وانا كمان بستغرب من إن مفيش حد بيكره العربية دي قد الفيرناويه هههههههه
ياباشا ولا إنكار ولا فيراري, والعربية مش كاملة الأوصاف زيها زي أي عربية, ليها عيوب وليها ميزات, وعيوبها معروفة للجميع ومحدش أنكرها, بل بالعكس أنا لما جيت أشتري عجبني فيها إن عيوبها واضحة, يعني مثلا لو لقيت سخونة من عند الدواسات مش هتخض وأتفاجئ.
كمان مضنش (من وجهة نظري) إن الإحساس بالنقلات وصوت الموتور .. إلخ هي حاجات نحكم بيها على عربية إن كانت كوبيسه أو وحشة, زي محضرتك بتقول النتشة دي محستهاش فالصيني, بالله عليك معنى كده إن الصيني أحسن من رينو أو هيونداي؟! أنا إتفرجت على ريفيوهات للوجان على النت على مواقع أوروبية ولا حد جاب سيرت صوت الموتور ولا إن الباور تقيل, دي ناس بتقيم وعارفة إيه إللى يحكم على عربية بالفشل أو النجاح دي ليها عوامل كثير بس أكيد لا صوت الموتور ولا تقل الباور منهم, لأنهم فعلا أشياء نسبية, يعنى ممكن تقول صوت موتور الإلانترا أهدئ من اللوجان بس مش معنى كده إن اللوجان دبابة ماشية. ممكن تقول إن باور الفيرنا أنعم من اللوجان بس مش معنى كده إن اللوجان تقيله ومكلبشة فالأرض.
الإختلاف في الراي شئ طبيعي, أنا بس كنت بحاول أتناقش مع أستاذ محمد عشان أحاول أفهم منه إيه موضوع النتشة دي لأني مش حاسه عندي وغيري كمان, ممكن يكون هو موسوس زياده وممكن يكون فعلا عنده عيب مش موجود عندي وعند ناس تانيه ودي فايدة المناقشة. لاكن أنا لاقولت العربية خاليه من العيوب ولا قلت إنها فيراري. بس لما بقيس العيوب جنب الميزات ببوس إيدي وش وظهر وأقول الحمد لله على ما رزقنا والحمد لله لحد دلوقت مبسوط من العربية وراضي عن أدائها, ولكن هل ده يمنع إنى كنت أتمنى أركب حاجة أحسن؟ أكيد كنت اتمنى بس أدفع فى حاجة تستحق وده ملاقتهوش لحد 110 ألف, لاكن فضل ونعمة من ربنا, وربنا يكرمنا ونركب إللى أحلى من اللوجان والفيرنا, قولو آمين.
فالآخر بس أحب أقول ياريت نحاول نساعد الراجل ونحاول نفهم مشكلته يمكن حد يقدر يفيده بنصيحة تحل المشكلة, بدل منسخن فيه وخلاص ونخليه يغلى أكثر ويكره العربية أكثر.