العربية ممكن يفرق معاك من 1000 الى 2000 جنيه (الالوان دايما اغلى من العربية الى لونها ابيض ﻷن الاقبال على الابيض اقل ..)

5- اتأكد من البارومه حسس على العربية من تحت - شيل كاوتش الابواب - شيل الفرش بتاع الشنطة ... لحد ما تتأكد

6- بعد كده شغل العربية اسمع صوتها و تأكد من الكهرباء و شوف لو عايز تستفسر على اى حاجه تانية

7- ان شاء الله لو ناويت تشترى ماتدفعش المبلغ بالكامل (طبعا مع الاوراق المطلوبه) عشان فى خطوه مهمة جدا و معظم الناس بتتخم فيها و هى اكسسوارات العربية.

8- انت بعد ما تنوى الشراء ﻻزم تتأكد من بادى العربية يعنى مخبوطة كام خبطة وايه منهم ممكن يتعالج - لو فى فانوس مكسور او مساحة مش شغاله - حتى الفرشه الى جايه مع العربية اتاكد انك هتخدها (مش حقك برده ) و كمان متنساش الاستبن و الكوريك و طبعا الافضل انه يجربهولك

9- بعد ما تتأكد من كل حاجه بقت تمام و متنساش البادج بتاع العربية المجهزه طبعا هترش رشه على العمّال (بمزاجك او من غير - شر لابد منه)
10- هتدفع باقى المبلغ و اكيد يبقى معاك حد هيسوقهالك لحد مصر و متنساش اللوح المؤقته عشان تعرف تعدى (طبعا دى شغاله لحد 24 ساعه)

11- فى حاجه مهمه ﻻزم تكشف عليها و هى الزيت بكل انواعه و البطاريه (شوف لو عايز تغيرها وﻻ ﻷ علشان معظم العربيات هناك بتبقى مركونه لفترات طويلة من غير تشغيل و طبعا البطارية بتبقى نايمة)

12- ممكن بعد ما تخرج من المعرض تبقى تروح للبنزينه عشان تزود زيت لحد ما توصل مصر و بعدين ابقى غيره للزيت الى انت بتستعمله

العربية زى ما قلت عاملة 36 الف جنيه و من بق الراجل 38 و بلعافية قللناها بس طبعا خدت كمان الف زياده لزوم زيت و عرق العمال و تخليص ورق حتى خروجك من المعرض بفلوس (طبعا حلاوة العربية الجديدة)

طبعا احنا اتأكدنا من معظم الحاجات دى بس تاه علينا موضوع الوﻻعه و الشاحن (فى العربية فى وﻻعه واحده و 2 شاحن) فجينا مصر نستخدمها مشتغلتش (اتأكد منها برده)

اتمنى انك تكون فهمت الخطوات ديه كويس ولو فى حاجة تانيه افتكرتها هقولك ان شاء الله.