|
#416
17-08-2010, 06:47 PM
|
||||
|
||||
رد: أدب الرحلات
ونكمل مع صافى
وبقينا ناخد عينات الارض ونحفر ونعبى فى شنط كبيرة ونكتب عليها وهكذا والمغرب قرب يأذن والدنيا قربت تضلم والجو شتاء والجو ينذر بسيول والساعة بقت 5 الا ربع والمغرب على 5 يالا يااستاذ خالد ايه ياصافى انت خايف بتردد / لا مش خايف بس انت عارف الليل هنعمل فيه ايه ولا حاجة طيب يبقى هنقعد ليه ماشى يالا بينا وركبنا النيسان المعذبة بتاعتى ورجعنا من نفس الطريق واثناء الطريق يااستاذ خالد نعم احنا هنمشى من طريق اكتوبر ليه اقرب واحسن اقرب ازاى انت مشيته قبل كده اااااااااووووه هه الصحرا بتاعتنا يااستاذ خالد تاااااااااانى انت والطريق طوله اد ايه حوالى من 100 الى 150 كيلو بصراحة اغرانى 150 كيلو وتبقى فى اكتوبر ارحم من الدوشة دى كلها الواحد كان بيمشىحوالى 500 كيلو على ميوصل ومنهم 250 كيلو اسفلت وجينا قبل بوابة البترول بحوالى 3 كيلو ولسه هدخل شمال فى الصحرا قال لا شمال هتروح على مدينة الحمام ادخل يمين على اكتوبر ودخلنا يمين فى الصحرا (مسكينة والله العربية دى) وخرجنا على الطريق وياللهول (تالت مرة يوسف وهبى ) الطريق اسوأ من السىء اللى جينا فيه وبكل فذلكة قال دول حوالى 5 كيلو فى الاول بس وبعد كده؟؟؟ اوعى تقول هاخد على كده ضحك وقال لا الطريق هيبقى زى التانى يامسهل الحال ومشينا اكتر من 30 كيلو والطريق ولا شاف اى تحسن بل والمطر ابتدا ينزل بغزارة وافرمل وافاجأ مفيش فرامل الارض المبلولة مع الحصى والزلط الصغير بتزحلق العربية والدنيا بقت ضلمة كحل (ضمه على الكاف)والعربية ماشية على ارض سيئة وجو اسوأ وصافى وصاحبه ناااامو ومشيت حوالى 150 كيلو ومفيش اى بوادر لاكتوبر صحيت صافى ياعم مشينا 150 كيلو ومفيش حاجة والله طب استنى كده فى نور هناك اهو كمل لحد هناك وانا بكل غيظ / حاااااااااااااااضر ووصلنا عند النور طلعت بوابة أمن بتاعة شركة بترول وفتح لنا الطريق بعد كام سؤا ل حسسونى اننا مهربين وهو شاكك فينا مهو صحيح طريق مفيهوش غير تريللات ايه اللى جايب عربية ملاكى فيه؟؟؟؟؟؟؟؟ المهم صافى سأ ل الراجل بتاع الأمن هو لسه بدرى على اكتوبر فقال حوال 150 كيلو وانا صعقت (بضم الصاد وكسر العين ) وقلت/ 150 كيلو لسه فى الطريق ده ؟؟؟؟؟!!!! وصافى علشان يهون عليا قال / 150 كيلو ايه ده بيخرف هو فاهم حاجة لكنه اونطجى وانا عارفه ومشينا حوالى 50 كيلو تانية بالمناسبة فى ملحوظتين جميع شبكات المحمول لاتعمل داخل الصحراء وبالتالى احنا معزولين عن الدنيا تماما والملحوظة التانية طول الطريق مستنى سكان الصحراء يهاجموننا مش العرب طبعا ولكن الذئاب او الثعالب او التعابين ولكن ولله الحمد كل ما وجدته فيران متوسطة الحجم مش ضخمة ولا صغيرة تعبر الطريق امام السيارة صافى / اقف يااستاذ خالد ليه ناكل ونستريح ونصلى ونعمل حمام ونشرب الشاى وانا بغيظ ودهشة وانفعال (اه والله مشاعر مختلطة) تاااكل؟؟؟ وتستريح؟؟؟؟؟ وتعمل حمام ؟؟؟ وتشرب شاى أيوه ايوه؟ ايه الروقان ده كله والله لو ادونى مليون جنيه مقفش فى الطريق ده ليه ليه ده ايه لو طلع علينا جماعة من قرايبك او سواق تريللا قلبه قاسى شوية هيموتونا هنا وملناش ديه او ديب او تعلب تعبااان يااخى مفيش الحاجات دى هنا ههههههههههههههه ضحكة ضحكة عاليه جدا وقال انت فاكر ايه الصحرا بتاعتنا هنكدب تانى ياعم مينفعش هنا تقول الكلمتين دول اقف بس يااستاذ خالد جعان والله وعايز اعمل حمام امرى لله حاضر وركنت وشغلت الانتظار وولعت جميع انوار العربية صافى / ايش الحفلة اللى انت عاملها دى اطفى الأنوار لو البطارية نامت مش هنروح من هنا ياعم البطارية جديدة ومتخافش عليها ثم علشان اى حد جاى يشوفنا متخافش وطفيت كل الانوار ماعدا النور الخلفى المحدد للسيارة وولعنا نار وسخننا لحمة وفته كانو معايا وعملنا الشاى وكان معانا جركن ميه كبير اتوضينا منه وصلينا طبعا منكم ممكن يسأل عرفنا القبله ازاى هما عارفين ان القبلة جهة الجنوب الغربى او الشرقى مش فاكر ولذلك من خبرتهم فى الاتجاهات عرفوها عن طريق النجوم وصدق الله العظيم حين قال (وعلامات / وبالنجم هم يهتدون ) واحنا بناكل حدث موقف يثير خوف اى حد لكن العبد الفقير واخد على كده من أيام القنبلة (فاكرينها طبعا) فوجئنا واحنا بناكل عربية جيب وقفت جنبنا ونزل منها اكتر من 20 راجل ومعاهم كلهم سلاح ألى (طبعا لو ده مسلسل تلفزيونى كانت الحلقة خلصت هنا) ونكمل صافى شاف ماركة العربيه هو وشريف صاحبه وصاحو بصوت عالى ااااي ى ى ى دى كلمة تدل على الترحيب ونزلت الناس ورفعو السلاح لفوق وقالو اااااى ى ى ى وانا قلت فى سرى / ايه ياخواننا ولا اللى واقفين فى بار ف شيكاغو ف امريكا او من منظمة حماس ورايحين يعملو عملية ضد اليهو د وفضلت اراقب الموقف اخدو بعض بالاحضان واتاريهم غفر رايحين شركة بترول وتاهو وهما بيدورو عليها وطبعا صافى عمل فيها رئيس جمهورية الصحراء ونفش ريشه وقااال /انت سبتوها من زماااان ترجعو ل ورا حوالى 20 كيلو (بعد كده مشينا 30 كيلو لقدام لقيناها ) وكملنا اكلنا بعد م الناس مشيت وشربنا الشاى وانا احتجت الحمام صافى /ميه ولا كهرباء يااستاذ خالد هتفتى تااااانى؟؟؟؟؟؟؟؟؟؟؟؟؟ فقلت ال2 خلاص اى جنب هنا واعملها يابنى دى صحرا هو (بكسر الهاء) هنديك ضهرنا قلت انا مقدرش اقلع البنطلون فى الصحرا كده ولو لوحدى م احنا عملنا ها انت لابس جلابية لما بتقعد على ركبك علشان تعملها الجلابية بتغطيك انما انا لا فضحك وقال / علشان تحرم تلبس بنطلو ن تانى بعد حوالى ساعة اجبرتنا السيول اننا نمشى ومشينا وبعد 30 كيلو لقينا شركة البترول اللى كانو بيدورو عليها اخواننا بتوع العربية الجيب ايه ده ياصافى توهت الناس وبكل برود / هيكتشفو انهم تاهو ويرجعو تانى فى الجو ده والارض دى مستسهلها