ارشيف الاستراحة 2009

[omnya]

المشاركة الأصلية كتبت بواسطة AHMEDCAR هو لازم يكون فى اختلاف فى الاراء الاول بين اى شخصيين و ده عادى جدا للاختلاف الظروف و البيئه المحيطه بكل فرد حتى لوكانوا من نفس الحى مش من نفس البلد و ده مش عيب العيب ان يكون احد الاطراف مابيعرفش يتعامل او يكون فاكر نفسه انه هو الصح على طول و اكبر غلط هو ادخال احد فى النزاع من اجل حله دى بيؤدى الى تدهور الموضوع اكثر لان الكلمه اللى هايقولها هاتفضل موجوده فى دماغ اللى سمعها و محدش بينسى لحد حاجه فى الاخر الجواز ده الرزق بتاع ربنا و محدس عارف رزقه فين و لا حياته ماشيه ازاى ناس كتير بتخاف تتجوز علشان مايبهدلش ولاد الناس معاه لكن سبحان الله بمجرد ما ان الواحد يقدم على الخطوه دى بثقه و يكون الغرض من كده العفه مش الفشخره الاجتماعيه تاكدوا ان ربنا هايقف جنب الاتنين و يعديهم لبر الامان

ايييييييييييييوه اهي دي بقي برده مهمه اوي( الفشخره الاجتماعيه ) اهو ده برده اللي شغال اليومين دول و بجد يبقي افشل جوووووووووواز عن تجارب ناس اصحابي مافيش احسن من البساطه

[bmkbmk]

احييك يا امنية على الموضوع المميز اولا
و كلامك و تجاربك مع ال 22 عريس و رأيك فى الموضوع ثانيا
و ثالثا اتكلم انا شوية بقى ده بعد اذنك طبعا
انا محمد عندى 30 سنة مهندس كمبيوتر و متزوج و عندى بنتين الحمد لله
انا خلصت كلية و اشتغلت سنتين فى مصر و بعدين سافرت على الكويت و انا لسة موجود فيها لحد دلوقتى
انا بدأت افكر فى الجواز طبعا بعد ما اتخرجت و اشتغلت على طول بس ساعتها طبعا انا كنت لسة بادئ اكوم نفسى فا كان ساعتها الجواز هيبقى كله على حساب السيد الوالد او على الاقل الجزء الاكبر منه ... و انا بصراحة الموضوع ده ماكنش عاجبنى قوى لأنى عارف ان اللى بيجى بالساهل بيروح بالساهل و ده اللى كنت مقتنع بيه ساعتها و انا ماكنتش مرتبط بواحدة معينة و مليش والله فى الصياعة و الكلام ده بس طبعا ليا زميلات كتير فى الكلية و الشغل و اللى استشفيت من التعامل معاهم احسن مواصفات للانسانة اللى هكون حابب الحياة معاها طول عمرى ......

و اعتقد ان اكبر عائق للزواج فى مصر هو ان الشاب يكون جاهز ماديا حتى بنسبة معينة قبل ما يدخل نفسه فى جواز و مصاريف .. علشان يبقى داخل بقلب جامد

المهم شلت الفكرة من دماغى لحد ما اقف على رجليا شوية و الحمد لله ربنا سهل و سافرت الكويت و بعد سنتين بدأت افكر فى الجواز تانى .. و كنت كل اجازة انزلها يكون الاهل محضرينلى عدد كبير من العرايس علشان اشوفهم .. مش موقفينهم صف يعنى ولا حاجة بس سائلين على كذا حد و طبعا فيهم من زميلات و صاحبات اختى و يفوت شهر الاجازة و اشوف العرايس و ماحسش مع ولا واحدة منهم بالتقارب اللى انا بفكر فيه ولا الصفات اللى فى دماغى .. منهم اللى مدلعة زيادة و اللى عندية و دماغها ناشف و اللى معندهش دماغ اصلا مع احترامى للجميع واللى واللى واللى و فضلت على الحال ده 3 سنين .. و طبعا كل سنة اتنازل عن شوية مواصفات من اللى فى دماغى و طبعا الحاح الاهل عليا انهم عاوزين يفرحوا بيا ساعد على كدة كتير .. و انا مش هكذب عليكى و اقولك انى مكنتش خايف من المسئولية .. لا طبعا كنت خايف بس مش بنسبة كبيرة يعنى ....

و على فكرة الاختيار بالعقل فى موضوع الجواز ده بجد حاجة حلوة جدا (و مش قصدى جواز المصلحة طبعا) و يا سلام لو بالعقل و القلب يبقى هو ده التمام اما الاختيار بالقلب بس فاشل جدا جدا جدا

لحد ما رحت شفت مراتى و من اول ما اتعاملت مع حماتى و حمايا قبل ما اشوف العروسة و هى داخلة بالصينية حسيت انهم قريبين منى قوى و اعرفهم من زمان و لما شفت العروسة سبحان الله حسيت ان هى دى اللى انا بدور عليها و ربنا سهلها فى كل حاجة و اتفقنا على كل حاجة تانى يوم و لقينا الشقة تالت يوم و كتبنا الكتاب و عملنا الفرح و اتجوزنا فى تلات اسابيع قبل ما الاجازة تخلص ........

و الحمد لله عايش سعيد جدا و ربنا يا رب يسعد كل الناس

هى الحكاية نصيب اولا طبعا و لازم يكون فيه تكافؤ فكرى و مادى و معنوى بين الطرفين و تفاهم تفاهم تفاهم
و لازم طبعا اخلاص النية علشان ربنا يوفق

بس و هى دى حكايتى ,,, ربك لما يريد

و احييكى مرة تانية على اثارة الموضوع المميز

[omnya]

و بعدين يا جماعه احنا ساعات بننسي ان الجواز عباره عن تجربه انسسسسسسسسسسسسسسسانيه بحته و ان البنزين بتاعها هي المديات مافيش شك انما ان الصوره تتقلب يعني نجري الاول ندور علي فلوس و مناصب و بعدين نبقي نشوف بقي الشخص عامل ازاي او ممكن نتعمي خالص و مانشوفش و هو ده اللي هايبقي طبيعي في الحاله دي و بعدين الندم بقي بعد فوات الاوان

[hossamhamdy]

المشاركة الأصلية كتبت بواسطة omnya اولا ان شاء الله ربنا يقربلك البعيد ثانيا مرسي لزوءك انا بس حاسه ان الموضوع فعلا مش سهل فا ماحاولتش اعقده فاكتبته بشكل بسيط و ربنا يرزق كل واحد بللي يستاهله

الموضوع مش سهل خالص خالص ده انا بقالى سنه بدور ,لا والناس بقى اللى بتجيب اى حاجه بعيد عن اللى الواحد بيفكر فيه وقال عليه, على امل ان يحصل قبول..
.فاللى بيحصل انى بيبان انى مش مبسوط و فى مره روحت زياره كده كنت عايز اجرى من البيت و فضلت ساكت و مش عارف اتكلم فى ايه مع انى رغاي و بعرف اخترع اى حاجه اتكلم فيها بس كنت هموت.ptmnlo123per1106

[AHMEDCAR]

ماهو دلوقتى تعالى كده ادخلى اى بيت و قوليلهم انا مش معايا غير مرتبى هايقولولك روح جيب شقه الاول و بعد كده نشوف الموضوع ده