ارشيف الاستراحة 2010

[sad-bird]

ونقول الكومنت على التوبيك بقى
اولا يا انسه نورا ربنا يرزقك بابن الحلال اللي ترتاحي معاه ويرتاح معاكي
ثانيا انا كنت من المتابعين لمدونة دكتور غادة وكنت معجب بالتلقائية الشديدة جدا اللي كانت بتقول بيها مواقفها وهيا نفسها نفس الاسلوب اللي قدمت بيه هند صبري الشخصية في المسلسل (في عدد محدود جدا من الحلقات اللي انا شوفتها لاني مش متابع اي حاجة بشكل مستمر)
ثالثا بقى قصة الجواز النهاردة وده بقى مواااااااال لوحده ولو قلتلك كم البحوث اللي ناقشت الموضوع ده في المركزالقومي للبحوث ومركز البحوث الجنائية والاجتماعية ده غير البحوث اللي في كليات الخدمة الاجتماعة والاداب والتربية وحتى يومنا هذا مفيش اي تطور الموضوع بيسوء من سيء إلى أسوأ وانا اتعلمت في البحث العلمي علاشن ادرس اي مشكلة لازم الاحظها واحس انها مشكلة وبعدين ادرس الاسباب وبعدين ادور على العلاج ولان الموضوع اصبح ظاهره ملاحظة ولان الاسباب تقريبا معروفه يبقى باقي العلاجات المقترحة ودي كل واحد وواحده ولهم ظروفهم الخاصة يقدروا يقبلوا بيها والا لأ

وفي البداية اذكر هذا الحديث
عَنِ أَبي هُريرة رضيَ اللَّهُ تَعَالَى عَنْهُ عَنِ النبيِّ صَلّى الله عَلَيْهِ وَسَلّم قال: " تُنْكحُ الْمَرْأَةُ لأرْبَعٍ: لمالها ولِحَسَبها ولِجَمَالها وَلدينها: فَاظْفَرْ بذاتِ الدِّينِ تَربَتْ يَدَاكَ " مُتّفَقٌ عَلَيْهِ



......... يتبع

[MEMOO_1ST]

انا بردو مش بحب اعلان بيرل بحس انو اعلان تعبان قوي لكن فعلاً الي بحبو اعلان اتصالات جامد.

[hazem_khidr]

بصراحه المسلسل كوميدي لكن مبالغ فيه شويه
و الطبيعي ان اي عريس يكون فيه عيب زي ما هي اكيد فيها عيوب برضه

[sad-bird]

ونقول الاسباب بس انا هقول من وجهة نظري المتواضعة وهقول مشكلة الزواج ككل مش ان البنات ممكن تاخد اي حد وخلاص

1. ظروف اجتماعية :
الامهات والقريبات
اغلبنا ان لم يكن كلنا امهاتهم او جداتهم من اهل الزمن الجميل الذي مضي وولي كان معدل سن الزواج عندهم ما بين 13 و 18 سنة اكثر من ذلك تكون البنت عنست وغالبا القلق بيكون مصدره الأم قبل البنت ، وطبعا كلام الجدات والامهات والخالات والعمات البيت ياختي مبيجلهاش حد والا ايه ، مش تروحي تشوفي ام فلان الخاطبة ، والا تخرجي بيها تروحي عند ام فلان والا ام علان تشوفها يمكن يحصل قبول بين البنت وبينها ده عندها ولدين طول بعرض بارتفاع كل واحد منهم قد النخلة ، ومحدش يقولي الكلام ده مبيحصلش لان الكلام ده لازال حتى يومنا هذا بيحصل سواء بالشكل المتعارف عليه او غيره

الفروق بين الجنسين ذكور / اناث
الحاجة التانية البيئة الاجتماعية اللي اعطت للولد حقوق اكبر من البنت خلت البنت عاوز تتحرر اكتر وتخرج من القوقعة اللي اتحبست فيها ولو كل بيت فيه بنت وولد يشوف المقارنات اللي بتحصل بينهم في كل حاجة مع ان ده انسان ودي انسانه والاتنين مش انبياء ولا معصومين من الخطأ ووارد جدا ان الولد يحصله مشاكل ويبوظ اكتر من البنت، ونتيجة للضغط ده مع الضغط الأول اللي قلنا عليه بتاع الامهات والقريبات البينت حاسة انها هتنفجر وعاوز الملاذ والخلاص من البيت ده باي شكل وبيزود الاحساس ده عندها لو واحده صاحبتها نده شوية تحرر او واحده اتخطبت او اتجوزت بدري وطبعا كلهم بيفشروا فشررررررررررررررررررررررر مفيش بعد كده ، اللي هو كل واحده فيهم بتخلي اصحابها عارفين ومتأكدين ان الخطوبة والجواز دول حاجة هايلة مفيش بعد كده وانها في قمة سعادتها وان خطيبها او جوزاه مش حارمها من اي حاجة ابدااااااااااا وانهم في منتهي السعادة ( مع انها لسه عاملاله محضر في القسم بعد ما اديتله روسة اخد فيها 7 غرز بس قالت ءأمن نفسي بمحضر ضده ) وهنا بقى تبدأ البنات تغير وقسما بالله انا سمعتها من اكتر من واحده ( اتخطب بس مش مهم اتجوز بس احس اني زي باقي البنات وان مرغوب فيا واني لا ينقصني شيء )