انت قال / الجو ده والارض دى عادية بالنسبة لنا انت اللى مش متعود بس ومشينا حوالى 80 كيلو تانى واخيرا ظهر طريق وانوار سيارات من بعيييييييييد وكانت المسافة دى وحدها حوالى 20 كيلولا ن الصحراء مستوية والطريق مستقيم والدنيا ضلمة فلمحنا انوار السيارات من بعيد وكان الارهاق مسكنى ولكن الاضواء اللى شفتها ادتنى العزيمة واخيرا وصلنا للاسفلت واخيرا 6 اكتوبر والبنزين خلص(تنفع نهاية حلقة تانية ههههه) وسالت صافى / 6 اكتوبر يمين والا شمال يمين اوعى تتوهنا حكم انا عارفك ياراجل عيب عليك انت معاك امبراطور الصحراء ضحكت وقلت / م انا عارف وكسرت يمين علشان اركن العربية وامون بنزين لانى كنت عامل حسابى وواخد جركنين بنزين 92 (40 لتر) وقمع وزجاجة خل فاضية ومغسولة كويس طبعا وقطعنا نصها وملينا تانك البنزين وبدور ولسه همشى وجالى تليفون انا بكل فرح /الشبكة جات يارجالة اخيرا مظاهر الحضارة بدأت تبان ولقيته والدى وعرفت انى هتهزأ رديت طلعت المدام حمدت ربنا انت فين قلقتنا عليك معلش الارسال قاطع من الصبح ولسه جاى طيب انت كويس كويس والله الحمد لله طب استلقى وعدك من الحاج وراحت مدياه التليفون ونزل فيا كلام من قبل م يعرف اى حاجة لانه عارف البلاوى السودة اللى بعملها وخصوصا انى بطلت احكى لما لقيتهم بيقلقوعليا وطول وقت اى سفر حالة رعب فى البيت ووالدى يطلبنى كل شوية لحد م ارجع فبطلت اقول اى حاجة يعنى كتير من اللى قلته هنا محدش يعرفه فى البيت بعد م اخدت الطريحة ركبت العربية ومشيت صافى / والله يااستاذ خالد طول السكة وانا حاسس نفسى ادام خط الصعيد من قلبك الميت لكن لما شفتك ووالدك بيشتم فيك وانت ساكت عرفت انك ابن حلال ههههههههههههه انت عايزنى أرد على ابويا ؟؟؟؟؟؟؟؟؟؟ طبعا لا بس متخيلتش خط الصعيد ده كله مينطقش ولا كلمة لا ياعم احنا اتربينا على كده ربنا يكرمك يالا بينا يالا ومشينا 3 كيلو وكانت الصاعقة التى جائت لى باحباط يافطة كبيرة بتقول / ميدان الرماية 170 كيلو ياخراااااااااااابى لسه 170 كيلو طيب انا مش هستحمل على الطريق ده اكتر من ساعة ف يتنامو ياتنامو ماشى (هما ال2 فى نفس واحد ) لكن مجرد احساسهم 170 كيلو فى ساعة طير النوم وقد كان رفعت السرعة الى 190 وخلال 55 دقيقة لقيت يافطة اسكندرية الصحراوى 20 كيلو وتشير الى الشمال دخلت جوه اكتوبر وفعلا 10 دقايق كنت عند اول الصحراوى عند بنزينة شل دخلت فيها الحمام لان حمامها نضيف وكانت بقت الساعةحوالى 12 ونص او 1 بالليل مش فاكر واستبد بى التعب والارهاق وقلة النوم شربت شاى تقيل انا وهما وقلت / شيبتنى ياصافى وكالعادة ليه ياعم هو انا اللى عملت الطريق مش قلت انك عارفه وقلت انه 150 كيلو واحنا مشينا 280 كيلو فى 7 ساعات و190 كيلو فى 65 دقيقة حرام عليك وكملت كلامى على فكرة انا منمتش من امبارح ومن 7 الصبح على الدركسيون وبيتنا على بعد 30 كيلو تعالو باتو عندى والصبح ارجعكو ورفضو رفض قاااااااطع وقالوهناخد اى مواصلة وطبعا 1 بالليل وشتاء وامطار ومواصلات ايه دى اللى هتوديهم عند قرية الأسد قبل اسكندرية ب48 كيلو امرى لله يامعذبنى اركبو خلاص يااستاذ خالد ياعم اركبو ووصلتهم ورجعت الساعة 6 صباحا ودخلت اخدت حمام سخن كانت المدام جهزت اكل ولكن معرفتش اكل ونمت اكتر من 15 ساعة متواصلة على فكرة انا مبعرفش انام اكتر من 7 ساعات مهما كنت مرهق لكن احداث اليوم مع النوم والارهاق والاحساس الدائم بالخطر خلونى نمت كل ده التعديل الأخير تم بواسطة خالدخليفة ; 17-08-2010 الساعة 07:25 PM 
|
|
#417
17-08-2010, 08:49 PM
|
||||
|
||||
|
رد: أدب الرحلات
حمـــد
حمد ده كان بلطجى وزعيم عصابة وله رجالته والناس كلها تخاف منه خط الصحراء فعلا مش زى صافى كلام بس وكان مجرد ترديد اسمه فى مكان او قعدة كفيل باثارة المشاكل والرعب فيها ومرة كان فى مشكلة فى مدينة الحمام واغلق المدينة تماما لمدة 3 ايام ممنوع الخروج منها او الدخول فيها وكان اى حد يشترى قطعة ارض من العرب ثم يتم الاستيلاء عليها يروح لحمد ويسأله / هما كام فدان 500 اشتريتهم من مين من فلان فلان الفلانى اللى صفته كذا كذا؟؟؟ويوصف الراجل ايوه وبيته فى الحتة الفلانية ايوه خلاص ياباشا اعتبر الارض رجعت ربنا يخليك ياحاج حمد نظامنا ايه اؤمرنى هناخد 100 فدان وقرشين للرجالة خليهم 50 مينفعش كلمتنا واحدة خلاص موافق مبروك ياباشا الله يبارك فيك تانى يوم ياخد رجالته ويروح على الارض اى شخص يعرف ان رجالة حمد فى الارض الفلانية خلص الموضوع ميفكرش يقرب ناحيتها تانى وييجى واحد تانى اشتريت كام فدان ......................... ........ ......................... ......... ......................... .......... وهكذا ومن هنا اصبح لديه كميات كبيرة من الاراضى كما ان الحكاية دى اتاحت له انه يعمل علاقات مع ناس اصبحو الأن من كبار رجال الدولة بل ومشارك ناس منهم فى بعض الاراضى وكثرت معاه الفلوس وبقى يشترى اراضى ويبيعها وهكذا بل واشترى عزبة 50 فدان فى كفر الشيخ وبنى فيها بيت ضخم على النظام العربى يعنى بيت وخارجة مربوعة (شرحناها قبل كده) وراح رصف الطريق لحد بيته ووضب نفسه وعمل كام شركة كبيرة واصبح له علاقات مع كبار رجال الدولة فى عدة محافظات من بينها القاهرة وطبعا بسبب العلاقات دى اصبح بيحاسب جدا فى تصرفاته وعلاقاته القديمة( أفراد العصابة /احتفظ ببعض منهم فقط) والباقى تخلص منهم كلهم وبدا يرسم نفسه فاشترى اكتر من 4 عربيات جيب ليبرتى وواحدة بى ام دبليو وواحدة لانسر وأذكر مرة شفته بيشخط فى حد من عند عز العرب فى اسكندرية وكيل جيب اتصلو بيه واخدو منه العربية من كفر الشيخ ورجعوها تانى بعد التظبيط (وان كنت مش هاضمها الحكاية دى لان النص التانى منها اتحكى لى لكن الاول شفته) ولكن كثير من اهله من العرب يلجأون