المهم تتجوز علشان تروح بيتها ومملكتها وتأمر وتتحكم في كل حاجة وكل كبيرة وصغير ةمش هتمشي من غير ما تحط بصماتها عليها ( لكن طبعا هيهاااااااااااااااااااااا ت )


اللي نعرفه احسن من اللي منعرفوش
المثل الدائم واحدي مشكلات المجتمع المصري عدم المقدرة على خوض اي تجربه الا اذا كان متأكد تماما من نجاحها علشان ميطلعش باي خسائر ولا مادية ولا معنوية والامثله على كده كتير في مواقف الحياة لكن في موقف الجوزا اللي بيحصل ان ابن خالتك اوخالك او عمك او عمتك او ابن الجيران اللي عارفينهم من 20 سنة او ابن زميل الوالد او موظف جديد عنده او او او او االمهم انه لازم يكون شخصية معروفه للاسرة ( وطبعا ده حقهم لكن برضة عدم الاقبال على توسيع الدائرة ده في حد ذاته مشكلة لان الخيارات بتزيد كل ما الدايرة توسع )
انا مش بقول اي حد يروح بيت الناس توافق عليه بالعكس فترة الخطوبة معموله علشان الطرفين والاسرتين يعرفوا بعض اكتر ويعرفوا اوضاع بعض اكتر قبل الخطوة الحاسمة ( الجوااااااااااااااز )

جواز الاصغر
الكارثة او المصيبة الكبري اللي بتكون عند البنت لو اختها الاصغر او اكبر منها بسنة او اتنين اتجوزت وخلفت ودي لسه قاعده ويا سلام بقى لو كان اخوها مش اختها هو اللي اتجوز دي بقى تبقى فيها حريقة في البيت ونار قايدة في البنت بسبب حاجة زي كده معقول البت المفعوصة دي اصغر مني بسنتين وتتجوز وتجيب عيال وتقعد في بيتها مرتاحة معززة مكرمة ولا بتقشر بصل ولا توم ولا بتخرط ملوخية ( لسه قايلين الفشر في الموضوع ده كتير )
ممكن الامور في الاسرة الواحده تكون اقل من كده بكتير خصوصا لو سنة الاخوات قريب من بعض ومتفاهمين وبيحبوا بعض ، لكن بقى لو بنت خاله او بنت عم وعلى صلة دايمة بالاسرة وعندهم بنت اتخطبت او اتجوزت وام دي تيجي لام دي وتقعد تحكي والعيال والجهاز وهنجيب الغسالة ال جي لا ياختي خليها زانوسي والا اقلك بيقولوا يونسفرسال شغااااااااااااااااااااااا ااااال كل ده والبنت المسكينة الغلبانه قاعده تسمع وتتقهر وتهري وتاكل في نفسها وهتموت من الغيظ
بقى البت المفعوصة دي اللي كانت بالمريلة اول امبارح هتتجوز وانا قاعده الله يرحم لما كنت بجيبها من شعرها واجرجرها في الارض وهيا تقلي يا ابله خلاص حرمت وهسمع كلامك


.............. يتبع

[sad-bird]

المشاركة الأصلية كتبت بواسطة hazem_khidr بصراحه المسلسل كوميدي لكن مبالغ فيه شويه و الطبيعي ان اي عريس يكون فيه عيب زي ما هي اكيد فيها عيوب برضه

منور ياعم حازم
ايه مش نويت تغير رايك


فعلا يا حازم باشا المسلسل كوميدي وده لو مكنش في اطار كوميدي مكنش ينفع يتقدم بالشكل ده ولو كنت شوفت المؤلفة وشخصيتها الكوميديه المرحة كنت عرفت انها عملاه على حسب شخصيتها
وانا عن نفسي شوفت مواقف بتحصل بين ناس قريبة جدا من اللي بيحصل في المسلسل

اما بقى عن العيوب فكلنا فينا عيوب
لكن مين فينا يقدر يقاوم عيوبه او يتقبل عيوب الاخر او يقدم تنازل علشان الاخر