اليه بسبب علاقاته الكثيرة ويقوم بحل مشاكلهم وتدخل الانتريه الخاص بالضيوف ذوى الأهمية فقط تجد صـــورة ضخمة له مع العقيد القذافى ( مش عارف انا القذافى ده هياخد عميد امتى) حتى ابن عمه توفى فى ليبيا اتصلو بيه لكى يقوم بالا تــفاق مع احد مشايخنا القراء الكبار هنا واتصل بيه فعلا وحجز الشيخ واتفقو على الفلوس وكل حاجة اليومين دول بيجهز نفسه للترشيح لمجلس الشعب فى الانتخابات القادمة كل جنازة تلاقيه بيعزى فرح يحضر ويحيى وينقط حتى ولو محدش عزمه علاقاته كتيرة برجال الامن ولما جلسنا سويا فى الانتريه المخصص للضيوف المهمين تليفونه لايتوقف عن الرنين واتكلمنا كتير فى الشغل جمعتنا شغلانة الاراضى لكن وللحق لقيته بيعاملنى معاملة معجبتنيش رغم استقباله الكويس ليا دايما لكن لى شريك من العرب عارف عاداتهم وطبائعهم وقال ده مش بيعاملنا معاملة كويسة فانا استغربت فقال المفروض ضيف جالك ولو مفاجأة لازم تدبح له وتأكله اتارى شريكى اعتبر عدم اكلنا ده اهانة لينا وبصراحة من يومها مروحتش تانى وطلبنى مرتين بالتليفون ومردتيش واستغربت جدا هذا البلطجى زعيم العصابة بيجهز نفسه لعضوية مجلس الشعب وغالبا هينجح لان علاقاته برجال الداخلية قوية وخاصة انه بيلعبها صح وداخل مع الحزب الوطنى باقى الكلام ممكن يودينى السجن كفاية كده التعديل الأخير تم بواسطة خالدخليفة ; 17-08-2010 الساعة 09:01 PM
|
|
#418
17-08-2010, 08:52 PM
|
||||
|
||||
|
رد: أدب الرحلات
ايه المسافات المهوله دى يا استاذ خالد دة انا بسافر اسكندريه او مطروح وبحس انى ممكن اموت فيها
ربنا يكون فى عونك لازم تقابل اشخاص يعزبوك شويه فى انتظار باقى الرحلات 
__________________
 اللهم انزل نورا من نورك عليه اللهم نور له قبره ووسع مدخله وآنس وحشته اللهم ارحم غربته وارحم شيبته اللهم اجعل قبره روضة من رياض الجنة . لا حفرة من حفر النار اللهم أغفر له وارحمه واعف عنه واكرم نزله
|
|
#419
17-08-2010, 08:55 PM
|
||||
|
||||
|
رد: أدب الرحلات
ههههههههههههه يافطومة انا مرة سافرت كوم امبو (تبعد عن القاهرة 830 كيلو) بالعربية لم اتوقف الا للتموين فى سوهاج (480 كيلو بالسيارة وبالقطار 467) وكملت الى كوم امبو بزمن سفر متواصل 12 ساعة بلا توقف
|
|
#420
17-08-2010, 09:20 PM
|
||||
|
||||
|
رد: أدب الرحلات
لا صعب صعب صعب
 بس واضح ان حضرتك بتحب السفر والرحلات وربنا يديك الصحه وطولت العمر يارب و تسافر براحتك بس انا لحظت ان السفر بيدى الواحد خبرات كتير وبيتعرف على ناس كتير وبيشوف طباع ناس وبيتعلم بردو وفى انتظار باقى رحلات حضرتك
__________________
اللهم انزل نورا من نورك عليه اللهم نور له قبره ووسع مدخله وآنس وحشته اللهم ارحم غربته وارحم شيبته اللهم اجعل قبره روضة من رياض الجنة . لا حفرة من حفر النار اللهم أغفر له وارحمه واعف عنه واكرم نزله
|
 |
|
|
